Wәʹде Гöһастьна Дьлрʹьһʹәтийе Хwәй кьн

1, 2. а) Чахе әʹмьре мәда тьштәк ньшкева те гöһастьне, әw йәк ча дькарә сәр мә һʹöкöм бә? (Бьньһерʹә шькле әʹwльн.) б) Ль гора Зәбур 131, чь дькарә али мә бькә дьлрʹьһʹәт бьминьн?

ЛОИД у Александра 25 сала зедәтьр Бәйтʹәледа хьзмәт дькьрьн. Ле паше әwана һатьнә кʹьфшкьрьне ча пешәнг. Чахе әwана дәрһәqа wе йәке пеһʹәсийан, пешийе гәләк бәрхwә кʹәтьн. Лоид гьли дькә: «Мьн Бәйтʹәл у шьхöле кö мьн wедәре дькьр öса зәʹф һʹьз дькьр, wәки мьн нә жи дьда бәр чʹәʹве хwә кö әзе бей ве йәке бькарьбьм бьжим. Мьн фәʹм дькьр мәʹнийед wе гöһастьне, ле чахе һʹәфти у мәһ дәрбаз дьбун, мьн гәләк щар хwә öса тʹәхмин дькьр, кö те бежи әз һатьмә инкʹаркьрьне». Лоид тʹәвһәв дьбу, чьмки щара сәр ве гöһастьне рʹаст дьньһерʹи, щара жи ньшкева дькʹәтә депресийе.

² Чахе әʹмьре мәда ньшкева тьштәк дьqәwьмә, дьбәкә тьрс дькʹәвә дьле мә у әм дькʹәвьнә стресе (Мәтʹлк. 12:25). Щара мәрʹа һәла һе жи чәтьн ә wан гöһастьна qәбул кьн. Ле әм ча дькарьн wан дәрәщада дьлрʹьһʹәт бьминьн? (Бьхунә Зәбур 131:1-3.) Wәрә әм шеwьр кьн, кö чаwа хьзмәткʹаред бәре у йед иройин, нава гöһастьнада дьлрʹьһʹәти хwәй кьрьнә.

ЧА «ӘʹДЬЛАЙИЙА ХWӘДЕ» АЛИ МӘ ДЬКӘ?

3. Чаwа әʹмьре Усьв ньшкева һатә гöһастьне?

³ Wәрә шеwьр кьн сәрһатийа Усьв. Баве Усьв жь һʹәму кöрʹед хwә, гьшка зәʹфтьр wи һʹьз дькьр. Жь бо ве йәке бьред wи һʹәвсуди wи дькьрьн, у чахе әw wәкә 17 сали бу, wи дилти фьротьн (Дәстп. 37:2-4, 23-28). Wәкә 13 сала Усьв Мьсьреда хöламтийеда у кәледа бу. Һьн жи әw жь баве хwә гәләк дур бу, кʹижани әw зәʹф һʹьз дькьр. Wи һʹале хwәда әwи дькарьбу нета әʹмьре хwә öнда кьра у бьбуйа йәки һерс. Ле чь али Усьв кьр, wәки нәбу йәки öса?

4. а) Чахе Усьв кәледа бу, әw дькарьбу дәрһәqа чь бьфькьрийа? б) Йаһоwа ча щаба дöайед Усьв дьда?

⁴ Чахе Усьв кәледа бу, әw дьбәкә кʹур дьфькьри кö чаwа Йаһоwа али wи дькьр (Дәстп. 39:21; Зәб. 105:17-19). Дьqәwьмә әw öса жи дьфькьри сәр хәwнед пʹехәмбәртийе, кʹижан кö әwи щаһьлтийеда дитьбу. Әwе йәке баwәрийа wи qәwи дькьр, кö Йаһоwа wи qәбул дькә (Дәстп. 37:5-11). Öса жи әwи дьбәкә гәләк дöа дькьр у дьле хwә Йаһоwарʹа вәдькьр (Зәб. 145:18). Сәр дöайед wийи дьлсах, Йаһоwа щаба Усьв да сәва әw дöдьли нәбә, wәки чь жи әʹмьре wида бьqәwьмә, Әw wе тʹьме «тʹәви wи» бә (Кʹар. Шанд. 7:9, 10).a

5. «Әʹдьлайийа Хwәде» ча дькарә мә qәwи кә, сәва бәрдәwам кьн Хwәдерʹа хьзмәт кьн?

