Рʹастийе Һин кьн

1, 2. а) Әʹмьре Исада кʹижан шьхöл щийе пешьн дьгьрт, у чьрʹа? б) Әм гәрәке чь бькьн, wәки бьбьнә һәвалхьзмәткʹаред Хwәдейә баш?

ИСА МӘСИҺ нәщар у хьзмәткʹар бу (Марq. 6:3; Рʹом. 15:8). Әwи һәрдö шьхöл жи бь һостәти дькьр. Әw чаwа нәщар, һин бу һащәтед бона ви пʹешәйи рʹьнд бьдә хәбате, сәва пе дара тьштед керһати чекә. У чаwа дәрсдаре мьзгинийе, әwи öса жи бь һостәти занәбуна Ньвисаред Пироз дьда хәбате, сәва али мәрьва бькә кö әwана рʹастийед жь Хәбәра Хwәде фәʹм кьн (Мәт. 7:28; Луqа 24:32, 45). Иса чахе 30 сали бу ида нәщарти нәдькьр, чьмки заньбу кö хьзмәткьрьн шьхöләкә һе фәрз ә. Әwи гот, wәки бәлакьрьна мьзгинийа Пʹадшатийе жи мәʹни бу, кö Хwәде әw шандә сәр әʹрде (Мәт. 20:28; Луqа 3:23; 4:43). Бона Иса хьзмәти щийе пешьн дьгьрт, у әwи дьхwәст wәки бона мәрьвед дьн жи öса бә (Мәт. 9:35-38).

² Дьбәкә әм нәщар ниньн, ле әм гьшк жи хьзмәткʹар ьн, йед кö мәрьва мьзгинийе һин дькьн. Әw шьхöл гәләк фәрз ә, чьмки Хwәде нав wи шьхöлида йә, у әм һәвалхәбаткʹаред wи нә (1 Корн. 3:9; 2 Корн. 6:4). Әм заньн, wәки «хәбәред [Йаһоwа] тʹәмамийа хwәва рʹасти нә» (Зәб. 119:159, 160, ДТʹ). Ләма жи әм дьхwазьн баwәр бьн, wәки әм «хәбәра рʹастийе» рʹаст шьровәдькьн. (Бьхунә 2 Тимотʹейо 2:15.) Бона ве йәке, әм сәр хwә дьхәбьтьн, wәки һе бь һостәти Кʹьтеба Пироз бьдьнә хәбате, чьмки әw һащәта мәйә сәрәкә йә, кö әм дьдьнә хәбате сәва мәрьва дәрһәqа Йаһоwа, Иса у Пʹадшатийе һин кьн. Ле сәва кö әм хьзмәтийеда пешда һәрʹьн, тʹәшкиләта Йаһоwа һащәтед дьн жи дәрхьст. Әм гәрәке һин бьн wан һащәта бь һостәти бьдьнә хәбате. Әм wан һащәта нав дькьн Һащәтед Сәрәкә бона Һинкьрьне.

3. Жь бо ве йәке кö бона шәʹдәтийе wәʹдә һьндьк майә, әм гәрәке һе зәʹф дина хwә бьдьнә сәр чь? У ль гора Кʹаред Шандийа 13:48 әм мәрьвед чь щурʹәйи дьгәрʹьн?

³ Дьбәкә һун ньһа дьфькьрьн, wәки чьрʹа әм дьбежьн Һащәтед бона Һинкьрьне, нә кö Һащәтед бона Бәлакьрьна Мьзгинийе. «Бәлакьрьн» әв те һʹәсабе чахе әʹламәтийе бәла дькьн, ле «һинкьрьн» әw те һʹәсабе, әwе әʹламәтийе бьгьһиньнә һʹьш у дьле мерьв, сәва кö әw паше бьдә хәбате wан тьшта чь кö педьһʹәсә. Гәләк һьндьк wәʹдә майә сәва әм мәрьварʹа шәʹдәтийе бьдьн, ләма нета мә гәрәке әw бә, кö тʹәви мәрьва һинбунед Кʹьтеба Пироз дәстпекьн, у wана рʹастийе һин кьн. Әw те һʹәсабе, wәки әм гәрәке бь дьл у щан wан мәрьвед дьлсах бьгәрʹьн, йед кö һазьр ьн гöһ бьдьнә мьзгинийе, wәки әwана жийина һʹәта-һʹәтайе бьстиньн. (Бьхунә Кʹаред Шандийа 13:44-48.)

