Кʹе Алийе Йаһоwа йә?

1, 2. а) Чьрʹа билани йә алийе Йаһоwа бьгьрьн? б) Ве готареда әме чь шеwьр кьн?

ҺӘМЬКИ, wе бь билани бә кö әм хwә ль Йаһоwа бьгьрьн. Тʹö кәс öса qәwат, билан у бь һʹьзкьрьне нинә чаwа Хwәдейе мә! Бәле, әм тʹьме дьхwазьн wирʹа амьн бьн у алийе wи бьгьрьн (Зәб. 96:4-6). Ле йазьх һьнә хьзмәткʹаред Хwәде чахе рʹасти дәрәщед öса тен кö гәрә алийе wи бьгьрьн, мьqәрʹм ве йәке накьн.

² Ве готареда әме шеwьр кьн мәсәлед wан мәрьва, кʹижана дьготьн кö алийе Йаһоwа нә, ле йәкә тьштед öса дькьрьн кö Йаһоwа нәфрʹәт дькә. Әw мәсәлә мә һин дькьн кö чаwа бь тʹәмами Йаһоwарʹа амьн бьминьн.

ЙАҺОWА ДЬЛА ДЬНЬҺЕРʹӘ

3. Чьрʹа Йаһоwа дьхwәст али Qайин бькьра, у Әwи чь жерʹа гот?

³ Бьфькьрьн дәрһәqа мәсәла Qайин. Әwи хöдане qәлп нәдьһʹәбанд, ле йәкә Йаһоwа хьзмәткьрьна wи qәбул нәкьр. Ле чьрʹа? Чьмки дьле wида хьраби кʹур рʹуньштьбу (1 Йуһʹн. 3:12). Йаһоwа Qайинрʹа гот: «Һәгәр тö рʹастийе бьки, гәло те сәре хwә бьльнд нәки? Ле wәки тö рʹастийе нәки ва йә гöнә ль бәр дери кʹәтийә у хwәха жи һʹәйра тәда йә, ле бькә кö тö һʹöкöми ль сәр бьки» (Дәстп. 4:6, 7). Демәк, Йаһоwа пешда готә Qайин, кö һәрге әw тʹобә бькә у алийе Йаһоwа бьгьрә, һьнге Әw жи wе алийе wи бә.

4. Рʹаст ә мәщала Qайин һәбу кö алийе Йаһоwа бьгьрә, ле йәкә әwи чь кьр?

⁴ Һәрге Qайин ньһерʹандьна хwә рʹаст кьра, Йаһоwа wе диса жи wи qәбул кьра. Ле әwи ширәта Йаһоwа qәбул нәкьр. Фькьр у хwәстьнед нәрʹаст wи бәрбь кьред нәрʹаст бьрьн (Аqуб 1:14, 15). Щаһьлтийеда Qайин дьбәкә нә жи дьфькьри кö wе мьqабьли Йаһоwа һәрʹә. Ле wәʹдә дәрбаз бу, әwи тьштед әʹщеб кьр. Әw мьqабьли Хwәде дәркʹәт у бьре хwә кöшт!

5. Чь дькарә бьбә мәʹни кö әм qәбулкьрьна Йаһоwа öнда кьн?

⁵ Иро жи Мәсиһи мина Qайин дьбәкә Йаһоwарʹа хьзмәт кә, ле тьштед öса бькә кö бәр чʹәʹве Хwәде рʹәш ьн (Щьһуд. 11). Әw дькарә хьзмәтийеда хирәт бә у тʹьме бе сәр щьвате жи. Ле әw öса жи тьштед нәщайиз дькарә бькә, мәсәлә дьбәкә сәр тьштед бенамуси бьфькьрә у бьдә бәр чʹәʹве хwә, у дьле хwәда тьма бә, йан хушк-бьра нәфрʹәт кә (1 Йуһʹн. 2:15-17; 3:15). Әw тьшт дькарьн Мәсиһи бәрбь кьред хьраб бьвьн, демәк бәрбь гöнә. Бәр мәрьва әм дькарьн фькьр у кьред хwә вәшерьн, ле жь Йаһоwа әм тʹö тьшти нькарьн вәшерьн. Чахе әм бь тʹәмамийа дьле хwә алийе wи ниньн, әw занә, чьмки әw һәр тьшти дьвинә. (Бьхунә Йерәмйа 17:9, 10.)

