Һӧрмәт кьн Зәԝаще, чьмки Әԝ Сазкьрьна Хԝәде йә

1, 2. Ибрани 13:4 гәрәке мә бәрбь чь һелан кә?

ҺӘР кәс жь мә дьхԝазә Йаһоԝа һӧрмәт-рʹумәт кә. Йаһоԝа һежайи һӧрмәте йә у әԝ соз дьдә мә, ԝәки әԝе жи мә һӧрмәт кә (1 Сам. 2:30; Мәтʹлк. 3:9; Әʹйан. 4:11). Әԝ ӧса жи дьхԝазә ԝәки әм ԛәдьре мәрьва жи бьгьрьн, мәсәлә сәрԝеред дәԝләте (Рʹом. 12:10; 13:7). Ле әʹмьре мәда диса һәйә тьштәк, чь кӧ әм гәрәке һӧрмәт кьн. Әԝ һәйә зәԝащ.

² Паԝлосе шанди ньвиси: «Һʹал-зәԝащ һʹәмуйарʹа нав-намуси бә у щи-ньвин һʹәлал бә» (Ибрн. 13:4). Дәрһәԛа зәԝаще Паԝлос нә кӧ тʹәне һәма ӧса хәбәр да, ле әԝи Мәсиһи ширәт кьрьн, ԝәки зәԝаще һӧрмәт у ԛимәт кьн. Ле һун жи сәр зәԝаще ӧса дьньһерʹьн, илаһи һәрге һун зәԝащеда ньн?

3. Иса дәрһәԛа зәԝаще кʹижан ширәтәкә фәрз да? (Бьньһерʹә шькле әʹԝльн.)

³ Һәрге һун зәԝаще һӧрмәт дькьн, ԝәки ӧса нә һун чʹәʹв дьдьнә Иса, кʹижан кӧ мәсәла лапә баш ә. Иса хԝәха зәԝащ һӧрмәт дькьр. Чахе Ферьсийа дәрһәԛа һәвԛәтандьне жь ԝи пьрсин, Иса гьлийед Хԝәде ԝәкʹьланд, кʹижан кӧ әԝи гот чахе зәԝаща пешьн саз кьр: «Бона ве йәке мере де у баве хԝә бьһелә, хԝә ль жьна хԝә бьгьрә у һәр дӧ ԝе бьбьнә бәдәнәк». Паши ԝан гьлийа Иса гот: «Әԝед кӧ Хԝәде әԝ кьрьнә йәк, бьра мәрьв ԝан жь һәвдӧ нәԛәтинә» (Бьхунә Марԛос 10:2-12; Дәстп. 2:24).

4. Нета Йаһоԝа дәрһәԛа зәԝаще чь бу?

⁴ Иса заньбу кӧ Хԝәде зәԝащ саз кьрийә у да кʹьфше ԝәки зәԝащ гәрәке ԝәʹдәлу нибә. Хԝәде нәготә Адәм у Һеԝайе, ԝәки зәԝащеда әԝана дькарьн жь һәв бьԛәтьн. Дәԝсе, нета Йаһоԝа әԝ бу кӧ «һәр дӧ» һʹәта-һʹәтайе зәԝащеда йәктийеда бьн.

ГӦҺАСТЬНЕД ԜӘʹДӘЛУ ЗӘԜАЩЕДА

5. Мьрьн ча һʹӧкӧм бу сәр зәԝаще?

⁵ Әм гьшк заньн ԝәки сәва гӧне Адәм гәләк тьшт һатьнә гӧһастьне. Мәсәлә, мьрьн дәрбази сәр һʹәму мәрьва бу у әԝ йәк сәр зәԝаще жи һʹӧкӧм бу. Паԝлосе шанди Мәсиһийарʹа шьровәкьр, ԝәки мьрьн зәԝаще дьдә сәкьнандьн у кӧ тʹәне паши ве йәке мер йан жьна кӧ тʹәне дьминә, дькарә тʹәзәда бьзәԝьщә йан мер кә (Рʹом. 7:1-3).