⁵ Нава тәнгасийед гьранда әм дькарьн «әʹдьлайийа Хwәде» бьстиньн, кʹижан кö һʹьш-аqьле мә хwәй дькә у мә дьлрʹьһʹәт дькә. (Бьхунә Филипи 4:6, 7.) Чахе әм дьлтәнг дьбьн у гәләк бәрхwә дькʹәвьн, әʹдьлайа Хwәде дькарә мә qәwи кә, сәва әм дәсте хwә сьст нәкьн у бәрдәwам кьн Йаһоwарʹа хьзмәт кьн. Wәрә әм ньһа чәнд сәрһатийед хушк-бьра шеwьр кьн, йед кö әʹдьлайа Хwәде сәр хwә тʹәхмин кьрьнә.

АЛИКʹАРИЙЕ ЖЬ ЙАҺОWА БЬХWАЗЬН СӘВА ДИСА ДЬЛРʹЬҺʹӘТИЙЕ БЬСТИНЬН

6, 7. Дöайед конкрет ча али мә дькьн, кö диса әʹдьлайе бьстиньн? Мәсәле биньн.

⁶ Чахе Райан у Щулийет пеһʹәсийан, wәки хьзмәтийа пешәнгтийа wанә мәхсус ида хьлаз бу, әwана гәләк бәрхwә кʹәтьн. Райан дьбежә: «Мә дәрберʹа Йаһоwарʹа дöа кьр. Мә заньбу, wәки әw дәрәщә мәщаләкә баш ә, сәва кö итʹбарийа хwә һьндава Хwәде бьдьнә кʹьфше. Щьвата мәда гәләк мәрьв һәбун, йед кö тʹәзә һатьбунә нава рʹастийе, ләма мә Йаһоwарʹа дöа дькьр, wәки али мә бькә сәва әм мәсәла баш бьн баwәрийеда».

⁷ Ле Йаһоwа ча щаба дöайе wан да? Райан дьбежә: «Һәма паши дöайе мә, фькьред нәбаш у дьлтәнги кö мә пешийе тʹәхмин дькьр, дәрбаз бун. Әʹдьлайа Хwәде дьл у һʹьш-аqьле мә хwәй дькьр. Мә фәʹм дькьр, wәки әм дькарьн диса жи Йаһоwарʹа хьзмәт кьн, һәрге ньһерʹандьна хwә рʹаст хwәй кьн».

8-10. а) Чаwа wәʹде дьлтәнгбуне рʹöһʹе Хwәдейи пироз али мә дькә? б) Чаwа Йаһоwа али мә дькә әм хьзмәтийа wида хирәт бьминьн?

⁸ Рʹöһʹе Хwәдейи пироз дькарә һьн дьле мә рʹьһʹәт кә, һьн жи бинә бира мә wан рʹезед жь Кʹьтеба Пироз, кʹижан wе али мә бькьн кö әм фәʹм кьн әʹмьре мәда чь йа лапә фәрз ә. (Бьхунә Йуһʹәнна 14:26, 27.) Дина хwә бьдьн мәсәла жьн-мерәки бь наве Филип у Мери, йед кö wәкә 25 сала Бәйтʹәледа хьзмәт дькьрьн. Нава чар мәһада һәрдö жи дайикед хwә у диса мәрьвәки хwәйи незик öнда кьрьн, у һьн жи мьqати баве Мери дьбун, кʹижан кö һʹьшда нәхwәш ә.

