Рʹастийе Хәбәр дьн

1, 2. Чь инсанәтерʹа зийанәкә лапә мәзьн ани, у кʹе йә нәһәq бона ве йәке?

ИРО һьнә тьшт кö мәрьва дәрхьстьнә бона жийина һәр рʹожи, мәрʹа гәләк кʹаре тиньн. Мәсәлә, тʹел, чʹьра, әʹрәбә, сарьнщә, у тьштед майин. Ле тьштед öса жи һатьнә дәрхьстьне, кʹижан кö бона әʹмьре мәрьва хоф ә, бәʹса хәбәре чʹәк, щьхарә, бомбед атоме у диса тьштед дьн. Ле диса һәйә тьштәки öса, кö жь wан тьшта зедәтьр инсанәтерʹа зийана мәзьн тинә у әw тьшт жь бәреда те. Әw чь йә? Әw һәйә дәрәwи! Дәрәwи әw ә чахе кәсәк нәрʹастийе дьбежә, wәки кәсәки дьн бьхапинә у бьхальфинә. Ле гәло кʹе дәрәwа пешьн гот? Иса Мәсиһ гот wәки әw «Мирещьна» бу, йе кö «баве дәрәwа» йә. (Бьхунә Йуһʹәнна 8:44.) Ле кʹәнге әwи щара пешьн дәрәw кьр?

² Әw qәwьми бь һʹәзара сала пешда, бахче Еденеда. Адәм у Һеwа әʹмьре хwәрʹа ша дьбун Щьнәта бәдәwда, кʹидәре кö Хwәде wана щиwар кьрьбу. Шәйтʹан заньбу, wәки Хwәде тʹәми да Адәм у Һеwайе, кö жь «дара qәнщи у хьраби наскьрьне» нәхwьн, чьмки бона нәгöһдарикьрьне әwана wе бьмьрьн. Ле йәкә Шәйтʹан бь сайа мәʹр готә Һеwайе: «На, һун тʹö щар намьрьн [әw бу дәрәwа лапә пешьн], ле Хwәде занә, wе рʹожа гава һун жь wе бьхwьн, чʹәʹвед wәйе вәбьн у бьбьнә мина Хwәде, qәнщи у хьрабийе жь һәв дәрхьн» (Дәстп. 2:15-17; 3:1-5).

3. Чьрʹа әм дькарьн бежьн, wәки Шәйтʹан пе нета хьраб дәрәw кьр, у ахьрийа ве йәке чь бу?

³ Шәйтʹан пе нета хьраб дәрәwи кьр. Әwи заньбу, wәки һәрге Һеwа гьлийед wи баwәр кә у бәре даре бьхwә, әwе әʹсә бьмьрә. Һеwайе у Адәм гöрʹа тʹәмийа Йаһоwа нәкьрьн у ахьрийеда мьрьн (Дәстп. 3:6; 5:5). Хенщи ве йәке, сәва wи гöнәйи, «мьрьн сәр һʹәму мәрьва бәла бу». Ләма жи мьрьне «һʹöкöм кьр, һʹәта сәр wан жи, йед кö мина Адәм гöрʹа Хwәде дәрнәкʹәтьн» (Рʹом. 5:12, 14). Ләма иро мәрьв дәwса кö чаwа Хwәде дьхwәст, әʹмьре хwәйи беqьсуррʹа ша бьн у һʹәта-һʹәтайе бьжин, рʹожед әʹмьре wан «һʹәфте сал ьн, һәгәр бь сьһʹәт-qәwат һʹәйште сал». Һьн жи әʹмьре мәрьва бь «зәʹмәт у кʹәдәр» тʹьжә йә (Зәб. 90:10). Рʹасти жи әw дәрәwийа Шәйтʹан ахьрикә чьqас хьраб ани!

4. а) Кʹижан пьрса әме ве готареда шеwьр кьн? б) Ль гора Зәбур 15:1, 2, кʹе дькарә бьбә досте Йаһоwа?