4. Әм ча дькарьн тедәрхьн һәла кʹе һазьр ә мьзгинийе qәбул кә, у ча әм дькарьн wан мәрьва бьвиньн?

⁴ Ле әм ча дькарьн тедәрхьн, һәла кʹе һазьр ә мьзгинийе qәбул кә? Чаwа qьрʹна йәкеда, иро жи әм дькарьн wан мәрьва бьвиньн, гава шәʹдәтийе бьдьн. Иса готә шагьртед хwә: «Чь бажар йан гöнде кö һун бькʹәвьне, маләкә һежа бьбиньн» (Мәт. 10:11). Әм һивийе ниньн wәки мәрьвед дöрʹу, qöрʹә, йан жи йед кö нафькьрьн дәрһәqа һәләqәтийа хwә тʹәви Хwәде, wе гöһ бьдьнә мьзгинийе. Әм мәрьвед дьлсах, мьлук у рʹöһʹанида бьрʹчи дьгәрʹьн. Әwе йәке әм дькарьн бәрамбәри пʹеше Иса бькьн. Мәсәлә, чаwа нәщар, пешийе әwи гәрәке дарәки баш бьжбарта, сәва тьштед навмал, дәри, нир, йан жи тьштед дьн чекьра. Гава әwи дар ида дьжбарт, qöтʹийа һащәтед хwә һьлдьда, занәбуна хwә дьда хәбате у дәстпедькьр тьшта чекә. Әм жи пешийе мәрьвед дьлсах дьгәрʹьн, паше ида һащәт, фәрәсәт у занәбуна хwә дьдьнә хәбате, сәва али wан бькьн, кö бьбьнә шагьрт (Мәт. 28:19, 20).

5. Әм чь гәрәке бьзаньбьн дәрһәqа Һащәтед бона Һинкьрьне? Мәсәле биньн. (Бьньһерʹә шькле әʹwльн.)

⁵ Һәр һащәт бона нетәке йә. Бәʹса хәбәре, бьфькьрьн дәрһәqа һащәтед кö Иса нәщартийеда дьда хәбате.a Әwи гәрәке пе wан һащәта дар чапкьра, тьштед зедә бьбьрийа, рʹьндә кьра, у паше һәвва кьра. Мина ве йәке, Һащәтед Сәрәкә бона Һинкьрьне, сәва нетәкә конкрет мәрʹа һатьнә дайине. Wәрә ньһа әм шеwьр кьн, кö чь дькʹәвә нава һащәтед мә, у бьвиньн ча әм wан һащәтед фәрз гәрәке бьдьнә хәбате.

ҺАЩӘТЕД БЬ КʹИЖАНА МӘРЬВ ДӘРҺӘQА МӘ ҺЕ ЗЕДӘ ПЕДЬҺʹӘСЬН

6, 7. а) Һун ча дьдьнә хәбате картед малпәра мә? б) Тʹәглифкьрьна мәйә сәр щьвате, бона кʹижан дö нета йә?

⁶ Картед Малпәра мә. Әw картед бьчʹук гәләк һеса йә бьдьнә хәбате. Бь сайа wан карта мәрьв дәрһәqа мә педьһʹәсьн кö әм кʹе нә у әwана дина хwә дьдьнә сәр малпәра мә. Чахе әwана дькʹәвьнә малпәра мә, дькарьн дәрһәqа мә һе зедә пебьһʹәсьн у һәла һе жи һинбуна Кʹьтеба Пироз бьхwазьн. Һʹәта рʹожа иро 400 000 мәрьва зедәтьр сәр jw.оrg ньвисинә, wәки һинбуна Кʹьтеба Пироз дьхwазьн, у бь сәда зедәтьр жи һәр рʹож дәрһәqа ве йәке дьньвисьн. Wе баш бә кö чахе һун дьчьнә щики, әw картед малпәра мә тʹьме бал wә һәбьн, у гава мәщал һәбә, мәрьварʹа шәʹдәтийе бьдьн.