6. Ԛануна Муса ча ньһерʹандьна Хԝәде сәр зәԝаще әʹйан дькә?

⁶ Ԛануна дәрһәԛа зәԝаще кӧ Хԝәде дабу щьмәʹта Исраел, тьштед һур гьли дькьр. Мәсәлә, Ԛануне изьн дьда кӧ чәнд жьнед мерәки һәбьн. Ле синор һәбун ве йәкеда, тʹӧ кәси гәрәке әв Ԛанун бона кʹара хԝә нәда хәбате. Мәсәлә, һәрге мерәки Исраели хԝәрʹа хӧлам жьнти бьстанда у паше жьна дӧда жи бьстанда, әԝи гәрәке тʹӧ щар жь жьна пешийе хԝарьн, кʹьнщ у борще зәԝаще кем нәкьра. Хԝәде дәʹԝа дькьр, ԝәки әԝ ле хԝәй кә у хԝәйитийе ле бькә (Дәркʹ. 21:9, 10). Рʹаст ә әм бьн ве Ԛанунеда ниньн, ле әм дьвиньн ԝәки бәр чʹәʹве Йаһоԝа зәԝащ ԛимәт ә. Занәбуна ве йәке али мә дькә, ԝәки мина Хԝәде зәԝаще һӧрмәт кьн.

7, 8. а) Ль гора Ԛануна Дӧщари 24:1, дәрһәԛа һәвԛәтандьне Ԛанунеда чь дьһатә готьне? б) Йаһоԝа ча дьньһерʹә сәр һәвԛәтандьне?

⁷ Ле дәрһәԛа һәвԛәтандьне Ԛанунеда чь дьһатә готьне? Хԝәде тʹӧ щар нәдьхԝәст, ԝәки мер у жьн жь һәв бьԛәтьн, ле һәбу мәʹни жь бо кʹижани әԝи изьн дьда кӧ һәв бьԛәтьн. (Бьхунә Ԛануна Дöщари 24:1.) Ԛанунеда дьһатә готьне, ԝәки мере Исраели дькарә жьна хԝә бәрʹдә тʹәне һьнге, һәрге ԝеда тьштәки нәщайиз бьвинә. Ле Ԛанунеда нәдьһатә готьне чь дькʹәвә нава тьште нәщайиз. Ча те кʹьфше әԝ тьштәки шәрми у мәзьн бу, нә кӧ кемасикә бьчʹук (Ԛан. Дщр. 23:14). Ле йазьх, ԝәʹде Исада гәләк Щьһу «бона һәр мәʹнике» жьнед хԝә бәрʹдьдан (Мәт. 19:3). Әм тʹӧ щар нахԝазьн чʹәʹв бьдьнә ньһерʹандьна ԝан.

⁸ Малахи пʹехәмбәр мина Хԝәде сәр һәвԛәтандьне дьньһерʹи. Ԝәʹде ԝида тьштәки бәлабуйи бу, кӧ мер нәһәԛи «жьна щаһьлтийа» хԝә бәрʹдә, дьбәкә сәва жьнәкә ԝе щаһьлтьр бьстинә, кӧ пʹутпʹарьст бу. Малахи дәрһәԛа ньһерʹандьна Хԝәде сәр һәвԛәтандьне, ньвиси: «Һәвԛәтандьне әз нәфьрʹәт дькьм» (Малх. 2:14-16, ДТʹ). Әԝ гьли ль гора Хәбәра Хԝәде нә, кʹидәре дәрһәԛа зәԝаща пешьн те готьне: «[Мер ԝе] хԝә ль жьна хԝә бьгьрә у бьбьнә бәдәнәк» (Дәстп. 2:24). Иса жи пьштгьрийа ньһерʹандьна Баве хԝә дькьр у әԝ йәк те кʹьфше жь ԝан гьлийед ԝи: «Әԝед кӧ Хԝәде кьрьнә йәк, бьра мәрьв жь һәвдӧ нәԛәтинә» (Мәт. 19:6).

