Ebaruha Okwa Banya Efeso
3 Busana n’eki, ingye Paulo, omunya-ngomo wa Kristo Yesu busana nenyu, abandu b’ebihanda— 2 kwenene mwamabya imwabiriowa oko bwimaniri bw’olhukogho lhwa Nyamuhanga obo nahebawa busana nenyu, 3 ngoku omw’ibisulirwa munaminyisibwa embitha eyibuyirire, ngoku nanabya inabiribahandikira omwa bikuhi. 4 Neryo omughulhu mukasoma ebi, mwangana minya ngoku munayitheghererya ndeke embitha eyibuyirire ya Kristo. 5 Okwa sindi ndengo embitha eyi muyithaminyisibwa okwa baana b’abandu ngoku lino yabiribisulhwa okwa bakwenda biwe ababuyirire n’abaminyereri erilhabira omwa mulimu, 6 ni bugha ambu, abandu b’ebihanda, busana n’erimathikana na Kristo Yesu n’erilhabira omwa ngulhu yuwene, babye bawetwa haghuma nayu kandi bitsuko by’omubiri n’erisangira nethu omwa mulhaghe. 7 Munabya muherezya w’eki erikwamana n’ekihembo kya Nyamuhanga eky’olhukogho ekikahebawa ahathe erithuha ekyo nahebawa erilhabira omw’ikolha ly’obuthoki bwiwe.
8 Ingye, omundu wahisi kutsibu kwilhaba abahisi ab’okwa babuyirire bosi, munahebwa olhukogho olhu, nuku ngabwire ab’ebihanda b’engulhu yuwene eyihambire okwa bugaga bunene obuthehwayo obwa Kristo 9 n’erileka obuli mundu alhangire embitha eyibuyirire ey’obuthegheki eyabya iyabiribiswa ahabw’emyaka omu Nyamuhanga, oyuwahangika ebindu ebyosi. 10 Eki kyabya kithya nuku lino, erilhabira omwa kithunga, amathabali n’eby’obuthoki ebiri omwa myanya y’elhubulha byanga minya amenge wa Nyamuhanga manene awakalhangirika omwa myatsi muthina-muthina. 11 Eki kihambene n’ekighendererwa ekya kera na kera ekyo ahiraho ekihambire oku Kristo, Yesu Omukama wethu, 12 oyo erilhabira omw’iyo thuwithe obwiranda obu obw’erikania n’obw’erihikira Nyamuhanga ithunasikire busana n’erikirirya omw’iyo. 13 Neryo ngabasaba indi isimwabikyako habw’amalighe agho ngabana busana nenyu, kundi eki ni lhukengerwa okw’inywe.
14 Busana n’enzumwa eyi ngakukamira Thatha, 15 oyukaha obuli eka eyiri omwa lhubulha n’eyiri okwa kihugho y’erina lyayu. 16 Ngasaba indi ambi iniabathokesya erilhabira omwa bungyi bw’olhukengerwa lhwiwe, omundu oyo muli omwakathi abye n’amaaka, erilhabira omwa mulimu wiwe, 17 kandi indi erilhabira omw’ikirirya lyenyu ambi Kristo in’ikalha omwa mithima yenyu omwa lhwanzo. Ambi imwahanda emirihi n’erisingikwa ndeke okwa musingyi, 18 nuku inywe haghuma n’ababuyirire bosi mwangathoka eriyitheghererya ndeke obughali n’obuthambi n’obuuli n’omuthobero, 19 n’eriminya olhwanzo lhwa Kristo olhulengire eriminya, nuku mwangusulhamo ebyosi ebya Nyamuhanga akaha.
20 Neryo oko oyukathoka erikolha bingyi ebilhabire okwa myatsi yosi eyathukasaba kutse eyathukalengekanaya, erikwamana n’obuthoki bwiwe obukakolha omw’ithwe, 21 ahebawe olhukengerwa erilhabira omwa kithunga n’erilhabira omu Kristo Yesu okwa syondengo syosi kera na kera. Amina.