DERS 51
Bi Gotinên Xwe Dilê Yehowa Xweş Bike
Kitêba Pîroz dibêje ziman diyariyeke pir xweş e ku Yehowa daye me. Gelo ji bo wî muhîm e ku em çawa xeber didin? Belê, helbet muhîm e! (Aqûb 1:26 bixwîne). Gelo em çawa dikarin bi gotinên xwe dilê Yehowa xweş bikin?
1. Em çawa dikarin bi gotinên xwe qenciyê bikin?
Kitêba Pîroz van gotinên xweş ji me re dibêje: “Di ber dilê hev de werin û hevdû ava bikin” (1. Selanîkî 5:11). Gelo tu kesekî ku bêkêf bûye nas dikî? Gelo tu çawa dikarî dilê wî xweş bikî? Ji wî re bibêje ku ew li ber dilê te gelek ezîz e. Belkî tu dikarî ji wî re bibêjî ku çima kêfa te ji wî re tê. Teyê bi kîjan ayetê dilê wî ava bikira? Di Kitêba Pîroz de gelek ayetên xweş hene. Ji bîr neke xeberdana xweş û gotina jidil, diçe dil. Loma xîret bike ku tu her tim bi zimanekî şîrîn û nerm xeber bidî (Methelokên Silêman 15:1).
2. Gerek em bi çi awayî xeber nedin?
Kitêba Pîroz dibêje: “Bila qet gotina xerab ji devê we dernekeve” (Efesî 4:29 bixwîne). Yanî gerek em nifiran nekin, xeberên pîs û gotinên ku dikarin dilê kesên din biêşînin, nebêjin. Wekî din, gerek em li ser kesên din xeberên xerab nebêjin, sirên tu kesî eşkere nekin û fesadî û paşgotiniyê nekin (Methelokên Silêman 16:28 bixwîne).
3. Çi alî me dike ku em bi zimanekî xweş xeber bidin?
Gotinên ku ji devê me derdikevin eşkere dikin ku dilê me û hişê me li ser çi ye (Lûqa 6:45). Loma, gerek em xwe bielimînin ku em bala xwe bidin ser tiştên baş. Yanî gerek em li ser tiştên rast, paqij, delal û hêjayî pesindanê bifikirin (Filîpî 4:8). Ji ber vê yekê, gerek em hay ji xwe hebin ku em sebra xwe bi çi tînin, di televîzyonê de li çi mêze dikin û wexta xwe bi dostên baş re derbas bikin (Methelokên Silêman 13:20). Wekî din, gerek em pêşî baş bifikirin û paşê xeber bidin. Bila haya te ji gotinên te hebe ku ew li ser kesên din çawa tesîr dikin. Kitêba Pîroz dibêje: “Gotinên bêfikar wekî birîna şûr e, lê zimanê şehrezayan şifa ye” (Methelokên Silêman 12:18, Mizgînî).
HÛR Û KÛR BIFIKIRE
Em çawa dikarin bi gotinên xwe dilê Yehowa şa bikin û kesên din ava bikin?
4. Pêşî bifikire, paşê xeber bide
Carinan em hemû ji gotinên xwe poşman dibin (Aqûb 3:2). Galatî 5:22, 23 bixwîne û li ser van pirsan sohbetê bikin:
Kîjan sifet dikarin alî te bikin ku tu pêşî bifikirî û paşê xeber bidî? Dua çawa dikare alî te bike?
1. Korîntî 15:33 bixwîne û li ser vê pirsê sohbetê bikin:
Televîzyon, kêf û şahî û dostên te dikarin li ser xeberdana te çawa tesîr bikin?
Gelo çi tişt li ser xeberdana te tesîrê dike?
Waiz 3:1, 7 bixwîne û li ser vê pirsê sohbetê bikin:
Çima carinan çêtir e ku em bêdeng bimînin û li benda demeke minasib bisekinin?
5. Li ser kesên din bi awayekî baş xeber bide
Em çawa dikarin hay ji xwe hebin ku em dilê kesên din neêşînin û gotinên tehl nebêjin? VÎDEOYÊ vêxe û li ser van pirsan sohbetê bikin:
Birayê me çima êdî nedixwest li ser kesên din tiştên xerab bibêje?
Wî çi kir ku hay ji zimanê xwe hebe?
Waiz 7:16 bixwîne û li ser vê pirsê sohbetê bikin:
Ji bo ku em li ser kesên din tiştekî xerab nebêjin, gerek em çi bînin bîra xwe?
Waiz 7:21, 22 bixwîne û li ser vê pirsê sohbetê bikin:
Gava kesên din li ser te tiştên xerab bibêjin, ev ayet çawa alî te dike ku tu neqehirî?
6. Tevî malbata xwe bi awayekî xweş xeber bide
Yehowa dixwaze ku em bi malbata xwe re bi zimanekî şîrîn û xweş bipeyivin. VÎDEOYÊ vêxe û li ser van pirsan sohbetê bikin:
Çi dikare alî te bike ku tu bi malbata xwe re bi zimanekî şîrîn û xweş xeber bidî?
Efesî 4:31, 32 bixwîne û li ser vê pirsê sohbetê bikin:
Gerek em bi malbata xwe re çawa xeber bidin?
Yehowa anî zimên ku ew ji Kurê xwe Îsa Mesîh hez dike. Meta 17:5 bixwîne û li ser vê pirsê sohbetê bikin:
Gava tu bi malbata xwe re xeber didî, tu çawa dikarî Yehowa ji xwe re bikî emsal?
Li fersendan bigere ku tu pesnê kesên din bidî
HINEK WISA DIBÊJIN: “Ez çi bixwazim ezê wê bêjim. Kî aciz dibe ne xema min e.”
Gelo tu çawa difikirî?
BI ÇEND GOTINAN
Ziman hem dost e hem dijmin e. Loma gerek em hay ji xwe hebin ku em bi kesên din re çi, kengê û çawa xeber didin.
Tu çi elimî?
Tu çawa dikarî bi gotinên xwe ji kesên din re qenciyê bikî?
Gerek em çawa xeber nedin?
Çi alî me dike ku em her tim bi zimanekî şîrîn û xweş xeber bidin?
ZÊDETIR HÎN BIBE
Çi alî me dike ku em bi zimanekî baş xeber bidin?
Çima gerek em gotinên pîs nebêjin?
Çi dikare alî me bike ku em fesadiyê nekin?
Zilamekî dixwest dev ji gotinên pîs û nifiran berde. Gelo Yehowa çawa alî wî kir?
“Ez Kûr Difikirîm ku Jiyana Min wê Çawa Bibe” (Birca Çavdêriyê, 1 Tebax 2013)