ТʹӘНЕ МӘʹНИК ҺӘЙӘ БОНА ҺӘВԚӘТАНДЬНЕ

9. Әм гәрәке гьлийед Иса жь Марԛос 10:11, 12 ча фәʹм бькьн?

⁹ Һьнәк дьбәкә пьрсе дьдьн: «Чь мәʹни һәйә кӧ изьне дьдә Мәсиһи, ԝәки жь һәв бьԛәтьн у тʹәзәда бьзәԝьщьн?» Иса гот: «Кʹи кӧ жьна хԝә бәрʹдә у йәкә дьн бьстинә, һьндава ԝеда зьнекʹарийе дькә у һәгәр жьн жи мере хԝә бәрʹдә у йәки дьн бьстинә, зьнекʹарийе дькә» (Марԛ. 10:11, 12; Луԛа 16:18). Әшкәрә йә, ԝәки Иса зәԝащ һӧрмәт дькьр у дьхԝәст йед дьн жи чʹәʹв бьдьнә ԝи. Мере кӧ мәʹни бьгьрта сәва жьна хԝәйә амьн бәрʹда (йан жьн жь мере хԝәйи амьн бьԛәтийа), у паше тʹәзәда кәсәки дьн бьстанда, ԛави дькьр. Әԝ ӧса йә, чьмки бе мәʹни һәв бьԛәтьн, зәԝаще кʹӧта накә. Бәр чʹәʹве Хԝәде әԝ һәр дӧ жи диса «бәдәнәк» ьн. Хенщи ве йәке, Иса гот ԝәки чахе мер жьна хԝәйә амьн бәрʹдьдә, әԝ йәк ԝерʹа дьбә мәʹни кӧ ԛавийе бькә. Ле чь щурʹәйи? Жьна кӧ бемер дьма мәщбур дьбу кӧ кәсәки дьн бьстинә, сәва әʹбура хԝә бькә. Әԝ зәԝаща тʹәзә ида дьһатә һʹәсабе чаԝа ԛави.

10. Чь мәʹни изьне дьдә Мәсиһийа жь һәв бьԛәтьн у аза бьн сәва тʹәзәда бьзәԝьщьн йан мер кьн?

¹⁰ Иса ӧса жи гот, ԝәки кʹижан мәʹни изьне дьдә һәв бьԛәтьн: «Әз ԝәрʹа дьбежьм, кʹи кӧ бе сәбәбийа ԛавийе [хәбәра Йунани «порнейа»] жьна хԝә бәрʹдә у йәкә дьн бьстинә, әԝ зьнекʹарийе дькә» (Мәт. 19:9). Иса ԝәʹде Хьзмәтийа сәр Чʹийе жи әԝ йәк ԝәкʹьланд (Мәт. 5:31, 32). Һәрдӧ дәрәщада жи әԝи дәрһәԛа «ԛавийе» хәбәр да. Әԝ гьли те һʹәсабе гӧнед сексуали ортʹа ԝан, йед кӧ тʹәви һәв зәԝащеда ниньн, мәсәлә бенамуси, һәләԛәтийа сексуали ортʹа мәрьвед кӧ зәԝащеда ниньн, һомосексуали, у һʹәрьмандьна тʹәви һʹәйԝана. Бәʹса хәбәре, һәрге мере зәԝьщи бенамусийе дькә, жьна ԝи дькарә сафи кә йан жь ԝи бьԛәтә йан нәԛәтә. Һәрге әԝ жь ԝи дьԛәтә, бәр чʹәʹве Хԝәде зәԝаща ԝана кʹӧта дьбә.

11. Чьрʹа Мәсиһи дьбәкә сафи кә, ԝәки жь жьн йан мере хԝә нәԛәтә гава мәʹни сәр һʹиме Кʹьтеба Пироз һәйә?