⁹ Филип тинә бира хwә: «Мьн тʹьре мьн һеса тәйах дькьр, ле тьштәк кем бу. Щарәке, готарәкә ‹Бьрща Qәрәwьлийеда› чʹәʹве мьн чу сәр рʹеза Колоси 1:11. Мьн фәʹм кьр, wәки рʹаст ә мьн сәбьр дькьр, ле нә бь тʹәмами. Мьн гәрәке ‹бь думька дьреж› у ‹әшq› сәбьр кьра. Әве рʹезе ани бира мьн, wәки шабуна мьн нә кö дәрәщед мьва гьредайи йә, ле qәwата рʹöһʹе Хwәдейи пирозва, кö сәр әʹмьре мьн һʹöкöм дькә».

¹⁰ Филип у Мери хьзмәтийа Йаһоwада хирәта хwә öнда нәкьрьн, у бона ве йәке Йаһоwа wана бь гәләк щурʹа кʹәрәм кьр. Wәʹдә шунда чахе әwана жь Бәйтʹәле чун, wана тʹәви чәнд мәрьва һинбуна Кʹьтеба Пироз дәстпекьр, йед кö рʹöһʹанида зу пешда дьчун у һәла һе жи хwәстьн, wәки һʹәфте чәнд щара һинбуне дәрбаз бьн. Мери тинә бира хwә у дьбежә: «Әwана шабуна мә бун, у Йаһоwа бь wана мәрʹа дьгот, wәки һәр тьшт wе баш бә».

ТЬШТЕД ÖСА БЬКӘ КÖ КʹӘРӘМА ЙАҺОWА БЬСТИНИ

11, 12. а) Чаwа Усьв мәщал да Йаһоwа, wәки wи кʹәрәм кә? б) Чаwа Усьв бона сәбьра хwә һатә кʹәрәмкьрьне?

¹¹ Чахе әʹмьре мәда ньшкева тьштәк те гöһастьне, әм дькарьн дәстпекьн бона ахьрийе гәләк бәрхwә кʹәвьн у һʹьш-аqьле хwә педа бьдьнә сәр проблема хwә. Әw йәк дькарьбу тʹәви Усьв жи бьqәwьмийа. Ле дәwсе әwи һәр тьшт дькьр, сәва һʹале хwәда чьqас дькарә сәбьр кә, у бь ве йәке әwи мәщал да Йаһоwа кö щәфе wи кʹәрәм кә. Чаwа бал Потифар Усьв рʹьнд дьхәбьти, әwи кәледа жи һәр шьхöл кö сәрwере кәле дьда wи, рʹьнд дьани сери (Дәстп. 39:21-23).

¹² Рʹожәке, Усьв щабдари станд, wәки пәй дö мера бьньһерʹә, йед кö бәре бәрдәстийед Фьрәwьн бун. Щарәке Усьв дит кö кʹәсәр дьһатә wан у әwана нәрʹьһʹәт бун бона хәwнед кö wана дитьбу. Әwи бь дьле хwәйи сах wанрʹа гот, wәки дьле хwә жерʹа вәкьн (Дәстп. 40:5-8). Усьв нә жи заньбу, wәки әw хәбәрдана wи тʹәви wан, wе ахьрийеда азайе жерʹа бинә. Рʹаст ә Усьв паши ве хәбәрдане диса дö сала кәледа бу, ле паше әw аза кьрьн, у һәма ве рʹоже әw бу мәрьве дöда паши Фьрәwьн (Дәстп. 41:1, 14-16, 39-41).

13. Чаwа әм дькарьн мәщале бьдьнә Йаһоwа, wәки мә кʹәрәм кә?

¹³ Мина Усьв, әм жи щара дәрәща хwә нькарьн бьгöһезьн йан жи әм нькарьн проблема хwә сафи кьн. Ле йәкә һәрге әм сәбьр дькьн у ве дәрәщеда алийе хwәда һәр тьшти дькьн, әм мәщале дьдьнә Йаһоwа, wәки мә кʹәрәм кә (Зәб. 37:5). Бәле, щара әм сьст дьбьн у дьwәстьн, ле әм тʹö щар бечʹарә наминьн (2 Корн. 4:8). Әw гьлийед Паwлос жь ве рʹезе, wе сәр мә бенә сери, илаһи һәрге әм хьзмәтийеда хирәта хwә öнда нәкьн.

