Xwedê Çima Caba Hemû Dua Nade?
Bavê meyî ezmana Yehowa Xwedê hazir e û şa ye guh bide duayên meyî ji dil. Lê hine tişt hene ji bo çi jî Xwedê caba hemû dua nade. Gelo çi ne ev tişt û gava em dua dikin çi gerekê bîra xweda xweyî kin? Derheqa vê yekê jêrê hine rêberiyên ji Kitêba Pîroz hatine dayînê.
“Gava ku hûn dua dikin, giliya dîsa û dîsa newekilînin” (Metta 6:7).
Yehowa naxwaze, wekî em bi ezberî dua biwekilînin yan jî bi xwendinê dua bikin. Lê dewsê ew dixwaze, ku em ji dil tevî wî xeber din. Bide ber çevê xwe hevalekî te heye, û gava ew tevî te xeber dide, her roj giliyên mîna hev bi ezberî diwekilîne. Teyê çi texmîn kira? Hevalên baş wê hevra ji dil xeber din. Çaxê em bi giliyê xwe dua dikin, usa em şexsî Bavê xweyî ezmanara xeber didin.
“Gava hîvî dikin, nastînin, çimkî ser nêta xirabiyê hîvî dikin” (Aqûb 4:3).
Hergê duayên xweda em tiştên usa dixwazin, çi ku Xwedê xweş nayên, hemikî ew wê caba duayên me nede. Mesele, em zanin wekî Yehowa timayê sûcdar dike. Lê gelo Ew wê kerem bike duayê merivê xumarbaz, kîjan ku dixwaze wekî Xwedê alî wî bike, ku gelek pera çêke? (Îşaya 65:11; Lûqa 12:15). Hemikî Yehowa wê caba duayê vî cûreyî nede! Seva ku Xwedê caba duayê me bide, em gerekê îzbat bin ku duayê me li gora qirara wî ye.
“Ewê ku tilîya dike guhê xwe ku qanûnê nebihê, duayê wî jî heta zivêr e” (Metelok 28:9).
Wedê berê, Xwedê caba duayên wan meriva nedida, kîjana qanûnên wîyî rast înkar dikirin (Îşaya 1:15, 16). Nihêrandina Yehowa nehatiye guhastinê (Malaxî 3:6). Hergê em dixwazin, Xwedê caba duayên me bide, em gerekê her tiştî bikin wekî gura qanûnên wîda bin. Lê hergê me berê tiştên nerast dikir? Gelo ev tê hesabê, wekî Yehowa wê îda tu cara guh nede duayên me? Hemikî na! Hergê em tobe dikin û qewatê didine xebatê, ku dilê Xwedê şa kin, ew wê bi hizkirin bibaxşîne me (Karên Şandiya 3:19).