¹¹ Ле дина хԝә бьдьне, Иса нә гот кӧ һәрге жьн йан мере кәсәки бенамусийе бькә, әԝ гәрәке же бьԛәтә. Мәсәлә, жьн дьбәкә сафи кә, ԝәки зәԝаща хԝә хԝәй кә у жь мере хԝә нәԛәтә. Дьбәкә әԝ диса жи ԝи һʹьз дькә, у һазьр ә бьбахшинә ԝи у тʹәви ԝи зәԝаща хԝә ԛәԝи кә. Ле һәрге әԝ жь ԝи бьԛәтә у мер нәкә, әԝ ԝе рʹасти чәтьнайа бе. Мәсәлә, әԝе ча әʹбура хԝә бькә у һʹәԝщед сексуалида ԝе ча бә? Әԝе бькарьбә тʹәне бьминә? Әԝ йәк ԝе ча сәр зарʹа һʹӧкӧм бә? Дьбәкә әԝ һәвԛәтандьн чәтьн кә зарʹа рʹастийеда мәзьн кьн? (1 Корн. 7:14). Бәле, әшкәрә йә жьна бемер йан мере бежьн, ԝе рʹасти чәтьнайед мәзьн бе.

12, 13. а) Чь ԛәԝьми тʹәви зәԝаща Һосәйа? б) Чьрʹа Һосәйа Гомәр пашда ани, у жь ве йәке әм чь һин дьбьн дәрһәԛа зәԝаще?

¹² Жь сәрһатийа Һосәйа пʹехәмбәр әм һе зедә педьһʹәсьн ньһерʹандьна Хԝәде сәр зәԝаще ча нә. Хԝәде готә Һосәйа, ԝәки жьна ԛав бьстинә, наве кʹижане Гомәр ә, у кӧ әԝе пе ԛавийе жерʹа зарʹа бинә. Гомәр гьран дәркʹәт у Һосәйарʹа кӧрʹ ани (Һос. 1:2, 3). Паше, диса ԛиз у кӧрʹ жерʹа бун, дьԛәԝьмә жь ԛавтийе. Гомәре чәнд щара ԛави кьр, ле Һосәйа жь ԝе нәԛәтийа. Ахьрийеда әԝе Һосәйа һишт чу у бу хӧлам. Ле Һосәйа әԝ пашда ани (Һос. 3:1, 2). Йаһоԝа бь Һосәйа да кʹьфше, ԝәки Әԝи чьԛас щар нәмамийа Исраелийа дьбахшанд. Ле әм жь ве сәрһатийа Һосәйа чь һин дьбьн?

¹³ Һәрге жьн йан мере Мәсиһи бенамусийе бькә, әԝ бәр сафикьрьне дьсәнә. Анәгори готьна Иса, әԝ дькарә бьԛәтә у ида ԝе аза бә бьзәԝьщә йан мер кә. Ле әԝ ӧса жи дькарә бьбахшинә жьн йан мере хԝә. Ве йәкеда тьштәки нәрʹаст тʹӧнә йә. Һосәйа Гомәр пашда ани. Чахе әԝи ле пашда ани, әԝе гәрәке ида ԛави нәкьра. Ԝәʹдәки һәләԛәтийа Һосәйа тʹәви Гомәре тʹӧнә бу (Һос. 3:3). Ле ԝәʹдә дәрбаз бу, дьԛәԝьмә Һосәйа һәләԛәтийа хԝә тʹәви ԝе бәрдәԝам кьр, демәк диса ча жьн-мер дьжитьн. Бь ве йәке Һосәйа чʹәʹв да бахшандьна Хԝәде, чьмки Хԝәде щьмәʹта хԝә диса ԛәбул кьр у һәләԛәтийа хԝә тʹәви ԝан бәрдәԝам кьр (Һос. 1:11; 3:3-5). Әԝ йәк дәрһәԛа зәԝаще чь мә һин дькә? Һәрге кәсәк сафи дькә, ԝәки зәԝаща хԝә хԝәй кә, у диса ча жьн-мер дьжин у бәрдәԝам дькьн борще зәԝаще биньн сери, әԝ дьдә кʹьфше кӧ бахшандийә жьн йан жи мере хԝә (1 Корн. 7:3, 5). Бь ве йәке ида мәʹнийа һәвԛәтандьне тʹӧнә йә. Паши ве йәке ида мер-жьн гәрәке сәр хԝә бьхәбьтьн, ԝәки пе чʹәʹве Хԝәде сәр зәԝаще бьньһерʹьн.

