Şehrezayiyên bo jiyana rojane

YAHOWA Xweda wekî desthilatdar şehrezayiya xwe çawa nîşan da? Ji bo ku mirov bikare bersîva vê pirsê bibîne, divê li ser şîretên wî kûr bifikire. Gelo ev şîret ji bo jiyana rojane bikêr in? An jî guhdayîna wan dikare jiyanê biwatetir û qenctir bike? Silêmanê Şehreza, bi navgîniya Ruhê Pîroz, bi sedan mesele nivîsîn. Ev mesele, ji yên ku hema hema di hemû qadên jiyanê de têne bikaranîn, pêk tên. Em di vî warî de dikarin li ser çend mînakan lêkolînê bikin.

Ewlebûna li Xweda. Ji bo têkiliyeke qenc a bi Yahowa Xweda re, ewlebûn zehf pêwîst e. Silêman weha nivîsî: “Bi hemûya dilê xwe, li XUDAN ... ewle bibe û pişta xwe nesipêre aqilê xwe. Di her karê ku tu dikî de, wî nas bike û ew jî [wê] rêya te derxe rastiyê” (Methelokên Silêman 3:5, 6). Heger mirov rêberiya wî bixwaze û bi guhdayînê li Xweda ewle be, dikare jiyana xwe biwate bike. Jiyaneke wusa derfeta ku mirov bikare Yahowa Xweda dilşad bike, dide. Herweha ev yek angaşta ku dijminê wî ango Şeytên avêtibû holê jî, diderewîne û Xweda mafdar derdixe (Methelokên Silêman 27:11).

Têkiliyên bi kesên din re. Derbarê jiyana malbatê de ji bo jin, mêr û zarokan îro ji tevahiya demên din zêdetir, hewcedarî bi şîretên Xweda heye. Xweda ji zilam re vê şîretê dide: “Bi pîreka xwe ya tu di ciwantiya xwe de pê re zewiciyî ... dilxweş bibe!” (Methelokên Silêman 5:18-20). Jinên mêrkirî jî, dikarin di nivîsara Methelokên Silêman de, meseleya jineke canik a ku ji aliyê hevser û zarokên wê ve, bi heyranî pesnên wê hatine dayîn, bibînin (Methelokên Silêman beş 31). Di vê Nivîsara Pîroz de, zarok jî dibînin ku çima pêwîste ew bi ya dê û bavê xwe bikin (Methelokên Silêman 6:20). Pirtûk wekî din jî, nîşan dide ku gava mirov xwe ji civakê veqetîne, dibe xwehez. Herweha ev Nivîsar diyar dike ku di nav mirovan de hevaltî û dostî jî, zehf girîng e (Methelokên Silêman 18:1). Ji ber ku dostên me dikarin carna di gelek mijaran de, bandora qenc û neqenc jî li ser me bikin, di hilbijartina wan de hewcedariya me bi şehrezayiyê heye (Methelokên Silêman 13:20; 17:17).

Li xwe miqatebûyîn. Pirtûka Methelokên Silêman di naveroka xwe de gelek şîretên ku mirov bikare bi navgîniya wan, xwe ji xûyên xerab ên wekî: Serxweşî, tiralî û hîsên xeraker ên ku bi awayeke neyînî bandorê li tendûristiyê dikin biparêze, dihewîne (Methelokên Silêman 6:6; 14:30; 20:1). Ev Pirtûk dibêje ku ewlebûna li fikrên mirovî yên ku bi şîretên Xweda ve, ne diahengê de ne, bela û bêtarê bi ser mirovan de tîne (Methelokên Silêman 14:12). Herweha Nivîsar tîne bîra mirovan ku “çavkaniya” jiyanê ji dilê mirovan tê der, ango ew tembîh li me dike ku em dil û ramanên xwe ji bandorên xerab biparêzin (Methelokên Silêman 4:23).

Ji mirovên cîhanê bi mîlyonan kesan jiyana xwe li gor van şîretan domand û bûn xwediyê jiyaneke bextewertir. Wan di encama vê yekê de pê derxist ku gelek sedemên ku divê mirov Yahowa Xweda li ser xwe padîşah bipejirîne, hene.

Ji Nivîsara Methelokên Silêman.