6. Йаһоwа ча али мә дькә, wәки әм «һʹöкöми ль сәр» хwәстьнед хьраб бькьн?

⁶ Ле Йаһоwа ләз накʹәвә дәрберʹа мә инкʹар кә. Чахе әw дьвинә wәки әм дькʹәвьнә тʹәльке у жь wи дур дькʹәвьн, әw мә ширәт дькә: «Вәгәрʹьн мьн, әзе жи вәгәрʹьм wә» (Малх. 3:7). Чахе әм тʹәви кемасийед хwә шәрʹ дькьн, Йаһоwа дьхwазә wәки әм мьqәрʹм мьqабьли хьрабийе бьн (Иша. 55:7). Һәрге әм öса бькьн, Йаһоwа wе рʹöһʹанида у емосийалида али мә бькә, у qәwате бьдә мә wәки әм «һʹöкöми ль сәр» хwәстьнед хьраб бькьн (Дәстп. 4:7).

«НӘХАПЬН»

7. Чаwа Сьлеман достийа хwә тʹәви Йаһоwа öнда кьр?

⁷ Әм жь сәрһатийа Сьлеман Пʹадша дькарьн дәрсе хwәрʹа һьлдьн. Щаһьлтийеда, Сьлеман тʹьме рʹебәрийа Йаһоwа дьгәрʹийа. Йаһоwа билани да wи у шьхöл да, wәки әw пʹарьстгәһа мәзьн Оршәлимеда ава кә. Ле wәʹдә дәрбаз бу, Сьлеман достийа хwә тʹәви Йаһоwа öнда кьр (1 Пʹадш. 3:12; 11:1, 2). Qануна Хwәде qәдәхә дькьр кö пʹадша хwәрʹа «кʹöлфәт зедә кә», чьмки «дьле wи» дькарьбу бьхальфийа (Qан. Дщр. 17:17). Ле Сьлеман әw qанун пьшт гöһе хwәва авит, у ахьрийеда 700 жьнед wи у 300 щарийед wи һәбун (1 Пʹадш. 11:3). Гәләк жьнед wи жь мьләте Исраели нибун, у хöданед qәлп дьһʹәбандьн. У Сьлеман бь ве йәке жи гöрʹа qануна Хwәде нәкьр кö жьнед хәриб станд (Qан. Дщр. 7:3, 4).

8. Чаwа Сьлеман дьле Йаһоwа ешанд?

⁸ Дьле Сьлеман һьндава qанунед Йаһоwа һеди-һеди сар бу, у ахьрийеда әwи тьштед хьраб кьр. Сьлеман бона хöданед qәлп Астартийа у Кәмош, горигәһ ава кьр. Әwи һәла һе жи тʹәви жьнед хwә пʹутпʹарьсти кьр. Әwи әw горигәһ һәма бәр Оршәлиме сәр бьльндщи ава кьр, кʹидәре кö әwи хwәха бона Йаһоwа пʹарьстгәһ ава кьрьбу (1 Пʹадш. 11:5-8; 2 Пʹадш. 23:13). Дьqәwьмә Сьлеман хwәха хwә дьхапанд, wәки Йаһоwа чʹәʹве хwә дадьдә сәр кьред wийи хьраб, чьмки әwи диса жи бәрдәwам дькьр пʹарьстгәһа wида qöрбана бьдә.

9. Сьлеман чь ахьри станд кö тʹәмийа Хwәде пьшт гöһе хwәва авит?