ЗӘԜАЩЕ ҺӦРМӘТ КЬН, ҺӘРГЕ ЖИ ЧӘТЬНАЙИ ҺӘНӘ

14. Ль гора 1 Корьнтʹи 7:10, 11 зәԝащеда чь дькарә бьԛәԝьмә?

¹⁴ Һʹәму Мәсиһи гәрәке зәԝаще һӧрмәт кьн, чаԝа Йаһоԝа у Иса. Ле йәкә һьнәкарʹа чәтьн ә сәр зәԝаще ӧса бьньһерʹьн, чьмки һʹәму мәрьв гӧнәкʹар ьн (Рʹом. 7:18-23). Ләма әм әʹщебмайи наминьн, ԝәки ԛьрʹна йәкеда, зәԝаща һьнә Мәсиһийада чәтьнайи һәбун. Рʹаст ә Паԝлос ньвиси ԝәки «жьн жь мер нәԛәтә», ле йәкә щара әԝ йәк дьԛәԝьми. (Бьхунә 1 Корьнтʹи 7:10, 11.)

15, 16. а) Һәрге жи зәԝащеда чәтьнайи һәнә, нета жьн-мер гәрәке чь бә у чьрʹа? б) Ча әԝ йәк ӧса жи бона ԝан ә, кʹе тʹәви нәбаԝәр зәԝащеда нә?

¹⁵ Паԝлос шьровәнәкьр кӧ чьрʹа жьн-мер жь һәв башԛә дьбун. Ле әм заньн кӧ проблем ве йәкеда нибу, мәсәлә ԝәки мер бенамуси бькьра, у ида изьна жьне һәбуйа жь ԝи бьԛәтә у диса мер кә. Паԝлос ньвиси ԝәки жьн кʹижан кӧ жь мере хԝә башԛә буйә, гәрәке «мер нәкә йан жи мере хԝәрʹа ль һәв бе». Әԝ йәк ӧса бу, чьмки бәр чʹәʹве Хԝәде әԝана һәр дӧ жи диса йәк бун. Паԝлос ширәт да, ԝәки һәрге зәԝащеда бенамуси нәһатийә кьрьне, чь чәтьнайи жи һәбә нета башԛәбуне гәрәке диса һәвһатьн бә. Әԝана һәрдӧ дькарьн жь рʹуспийа аликʹарийе бьхԝазьн. Рʹуспи ԝе тʹӧ щар пьшта кәсәки нәгьрьн, ле әԝана ԝе сәр һʹиме Кʹьтеба Пироз ширәта бьдьнә ԝан.

¹⁶ Ле һәрге Мәсиһи тʹәви йе нәбаԝәр зәԝащеда нә, чәтьнайед дьн дькарьн һәбьн. Һьнге гәло изьн һәйә, ԝәки башԛә бьминьн? Чаԝа мә жоре гот, Кʹьтеба Пироз дьбежә, ԝәки тʹәне бенамуси дькарә бьбә мәʹнийа һәвԛәтандьне. Ле Кʹьтеба Пирозда тʹӧ щики найе готьне, ԝәки мәʹни гәрәке чь бә кӧ жьн-мер башԛә бьжин. Паԝлос ньвиси: «Жьнәкә кӧ мере ԝе нәбаԝәр бә у әԝ бьхԝазә тʹәви ԝе бьминә, бьра жь ԝи нәԛәтә» (1 Корн. 7:12, 13). Әԝ йәк бона ԝәʹде мәйә жи.

