Фәсал Бьн кӧ Нәкʹәвьнә Щерʹьбандьна

1-2. (а) Иса шагьртед хԝәрʹа чь гот? (б) Шагьртед Иса чьрʹа сьст бун? (Бьньһерʹә ӧса жи шькьл.)

«РʹАСТ Ә, рʹӧһʹ һазьр ә, ле бәдән сьст ә»a (Мәтта 26:41б). Бь ван гьлийа Иса да кʹьфше, ԝәки әԝ фәʹм дькә кӧ әм ԛьсурдар ьн у ләма жи шашийа дькьн. Ле жь гьлийед ԝи ӧса жи те кʹьфше, ԝәки әм гәрәке фәсал бьн у хԝәда баԝәр нибьн. Чәнд сьһʹәт пешийа кӧ Иса әв гьли бьготана, шагьртед ԝи жерʹа сонд хԝарьн, кӧ ԝе тʹӧ щар ԝи инкʹар нәкьн (Мәтта 26:35). Һәмьки нета ԝан баш бу, ле ԝана фәʹм нәдькьр кӧ дәрәщәкә чәтьнда мәрьв һеса дькарә сьст бә у шашики бькә. Ләма жи, Иса шагьртед хԝәрʹа гот: «Һʹьшйар бьминьн у тʹьме дӧа бькьн, сәва кӧ һун нәкʹәвьнә щерʹьбандьне» (Мәтта 26:41а).

² Сәд һʹәйф кӧ шагьртед Иса һʹьшйар нәман. Гава Иса һатә гьртьне, әԝана тьрсийан у рʹәвийан. Бәле, әԝана фәсал нибун, ләма жи созе хԝә нәанинә сери у Иса тʹәне һиштьн (Мәтта 26:56).

3. (а) Сәва кӧ әм Йаһоԝарʹа амьн бьминьн, чьрʹа фәрз ә кӧ әм бь зедәйи хԝәда баԝәр нибьн? (б) Ве готареда әме чь шеԝьр кьн?

³ Әм гәрәке бь зедәйи хԝәда баԝәр нибьн. Һәмьки әм нахԝазьн ван тьшта бькьн, чь кӧ ԝе дьле Йаһоԝа бешинә. Ле әм мәрьвнә ԛьсурдар ьн, ләма жи гава әм тенә щерʹьбандьне, әм һеса дькарьн тьштәки нәрʹаст бькьн (Рʹомайи 5:12; 7:21-23). Бәле, ньшкева әм дькарьн тьштәки нәрʹаст бькьн, чь кӧ дьбәкә мәрʹа һʹәԝас бе кʹьфше. Сәва кӧ әм Йаһоԝа у Исарʹа амьн бьн, әм гәрәке гӧһ бьдьнә ве ширәта Иса кӧ «һʹьшйар бьминьн» у «нәкʹәвьнә щерʹьбандьне». Ве готареда пешийе әме шеԝьр кьн, кӧ әм гәрәке илаһи кʹижан дәрәщада һʹьшйар бьминьн. Паше әме дина хԝә бьдьне, кӧ әм ча дькарьн хԝә һьмбәри щерʹьбандьна бьпʹарезьн, у ӧса жи әме шеԝьр кьн, кӧ әм гәрәке чь бькьн, ԝәки һʹьшйар бьминьн.

ӘМ ГӘРӘКЕ КʹИЖАН ДӘРӘЩАДА ҺʹЬШЙАР БЬМИНИН?

4-5. Чьрʹа фәрз ә, ԝәки әм хԝә жь гӧнед бьчʹук жи дур бьгьрьн?

⁴ Һәла һе гӧнед бьчʹук жи дькарьн достийа мә тʹәви Йаһоԝа сьст кьн, чьмки әв гӧнед бьчʹук дькарьн мә бәрбь гӧнед гьран жи бьвьн.

⁵ Әм гьшк жи мәрьвнә ԛьсурдар ьн, ләма жи әм тенә щерʹьбандьне. Ле кемасийед мә жь һәв щӧдә дьбьн. Мәсәлә, бона һьнә мәрьва дьԛәԝьмә ӧса һеса нинә, кӧ хԝә жь бенамусийе дур бьгьрьн. Ле һьнәкарʹа дьбәкә һеса нинә хԝә жь мастурбасийайе йан жь порнографийе дур бьгьрьн. Һьнә мәрьв жи дьԛәԝьмә сәр хԝә дьхәбьтьн, ԝәки зу һерс нәкʹәвьн, кʹӧбар-бабах нибьн, йан жи тьрса бәр мәрьва жь дьле хԝә дәрхьн. Бәле, чаԝа Аԛуб гот, «һәр кәс дьбә машоԛе дьлһавьжийед хԝә, дьхапә у те щерʹьбандьне» (Аԛуб 1:14).

