Ebaruha y’Erimbere Okwa Banya Tesalonika
5 Neryo balikyethu, bikahika okwa mighulhu n’ebirimo, simuliyithagha erihandikirwa ekyosi-kyosi. 2 Kundi inywibene-bene munasi ndeke-ndeke ngoku ekiro kya Yehova kinemwasa ng’omwibi oyukasa omwa kiro. 3 Bakendi syabya bakabugha bathi, “Obuholho n’obuthekane!” neryo erithoghothya erya kitsumbukirania likendi syabahikako aho naho, ngoku obulhumi bw’eributha bukanahika okwa mukule, kandi sibendi syabalha nahake. 4 Aliwe inywe, balikyethu, simuli omwa mwirima, nuku ekiro ekyo kireke erisyabahikako isimuyitsulirye ngoku bukanakererera abibi isibayitsulirye, 5 kundi inywe bosi muli baana b’ekyakakalha kandi baana b’erithungyi. Sithuli b’ekiro kutse ab’omwirima.
6 Neryo kwesi, sithughotsere ng’abandi ku bakakolha, aliwe thubye ithunalholire kandi ithunatheghirye. 7 Kundi abakaghotsera, bakaghotsera omwa kiro, n’abakathamira, bakathamira omwa kiro. 8 Aliwe ithwe ab’erithungyi, thubye ithunatheghirye kandi thwambale ekitheya-kikuba eky’erikirirya n’olhwanzo n’amaha w’omulhamu ng’ekisapeho 9 kundi Nyamuhanga mwathusombolha, isi busana n’erisyabana erihithana liwe, aliwe busana n’eribana omulhamu erilhabira omo Mukama wethu Yesu Kristo. 10 Mwathuholera, nuku mbulha thubukire kutse thughotsere,* thutholere ithwabyaho haghuma nayu. 11 Busana n’ekyo, mulhole embere erihirana mw’omuhwa* n’erihimbana, ngoku munemukolha.
12 Neryo balikyethu, thukabasaba thuthi, musikaye abakakolha kutsibu omwa kathi-kathi kenyu kandi abakabasondolha omo Mukama kandi abakabahabulha; 13 kandi omo lhwanzo thubatsomane kutsibu omwa nzira eyilengire eya buli kiro busana n’eby’abakakolha. Mubye buholho owundi busana n’owundi. 14 Okwa lhundi lhuhandi, balikyethu, thukabalemba-lemba thuthi mukunge* abakalendera mahengu-hengu, muhumulikanaye abakasindoghera,* muwathikaye abatsekire, mughumisirizaye abosi. 15 Mulhangire muthi sihabye owosi-wosi oyukathuhulhaya, aliwe mughulhu wosi mukolerane ebibuya n’okwa bandi bosi.
16 Mutseme mughulhu wosi. 17 Musabe buth’usa. 18 Muhe ewasingya busana n’obuli kindu. Eri ly’erisonda lya Nyamuhanga busana nenyu omu Kristo Yesu. 19 Simulimaye omuliro w’omulimu. 20 Simupone amaminyereri. 21 Mulebaye ndeke emyatsi yosi; mumakirire ekibuya. 22 Muyihighule okwa buli mulingo w’obubi.
23 Ambi Nyamuhanga w’obuholho iyuwene-wene iniabahighulha ndeke-ndeke. Kandi ambi balikyethu, omulimu wenyu n’engebe yenyu n’omubiri wenyu, ibyalhughirirana omo buli mwatsi, isibiriko kahinira okw’ibyaho ly’Omukama wethu Yesu Kristo. 24 Oyukababirikira ni muyiketherwa, kandi omo kwenene akendi kolha ekyo.
25 Balikyethu, mulhole embere erithusabira.
26 Muramukaye balikyethu abosi omw’ilyatsirira eribuyirire.
27 Ngabalemba-lemba kutsibu omo Mukama indi mulhangire muthi ebaruha eyi yikasomerawa balikyethu abosi.
28 Olhukogho lhw’Omukama wethu Yesu Kristo lhubye nenyu.