Kitêba Pîroz Xebera Xwedê ye

Yehowa xelateke pir xweş daye me. Ev xelat Kitêba Pîroz e. Kitêba Pîroz ji 66 kitêbên biçûk hatiye berhevkirin. Gelo Kitêba Pîroz ji ku hatiye? Nivîskarê wê kî ye? Di vê dersê de, emê cewabên van pirsan bistînin.

1. Madem ku pêxemberan Kitêba Pîroz nivîsandiye, çima jê re “Peyva Xwedê” tê gotin?

Kitêba Pîroz ji aliyê teqrîben 40 pêxemberan ve hatiye nivîsandin. Kitêba pêşîn berî 3.500 salan û ya dawîn jî berî 1.900 salan hatiye nivîsandin. Û nivîskarên Kitêba Pîroz bi esl û emrê xwe ji hev cuda bûn. Lê dîsa jî, hemû qismên Kitêba Pîroz hev digirin û ne li dijî hev in. Çimkî Kitêba Pîroz bi eslê xwe Peyva Xwedê ye (1. Selanîkî 2:13 bixwîne). Pêxemberan ne fikrên xwe nivîsandin, lê belê wan “bi rêberiya Ruhê Pîroz, peyv ji Xwedê gotine”a (2. Petrûs 1:21). Xwedê fikrên xwe bi destê ruhê pîroz dan pêxemberan, û wan jî ew nivîsandin (2. Tîmotêyos 3:16).

2. Kî dikare ji Kitêba Pîroz feydeyê bistîne?

Însanên ji “her milet, bavik, ziman û gelan” dikarin ji mizgîna Kitêba Pîroz feydeyê bistînin (Peyxam 14:6 bixwîne). Heta îro jî, Kitêba Pîroz ji kitêbên din zêdetir bi gelek zimanan hatiye tercûmekirin û belavkirin. Hema her kes, li ku derê be û bi çi zimanî jî bixwaze, dikare Kitêba Pîroz bixwîne yan guhdarî bike.

3. Yehowa çawa Kitêba Pîroz parastiye?

Kitêba Pîroz li ser tiştên wek çerm û kaxizê papîrûsê hatiye nivîsandin. Tiştên wisa zû dereng xera dibin. Lê zilamên ku ji Kitêba Pîroz hez dikir, wan gotinên wê bi destê xwe dîsa bi dîqat dinivîsandin, yanî kopî dikirin. Hin hukimdaran û rêberên dînî dixwest ku Kitêba Pîroz tune bikin. Lê kesên din jî hazir bûn ku ji bo parastina Kitêba Pîroz canê xwe bidin. Xwedê nehişt ku tu kes yan jî tu tişt rê li ber wî bigire ku Kitêba Pîroz bigihîne me. Kitêba Pîroz dibêje ku “peyva Xwedayê me her û her dimîne” (Îşaya 40:8, Mizgînî).

HÛR Û KÛR BIFIKIRE

4. Nivîskarê eslî yê Kitêba Pîroz

VÎDEOYÊ vêxe. Paşê 2. Tîmotêyos 3:16 bixwîne û li ser van pirsan sohbetê bikin:

VÎDEO: Nivîskarê Kitêba Pîroz Kî ye? (Bi Qismî) (2:48)

• Kitêba Pîroz bi destê însanan hatiye nivîsandin. Lê çima jê re “Peyva Xwedê” tê gotin?

• Tu çi dibêjî, gelo maqûl e ku Xwedê fikrên xwe derbasî hişê însanan kiriye?

5. Kitêba Pîroz li hemberî derbeyên mezin bi ser ket

VÎDEO: Wan Qîmet Dida Kitêba Pîroz (Bi Qismî: William Tyndale) (6:17)

• Gelek kes hazir bûn ku ji bo parastina Kitêba Pîroz canê xwe bidin. Gelo ev yek dilê te xweş nake ku tu Kitêba Pîroz bixwînî?

Zebûr 119:97 bixwîne û li ser vê pirsê sohbetê bikin:

• Çima gelek kes hazir bûn ku ji bo tercûmekirin û belavkirina Kitêba Pîroz canê xwe bidin?

6. Kitêbeke ji bo hemû însanan

Di tarîxê de, Kitêba Pîroz kitêba herî zêde tercûmekirî û belavkirî ye. Karên Şandiyan 10:34, 35 bixwîne û li ser van pirsan sohbetê bikin:

• Çima Xwedê dixwaze ku Kitêba Pîroz bi gelek zimanan bê tercûmekirin û belavkirin?

• Çima kêfa te ji Kitêba Pîroz re tê?

BI ÇEND GOTINAN

Kitêba Pîroz Peyva Xwedê ye. Kitêba Pîroz bi gelek zimanan heye.

Tu çi elimî?

• Xwedê çawa fikrên xwe bi destê pêxemberan dane nivîsandin?

• Kitêba Pîroz li hemberî derbeyên mezin bi ser ketiye, hatiye tercûmekirin û belavkirin. Ev yek li ser te çawa tesîr dike?

• Ji bo ku Xwedê fikrên xwe bigihîne me, wî gelek tişt kirine. Gelo ev yek dilê te digire?

ZÊDETIR HÎN BIBE

Li ser dîroka Kitêba Pîroz, yanî ji destnivîsên eslî bigire heta wergerên ku îro hene, hin tiştan bixwîne.

“Kitêba Pîroz Çawa Gihîştiye Me?” (Hişyar Bin!, Mijdar 2007)

Kitêba Pîroz li hemberî kîjan derbeyên mezin bi ser ketiye?

“Kitêba Pîroz li Hemberî Derbeyên Tunekirinê bi Ser Ketiye” (Birca Çavdêriyê No. 4 2016)

Ka binêre ku hin kesan di bin xetera mirinê de çawa Kitêba Pîroz tercûme kiriye.

Wan Qîmet Dida Kitêba Pîroz (14:26)

Kitêba Pîroz gelek caran hatiye kopîkirin û tercûmekirin. Em ji ku dizanin ku ew nehatiye guhertin?

“Gelo Kitêba Pîroz Hatiye Guhertin?” (Meqaleya Înternetê)