6. Чьрʹа фәрз ә кӧ әм һьндава хԝәда һʹәлал бьн?

⁶ Гәло тӧ зани кʹижан дәрәщада тӧ һеса тейи щерʹьбандьне? Хофәкә мәзьн ә һәрге әм кемасийед хԝә инкʹар кʹин у бьфькьрьн ԝәки әм ӧса ԛәԝи нә, кӧ әме тʹӧ щар гӧнә нәкьн (1 Йуһʹәнна 1:8). Чаԝа Паԝлосе шанди готьбу, һәла һе мәрьвед рʹӧһʹанида гьһишти жи дькарьн бенә щерʹьбандьне, һәрге мьԛати хԝә нибьн (Галати 6:1). Ләма жи, әм гәрәке һьндава хԝәда һʹәлал бьн у тедәрхьн, кӧ чьда әм сьст ьн (2 Корьнтʹи 13:5).

7. Әм гәрәке илаһи дина хԝә бьдьнә чь? Мәсәле биньн.

⁷ Чахе әм тедәрдьхьн кӧ сьстбунед мә чьда ньн, әм гәрәке чь бькьн, ԝәки сәр хԝә бьхәбьтьн. Ԝәʹде бәре, щийе һәри сьст йа суред бажер, дәргәһед ви бун. Ләма жи, нобәдар илаһи ль бәр дәргәһа дьсәкьнин. Мина ве йәке, әм жи гәрәке илаһи дина хԝә бьдьнә сьстбунед хԝә, кӧ нәкʹәвьнә щерʹьбандьна (1 Корьнтʹи 9:27).

ӘМ ЧА ДЬКАРЬН ХԜӘ БЬПʹАРЕЗЬН?

8-9. Әви хорти, дәрһәԛа кʹижани кӧ Мәтʹәлок сәре 7-да те готьне, ча дькарьбу хԝә жь гӧнәкьрьне хԝәй кьра? (Мәтʹәлок 7:8, 9, 13, 14, 21)

⁸ Гәло әм чаԝа дькарьн хԝә бьпʹарезьн? Ԝәрә әм дина хԝә бьдьнә мәсәла хортәки жь Мәтʹәлок сәре 7 у пебьһʹәсьн, кӧ әм чь дькарьн жь ве йәке һин бьн. Әԝи хорти тʹәви жьнәкә хьраб бенамуси кьр. Рʹеза 22 дьбежә, кӧ әԝи «зу да пәй ԝе чу». Ле чаԝа әм жь контексте дьвиньн, әԝ хорт ида пешда сафикьрьнед нәрʹаст дькьр, чь кӧ һеди-һеди ԝи бәрбь гӧнәкьрьне дьбьр.

⁹ Гәло чь һеди-һеди ԝи хорти бьрә бәрбь гӧнә? Пешийе, еваре әԝ «кʹучеда незики әʹнишке хԝә ль рʹийа мала ԝе [кʹӧлфәта бенамус] гьрт» у бәрбь мала ԝе чу (Бьхунә Мәтʹәлок 7:8, 9). Паше, гава әԝи әв жьньк дит, әԝ жь ԝедәре нәчу. Әԝи изьн да ԝәки жьньк ԝи пачʹ кә, у гава әԝе бәʹса ԛӧрбанед хԝә кьрьн, дьԛәԝьмә сәва кӧ избат кә, ԝәки әԝ кʹӧлфәтәкә хьраб нинә, әԝи гӧһ да ԝе (Бьхунә Мәтʹәлок 7:13, 14, 21). Һәрге әви хорти хԝә дур бьгьрта жь гавед кӧ бәрбь гӧнә дьбьрьн, әԝе фәсал буйа у гӧнә нәкьра.

10. Ча иро мәрьв дькарә мина хорте жь кʹьтеба Мәтʹәлок гӧнә бькә?

