Gherereraya Eriyikehya lya Yesu n’Olhukeri Lhwiwe

1. Erigherererya Yesu lyanga thuthunda lithi hakuhi na Yehova?

MUGHULHU mungyi thukanza ithwagherererya abawithe emibere n’emighendere eya thwanzire. Omwa bandu abosi ababirithabyaho okwa kihugho, sihali ow’erigherererya oyulengire Yesu Kristo. Busana naki? Yesu iyuwene-wene mwanabugha athi: ‘Oyuwamanyilhangira iniamabirilhangira Thatha.’ (Yn. 14:9) Emibere ya Yesu yiri ng’eya Thatha wiwe ndeke-ndeke, indi wamamulhangira wukabya nga wamalhangira Thatha wiwe. Busana n’ekyo, thukabya thukagherererya Yesu, thukabya ithwama yithunda hakuhi na Yehova, oyulengire ebyosi omwa buhangwa. Oyu ka ni mughisa munene busana n’erigherererya Mughalha wiwe!

2, 3. (a) Ni kyahi ekyaleka Yehova iniathuha amasako awakakangaya emibere ya Mughalha wiwe, kandi akanza thukoleki? (b) Omwa mwatsi ono n’ow’akakwamako, thukendi kania okuki?

² Aliriryo, emibere ya Yesu thwanga minyayo thuthi? Eky’omughisa, thunawithe ebihandikire ebya sondolhawa n’omulimu ebikakanganaya emibere ya Yesu. Yehova mwathuha ebihambire oku Yesu, ebikabanika omwa Masako w’Ekigiriki kundi anzire ithwaminya Mughalha wiwe ya ndeke nuku thwanga mugherererya. (Soma 1 Petero 2:21.) Omwa Biblia, eky’erileberyako ekya Yesu athusighira kikalinganisibawa ‘n’olhughobe.’ Ni bugha ambu, Yehova ali ng’oyukathubwira athi thukwame Yesu y’enyuma n’erilyatha ah’akalyatha. Ni kwenene eky’erileberyako ekya Yesu athusighira kyabya kihikene, kandi ithwe sithuhikene. Aliriryo Yehova syali thuyithaghako erikwama olhughobe lhwa Yesu ng’abahikene. Aliwe anzire ithwalengaho ngoku thwanga thoka erigherererya Mughalha wiwe omwa buthahikana bwethu.

³ Kwesi, leka thulebaye emighuma y’okwa mibere ya Yesu eyuwene. Omwa mwatsi ono thukendi kania okw’iyikehya n’olhukeri lhwiwe; n’ow’akakwamako, ithwasyakania okwa buthubaha n’eribya w’amenge. Okwa buli mubere, thukendi subirya bibulyo bisathu bino: Omubere oyu akamanyisayaki? Yesu mwakangania w’athi? Thwanga mugherererya thuthi?

YESU AKAYIKEHAYA

4. Wanga soborera wuthi eriyikehya?

⁴ Eriyikehya niki? Omwa kihugho kino ekiri mw’emiyiheko, abandi ibangana lengekania bathi eriyikehya ni bulemwa kutse erilemwa erisika. Aliwe kwa bithe bithya. Oyukayikehaya akabya iniawithe akaghalha n’obuthubaha. Eriyikehya likasoborerawa ngoku “ni mubere ow’erithendibya mw’emiyiheko n’akaghayu.” Eriyikehya likasighikira nga wukayilhangira wuthi. Edikisyanare nguma eyikasoborera ebinywe bye Biblia yikabugha yithi, “Eriyikehya ly’eriminya ngoku thuli b’ahisi kutsibu embere sya Nyamuhanga.” Thwamabya kwenene ithunayikehirye embere sya Nyamuhanga, ithukendi yihighulha okw’iyowa nga thulengire abandi. (Abar. 12:3) Sikyolho abandu eriyikehya. Aliriryo ithwangan’igha eriyikehya thwamaghanirya okw’ibya ithuli b’ahisi embere sya Nyamuhanga n’erikwama olhughobe lhwa Mughalha wiwe.

5, 6. (a) Mikaeli omulaika mukulhu nindi? (b) Mikaeli mwakangania athi omubere w’eriyikehya?

⁵ Yesu mwakangania athi eriyikehya? Erilhua kera, Mughalha wa Nyamuhanga asibwe ng’oyuwithe omubere w’eriyikehya, mwakangania gho iniane elhubulha ng’ekihangikwa ky’ekirimu eky’akaghalha kandi iniane okwa kihugho ng’omundu oyuhikene. Thuthalebya eby’erileberyako bike.

