Gelo Şahidên Yehowa Tenê Wergera Xwe ya Kitêba Pîroz bi Kar Tînin?
Ji bo lêkolînkirina Kitêba Pîroz Şahidên Yehowa gelek wergeran bi kar tînin. Dîsa jî, em bi zêdeyî Wergera Dinyaya Nû ya Nivîsarên Pîroz bi kar tînin. Gelo çima? Çimkî navê Yehowa tê de derbas dibe û ew wergereke rast û zelal e.
Navê Xwedê. Hin weşîner qedrê nivîskarê eslî yê Kitêba Pîroz, yanî Xwedê nagirin, çimkî di gelek wergeran de navê Xwedê derbas nabe. Mesela, di naveroka wergereke Kitêba Pîroz de navê 70 kesan derbas dibe, çimkî wan di çêkirina vê wergerê de destek didan. Lê navê nivîskarê eslî, yanî Yehowa Xwedê, di eynî wergerê de qet derbas nabe!
Lê Wergera Dinyaya Nû wisa nake. Di nivîsarên orîjînal de navê Xwedê bi hezaran caran derbas dibe. Û Wergera Dinyaya Nû di hemû van cihan de navê Xwedê bi kar tîne. Heta, navê tercûmanan tê de nayê gotin.
Wergereke Rast. Di gelek wergerên Kitêba Pîroz de maneya rast derbas nabe. Mesela, Meta 7:13 di wergerekê de wisa hat tercûmekirin: “Di dergehê teng re derbas bibin, çimkî dergehê ku dibe cehenemê fireh e û rêya wî jî rehet e.” Lê belê di nivîsara eslî de ne peyva “cehenem”, lê peyva “helakbûn” derbas dibe. Nexwe çima bi awayekî nerast hat tercûmekirin? Belkî li gor fikrên wan tercûmanan, kesên xerab piştî mirinê dikevin cehenemê û tê de îşkenceyê dikişînin. Û belkî ji ber vî sebebî wan peyva “cehenem” xist wergera xwe. Lê li gor Kitêba Pîroz cehenem tune ye. Îcar Wergera Dinyaya Nû wisa dibêje: “Di deriyê teng re derbas bibin, çimkî deriyê ku fireh e û rêya ku rehet e dibe helakê, û yên ku li ser vê rêyê diçin, gelek in.”
Wergereke Zelal. Wergereke baş gerek hem rast be hem jî zelal be. Mesela, li Romayî 12:11 fikreke wisa derbas dibe ku bi herfî tê maneya “ji ruh re bikelin”. Her çi qas di zimanê eslî, yanî Yûnanî de ev yek rehet tê fehmkirin, di zimanê Kurmancî de maneya vê nayê fehmkirin. Ji ber vê, Wergera Dinyaya Nû bi zelalî dibêje ku “bila ruhê pîroz agirê xîretkêşiyê di dilê” xizmetkarên Xwedê de vêxe.
Wergera Dinyaya Nû wergereke rast û zelal e û navê Xwedê tê de derbas dibe. Wekî din, ev werger bê pere tê belavkirin. Bi milyonan kesên ku îmkana wan tune ye ku Kitêba Pîroz peyda bikin, dikarin bi vî awayî Kitêba Pîroz bi zimanê dayika xwe bistînin û bixwînin.