¹⁰ Әв сәрһати нишан дькә, кӧ чь дькарә бе сәре һәр хьзмәткʹарәки Йаһоԝа. Дьбәкә кәсәк гӧнәки гьран бькә у паше бежә кӧ һәр тьшт ньшкева ԛәԝьми. Ле һәрге әԝ мәрьв кʹур бьфькьрә, әԝе фәʹм бькә, кӧ ида пешда әԝи гавед нәрʹаст у беаԛьл авитьбу, ләма жи гӧне гьран кьр. Мәсәлә, дьбәкә әԝи дәстпекьр рʹәх һәвалед нәбаш кʹәвә, ԝәʹдәдәрбазкьрьнед нәрʹаства мьжул бә, һәрʹә щийед нәлайиԛ, йан жи бькʹәвә малпәред нәбаш. Һьм жи, дьбәкә әԝи ида дӧа нәдькьр, Кʹьтеба Пироз нәдьхԝәнд, нәдьчу щьвата у хьзмәтийе. Мина хорте жь кʹьтеба Мәтʹәлок, дьбәкә әԝи жи нә кӧ ньшкева, ле һеди-һеди бь сафикьрьнед хԝәйә нәрʹаст, бәрбь гӧнәкьрьне чу.

11. Сәва кӧ әм гӧнә нәкьн, әм гәрәке хԝә жь чь дур бьгьрьн?

¹¹ Әм жь ве йәке чь һин дьбьн? Бәс нинә кӧ әм хԝә жь гӧнә дур бьгьрьн, ле әм гәрәке хԝә жь гавед кӧ дьбьнә бәрбь гӧнә жи дур бьгьрьн. Ләма жи паши ве сәрһатийе, Сьлеман дәрһәԛа жьнька хьраб ӧса гот: «Шьвәрʹийед ԝеда нәхальфә» (Мәтʹәлок 7:25). Ӧса жи әԝи гот: «Жь ԝе кʹӧлфәте хԝә дур хԝәй кьн у незики дәре мала ԝе нәбьн» (Мәтʹәлок 5:3, 8). Бәле, сәва кӧ әм хԝә жь гӧнәкьрьне бьпʹарезьн, әм гәрәке хԝә жь гавед кӧ дьбьнә бәрбь гӧнәкьрьне, дур бьгьрьнb. Әв те һʹәсабе, кӧ һәрге фьлан тьшт бона Мәсиһийа ԛәдәхәкьри нинә жи, ле әм заньн кӧ әв йәк дькарә бона мә бьбә тʹәльк у мә бәрбь гӧнә бьвә, әме хԝә жь ве йәке дур бьгьрьн (Мәтта 5:29, 30).

12. Ибо чь сафи кьрьбу, у әве йәке ча али ԝи дькьр зьнекʹарийе нәкә? (Ибо 31:1)

¹² Сәва кӧ әм хԝә жь дәрәщед хоф дур бьгьрьн у гӧнә нәкьн, әм гәрәке пешда дәрһәԛа ве йәке бьфькьрьн. Ԝәʹде бәре Ибо жи ӧса дькьр. Кʹьтеба Пироз дьбежә, кӧ әԝи «бь чʹәʹве хԝәрʹа пәйманәке чекьр», ԝәки бь чʹәʹве хьраб жьнед дьн нәньһерʹә (Бьхунә Ибо 31:1). Ибо хԝә ль ви сози дьгьрт, у әве йәке али ԝи дькьр, кӧ зьнекʹарийе нәкә. Ԝәрә әм жи сафи кьн хԝә жь ԝан тьшта дур бьгьрьн, чь кӧ дькарьн бьбьнә сәбәб, ԝәки әм бенә щерʹьбандьне.

13. Чьрʹа фәрз ә кӧ әм фькьред хԝә контрол кьн? (Бьньһерʹә ӧса жи шькьл.)

¹³ Әм гәрәке ӧса жи фькьред хԝә контрол кьн (Дәркʹәтьн 20:17). Һьнә мәрьв дьбежьн, ԝәки әв йәк нормал ә, һәрге мәрьв бьдә бәр чʹәʹве хԝә кӧ әԝ бенамусийе дькә, ле бь реали ӧса накә. Ле әв ньһерʹандьн нәрʹаст ә. Кәсе кӧ бәрдәԝам дькә дәрһәԛа хԝәстьнед нәрʹаст бьфькьрә, әԝ ван хԝәстьна дьле хԝәда дьһа ԛәԝи дькә. У жерʹа дьһа чәтьн дьбә хԝә жь гӧнәкьрьне дур бьгьрә. Һәмьки фькьред нәрʹаст щара дькарьн бькʹәвьнә һʹьше мә. Ле фәрз әв ә, кӧ әм ван фькьра дәрберʹа инкʹар кьн у дәрһәԛа тьштед баш бьфькьрьн. Әм гәрәке изьне нәдьн, ԝәки фькьред хьраб хԝәстьнед хьраб дьле мәда ԛәԝи кьн, йед кӧ дькарьн мә бәрбь гӧне гьран бьвьн (Филипи 4:8; Колоси 3:2; Аԛуб 1:13-15).

