NAVÊ XWEDÊ ÇI YE?

Çaxê tu dixwazî kesekî nas kî, hemikî pêşiyê tuyê pirs kî: “Navê te çi ye?” Lê hergê tu evê pirsê bidî Xwedê, hingê ewê ça caba te bide?

“Ez Yehowa me. Navê min ew e” (Îşaya 42:8, DT).

Te ev navê Xwedê bihîstiye? Diqewime belê. Bi rastî tercimanên Kitêba Pîroz navê Xwedê gelek car ne didane xebatê. Lê dewsa navê Xwedê, wana didane xebatê sernavê usa ça: “XUDAN”. Bi rastî navê Xwedê li orîjînala Kitêba Pîrozda weke 7 000 cara hatiye nivîsarê. Ev nav ji çar herfên nedenganî ye YHWH, û ser zimanê Kurdî-Kurmancî tê gotinê “Yehowa”.

Navê Xwedê temamiya têksta Îbranîda tê dîtinê û gelek welgerandinên dinda

ÇIMA NAVÊ XWEDÊ USA FERZ E

Bona Xwedê ev nav ferz e. Ev nav, Xwedê xwexa bona xwe bijartiye. Yehowa dibêje: “Heta-hetayê navê min ev e û hemû nisilada ezê aha bême bîranînê” (Derketin 3:15). Di Kitêba Pîrozda ev navê Xwedê ji hemu sernavên wî, mesele Himzor, Bav, Xudan yan Xwedê hê zêde car tê xebitandinê û usa jî ji navên meriva, mesele Birahîm, Mûsa, Dawid, û Îsa zêdetir e. Hê ferz ew e, wekî Yehowa xwexa dixwaze wekî navê wî bê eyankirinê. Kitêba Pîroz dibêje: “Bira meriv bizanibin ku navê te Yehowa ye, û li ser temamiya erdê yê Hêrî Jorin tenê tu yî” (Zebûr 83:18, DT).

Bona Îsa ev nav ferz e. Îsa peyçûyên xwe hîn dikir, wekî ewana duayên xweda usa bêjine Xwedê: “Navê te pîroz be” (Metta 6:9). Îsa xwexa jî Xwedêra usa dua dikir: ”Bavo, navê xwe bilind ke” (Yûhenna 12:28). Jîyîna Îsada herî ferz ew bû, ku navê Xwedê rûmet ke, lema jî ewî duayên xweda got: ”Min tu wanva dayî eyankirinê û ezê hê bidime eyankirinê” (Yûhenna 17:26).

Bona me ev nav ferz e. Cimeta Xwedêye berê, fem dikir ku xilazkirina wan navê Xwedêyî mexsûsva girêdayî ye. ”Navê Yehowa birca qewî ye, yên heq direwine hindur û xilazbûnê distînin” (Metelok 18:10, DT). “Her kî bangî navê XUDAN [Yehowa, DT] bike wê xelas bibe” (Yowêl 2:32). Kitêba Pîroz nîşan dike, ku xizmetkarên Xwedê wê bi vî navî cude bin. “Ji ber ku hemûya neteweyan, her yek bi navê îlahê xwe dimeşe, em jî her tim û heta bêdawîbûnê, bi navê Xwedayê xwe [Yehowa, DT] Xudanva dimeşin!” (Mîxa 4:5; Karên Şandiya 15:14).

EV NAV ÇI EYAN DIKE

Ev nav eyan dike Xwedê. Gelek zandar dibêjin, wekî navê Yehowa tê hesabê “Ew Dike wekî Bibe”. Çaxê Yehowa Xwedê tevî Mûsa xeber da, ewî mena navê xwe wîra vekir: “Ezê Bibime Ew, Kê jî Bixwazim Bibim” (Derketin 3:14, DT). Navê Xwedê tê hesabê hê zêde, ne ku tenê rola wî ku Ew Efirandarê her tiştî ye. Ew tê hesabê, wekî Xwedê dikare bibe ew kê jî bixwaze. Xêncî wê yekê, navê wî dîsa jî tê hesabê, wekî ew dikare usa bike, wekî efrînên wî bibin ew kê jî Ew xwexa bixwaze, seva qirara xwe bîne sêrî. Sernavên Xwedê eyan dikin himzoriya wî, hukumtî û qewata wî, lê navê wî Yehowa, eyan dike hemû tiştî derheqa wî, yanê ew yekî çawa ne û qewata wî digihîje çi.

Navê wî nîşan dike, wekî ew bona me xem dike. Mena navê Xwedê zelal dike, wekî ew hindava hemû efirînên xwe, hela hê hindava meda jî, amin e. Ev yek ku Xwedê navê xwe mera eyan kir, dide kifşê wekî ew dixwaze em wî nas kin. Yehowa gava pêşin avît, ku navê xwe mera eyan ke. Zelal e, Xwedê dixwaze wekî wî hesab kin ne ça xudanê ku xwe ji me dûr digire, lê ça kesê rêalî, tevî kîjanî em dikarin nêzîk bin (Zebûr 73:28).

Xebitandina navê Xwedê nîşan dike, ku em dixwazin wî hê rind nas kin. Mesele bide hesabê xwe, ku hevalê te wedê xeberdanê naxwaze navê te hilde. Teyê çi texmin kira? Dibeke tu bifikiriyayî wekî ew meriv bi rastî naxwaze nêzîkî te be. Evê yekê em dikarin derheqa Xwedê jî bêjin. Yehowa navê xwe însanetêra eyan kir, û ew me hêlan dike evî navî bidine xebatê. Çaxê em evî navî didine xebatê, usa em Yehowara nîşan dikin ku dixwazin nêzîkî wî bin. Lema jî ew dîna xwe dide wan, yên ku bona “navê wî difikirin” (Malaxî 3:16).

Gava pêşine sereke ku Xwedê nas bikin ew e, wekî navê wî pêbihesin. Lê em gerekê berdewam kin wî nas kin û pêbihesin, hela piş vî navî Kê sekiniye û bi rastî Ew yekî çawa ne.