⁹ Ле Йаһоwа тʹö щар сәр хьрабийе чʹәʹве хwә данадә. Кʹьтеба Пироз дьбежә: «Һерса Йаһоwа рʹабу сәр Сьлеман, чьмки дьле wи жь Йаһоwа дур кʹәтьбу . . . , йе кö дö щара хwә wирʹа әʹйан кьрьбу у wи ширәт кьрьбу, wәки әw пәй хöданед дьн нәчә. Ле Сьлеман тʹәмийа Йаһоwа хwәй нәкьр». Ахьрийеда, әwи qәбулкьрьн у кʹәрәма Хwәде öнда кьр. Зöрʹәтед Сьлеман һʹöкöмтийа сәр тʹәмамийа Исраеле öнда кьрьн, у бь сәда сала гәләк хәзәб дьдитьн (1 Пʹадш. 11:9-13, ДТʹ).

10. Чь дькарә амьнийа мә һьндава Хwәде бькә бьн хофе?

¹⁰ Жь сәрһатийа Сьлеман әшкәрә те кʹьфше, wәки чьqас хоф ә тʹәви wан мәрьва һәвалтийе бькьн, йед кö фәʹм накьн йан жи qәдьре принсипед Йаһоwа нагьрьн. Һьнәк жь wан дьqәwьмә щьватеда ньн, ле рʹöһʹанида сьст ьн. Һьнәк жи дьбәкә мәрьвед незик ьн, щинар ьн, һәвалхәбатчи нә, һәвалдәрсханед wан ьн, йед кö хьзмәткʹаре Йаһоwа ниньн. Фьрqи тʹöнә кʹе жи һәбә, һәрге әw мәрьв qайим хwә ль принсипед Йаһоwа нагьрьн, ахьрийеда әм дькарьн сәва wан qәбулкьрьна Хwәде öнда кьн.

11. Чь дькарә али мә бькә wәки һәвалед баш хwәрʹа бьжберьн?

¹¹ Бьхунә 1 Корьнтʹи 15:33. Бал гәләк мәрьва хәйсәт-һʹöнöред баш һәнә, у мәрьвед кö хьзмәткʹаред Йаһоwа ниньн жи дькарьн тьштед хьраб нәкьн. Дьбәк һун мәрьвед öса нас дькьн, ле гәло әw те һʹәсабе wәки һәвалти тʹәви wан wе кʹаре мәрʹа бинә? Пьрсед öса бьдьнә хwә: «Һәвалтийа тʹәви wан ча wе һʹöкöм кә сәр һәләqәтийа мьн тʹәви Йаһоwа? Гәло дьле wанда чь йә? Әwана һе зәʹф дәрһәqа чь хәбәр дьдьн? Дьбә кö әwана тʹьме дәрһәqа моде, пʹәра, тьштед әләктроник, wәʹдәдәрбазкьрьне у тьштед дьн хәбәр дьдьн? Йан дьбәкә хәбәрданеда qәрфа мәрьва дькьн, йан жи һʹәнәкед нәщайиз дькьн?». Иса рʹастә-рʹаст гот: «Чь кö дьлада һәйә зар жи wе дьбежә» (Мәт. 12:34). Һәрге һун дьвиньн, wәки һәвалед wә нәбаш һʹöкöм дькьн сәр һәләqәтийа wә тʹәви Йаһоwа, дәрберʹа тьштәки бькьн, wәки һе кем тʹәви wан wәʹдә дәрбаз кьн, у һәрге лазьм бә жи һәвалтийа тʹәви wан бьqәтиньн (Мәтʹлк. 13:20).

ЙАҺОWА ДЬХWАЗӘ ӘМ БЬ ТʹӘМАМИ ЖЕРʹА АМЬН БЬН

12. а) Йаһоwа Исраелийарʹа кö тʹәзә жь Мьсьре аза бун, чь да кʹьфше? б) Исраелийа хwә ча данә кʹьфше чахе Хwәде гот, wәки әwана гәрәке бь тʹәмами жерʹа амьн бьн?