14. Әм диса чь дькарьн бькьн, ԝәки хԝә жь щерʹьбандьна хԝәй кьн?

¹⁴ Әм диса чь дькарьн бькьн, ԝәки хԝә жь щерʹьбандьна хԝәй кьн? Әм гәрәке сәд сәләфи баԝәр бьн, кӧ ԛанунед Йаһоԝа тʹьме кʹаре мәрʹа тиньн. Дьбәкә щара бал мә найе стандьне, ԝәки фькьр у хԝәстьнед мә ль гора хԝәстьна Йаһоԝа бьн, ле һәрге әм сәр хԝә бьхәбьтьн кӧ ве йәке бькьн, әме бь рʹасти бәхтәԝар бьн.

15. Ча хԝәстьна рʹаст дькарә али мә бькә хьрабийе инкʹар кьн?

¹⁵ Әм гәрәке хԝәстьнед рʹаст дьле хԝәда пешда биньн у һин бьн, кӧ хьрабийе нәфрʹәт кьн у ԛәнщийе һʹәз бькьн. Әв йәк ԝе али мә бькә хԝә ль рʹастийе бьгьрьн у жь дәрәщед ӧса дур бьн, кʹижан кӧ бәрбь хьрабийе дьбьн (Амос 5:15). Һәрге хԝәстьнед мә рʹаст бьн, әме бькарьбьн хьрабийе инкʹар кьн, гава ньшкева бенә щерʹьбандьне.

16. Шьхӧлед рʹӧһʹани ча али мә дькьн достийа хԝә тʹәви Йаһоԝа ԛәԝи хԝәй кьн? (Бьньһерʹә ӧса жи шькьл.)

¹⁶ Гәло әм ча дькарьн хԝәстьнед рʹаст нав хԝәда пешда биньн? Бона ве йәке әм гәрәке ԝан тьшта бькьн, чь кӧ һʹәзкьрьна мә һьндава Йаһоԝа дьһа ԛәԝи дькә. Мәсәлә, гава әм дьчьнә щьвата, йан жи хьзмәтийе, әм жь щерʹьбандьна дьһа хԝәйкьри нә у хԝәстьна мә һе ԛәԝи дьбә кӧ дьле Йаһоԝа ша кьн (Мәтта 28:19, 20; Ибрани 10:24, 25). Гава әм Кʹьтеба Пироз дьхуньн у сәр ԝе кʹур дьфькьрьн, әм һин дьбьн кӧ һе зедә ԛәнщийе һʹәз бькьн у хьрабийе нәфрʹәт кьн (Йешу 1:8; Зәбур 1:2, 3; 119:97, 101). Иса шагьртед хԝәрʹа гот: «Һʹьшйар бьминьн у тʹьме дӧа бькьн, сәва кӧ һун нәкʹәвьнә щерʹьбандьне» (Мәтта 26:41). Гава әм Баве хԝәйи әʹзманарʹа дӧа дькьн, әм жь ԝи аликʹарийе дьстиньн, у хԝәстьна мә дьһа ԛәԝи дьбә, кӧ дьле ԝи ша кьн (Аԛуб 4:8).

ҺʹЬШЙАР БЬМИНӘ

17. Чь кемасийа Пәтрус һәбу?

¹⁷ Һʹәта кӧ әм ԛьсурдар ьн, әм нькарьн бь тʹәмами жь һʹәму кемасийед хԝә аза бьн. Ԝәрә әм дина хԝә бьдьнә дәрәща Пәтрусе шанди. Жь бо тьрса бәр мәрьва, әԝи Иса се щара инкʹар кьр (Мәтта 26:69-75). Ле гава Пәтрус бь мерхаси бәр Щьвина Гьрәгьра дәрһәԛа Иса хәбәр да, ӧса дьһатә кʹьфше, кӧ те бежи әԝ ида жь мәрьва нәдьтьрсийа (Кʹаред Шандийа 5:27-29). Ле чәнд сал шунда, Пәтрус жь бо тьрса бәр мәрьвед «кӧ дьготьн, гәрәке нәщьһу бенә сьнәткьрьне», ԝәхтәки тʹәви Мәсиһийед нәщьһу хԝарьн нәдьхԝар (Галати 2:11, 12). Бәле, диса тьрс дькʹәтә дьле Пәтрус у дьбәкә әԝ бь тʹәмами жь тьрсед хԝә нә жи аза бу.

18. Чьрʹа лазьм ә кӧ әм һаш жь хԝә һәбьн?

