Îsa Şawûl Dijbêre

Şawûl bajarvanê Romê bû, ew Tarsûsêda hatibû bûyînê. Ew Fêrisî bû û Qanûna Cihûya rind zanibû, ewî Mesîhiya nefret dikir. Ew dikete malên Mesîhiya, wana digirt û davîte kelê. Carekê Şawûl sekinîbû û dinihêrî ça cimeta hêrs pê kevira Steyfan dikuştin.

Lê Şawûl ne tenê Orşelîmêda pey Mesîhiya diket. Şawûl gote serekkahîn, wekî îzinê bide wî here şeherê Şamê û wêderê jî Mesîhiya bide girtinê. Gava Şawûl nêzîkî şeher dibû, nişkêva ronkaya ji ezmên dora wî şewq da û ew erdê ket. Ewî deng bihîst ku gote wî: “Şawûl, çima tu pey min ketî?” Şawûl got: “Tu kê yî?” Ewî got: “Ez Îsa me. Here Şamê û tuyê pêbihesî çi gerekê bikî”. Wê demê Şawûl kor bû, merivên ku tevî wî bûn milê wî girtin û birine şeher.

Şamêda Mesîhîkî amin dima, navê kîjanî Hananiya bû. Îsa xewn-xeyalêda gote wî: “Here kûça ku jêra Rast dibêjin, mala Cihûdada, bona Şawûl bipirse”. Hananiya got: “Xudan, ez hemû tiştî derheqa wî merivî zanim! Ew pey şagirtên te dikeve û wana dike kelê”. Lê Îsa got: “Here cem wî. Min Şawûl jibartiye, wekî ew mizgîniya xêrê nava gelek miletada bela ke”.

Hananiya çû pey Şawûl û gava wî dît, gotê: “Şawûl, birê min, Îsa min şand, wekî tu bikaribî dîsa bivînî”. Hema wê demê çevê Şawûl vebûn. Ewî destpêkir derheqa Îsa zanebûnê bistîne û bû şagirtê wî. Ew hate nixumandinê çawa Mesîhî û kinîştada tevî Mesîhiyên din rastiyê hîn dikir. Bide hesabê xwe, merivên Cihû çiqas ecêbmayî diman, çaxê didîtin, wekî Şawûl derheqa Îsa cimetê hîn dike! Wana digot: “Gelo ew ne ew meriv e, kîjan pey şagirtên Îsa diket?”

Şawûl weke sê sala şeherê Şamêda xizmet dikir. Cihûya Şawûl nefret dikirin û hev dişêwirîn ça wî bikujin. Şagirt derheqa wê yekê pêhesiyan û alî Şawûl kirin, wekî ew xilaz be. Dîwarê dora şeherda qul hebû, wana wî kirine sevetê û wê qulêra daxistin.

Çaxê Şawûl hate Orşelîmê, ewî dixwest rastî birên wêderê bê. Lê ewana gelek wî ditirsiyan. Lema şagirtekî rem bi navê Barnabas, tevî Şawûl hate bal şagirta û wana da bawerkirinê, wekî Şawûl hatiye guhastinê. Şawûl tevî civata Orşelîmê destpêkir bi xîret mizgîniya xêrê bela ke. Wede şûnda wî nas dikirin çawa Pawlos.