¹² Паши ве йәке чахе Исраели жь Мьсьре аза бун, тьштед öса qәwьмин жь чь жи әм дькарьн хwәрʹа дәрсе һьлдьн. Щьмәʹт тʹоп бьбу бәр чʹийайе Синайе у wедәре Йаһоwа әшкәрә wанрʹа әʹйан кьр кö әw тʹәви wан ә. Бь кʹәрәмәти әʹwьрәки тәʹри дәркʹәт, у Йаһоwа öса кьр кö бу qьрʹчʹин, бьруске бьрq вәдьда, бу ду у дәнге борʹийе гәләки qайим һат (Дәркʹ. 19:16-19). Wи щурʹәйи Йаһоwа Исраелийарʹа да кʹьфше, wәки әw «Хwәдеки кʹöмрʹәш» ә, демәк йе кö дәʹwа дькә бь тʹәмами жерʹа амьн бьн. Әwи öса жи соз да wан, кö әw wе амьн бә һьндава wан, йед кö wи һʹьз дькьн у гöрʹа тʹәмийед wи дькьн. (Бьхунә Дәркʹәтьн 20:1-6.) Щурʹәки дьн бежьн, Йаһоwа wанрʹа гот кö «Һәрге һун алийе мьн бьн, әзе жи алийе wә бьм». Һәрге wә әw созе амьн жь Йаһоwа Хwәде бьбьһиста, wәйе чь бьгота? Бешьк, wәйе жи мина Исраелийа öса бьгота: «Һʹәму хәбәред кö Хöдан готийә, әме бькьн!» (Дәркʹ. 24:3). Ле һьнә wәʹдә шунда тьштәки öса qәwьми, кö амьнийа wан Исраелийа һатә щерʹьбандьне.

13. Кʹижан дәрәща амьнийа Исраелийа щерʹьбандьн?

¹³ Исраелийа гава qьрʹчʹини бьһистьн у дитьн бьрqвәдана бьруске, әʹwьре тәʹри у диса нишанед мәзьн жь Хwәде, гәләк тьрсийан. Ләма жи wана готьнә Муса wәки әw дәwса wан тʹәви Хwәде хәбәр дә сәр чʹийайе Синайе (Дәркʹ. 20:18-21). Муса гәләк wәхт сәре чʹийе ма. Дьqәwьмә кö щьмәʹтерʹа чәтьн бу, чьмки бе рʹебәре хwә бәрʹийеда тʹәне мабун. Әwана гәләк һини Муса бьбун у ча те кʹьфше итʹбарийа хwә мерьв дьанин. Әwана бәрхwә кʹәтьн у готьнә Һарун: «Рʹабә мәрʹа хöданәки чекә, кö пешийа мә кʹәвә, чьмки әw Мусайе мәрьв, йе кö әм жь wәлате Мьсьре дәрхьстьн, әм ньзаньн чь һатә сәре wи» (Дәркʹ. 32:1, 2, ДТʹ).

14. Исраелийа чьда хwә дьхапандьн, у Йаһоwа ча ньһерʹи сәр кьред wан?

¹⁴ Щьмәʹте рʹьнд заньбу, wәки пʹутпʹарьсти бәр чʹәʹве Йаһоwа гöнәки гәләк гьран ә (Дәркʹ. 20:3-5). Ле wәʹдә дәрбаз бу у wана сәре хwә бәр голькәкә зерʹ данин! Исраелийа заньбун кö бь ве йәке әwана гöрʹа Хwәде накьн, ле йәкә wана хwәха хwә дьхапандьн йанчь әwана диса жи алийе Йаһоwа нә. Һәла һе Һарун жи кʹәтә ве тʹәльке чахе гот кö әw гольк бона «щәжьна» Йаһоwа йә. Ле Йаһоwа ча сәр ве йәке ньһерʹи? Әwи һʹәсаб кьр wәки wана пьшта хwә данә wи у нәмамийа wи кьрьн. Йаһоwа готә Муса wәки щьмәʹт «жь wе рʹийе шьһʹьтин» кʹижанерʹа кö әwи «тʹәми дабу wан» кö һәрʹьн. «Һерса» Йаһоwа öса сәр wан рʹабу, кö әwи һәла һе жи дьхwәст бь тʹәмами qьрʹа мьләте Исраел бинә (Дәркʹ. 32:5-10).

15, 16. Чаwа Муса у Һарун данә кʹьфше кö әwана мьqәрʹм алийе Йаһоwа нә? (Бьньһерʹә шькле әʹwльн.)

¹⁵ Йаһоwа сафи кьр wәки qьрʹа Исраелийа нәйнә. Жь рʹәʹма хwә әwи мәщал да хьзмәткʹаред хwәйи амьн, wәки мьqим алийе wи бьгьрьн (Дәркʹ. 32:14). Гава Муса хwәха пе чʹәʹве хwә дит кö чаwа щьмәʹт бәр пʹут дькьнә qажини, дьстьрен у дьрʹәqьсьн, әwи әw голька зерʹ һьлда у һур-һури кьр, кьрә тʹоз. Паше әwи әʹлам кьр: «Кʹе алийе Хöдан ә, бьра бе щәм мьн!». Сәр ве йәке һʹәму Леwи щьвийанә щәм wи (Дәркʹ. 32:17-20, 26).

¹⁶ Рʹаст ә пешийе Һарун хwәха әw пʹут чекьр, ле әwи гöне хwә ани рʹуйе хwә у тʹәви wан Леwийа алийе Йаһоwа гьрт. Әw мәрьвед амьн, нә кö тʹәне алийе Йаһоwа гьртьн, ле öса жи хwә башqә кьрьн жь wан, йед кö нәрʹасти кьрьн. Әw аqьлайи бу алийе wанда, чьмки ве рʹоже бь һʹәзара Исраели сәва пʹутпʹарьстийа хwә әʹмьре хwә öнда кьрьн. Ле әwед кö алийе Йаһоwа гьртьн, хьлаз бун у һьн жи Хwәде wанрʹа соз да кö wе wана кʹәрәм кә (Дәркʹ. 32:27-29).

17. Гьлийед Паwлос дәрһәqа сәрһатийа Исраелийа, чь мә һин дькьн?

¹⁷ Паwлосе шанди чахе бәʹса ве qәwьмандьне кьр, гьлийед öса гот: «Әw тьшт бона мә бунә мәсәлед готи, wәки әм . . . нә жи бьбьн пʹутпʹарьст, чаwа жь wан һьнәк бун. . . . Әw . . . бона мә кö әм ахьрийа ван дәwрада дьжин, чаwа ширәт һатьнә ньвисаре. Аwа кʹи дьфькьрә кö әw мьqәрʹм сәкьни йә, бьра һаш жь хwә һәбә кö нәкʹәвә» (1 Корн. 10:6, 7, 11, 12). Жь гьлийед Паwлос те кʹьфше, wәки һәла һе хьзмәткʹаред рʹаст жи дькарьн кьред хьраб бькьн. Әwед кö дькʹәвьнә ве тʹәльке дьбәкә дьфькьрьн, wәки Йаһоwа wана диса жи qәбул дькә. Ле һәрге мәрьв тʹәне дьхwазә бьбә досте Йаһоwа йан жи дьбежә йанчь әw жерʹа амьн ә, әw найе һʹәсабе wәки Йаһоwа wи бь рʹасти qәбул дькә (1 Корн. 10:1-5).

18. Чь дькарә бьбә мәʹни кö әм жь Йаһоwа дур кʹәвьн, у әw йәк wе чь ахьрийе мәрʹа бинә?

¹⁸ Исраели бәрхwә кʹәтьн чахе дитьн кö Муса дәрәнги дькʹәвә, жь Синайе бәржер набә. Иро жи Мәсиһи дькарьн бина хwә тәнг кьн, чьмки wана тʹьре рʹожа диwана Йаһоwа у дьнйа тʹәзә, дәрәнги дькʹәвә. Әwана дьбәкә бьфькьрьн жи wәки созе Йаһоwа һе гәләк дур ә, йан жи әw созәки нәбуйи йә. Һәрге әм мьqати хwә нәбьн у фькьред хwә рʹаст нәкьн, әме ида хwәстьнед хwәйә бәдәне сәр qьрара Йаһоwарʹа бьгьрьн. Паше, һеди-һеди әме жь Йаһоwа дур кʹәвьн у тьштед öса бькьн, кʹижан кö дьбәкә qә һʹьше мәрʹа жи дәрбаз нәдьбу.

19. Әм чь гәрәке тʹö щар бир нәкьн?

¹⁹ Әм гәрәке тʹö щар бир нәкьн, wәки Йаһоwа дәʹwа дькә кö әм бь тʹәмамийа дьле хwә гöрʹа wи бькьн у жерʹа амьн бьн (Дәркʹ. 20:5). Һәрге әм тьштед öса накьн чь кö Йаһоwа жь мә дәʹwа дькә, wәки öса нә әме wан тьшта бькьн чь кö Шәйтʹан дьхwазә, у әw йәк дькарә мәрʹа тʹәне ахьрикә хьраб бинә. Ләма жи Паwлос ширәт да Мәсиһийа: «Һун нькарьн һьн кʹаса Хöдан вәхwьн, һьн жи кʹаса щьна. Һун нькарьн һьн жь сьфра Хöдан бьхwьн, һьн жи жь сьфра щьна» (1 Корн. 10:21).

ХWӘ QАЙИМ ЛЬ ЙАҺОWА БЬГЬРӘ

20. Йаһоwа ча дькарә али мә бькә чахе әм гавед нәрʹаст давежьн?

²⁰ Сәрһатийа Qайин, Сьлеман у Исраелийа, дьдә кʹьфше кö бал һʹәмушка һәйә мәщал wәки «тʹобә кьн у . . . вәгәрʹьн» (Кʹар. Шанд. 3:19). Әшкәрә йә, wәки Йаһоwа ләз накʹәвә мә инкʹар кә чахе әм шашийа дькьн. Дәрәща Һарунда әм дьвиньн, wәки Йаһоwа бахшандә wи. Иро жи һәрге әм гавәкә нәрʹаст давежьн, Йаһоwа бь сайа Кʹьтеба Пироз, әʹдәбйәтед сәр һʹиме Кʹьтеба Пироз, у ширәтед жь хушк-бьра мә пешда ширәт дькә. Гава әм ширәтед wи у рʹасткьрьна wи qәбул дькьн, әм дькарьн рʹәʹма wи бьстиньн.

21. Гава амьнийа мә те щерʹьбандьне, әм гәрәке хwәрʹа чь сафи кьн кö бькьн?

²¹ Qәнщийа Йаһоwайә нәһежа бона нетәке йә (2 Корн. 6:1). Әw мәщале дьдә мә, wәки «нәпʹакийе у дьлһавьжийед дьнйайе инкʹар кьн». (Бьхунә Тито 2:11-14.) Һʹәта кö әм «ль ве дьне» дьжин, әме рʹасти wан дәрәща бен, кʹидәре кö амьнийа мә һьндава Йаһоwа wе бе щерʹьбандьне. Ләма жи wәрә әм һәр гав алийе Йаһоwа бьгьрьн, чьмки әм гәрәке тʹәне жь Хwәдейе хwә Йаһоwа бьтьрсьн, хöламтийе wирʹа бькьн, у хwә ль wи бьгьрьн! (Qан. Дщр. 10:20).