17, 18. Чьрʹа һьнә Мәсиһи зәԝаща хԝәйә чәтьнда башԛә нәбун?

¹⁷ Ле йәкә щара дәрәщед ӧса һәнә, кӧ дьдьнә кʹьфше ԝәки «мере нәбаԝәр» нахԝазә тʹәви жьна хԝә «бьминә». Мәсәлә, әԝ жьна хԝә ӧса ԛайим дькʹӧтә кӧ әԝ дьфькьрә ԝәки сьһʹәт-ԛәԝата ԝе йан жи әʹмьре ԝе, бьн ԛәзийеда нә. Йан әԝ нахԝазә ле хԝәй кә у әʹбура нәфәред хԝә бькә, йан жи рʹе ԝе дьгьрә Хԝәдерʹа хьзмәт кә. Ԝан дәрәщада һьнә Мәсиһи дьфькьрьн кӧ мер чь жи дьбежә, йәкә әԝ нахԝазә тʹәви ԝе бьжи, ләма лазьм ә башԛә бьжин. Ле һьнә Мәсиһи жи ԝан дәрәщада сафи дькьн, ԝәки башԛә нәбьн. Әԝана сәбьр дькьн у алийе хԝәда һәр тьшт дькьн, ԝәки һʹале зәԝаща хԝә баш кьн. Ле чьрʹа әԝана ӧса сафи дькьн?

¹⁸ Чахе жьн-мер ԝан дәрәщада жь һәв башԛә дьбьн, әԝана йәкә диса жи зәԝащеда ньн. Һәрге әԝана жь һәв башԛә бьжин, һәрдӧ жи ԝе рʹасти чәтьнайа бен, чаԝа мә жоре гот. Паԝлосе шанди диса мәʹники дьбежә, кӧ чьрʹа баш ә жьн-мер тʹәвайи бьминьн. Әԝи ньвиси: «Мере нәбаԝәр бь жьна баԝәрмәнд һʹәлал дьбә у жьна нәбаԝәр жи бь мере баԝәрмәнд һʹәлал дьбә. Һәгәр ӧса нибуйа, зарʹед ԝәйе һʹәрам буна, ле ньһа һʹәлал ьн» (1 Корн. 7:14). Гәләк Мәсиһийед амьн, чәтьнайед гьранда жи тʹәви мер йан жьна хԝәйә нәбаԝәр манә. У әԝана гәләк ша бунә, гава дитьнә ԝәки әԝ ԛӧрбанкьрьн һежа бу, чьмки ахьрийеда йе нәбаԝәр бу хьзмәткʹаре Йаһоԝа (Бьхунә 1 Корьнтʹи 7:16; 1 Пәт. 3:1, 2).

19. Чьрʹа щьвата Мәсиһида тʹьжә малбәтед бәхтәԝар һәнә?

¹⁹ Иса дәрһәԛа һәвԛәтандьне тʹәми да, ле Паԝлос дәрһәԛа башԛәжитьне ширәт да. Һәрдӧ жи дьхԝәстьн, ԝәки хьзмәткʹаред Хԝәде зәԝаще һӧрмәт у ԛимәт кьн. Иро нав тʹәмамийа дьнйайеда щьватед мәда тʹьжә зәԝащед бәхтәԝар һәнә. Щьвата ԝәда жи ԝе һәбьн жьн-мер кӧ зәԝаща хԝәда бәхтәԝар ьн. Әԝ бьред амьн кӧ жьна хԝә һʹьз дькьн у әԝ жьнед кӧ мере хԝә һʹьз дькьн, нишан дькьн ԝәки те стандьне кӧ зәԝаще һӧрмәт кьн. Әм жи дькарьн ша бьн ве йәкерʹа кӧ бь милйона жьн-мер, ԝан гьлийед Хԝәде тиньн сери: «Бона ве йәке мер ԝе де у баве хԝә бьһелә, хԝә ль жьне бьгьрә у һәр дӧ ԝе бьбьнә бәдәнәк» (Әфәс. 5:31, 33).