Mirovên ji Gelek Miletan Dibin Mesîhî

Şandiyan guh da emrê Îsa û li her derê mizgînî belav kir. Di sala 47an de, birayên li Entakyayê ji Pawlos û Barnabas xwest ku ji bo belavkirina mizgîniyê herin seferê. Ev her du mizgînvanên jêhatî li Anatolyayê, yanî li cihên wek Derbe, Lîstra û Konyayê geriyan.

Wan hem ji dewlemend û feqîran re hem jî ji ciwan û kalan re behsa mizgîniyê dikir. Gelek kesan rastiya li ser Mesîh qebûl kir. Gava Pawlos û Barnabas ji waliyê Qibrisê Sergiyos Pawlos re behsa mizgîniyê dikir, sêrbazekî dixwest wan bisekinîne. Pawlos ji sêrbaz re got: “Yehowa wê te ceza bike.” Sêrbaz di cih de kor bû. Walî ev yek dît û îman bi Yehowa anî.

Pawlos û Barnabas mal bi mal, li bazaran, li ser rê û di sînagogan de jî mizgînî belav dikir. Li Lîstrayê wan zilamekî lingseqet qenc kir. Gava mirovan ev mucîze dît, ew fikirîn ku Pawlos û Barnabas îlah in û xwest ji wan re îbadetê bikin. Lê Pawlos û Barnabas gotin: ‘Em jî mirovên wek we ne. Tenê ji Xwedê re îbadetê bikin!’ Piştre hinek Cihûyên din hatin û mirov teşwîq kirin ku li dijî Pawlos rabin. Piştî ku mirovan kevir avêtin Pawlos, ew fikirîn ku Pawlos mirî ye û wan ew ji bajêr derxist û li wir hişt. Lê Pawlos hê sax bû! Bira hatin ku alî wî bikin û wan ew dîsa bir bajêr. Paşê Pawlos vegeriya Entakyayê.

Di sala 49an de, Pawlos dest bi sefereke din kir. Pêşî wî xwişk û birayên li Anatolyayê ziyaret kirin. Paşê ew ket rêya Ewropayê. Ew çû Atîna, Efes, Filîpî, Selanîkê û cihên din jî. Di vê seferê de Sîlas, Lûqa û xortekî bi navê Tîmotêyos bi Pawlos re bûn. Wan bi hev re civatên nû ava kirin û alî xwişk û birayan kir ku ew di îmanê de xurt bibin. Pawlos sal û nîvekê li Korîntê ma û dilê xwişk û birayan xurt kir. Wî mizgînî belav dikir, dielimand û ji gelek civatan re name dinivîsandin. Wekî din, wî kon çêdikirin. Piştî demekê Pawlos vegeriya Entakyayê.

Di sala 52yan de, Pawlos ji bo xizmetê cara sisêyan çû seferê. Pêşî ew çû Anatolyayê. Pawlos çend salan li bajarê Efesê ma, dielimand, nexweş qenc dikirin û alî civatê dikir. Wekî din, wî her roj di mektebekê de gotar pêşkêş dikirin. Gelek kesan guh da wî û jiyana xwe guhert. Dûre Pawlos çû aliyê bakur û gihîşt Filîpiyê. Ji wir ew çû Korîntê. Di dawiyê de piştî ku Pawlos li gelek welatan mizgînî belav kir, ew çû Orşelîmê.