⁴ Чахе Иса бәʹса кьред Шәйтʹан кьр, әwи гот: «[Әw] тʹö щар хwә рʹастийе нәгьртийә». Шәйтʹан ньһа жи хwә рʹастийе нагьрә, чьмки әw диса бәрдәwам дькә «тʹәмамийа дьне» пе дәрәwийед хwә бьхальфинә (Әʹйан. 12:9). Әм нахwазьн, wәки Шәйтʹан мә бьхальфинә. Ләма wәрә әм се пьрса шеwьр кьн: Чаwа Шәйтʹан мәрьва дьхапинә? Чьрʹа мәрьв дәрәwа дькьн? У чаwа әм дькарьн һәр гав рʹастийе бежьн, сәва кö мина Адәм у Һеwайе достийа хwә тʹәви Йаһоwа öнда нәкьн? (Бьхунә Зәбур 15:1, 2.)

ЧАWА ШӘЙТʹАН МӘРЬВА ДЬХАПИНӘ

5. Чаwа Шәйтʹан иро мәрьва дьхальфинә?

⁵ Паwлосе шанди заньбу, кö әм дькарьн хwә хwәй кьн, wәки Мире-щьна мә нәхальфинә, чьмки әм «һаш жь һʹöнöред wи һәнә» (2 Корн. 2:11). Әм заньн wәки тʹәмамийа дьне, демәк öса жи дине qәлп, политикед берʹәʹм, у комерсийа тьма, бьн һʹöкöме Шәйтʹанда ньн (1 Йуһʹн. 5:19). Ләма жи әм мәтʹал наминьн чахе Шәйтʹан у щьнед wи мәрьвед хwәйиһʹöкöм һелан дькьн кö «дәрәw» бежьн (1 Тимтʹ. 4:1, 2). Бәʹса хәбәре, иро гәләк бизнесмен пе рекламед хwә мәрьва дьхапиньн, у öса жи тьштед кö зийане тиньн дьфрошьн у фелбазийе дькьн сәва пʹәра чекьн.

6, 7. а) Чьрʹа илаһи дәрәwед сәрwеред рʹелигийа гәләк хьраб ьн? б) Wә кʹижан дәрәw бьһистийә жь сәрwеред рʹелигийа?

⁶ Сәрwеред религийа кö дәрәwа дькьн, илаһи гәләк нәһәq ьн, чьмки әwана дәрәwед öса бәла дькьн, кö әʹмьре мәрьва дькьнә бьн хофе. Чь щурʹәйи? Һәрге кәсәк һинкьрьнед qәлп баwәр бькә у тьштед öса бькә, кö Хwәде qәдәхә дькә, әw мәрьв дькарә әʹмьре һʹәта-һʹәтайе нәстинә (Һос. 4:9). Иса заньбу wәки сәрwеред религийа кö wәʹде wида дьжитьн, дәрәwийеда нәһәq бун. Әwи рʹастә-рʹаст wанрʹа гот: «Wәй ль wә qанунзан у ферьсийа! Дöрʹуно! Һун бәʹр у бәже ль һәв дьдьн, кö йәки нәбаwәр биньн сәр рʹийа хwә. Гава мәрәме wә дьбә, һун әwи жь хwә дö щара зедәтьр дькьнә пʹара гәәна [qьркьрьна һʹәта-һʹәтайе]» (Мәт. 23:15, ДТʹ). Иса wан сәрwеред религийа гәләк сәрт сущдар кьр. Әwана рʹасти жи жь баве хwә Мире-щьна бун, йе кö qәтʹьл ә (Йуһʹн. 8:44).

⁷ Сәрwеред рʹелигийа нав тʹәмамийа дьнйайеда гәләк ьн. Һьнәка нав дькьн кʹәшиш, раби, пастор, йан жи пе сәрнавед дьн. Мина сәрwеред религийа qьрʹна йәкеда, әwана жи наһельн, wәки жь Хәбәра Хwәде «рʹасти хöйа бә» у «рʹастийа Хwәде дәрәwийерʹа гöһерʹин» (Рʹом. 1:18, 25). Әwана һинкьрьнед qәлп һин дькьн, мәсәлә дәрһәqа щәʹньме, жийина паши мьрьне, реинкарнасйайе, у дәрәwийа мьрдар бәла дькьн, кö йанчь Хwәде һомосексуалисме qәбул дькә.

8. Политик wе зутьрәке чь дәрәwийе бәла кьн, ле әм чь гәрәке нәкьн?

