Ebaruha Okwa Banya Efeso
4 Busana n’ekyo, ingye munya-ngomo omo Mukama, ngabalemba-lemba indi mulendere ng’abanatholere eribirikirwa eryo mwabirikirawamo, 2 omw’iyikehya* lyosi n’omwa bwolho, omw’ighumisirizya, erighumirana omwa lhwanzo, 3 mulengeho kutsibu eribya n’obughuma bw’omulimu omwa buholho obukamathanaya haghuma. 4 Hali mubiri mughuma, n’omulimu mughuma, ngoku mwabirikirawa omwa maha maghuma aw’eribirikirwa lyenyu; 5 Omukama mughuma, erikirirya lighuma, olhubatizo lhughuma; 6 Nyamuhanga mughuma kandi Thatha w’abosi, oyuli endatha okwa byosi n’erilhabira omwa byosi kandi ali omwa byosi.
7 Neryo obuli mughuma w’okw’ithwe mwahebwa olhukogho erikwamana ngoku Kristo aghaba ekihembo ekikahebawa ahathe erithuha. 8 Kundi kihandikire kithi: “Omughulhu ahethukira endatha mwaheka abanyewa; mwaha abalhume mwa bihembo.” 9 Neryo kikamanyisayaki eribugha hathi “ahethukira” aliwe kandi mwandaghalira omwa bitsweka by’eyikwa, ni bugha ambu, ekihugho? 10 Oyuwanandaghalha kandi y’oyuwanahethukira endatha kutsibu okwa syonyibulha syosi, nuku angaberererya emyatsi yosi.
11 Neryo mwaha abandi ng’abakwenda, abandi ng’abaminyereri, abandi ng’abathuli b’enjiri, abandi ng’abalisya n’abakangirirya, 12 inianawithe amalengekania w’erihengulha* ababuyirire, busana n’omubiiri w’obuherezya, erihimba omubiri wa Kristo, 13 erihika aho ithwe bosi thukendi syabanira obughuma omw’ikirirya n’omw’iminya erihikire erya Mughalha wa Nyamuhanga, eribya mundu oyukulire ndeke, erihika okwa lhulengo lhwa Kristo. 14 Neryo sithutholere thukathasyabya baana abakaghusawa eyi n’eyi omwa bisunda n’erihekwa eyi n’eyi omwa buli muyagha w’erikangirirya ery’amathebo w’abandu, omwa menge w’obughobya. 15 Aliwe erithabugha okwenene, thukule omo lhwanzo omo myatsi yosi omw’oyo oyuli muthwe, Kristo. 16 Erilhua okw’iyo omubiri wosi atsutsikanibirwe haghuma kandi akolirwe erikolera haghuma omwa buli nungu eyikaha ebikayithaghisibawa. Obuli kitsuko kyamakolha ndeke, eki kikaleka omubiri iniakulha inianemuyihimba omo lhwanzo.
17 Neryo eki kya ngabugha n’erihako obwema omo Mukama, indi simutholere mukathasyalendera ngoku abandu b’ebihanda bakalendera, omwa bukiru bw’obulengekania bwabo. 18 Bali omwa mwirima omwa bulengekania kandi bali haali okwa ngebe ya Nyamuhanga, busana n’obuthaminya obuli omw’ibo, busana n’emithima yabo eyabiribya kihiriti.* 19 Kundi babiriyikoberya omwa buthakw’isoni, babiriyihayo okwa mibere y’obukamya meso* n’erikolha obuli mulingo w’obukine omwa mururu.
20 Aliwe Kristo oyo mw’ighako kw’athe athya, 21 mwamabya kwenene imumwamwowa n’erikangiriribwa erilhabira omw’iyo, ngoku kine indi ekwenene yiri omu Yesu. 22 Mumwakangiriribwa erilhusya omundu wakera oyukaghondera emibere yenyu yakera kandi oyukatsandibawa erikwamana n’esyongumbu siwe sy’amathebo. 23 Kandi mutholere imwalholha embere eriyirwa mwa bahya-bahya omwa bulengekania* bwenyu obukabathabalhako, 24 kandi mutholere imwambalha omundu muhya-muhya oyuwahangikawa erikwamana n’erisonda lya Nyamuhanga omwa lithunganene ery’okwenene n’obuthaleghulha.
25 Neryo kundi mwabirileka amabehi, obuli mughuma w’okw’inywe abughe eby’ekwenene n’omuliranwa wiwe, kundi thuli bitsuko by’omubiri mughuma. 26 Muhithane, aliwe isimwakolha ekibi; simuleke eryuba likalenga imukinahithene; 27 simuhe Diabolo y’akaghisa.* 28 Oyuk’iba alekere aho er’iba; aliwe akole kutsibu, erikolha omubiiri owuwene omwa byalha biwe, nuku angabana eky’eriha oyuli omwa buyithawa. 29 Ambi ekinywe ekibbolire isikyalhua omwa buno bwenyu, aliwe ebikahimba bisa kikayithaghisibwa, eribugha ebyanga ghasira abahulikiriri. 30 Kandi simubye mukitha omulimu abuyirire wa Nyamuhanga w’obulighe,* ogho erilhabira omw’igho mwabirihirwako akaminyikalho busana n’ekiro ky’eriboholhwa omwa ndongolya.
31 Muyilhusayeko obuli mulingo w’ekinigha ekikalire, eriaghalirwa, erihithana, obutsurumi, n’eritsuma, kuthya n’obuli kindu ekikahuthalhaya. 32 Aliwe muyirirane olhukeri, eribuya-buyana omw’ikwirana obulighe, erighanyirana okwa bbule ngoku Nyamuhanga nayu erilhabira omu Kristo anabaghanyira okwa bbule.