¹⁸ Әм жи дькарьн бькʹәвьнә һʹаләки ӧса. Гәло чь щурʹәйи? Дьԛәԝьмә әм дьфькьрьн кӧ әм ида жь кемасикә хԝә аза бунә, ле мина Пәтрус, дьбәкә әм щарна диса бь ԝи тьшти бенә щерʹьбандьне. Мәсәлә, бьраки мә ӧса дьбежә: «Бь дәһа сала, мьн хԝә жь порнографийе дур гьртьбу, у әз дьфькьрим кӧ әв проблема мьн ида сафи буйә. Ле сьстбуна мьн диса әз алт кьрьм». Бьре мә бәрдәԝам дькьр сәр хԝә бьхәбьтә. Әԝи фәʹм кьр кӧ әԝ гәрәке рʹож бь рʹож сәр хԝә бьхәбьтә, у дьԛәԝьмә һʹәта хьлазийа әʹмьре хԝә жи. Бь аликʹарийа жьна хԝә у рʹуспийед щьвате, әԝи ԛәԝат дьстанд, ԝәки хԝә жь порнографийе дур бьгьрә.

19. Әм чь дькарьн бькьн, һәрге әм һәла һе нькарьн сьстбунәкә хԝә алт кьн?

¹⁹ Сәва кӧ әм жь бо кемасикә хԝә гӧнә нәкьн, әм гәрәке чь бькьн? Әм гәрәке гӧһ бьдьн ве ширәта Иса: «Һʹьшйар бьминьн». Һәла һе ԝи чахи жи гава әм тʹәхмин дькьн кӧ әм ԛәԝи нә, диса жи әм гәрәке тʹьме хԝә жь тьштед кӧ дькарьн мә бьщерʹьбиньн, дур бьгьрьн (1 Корьнтʹи 10:12). Бона ве йәке, ԝәрә әм ван тьшта бьдьнә хәбате, чь кӧ али мә дькьрьн сәркʹәвьн. Кʹьтеба Мәтʹәлок 28:14-да те готьне: «Хԝәзи бь ԝи кәси кӧ һәрдәм жь Хԝәде дьтьрсә, ИМ» (2 Пәтрус 3:14).

ЧЬРʹА ФӘРЗ Ә КӦ ӘМ ҺʹЬШЙАР БЬМИНЬН?

20-21. (а) Бона мә чьрʹа керһати йә һʹьшйар бьминьн? (б) Һәрге әм чь жь дәсте мә те бькьн, Йаһоԝа ԝе ча али мә бькә? (2 Корьнтʹи 4:7)

²⁰ Бона мә керһати йә кӧ әм тʹьме һьмбәри щерʹьбандьна һʹьшйар бьминьн. Бәле, гӧнә дькарә ԝәхтәкә кьн дьле мәрьв ша кә, ле жийина ль гора ԛанунед Йаһоԝа шабунәкә дьһа мәзьн тинә (Ибрани 11:25; Зәбур 19:8). Йаһоԝа әм ӧса чекьрьнә, кӧ әм ль гора ԛанунед ԝи бьжин (Дәстпебун 1:27). Һәрге әм ль гора ԛанунед Ԝи бьжин исафа мә ԝе тʹәмьз бә, у әме әʹмьре һʹәта-һʹәтайе бьстиньн (1 Тимотʹейо 6:12; 2 Тимотʹейо 1:3; Щьһуда 20, 21).

²¹ Рʹаст ә, «бәдән сьст ә», ле диса жи әв йәк найе һʹәсабе кӧ әм нькарьн һьмбәри кемасийед хԝә шәрʹ бькьн. Йаһоԝа һазьр ә ԛәԝате бьдә мә (Бьхунә 2 Корьнтʹи 4:7). Дина хԝә бьдьне, кӧ Хԝәде ԛәԝатәкә жь ԛәԝата мә зедәтьр дьдә мә. Гәрәке әм рʹож бь рʹож ԛәԝате бьдьнә хәбате, ԝәки нәкʹәвьнә щерʹьбандьна. Әва щабдарийа мә йә. Һәрге әм чь жь дәсте мә те бькьн, әм дькарьн баԝәр бьн, кӧ гава әм һʹәԝщә бьн у Йаһоԝарʹа дӧа бькьн, әԝе дьһа зедә ԛәԝате бьдә мә (1 Корьнтʹи 10:13). Бәле, бь аликʹарийа Йаһоԝа әм дькарьн һʹьшйар бьминьн, кӧ нәкʹәвьнә щерʹьбандьна.