⁸ Политик пе дәрәwийе мәрьва дьхальфиньн. Дәрәwийа лапә мәзьн кʹижан кö әwана wе бәла кьн, әw ә чахе әʹлам кьн кö «дьне сәqьрʹи у бехофи йә»! Ле «һьнге хәзәбе ньшкева сәр wанда бе». Wәрә әм тʹö щар баwәр нәкьн дәрәwийа wан, кö йанчь дьнйа һʹале хьрабда нинә! Ле әм һаш рʹастийе һәнә, әм заньн wәки «рʹожа Хöдан wе мина дьзе шәве бе» (1 Тʹеслн. 5:1-4).

ЧЬРʹА МӘРЬВ ДӘРӘWА ДЬКЬН

9, 10. а) Чьрʹа мәрьв дәрәwа дькьн, у әв йәк чь ахьрийе тинә? б) Әм чь гәрәке дәрһәqа Йаһоwа бир нәкьн?

⁹ Нә кö тʹәне мәрьвед хwәйиһʹöкöм дәрәwа дькьн, ле дәрәwи буйә тьштәки тʹәбийәти. Ньвискʹарәк бь наве И. Бхатачарщи, готара хwәда йа бь наве «Чьрʹа Әм Дәрәwа Дькьн», ньвиси wәки «дәрәwи нав хәйсәте мәрьвада гәләк кʹур рʹуньштийә». Мәрьв дәрәwа дькьн һʹәчʹи зәʹф сәва ве йәке, кö хwә хwәй кьн йан жи пешдачуйи бьн. Әwана пе дәрәwийе шашийед хwә йан жи кьред хwәйи хьраб вәдьшерьн. Öса жи әwана дәрәwа дькьн, wәки пʹәра хwәрʹа qазанщ кьн йан жи кʹарәкә дьн бьстиньн. Чаwа ве готареда һатә готьне, һәнә мәрьвед öса кö хwәрʹа кьрьнә хәйсәт wәки «мәрьвед нәнасрʹа, һәвалхәбатчийед хwәрʹа, у мәрьвед хwәйи незикрʹа» дәрәwа бькьн, фьрqи тʹöнә тьштед бьчʹукда йан мәзьнда.

¹⁰ Ле ахьрийа дәрәwа чь йә? Итʹбари у һәләqәтийа баш дькарә öнда бә. Бьдьнә бәр чʹәʹве хwә, мер wе ча хwә дьлшкәсти тʹәхмин кә, гава пебьһʹәсә, wәки жьна wи жерʹа нәамьн ә у wи дьхапинә сәва бенамусийа хwә вәшерә. Йан жи чахе мер бәр мәрьвед дьн һьндава жьн-зарʹед хwә һʹәйф ә, ле малда тʹәви wан хьраб ә, дьле нәфәра гәләк дешә. Ле йәкә әм гәрәке бир нәкьн, wәки әw мәрьвед qәлп нькарьн тьштәки жь Йаһоwа вәшерьн, чьмки «һәр тьшт ль бәр чʹәʹве wи вәкьри у ашкәрә йә» (Ибрн. 4:13).

11. Сәрһатийа Һананийа у Саферийа чь мә һин дькә? (Бьньһерʹә шькле әʹwльн.)

¹¹ Кʹьтеба Пирозда һәйә сәрһати, кʹидәре те готьне, wәки Мире-щьн «qәлпе хьраб кьрә дьле» жьн-мерәки, wәки Хwәде бьхапиньн. Әwана Мәсиһи бун, бь наве Һананийа у Саферийа кö qьрʹна йәкеда дьжитьн. Wана хwәст шандийа бьхапиньн. Wана һьнә һәбука хwә фьротьн, ле һьнә пʹәрә жь шандийа вәшартьн. Әw жьн-мер дьхwәстьн щьватеда наве хwә бьльнд кьн, йанчь әwана гәләк мәрʹд ьн кö гәләк пʹәрә qöрбан кьрьн. Ле Йаһоwа дәрәwийа wан дит, у анәгори ве йәке әwана щәза кьрьн (Кʹар. Шанд. 5:1-10).

12. Ахьрийа мәрьвед qәлп, йед кö гöне хwә найньн рʹуйе хwә, wе чь бә, у чьрʹа?