⁷ Тʹәглифкьрьн. Бәлге тʹәглифкьрьна сәр щьватед мә, бона дö нетед сәрәкә йә. Wедәре те готьне: «Әм wә тʹәглиф дькьн wәки тʹәви Шәʹдед Йаһоwа Кʹьтеба Пироз һин бьн». Паше те готьне, wәки әwана дькарьн сәр «щьвата мә» һин бьн, йан жи «һинбуна Кʹьтеба Пироз» шәхси тʹәви wан дькарьн дәрбаз кьн. Бь ве йәке әw һащәт, нә кö тʹәне мә тʹәви мәрьва дькә нас, ле öса жи мәрьвед кö «фәʹм дькьн һʹәwщәтийа хwәйә рʹöһʹани», тʹәглиф дькә Кʹьтеба Пироз тʹәви мә һин бьн (Мәт. 5:3, ДТʹ). Фьрqи тʹöнә мәрьве бьхwазьн йан нәхwазьн Кʹьтеба Пироз һин бьн, йәкә чахе әwана тенә сәр щьватед мә, әм wана бь дьл у щан qәбул дькьн. Һәрге әwана бенә сәр щьвинед мә, wе бьвиньн у бьбьһен кö чьqас тьшт әwана дәрһәqа Кʹьтеба Пироз дькарьн пебьһʹәсьн.

8. Чьрʹа гәләк фәрз ә wәки мәрьв һәма щарәке бенә сәр щьвате? Мәсәле биньн.

⁸ Гәләк фәрз ә, wәки әм гоне щарәке мәрьва тʹәглиф кьн сәр щьвата мә. Чьрʹа әw йәк öса фәрз ә? Әwана wе бивиньн, wәки әм мәрьва рʹастийа Кʹьтеба Пироз һин дькьн у wана тʹәви Хwәде дькьнә нас, ле динед qәлп, демәк Бабилона Мәзьн ве йәке накә (Иша. 65:13). Жьн-мерәк, Линда у Рей кʹижан жь Амәрикайе нә, чәнд сал пешда әв фьрqи дитьнә. Wана Хwәде баwәр дькьр у рʹöһʹанида бьрʹчи бун, ләма дәстпекьрьн һәрʹьн һʹәму деред кö шәһәре wанда һәнә. Дәстпекеда wана хwәрʹа qьрар кьр, wәки чахе дерәке бьжберьн, гәрәке дö тьшта һьлдьнә һʹәсаб. Йа пешьн, әwана гәрәке ве дереда тьшта һин бьн, у йа дöда, кʹьнщхwәкьрьна әндәмед ве дере, гәрәке лайиqи хьзмәткʹаред Хwәде бә. Wана нава чәнд салада, тʹәсәлийа һʹәму деред шәһәре хwәда кьрьн, ле дьлшькәсти ман. Әwана wедәре нә тьштәки һин бун, нә жи әндәмед дере лайиq хwә дькьрьн. Паши ве йәке чахе wана тʹәсәлийа дера пашьн кьр, Линда чу сәр хәбата хwә, ле Рей чу мале. Рʹева Рей пе авте бәр Ода Щьватерʹа дәрбаз дьбу, у дьле хwәда гот: «Бьсә әз бькʹәвьмә wедәре жи, у бьвиньм һәла wедәре чь дьqәwьмә». Һәмьки, әw рʹожәкә лапә хwәш бу бона wи! Һәр кәси Ода Щьватеда wи бь дьл у щан qәбул кьрьн, wирʹа һʹәйф бун, у лайиq хwәкьри бун. Рей сәр кʹöрсийед пешьн рʹуньштьбу у чь бьһист, гәләк дьле wи гьрт. Әw йәк дькә бира мә гьлийед Паwлос, чахе әwи дәрһәqа мәрьвәки гот, кʹижан щара пешьн те щьвате у дьбежә: «Хwәде нав wәда йә!» (1 Корн. 14:23-25). Паши ве йәке, Рей һәртʹьм рʹоже Ләʹда дьчу щьвате, паше жи ида дәстпекьр wәʹде бәрнама щьвине жи һәрʹә. Линдайе жи дәстпекьр бе сәр щьвате, у wана wәкә 70 салийед хwәда һинбуна Кʹьтеба Пироз дәстпекьрьн у һатьнә ньхöмандьне.