ХЬЗМӘТИЙА ХWӘДА ХИРӘТ БӘ

14-16. Нава гöһастьнада Филипойе мьзгиндар ча хьзмәтийа хwәда хирәт ма?

¹⁴ Филипойе мьзгиндар мәсәләкә баш һишт ве йәкеда, кö wәʹде гöһастьна, хьзмәтийеда хирәта хwә öнда нәкьр. Оршәлимеда әwи щабдарийа тʹәзә станд, ле паше ньшкева тьштәк qәwьми. Стәйфанb һатә кöштьне, у паши ве йәке Оршәлимеда мьqабьли Мәсиһийа зерандьнәкә гьран дәстпебу (Кʹар. Шанд. 6:1-6). Жь бо ве йәке, Мәсиһи жь wедәре рʹәвин у һәв бәла бун. Ле һʹьш-аqьле Филипо диса жи сәр хьзмәтийе бу, ләма әw чу Самәрйайе, сәва мьзгинийе бәла кә wан мәрьварʹа, йед кö мьзгини һе нәбьһистьбун (Мәт. 10:5; Кʹар. Шанд. 8:1, 5).

¹⁵ Филипо һазьр бу һәрʹә һʹәму щийа, кʹидәре кö рʹöһʹе Хwәдейи пироз рʹебәри wи бькьра. Ләма Йаһоwа wи да хәбате сәва wедәре мьзгинийе бәла кә, кʹидәре мәрьва һе нәбьһистьбун. Щьһу мәрьвед Самәри бәр тьштәкива һʹәсаб нәдькьрьн у һьндава wанда нәбаш бун. Ле Филипо фьрqи нәдькьрә ортʹа мәрьва у әw йәк дьле Самәрийа дьһат. Кʹьтеба Пироз дьбежә, wәки әʹлаләте «бь дьл» гöһ дьда Филипо (Кʹар. Шанд. 8:6-8).

¹⁶ Паши ве йәке, рʹöһʹе Хwәдейи пироз рʹебәри Филипо кьр, әw чу Ашдоде у Qәйсәрийайе, кʹидәре кö гәләк мәрьвед пʹутпʹарьст дьжитьн (Кʹар. Шанд. 8:39, 40). Wәкә 20 сала паши хьзмәтийа Самәрийайеда, ча те кʹьфше дәрәща wи диса һатә гöһастьне. Малбәта wи ида һәбу, у әw wе мьһаледа дьжит, кʹидәре мьзгини бәла дькьр. Нава wан гöһастьнада, Филипо йәкә хирәта хwә öнда нәкьр, у ләма Йаһоwа wи у малбәта wи гәләк кʹәрәм кьр (Кʹар. Шанд. 21:8, 9).

17, 18. Хьзмәти ча али мә дькә, чахе әʹмьре мәда тьштәк те гöһастьне?

¹⁷ Гәләк хьзмәткʹаред һәртʹьм тʹәхмин кьрьн, кö чахе әwана һʹьш-аqьле хwә датиньн сәр хьзмәтийе, әw йәк али wан дькә, wәʹде гöһастьна шабуне öнда нәкьн у дьлрʹьһʹәт бьминьн. Мәсәлә, жьн у мер жь Африкайа Башуре, Полит у Осборн чахе жь Бәйтʹәле чун, әwана бәрхwә дькʹәтьн, чьмки гәрәке хwәрʹа һьн хәбата лайиq бьдитана, һьн жи щи сәва бьжин. Осборн дьбежә: «Мә тʹьре әме зу хәбате хwәрʹа бьвиньн, ле öса нәбу». Жьна wи, Полит тинә бира хwә: «Мә се мәһа нькарьбу хәбат бьдита, у пʹәре мәйи зедә жи тʹöнә бу. Әw рʹасти жи чәтьнайикә мәзьн бу».