¹² Йаһоwа ча дьньһерʹә сәр дәрәwийе? Шәйтʹан у һʹәмуйед кö чʹәʹв дьдьнә wи у һʹәмде хwә дәрәwа дькьн у гöне хwә найньн рʹуйе хwә, wе ахьрийеда бькʹәвьнә «гола агьр» (Әʹйан. 20:10; 21:8; Зәб. 5:6). Ле чьрʹа? Чьмки Йаһоwа wан мәрьвед qәлп жи һʹәсаб дькә ча «сә-кʹучʹьк», демәк йед кö кьред öса дькьн, кʹижан бәр чʹәʹве wи рʹәш ьн (Әʹйан. 22:15).

13. Әм дәрһәqа Йаһоwа чь заньн, у әw йәк мә бәрбь чь һелан дькә?

¹³ Әм заньн wәки Йаһоwа «нә инсан ә кö дәрәwа бькә». Бь рʹасти, «набә кö әw дәрәw дәре» (Жьмар 23:19; Ибрн. 6:18). Бәр Йаһоwа «һʹәрам ьн . . . зьмане дәрәwин» (Мәтʹлк. 6:16, 17). Сәва әw мә qәбул кә, әм гәрәке бьжин ль гора принсипед wийә рʹастийе. Әw те һʹәсабе wәки әм «һәвдöрʹа дәрәwа нәкьн» (Колс. 3:9).

ӘМ «РʹАСТИЙЕ» ДЬБЕЖЬН

14. а) Чьда диса әм жь әндәмед религийед qәлп башqә дьбьн? б) Шьровәкьн принсипа жь Луqа 6:45.

¹⁴ Диса чь тьштида Мәсиһийед рʹаст жь әндәмед рʹелигийед qәлп башqә дьбьн? Әм «рʹастийе» дьбежьн. (Бьхунә Зәкәрйа 8:16, 17.) Паwлос шьровәкьр: «Әм хwә  . .. дьдьнә кʹьфше, чаwа qöльхкʹаред Хwәде . . . бь готьна рʹастийе» (2 Корн. 6:4, 7). Иса дәрһәqа мәрьва гот: «Чь дьле инсенда һәйә, зар жи wе йәке дьбежә» (Луqа 6:45). Ләма жи чахе мәрьве qәнщ дьле хwәда рʹастийе дьбежә, жь дәве wи жи wе тьштед рʹаст дәрен. Әwе һьн тьштед бьчʹукда һьн жи йед мәзьнда рʹастийе бежә мәрьвед нәнасрʹа, һәвалхәбатчийед хwәрʹа, һәвалед хwәрʹа, у мәрьвед хwәйи незикрʹа жи. Дина хwә бьдьнә һьнә мәсәла, кö чаwа әм дькарьн нишан кьн, wәки һʹәму тьштада һʹәлал ьн.

15. а) Чьрʹа нәаqьлайи йә мина мәрьвед дöрʹу бьжин? б) Чь дькарә али щаһьла бькә, wәки нәкʹәвнә бәр байе щаһьлед дьн? (Бьньһерʹә спартьн.)

¹⁵ Һәрге тö щаһьл и, дьбәкә дьхwази мина щаһьлед дьн би, сәва жь wана щöдә нәби. Ле әw йәк хоф ә, чьмки гәләк щаһьл бона ве йәке дьбьнә мина мәрьвед дöрʹу. Әwана бәр нәфәр у хушк-бьред щьвате хwә нав-намус дьдьн кʹьфше, ле нав щаһьлед дьнйайе у малпәред сосйалида лаптә щурʹәки дьн ьн. Мәсәлә, гьлийед хьраб дьбежьн, кʹьнщед нәщайиз хwә дькьн, кʹьламед нәбаш дьбьһен, ичʹкева, наркотикева йан жи щьхарева мьжул дьбьн, дьзикава рʹасти кәсәки тен, йан жи һе тьштед хьраб дькьн. Бь ве йәке әwана де-бавед хwә, хушк-бьред щьвате у Хwәде дьхапиньн (Зәб. 26:4, 5). Ле Йаһоwа занә чахе әм wи тʹәне пе зар-зьмане хwә һöрмәт дькьн, ле дьле мә жь wи дур ә (Марq. 7:6). Чьqас баш ә бькьн ве йәке, чь жи ве мәтʹәлокеда те готьне: «Бьра дьле тә һʹәвсудийа гöнәкʹар нәкә, ле һәр рʹож хофа Хöданда бә» (Мәтʹлк. 23:17).a

16. Әм ча гәрәке щаба хwә бьдьн сәр пьрсед кö бланка бона хьзмәтийа һәртʹьм тʹьжә дькьн?