ҺАЩӘТЕД БОНА ДӘСТПЕКЬРЬНА ХӘБӘРДАНЕ

9, 10. а) Чьрʹа һеса йә бәлавока бьдьнә хәбате? б) Шьровәкьн кö ча бьдьнә хәбате бәлавока бь наве «Чь йә Пʹадшатийа Хwәде?».

⁹ Бәлавок. Һʹәйшт бәлавокед мә һащәтед баш ьн. Гәләк һеса йә wана бьдьнә хәбате, сәва хәбәрдане дәстпекьн. Әw бәлавок сала 2013 һатьнә дәрхьстьне, у wәкә 5 милиард һәв һатьнә нәшьркьрьне! Әw һащәт бь форматәке һатьнә дәрхьстьне, у ләма һәрге һун һин бьн кö жь wана йәке бьдьнә хәбате сәва хәбәрдане дәстпекьн, һуне бькарьбьн wи щурʹәйи йед майин жи бьдьнә хәбате. Ле чаwа?

¹⁰ Мәсәлә, дьбәкә һун дьхwазьн бьдьнә хәбате ве бәлавоке «Чь йә Пʹадшатийа Хwәде?». Дина мәрьва бьдьнә сәр пьрса жь рʹуйе бәлавоке, у бьпьрсьн: «Һун qә фькьринә сәр ве йәке, кö чь йә Пʹадшатийа Хwәде? Һьнәк дьфькьрьн wәки әw  . . .». Паше бьпьрсьн һәла әwана wе жь wан се щаба кʹижане бьжберьн. Фьрqи тʹöнә, әwе щаба рʹаст бьжберә йан на, бәлавоке вәкьн, кʹидәре ньвисар ә «Кʹьтеба Пироз Дьбежә», у бьхунә рʹеза жь Данийел 2:44 у Ишайа 9:6. Һәрге дьбә, хәбәрдане бәрдәwам кьн. Хьлазийеда, сәр рʹупʹела пашьн бьхуньн әван бьнсәрийа «Дәрһәqа ве йәке Бьфькьрьн»: «Бьн сәрwерийа Пʹадшатийа Хwәде жийина мә wе чаwа бә?». Әw йәк wе һʹим дайнә, сәва щарәкә дьн хәбәрдане бәрдәwам кьн. Чахе һун диса рʹасти һәв бен, дина мәрьв бьдьн сәр дәрса 7, жь брошура «Мьзгинийа Хwәде сәва Мәрийа». Әw брошура жи йәк жь wан һащәта йә, бь сайа кʹижани әм дькарьн һинбуна Кʹьтеба Пироз тʹәви мәрьва дәстпекьн.

ҺАЩӘТЕД КÖ БАWӘРИЙЕ ҺЬНДАВА КʹЬТЕБА ПИРОЗ ПЕШДА ТИНЬН

11. Журналед мә бона чь нете тенә дәрхьстьне, ле әм гәрәке дәрһәqа wан чь бьзаньбьн?