⁶ Ngoku akayilhangira. Omuhandiki we Biblia ya Yuda akathuha eky’erileberyako okwa bya Yesu akolha iniakine elhubulha. (Soma Yuda 9.) Iyo nga Mikaeli, omulaika mukulhu, Yesu ‘mwalhwa na Sitani’ ‘n’erikuba obuhaka’ n’omubi oyo. Eki kyabya “busana n’omubiri wa Musa.” Wibuke ngoku Musa abere abiriholha, Yehova mwamutsika ahathasibwe. (Ebi. 34:5, 6) Obundi Sitani anza erikolesya omubiri wa Musa erikulha-kulhania eriramya ly’amabehi. Mbulha Sitani abya awithe kighendererwa kyahi kibi busana n’omubiri oyo, Mikaeli mwathamulighira. Ekitabu kighuma kikasoborera kithi ebinywe by’Ekigiriki ebya hindulhawa mwa “mwalhwa” na “erikuba obuhaka” “bikanathasya kolesibawa erimanyisya erithongana” neryo ikyangana kangania “kithi Mikaeli ‘mwasinga Sitani’ omw’ithongana nuku syathwale omubiri wa Musa.” Aliwe, Omulaika Mukulhu oyu abya inianasi ngoku yuthatholere eritswera Sitani. Neryo eritswera mwalirekera Yehova, Omutsweri Mukulhu. Busana n’ekyo Mikaeli mwayitheya okw’ikolha ekithe omwa buthoki bwiwe, nomwanabya iniabirihithanibwa. Oyu k’abya mubere w’eriyikehya!

7. Yesu mwakangania athi eriyikehya omwa by’abugha n’omwa by’abya akakolha?

⁷ Iniane okwa kihugho akathulira, iniakakanganaya eriyikehya ery’okwenene omwa by’abya akabugha n’erikolha. Omwa mibughire. Isyali yipipa. Aliwe olhukengerwa lhwosi iniakalhusubuliraya Thatha wiwe. (Mk. 10:17, 18; Yn. 7:16) Omwa binywe biwe isyali ghaya abigha biwe kutse erileka bakayowa nga ni b’ahisi. Aliriryo iniakabaha ekitsumbi omw’ibasima busana n’ebibuya eby’abya akabalhangiramu kandi iniakangania kw’abayikethere. (Lk. 22:31, 32; Yn. 1:47) Omwa by’abya akakolha. Yesu mwayisinga eribya omwa ngebe ey’erithendi thunga bindu binene. (Mt. 8:20) Mwaligha erikolha ekindu ekyabya kikakolhwa n’abandu b’ahisi kutsibu. (Yn. 13:3-15) Iyo eribya mwowa mukyakangania ndeke-ndeke ngoku akayikehaya. (Fil. 2:5-8.) Erithendibya ng’abandu ab’emiyiheko abakalhangira obwowa nga siki, Yesu iyo mwaghondera ekya Nyamuhanga anza akole, omw’ibya ‘mwowa erihika okwa lhuholho.’ Mbwino eki sikiri kanganaya ngoku Yesu, Mughalha w’omundu, abya ‘w’omuthima ahehere’?​—Mt. 11:29.

GHERERERAYA ERIYIKEHYA LYA YESU

8, 9. Thwanga kangania thuthi eriyikehya?

⁸ Thwanga gherererya thuthi Yesu omw’ikangania eriyikehya? Ngoku thukayilhangira. Eriyikehya likaleka ithwayitheya okw’ikolha ekithe omwa buthoki bwethu. Thwamabya ithunasi ngoku thuthatholere eritswera abandi, isithwendyanguha eribatsweba busana n’ebisobyo byabu, kutse erithika-thikira ebilhubirirwa byabu. (Lk. 6:37; Yak. 4:12) Eriyikehya likaleka ithwayihighulha okw’iyowa nga thuli ‘bathunganene kutsibu,’ ekindu ekyangaleka ithwaghaya abathethoka ebya thukathoka kutse abathawithe esyonzunzo ng’esyethu. (Omu. 7:16) Abasyakulhu abakayikehaya si bali yilhangira nga balengire Abakristayo balikyabo. Aliriryo, abalisya ng’abo ‘bakaghanza obuli mundu mwa mubuya kwilhaba ibo’ n’eriyighanza mwa bake kutse ab’ahisi.​—Fil. 2:3; Lk. 9:48.

⁹ Thalengekania okwa W.  J. Thorn oyuwabya mulebererya oyukabalhama eritsuka 1894. Enyuma w’emyaka mingyi omwa mubiiri oyu, mwabirikirwa eriyakolera okwa Famu ye Beteli eyabya e New York amahebwa omubiiri w’erilabirira esyongoko. Akabugha athi: “Nanabya namasa mw’omuthima w’eriyirengekaniako kutsibu, ininga huna hake neryo inayibwira indi: ‘Iwe kadoti buyira k’olhuthuthu, obo ni kyahi ekyanga leka iwayiheka?’” (Soma Isaya 40:12-15.) Kwenene oyu k’abya mubere w’eriyikehya!

10. Thwanga kangania thuthi eriyikehya omwa mibughire yethu n’omwa bya thukakolha?

¹⁰ Omwa mibughire yethu. Thwamabya kwenene ithunawithe omuthima w’obwolho, ebya thukabugha ibikendi kangania eriyikehya lyethu. (Lk. 6:45) Thukakania n’abandi, thutholere ithwayihighulha okw’iyipipa busana n’ebya thukathoka n’esyonzunzo esya thuwithe. (Emi. 27:2) Aliwe, ithukendi rondekania ebibuya omwa balikyethu n’eribasima busana n’emibere mibuya eya bawithe, ebya bakathoka, n’ebya babirikolha. (Emi. 15:23) Ebya thukakolha. Abakristayo abakayikehaya sibalisondekanaya ebitsumbi omwa kihugho kino. Kamwanya ibabya omwa ngebe nyolho, nibya n’erikolha emibiiri eya bandu b’ekihugho bakalhangira mwa y’ahisi nuku banga thoka erikolera Yehova ya ndeke ngoku banga thoka. (1 Tim. 6:6, 8) Ekikulhu kutsibu, thutholere ithwa kangania eriyikehya omw’ibya bowa. Thukayithagha obwolho erithoka ‘eriowa abakathusondolha’ n’erighendera okwa busondoli obwa thukabana omwa kithunga kya Yehova.​—Ebr. 13:17.

YESU NI W’OLHUKERI

11. Soborera olhukeri nga niki.

¹¹ Olhukeri ni mubere w’olhwanzo. Amasako akakanaya oku Yehova na Yesu ng’abakakanganaya ‘omuthima w’erighanyira,’ ni bugha ambu ow’olhukeri, ‘n’ow’olhwanzo.’ (Lk. 1:78; 2 Kor. 1:3; Fil. 1:8) Ekitabu kighuma kikabya kikakania okwa kihano ky’Amasako eky’erikangania olhukeri, kikasoborera kithi: “Ekihano eki sikiri subulira okw’ibugha indi ambi ithwayihira omwa bisandu by’abakayithagha obuwathikya n’eribakwira obulighe lisa. Ni kihano ekikathuyithaghako eritsomana ndeke n’eriwathikya omundu omw’iyira ekya wukakolha nuku angathasyabya ndeke.” Omuthima w’olhukeri akakuha omuhwa w’eriyira ekya wukakolha. Omundu w’olhukeri akalumirirawa esyongebe sy’abandi.

12. Ni kyahi ekikakanganaya ngoku Yesu abya akakwira abandu b’obulighe, kandi olhukeri lhwiwe ilhukaleka iniakolhaki?

¹² Yesu mwakangania athi olhukeri? Omw’iyowa liwe n’omwa mikolere. Yesu iniakakwira abandu b’obulighe. Yesu abere alhangira munywani wiwe Maria n’abandi bakalira busana na Lazaro eriholha, “mwalira” ahathe eriyibisirira. (Soma Yoane 11:32-35.) Neryo busana n’obulighe obwabya omwa muthima wiwe obwaleka iniasubya omwana w’omukwakali, bwangabya ibw’obwanaleka inialhubukya na Lazaro. (Lk. 7:11-15; Yn. 11:38-44) Busana n’olhukeri olho, Yesu angabya imwaleka Lazaro iniabya iniangana syabana engebe elhubulha. N’okwa bundi buthuku, eki kithe kyabya, endeko nene y’abandu mubasa oku Yesu neryo ‘amabakwira obulighe.’ Busana n’olhukeri, ‘mwatsuka erikangiriryabo myatsi mingyi.’ (Mk. 6:34) Erikangirirya eri ka lyangabya imulyahindulha esyongebe sy’abalighenderako! Ebi bikakanganaya ngoku olhukeri lhwa Yesu lyabya isiyowa buyira; ilhukaleka iniathwamu eriwathikya abandu.​—Mt. 15:32-38; 20:29-34; Mk. 1:40-42.

13. Yesu mwakanirya athi abandu omwa lhukeri? (Lebaya ekisasani ekiri okw’itsuka.)

¹³ Ebinywe biwe by’olhukeri. Omuthima w’olhukeri iniakaleka Yesu iniakanirya abandu omwa lhukeri, na kwilhabirirya abakanubibawa. Omukwenda Matayo, akakania oku Yesu, mwakolesya ebinywe ebiri omu Isaya bino: ‘Syendi syabbuna ekibingo ekikokomire, kandi syendi syalimya embumba eyikathumba.’ (Isa. 42:3; Mt. 12:20) Yesu iniakakanaya omwa mibere eyikahumulikanaya ababbunikire omwa muthima ng’olhuseke olhuthulhangire kutse ng’orutambi lhw’etadoba olhukasonda eririma. