Yehowa Alî Yehoşafat Kir

Yehoşafat padîşahê Cihûdayê bû. Li welatê xwe wî pût û îbadetgehên Baal tune kirin. Wî dixwest ku xelk qanûnên Yehowa bielime. Ji bo ku xelkê perwerde bike, wî mezinên milet û Lêwî şandin hemû Cihûdayê.

Miletên li derdora wan dizanibû ku Yehowa bi xelkê xwe re ye. Ji ber vê yekê, ew ditirsiyan ku hicûmî Cihûdayê bikin. Heta wan diyarî ji Yehoşafat Padîşah re anîn. Lê piştre Moabî, Ammonî û yên ji herêma Seîrê hatin ku bi Cihûdayê re şer bikin. Yehoşafat dizanibû ku ew hewceyî alîkariya Yehowa ye. Wî hemû jin, mêr û zarok li Orşelîmê li hev kom kirin. Wî li ber wan dua kir: ‘Yehowa bêyî te em nikarin zora wan bibin. Ji kerema xwe re ji me re bêje ku em çi bikin.’

Yehowa cewaba duaya wî da: ‘Netirsin. Ezê alî we bikim. Rabin, bisekinin û bibînin ku ezê we çawa xelas bikim.’ Gelo Yehowa ew çawa xelas kirin?

Roja din Yehoşafat stranbêj hilbijartin û ji wan re got ku li pêş ordiyê bimeşin. Ew ji Orşelîmê derketin û heta meydana şer a li cihê bi navê Teqoayê meşiyan.

Dema ku stranbêjan bi kêfxweşî û bi dengekî bilind ji Yehowa re stran digotin, Yehowa ji bo xelkê xwe şer dikir. Wî Ammonî û Moabî ew qas tev li hev kirin ku wan bi hev re şer kir û yek jî ji wan sax nema. Lê Yehowa xelkê Cihûdayê, esker û kahîn parastin. Hemû miletên li derdora wan tiştên ku Yehowa kirin bihîstin. Wan fehm kir ku Yehowa hê jî xelkê xwe diparêze. Belê, Yehowa dikare xizmetkarên xwe bi gelek awayan xelas bike. Ji bo vê yekê, ew ne muhtacî alîkariya mirovan e.