¹¹ Журнал. «Бьрща Qәрәwьлийе» у «Һʹьшйар бьн!» журналед гәләк бәлабуйи нә, кʹижан кö сәр гәләк зьмана тенә wәлгәрʹандьне! Әw журнал нав тʹәмамийа дьнйайе тенә бәлакьрьне, ләма жи рʹуйед wан журнала öса тенә сазкьрьне, wәки һʹәмуйарʹа һʹәwас бә. Әм гәрәке әwан һащәта бьдьнә хәбате, сәва дина мәрьва бьдьнә сәр тьштед лапә фәрз әʹмьрда. Ле сәва әван журнала рʹьнд бәла кьн, әм гәрәке бьзаньбьн һәр йәк жь wан бона чь щурʹә хwәндәвана йә.

12. а) Журнала «Һʹьшйар бьн!» бона чь щурʹә хwәндәвана те дәрхьстьне, у нета вейә сәрәкә чь йә? б) Wан пашwәхтийа чь qәwьмандьнед һʹәwас һәбунә чахе wә әв журнал да хәбате?

¹² «Һʹьшйар бьн!» бона wан хwәндәвана йә, йед кö дәрһәqа Кʹьтеба Пироз һьнәки заньн йан жи qә ньзаньн. Әwана дьбәкә ньзаньн дәрһәqа һинкьрьнед Мәсиһити, у дьqәwьмә итʹбарийа хwә тʹö религийа найньн, йан жи ньзаньн wәки Кʹьтеба Пироз дькарә wанрʹа кʹаре бинә. Ле нетәкә сәрәкә йа ве журнале әw ә, wәки мәрьва бьдә баwәркьрьне кö Хwәде һәйә (Рʹом. 1:20; Ибрн. 11:6). Öса жи әw али хwәндәвана дькә баwәр кьн, кö Кʹьтеба Пироз бь рʹасти «хәбәра Хwәде» йә (1 Тʹеслн. 2:13). Се дәрхьстьнед ве журнале йед сала 2018, әw ьн: «Рʹийа кö Дьбә Бәрбь Бәхтәwарийе», «12 Гавед Керһати бона Бәхтәwарийа Малбәте», у «Аликʹари бона Wан, йед кö Мәрьвед Хwә Öнда Кьрьнә».

13. а) «Бьрща Qәрәwьлийе» бона бәлакьрьне, сәва чь щурʹә хwәндәвана йә? б) Wан пашwәхтийада чь qәwьмандьна һʹәwас бал wә һәбу дәрһәqа ве һащәте?

¹³ «Бьрща Qәрәwьлийе» бона бәлакьрьне, сәва wан хwәндәвана йә, йед кö Хwәде баwәр дькьн у qәдьре Кʹьтеба Пироз дьгьрьн. Әw журнал дина wан дьдә сәр һинкьрьнед Кʹьтеба Пироз. Рʹаст ә әwана дьбәкә дәрһәqа Кʹьтеба Пироз һьнәки заньн, ле әwана һинкьрьнед wе нәрʹаст фәʹм дькьн (Рʹом. 10:2; 1 Тимтʹ. 2:3, 4). Се дәрхьстьнед ве журнале йа сала 2018, щаба wан се пьрса дьдьн: «Гәло Кʹара Хwәндьна Кʹьтеба Пироз Һәйә?», «Гәло Чь Ахьри Һивийа Мә йә?», у «Гәло Дьле Хwәде сәр Тә Дьшәwьтә?».

ҺАЩӘТ КÖ ҺʹӘWАСА МӘРЬВА ПЕШДА ТИНЬН

14. а) Чар видеойед мә бона чь нете нә? б) Wәʹде хьзмәтийе wә ча әw видео данә хәбате у ча әw йәк сәр мәрьва һʹöкöм буйә?

¹⁴ Видео. Wәʹде Исада нәщара тʹәне һащәтед дәста дьданә хәбате. Ле рʹожа иройин, нәщар һащәтед әләктрики дьдьнә хәбате, мәсәлә рʹьндәйа токе, дрел, бьрәкед токе у мәкʹинед дьн. Хенщи әʹдәбйәтед нәшьркьри, бал мә иро һәнә видеойед баш, жь wана чар һәв дькʹәвьнә нава һащәтед мәйә сәрәкә: «Чьрʹа Һин бьн Кʹьтеба Пироз?», «Ча Дәрбаз Дьбә Һинбуна Кʹьтеба Пироз», «Чь Дьqәwьмә Ода Щьватеда?», у «Шәʹдед Йаһоwа бь Рʹасти Кʹи нә?». Әw видео кö 2 дәqә кемтьр дькʹьшиньн, гәләк керһати нә бона сәрледана пешьн. Ле видеойед дьреж, ида әм дькарьн бьдьнә хәбате wәʹде сәрледана дöда у öса жи тʹәви wан мәрьва wәʹде кʹижана һәйә. Әw һащәтед баш дькарьн мәрьва һелан кьн, wәки дәстпекьн Кʹьтеба Пироз һин бьн у бенә сәр щьватед мә.

15. Мәсәле биньн кö чахе мәрьв сәр зьмане хwә видеойа дьньһерʹьн, ча сәр wан һʹöкöм дьбә.

¹⁵ Дина хwә бьдьнә qәwьмандьнәкә хушкәке, кö рʹасти жьнькәкә жь Микронесйайе һат, зьмане кʹижане Йапи бу. Хушка мә жерʹа сәр зьмане wе видео бь наве «Чьрʹа Һин бьн Кʹьтеба Пироз» нишан кьр. Гава видео векʹәт, жьньке гот: «Әw сәр зьмане мьн ә. Әw гәләк әʹщебмайи йә! Видеойеда аксента мерьк жи, мина аксента ве гьраве йә, жь кʹидәре кö әз һатьмә! Әw һәма сәр зьмане мьн хәбәр дьдә!». Паши ве йәке әwе гот, wәки дьхwазә малпәра мә jw.org-да, һәр тьшти сәр зьмане хwә бьхунә у бьньһерʹә (Бәрамбәр кьн Кʹаред Шандийа 2:8, 11.) Ньһа дина хwә бьдьнә qәwьмандьна дьн. Хушкәкә мә жь Амәрикайе, кöрʹе бьре хwәрʹа кö wәлате хәрибда дьжи, линка ве видеойе сәр зьмане wи шанд. Гава әwи әв видео ньһерʹи, жерʹа пе емаиле ньвиси: «Әw пʹара кö те готьне, wәки дьнйа бьн һʹöкöме кәсе зöлмда йә, һʹәwаса мьн пешда ани. Мьн һинбуна Кʹьтеба Пироз хwәст». Әw wи wәлатида дьжи, кʹидәре шьхöле мә qәдәхәкьри йә!

ҺАЩӘТ КÖ РʹАСТИЙЕ ҺИН ДЬКЬН

16. Шьровәкьн нета wан һәр әʹдәбйәта: а) «Гöһ Бьдә Хwәде у Бьжи Һʹәта-Һʹәтайе». б) «Мьзгинийа Хwәде сәва Мәрийа». в) «Кʹи Иро Qьрара Йаһоwа Дьqәдинә?».

¹⁶ Брошур. Ча һун дькарьн рʹастийе wан мәрьва һин кьн, йед кö хwәндьне ньзаньн, йан жи сәр зьмане кʹижана әʹдәбйәт тʹöнәнә? Сәва wан мәрьва брошура «Гöһ Бьдә Хwәде у Бьжи Һʹәта-Һʹәтайе»b һәйә. Сәва һинбуна Кʹьтеба Пироз дәстпекьн, һащәта гәләк баш, әw һәйә брошура «Мьзгинийа Хwәде сәва Мәрийа». Һун дькарьн мәрьварʹа сәр рʹупʹела пашьн 14 пьрса нишан кьн, у бьра әw хwәха бьжберә, кʹижан пьрс жерʹа һʹәwас ә. Паше дәстпекьн тʹәви wи әве дәрсе шеwьр кьн. Ле wә әw метʹод qә wәʹде сәрледана дöбарә дайә хәбате? Брошура сьсийа кö дькʹәвә нава һащәтед мә, әw һәйә брошура «Кʹи Иро Qьрара Йаһоwа Дьqәдинә?». Әw брошура аликʹарийе дьдә wан, йед кö Кʹьтеба Пироз һин дьбьн, wәки дәрһәqа тʹәшкиләта мә һе зедә пебьһʹәсьн. Сәва кö һин бьн ча әве брошуре wәʹде һинбуна Кʹьтеба Пироз бьдьнә хәбате, бьньһерʹьн бәрнама щьвине «Мина Иса Мәсиһ Бьжин у Хьзмәт кьн», йа мәһа Адаре, сала 2017.

17. а) Нета кʹьтебед бона һинбуне чь йә? б) Чь те дәʹwакьрьне жь wан, йед кö дьхwазьн бенә ньхöмандьне, у чьрʹа?

¹⁷ Кʹьтеб. Чахе wә ида һинбуна Кʹьтеба Пироз пе брошуре дәстпекьр, ида чьчах дьхwазьн, дькарьн кʹьтеба «Кʹьтеба Пироз Чь Дьбежә?»c дәрбаз бьн. Пе ве кʹьтебе, әw wе дәрһәqа һинкьрьнед Кʹьтеба Пирозә сәрәкә, һе зедә занәбуне бьстинә. Паши ве йәке, чахе wә ида әw кʹьтеб хьлаз кьр, у һәрге әw мәрьв рʹöһʹанида пешда дьчә, бәрдәwам кьн һинбуне пе кʹьтеба «Чаwа Нава Һʹьзкьрьна Хwәдеда Бьминьн?». Әw һащәт wе wи мәрьви һин кә, кö чаwа ширәт у принсипед Кʹьтеба Пироз әʹмьре хwәда бьдә хәбате. Бир нәкьн, wәки һәла һе паши ньхöмандьне жи, шагьртед тʹәзә гәрәке бәрдәwам кьн һинбуне, һʹәта кö әw һәрдö кʹьтеба хьлаз кьн. Әw йәк wе али wан бькә баwәрийеда qәwи бьн. (Бьхунә Колоси 2:6, 7.)

18. а) 1 Тимотʹейо 4:16 чь мә һелан дькә сәва рʹастийе һин кьн, у кʹара ве йәке чь йә? б) Чахе әм Һащәтед бона Һинкьрьне дьдьнә хәбате, нета мә гәрәке чь бә?

¹⁸ Әм Шәʹдед Йаһоwа, борщдар ьн «хәбәра мьзгинийейә рʹаст» мәрьва һин кьн, чьмки öса әwана дькарьн жийина һʹәта-һʹәтайе бьстиньн. (Колс. 1:5; бьхунә 1 Тимотʹейо 4:16.) Сәва әм wи шьхöли рʹьнд бькьн, бал мә һәнә Һащәтед бона Һинкьрьне, чь кö мәрʹа гәләк лазьм ьн. (Бьньһерʹьн «Һащәтед Сәрәкә бона Һинкьрьне».) Wәрә әм чьqас дькарьн әwан һащәта бь һостәти бьдьнә хәбате. Һәр кәс жь мә хwәха дькарә сафи кә, кʹижан әʹдәбйәте бьдә хәбате у кʹәнге. Ле әм заньн, wәки нета мә әw нинә, кö тʹәне әʹдәбйәта бәла кьн, йан жи wан мәрьварʹа әʹдәбйәтед мә бьһельн, йед кö нахwазьн гöһ бьдьнә мә. Нета мә әw ә, wәки мәрьвед дьлсах, мьлук у рʹöһʹанида бьрʹчи, демәк йед кö һазьр ьн мьзгинийе qәбул кьн, бькьнә шагьрт (Кʹар. Шанд. 13:48; Мәт. 28:19, 20).