¹⁸ Ле ве чәтьнайеда чь али wан кьр? Осборн гьли дькә: «Мә тʹәви щьвате хьзмәт дькьр, у һʹәчʹи зәʹф әве йәке али мә кьр, кö әм гәләк бәрхwә нәдькʹәтьн у шабуна хwә öнда нәдькьр. Мә хwәрʹа сафи кьр, wәки дәwса кö әм рʹунен у бәрхwә кʹәвьн, һе баш ә педа нав шьхöле хьзмәтийеда бьн. Әwе йәке мәрʹа шабунәкә мәзьн ани. Мә һʹәму щийа хәбат дьгәрʹийа, у ахьрийеда мә хwәрʹа хәбат дит».

БЬ СӘБЬР ҺИВИЙА ЙАҺОWА БЬН

19-21. а) Чь wе али мә бькә дьлрʹьһʹәтийе хwәй кьн? б) Әм чь кʹаре дькарьн бьстиньн чахе һини гöһастьна дьбьн?

¹⁹ Чаwа мәсәлед жоре нишан кьрьн, һәрге wәʹде гöһастьна, әм алийе хwәда һәр тьшти дькьн у бь сәбьр һивийа Йаһоwа нә, әме дьлрʹьһʹәтийе öнда нәкьн. (Бьхунә Миха 7:7.) Һьнге әме фәʹм кьн, wәки чахе әм һини гöһастьна дьбьн, һәләqәтийа мә тʹәви Йаһоwа qәwи дьбә. Полит бәʹса кʹижане мә жоре кьр, дьбежә: «Гöһастьна кʹьфшкьрьна мә, әз һин кьрьм, кö бь рʹасти чь те һʹәсабе итʹбарийа хwә Йаһоwа биньм, һәла һе жи гава проблемада те бежи чʹарәке навиньм. Достийа мьн тʹәви wи һе qәwи бу».

²⁰ Мери бәʹса кʹижани мә жоре кьр, һʹәта ньһа мьqати баве хwәйи әʹмьрда мәзьн дьбә, у һьн жи пешәнг ә. Әw дьбежә: «Мьн фәʹм кьр, wәки чахе әз бәрхwә дькʹәвьм, әз гәрәке дöа бькьм у паше һеса бьм. Дәрсәкә мәзьн кö әз әʹмьре хwәда һин бум, әw ә кö һʹәму дәрд у проблемед хwә бьдьмә дәстед Йаһоwа. Әw дәрс wе әʹсә ахьрийеда жи кери мьн бе».

²¹ Лоид у Александра, бәʹса кʹижани мә дәстпека готареда кьр, дьбежьн wәки гöһастьна дәрәща wан, баwәрийа wан öса щерʹьбанд, кö әwана әʹщебмайи ман. У wана гот: «Әве щерʹьбандьне әшкәрә кьр, һәла баwәрийа мә жь дьл ә йан на, у öса жи баwәрийа мә дькарә wәʹде тәнгасийа мә qәwи кә у дьлбинийе бьдә мә йан на. Әв дәрәщә сәр мә баш һʹöкöм бу у әм бунә мәрьвед һе баш».

22. Чахе wәʹде гöһастьна чь дәсте мә те әм дькьн, һьнге чьда әм гәрәке дöдьли нәбьн?

²² Һәрге әʹмьре wәда тьштәк ньшкева те гöһастьне, мәсәлә, кʹьфшкьрьна wә, йан сьһʹәт-qәwата wә, йан жи малда щабдарийед wәйи тʹәзә зедә дьбьн, дöдьли нәбьн wәки Йаһоwа wә һʹьз дькә у wе wәʹдәда али wә бькә (Ибрн. 4:16; 1 Пәт. 5:6, 7). Wи wәʹдәйи, алийе хwәда чь дәсте wә те бькьн. Бь дöа незики Баве хwәйи әʹзмана бьн, у һин бьн хwә бькьнә бьн пʹәрʹе wи. Бь wи щурʹәйи, чь жи бьqәwьмә у бе гöһастьне, һуне дьлрʹьһʹәтийе öнда нәкьн.