¹⁶ Дьбәкә тö дьхwази бьби пешәнг йан жи Бәйтʹәледа хьзмәт ки. Чахе тöйе бланке тʹьжә ки, гәләк фәрз ә сәр wан һʹәму пьрса бь тʹәмами һʹәлал щаба хwә бьди, мәсәлә дәрһәqа сьһʹәт-qәwата хwә, бьжартьна wәʹдәдәрбазкьрьне у намусийе (Ибрн. 13:18). Ле һәрге тә тьштәки öса кьрийә кö Йаһоwа нәфьрʹәт дькә, йан жи тьштәки öса кö исафа тә, тә дьчәрчьринә, ле тә тʹәви рʹуспийа хәбәр нәдайә, незики рʹуспийа бә, wәки али тә бькьн, сәва тö паше пе исафа тʹәмьз хьзмәт ки (Рʹом. 9:1; Галт. 6:1).

17. Әм чь гәрәке бькьн, чахе йед мьqабьл жь мә дәʹwа дькьн, wәки дәрһәqа бьра информасийа бьдьн?

¹⁷ Ле һәрге сәрwеред дәwләте шьхöле бәлакьрьна мьзгинийе wәлате wәда qәдәхә дькьн у wә дьгьрьн, сәва дәрһәqа бьра информасийа бежьн, һун чь гәрәке бькьн? Гәло лазьм ә, һун һәр тьшти чь заньн wанрʹа бежьн? Иса чь кьр, гава сәрwере Рʹоме пьрс дьда wи? Кʹьтеба Пироз дьбежә wәки «wәхта һʹьшбуне һәйә у wәхта готьне һәйә», у Иса жи әw принсип дьда хәбате у щара тьштәки нәдьгот (Wаиз 3:1, 7; Мәт. 27:11-14). Һәрге әм бькʹәвьнә ве дәрәще, әм гәрәке сәрwахт у фәсал бьн, wәки бьра нәкьнә qәзийе (Мәтʹлк. 10:19; 11:12).

18. Чь щабдарийа мә һәйә, чахе рʹуспи дәрһәqа хушк йан бьраки жь мә дьпьрсьн?

¹⁸ Ле һәрге кәсәк щьватеда гöнәки гьран кьрийә, у һун заньн дәрһәqа ве йәке, лазьм ә чь бькьн? Рʹуспи борщдар ьн сәва щьвате тʹәмьз хwәй кьн намусийеда, ләма жи әwана дьбәкә жь тә бьпьрсьн һәла тö чь зани дәрһәqа ве йәке. Һәрге әw кәс һәвале тәйи незик ә, йан жи мәрьве тә йә, тöйе һьнге чь бежи? Кʹьтеба Пироз дьбежә: «Йе һәq хәбәр дьдә, рʹастийе әʹлам дькә» (Мәтʹлк. 12:17; 21:28). Ләма жи тö щабдар и рʹуспийарʹа бь тʹәмами рʹастийе бежи, нә кö нивида, у гәрәке тьшта зедә йан кем нәки. Изьна wан һәйә, wәки бь тʹәмами рʹастийе бьзаньбьн, сәва кö паше али wи кәсе кö гöнә кьрийә бькьн, wәки әw һәләqәтийа хwәйә баш тʹәви Йаһоwа вәгәрʹинә (Аqуб 5:14, 15).

19. Готара дьнда әме дәрһәqа чь шеwьр кьн?

¹⁹ Зәбурбеж Йаһоwарʹа дöа кьр: «Тö рʹастийе дьле мьнда дьхwази» (Зәб. 51:6). Даwьд заньбу, wәки мәрьве һʹәлал жь дьле хwә һʹәлал ә. Бәле, Мәсиһи гәрәке һәр гав «һәвдöрʹа рʹастийе бежьн», ДТʹ. Чахе әм хьзмәтийеда мәрьва рʹастийе һин дькьн, wи щурʹәйи жи әм избат дькьн, wәки әм хьзмәткʹаред Хwәде нә. Ле ча ве йәке бькьн, әме готара дьнда шеwьр кьн.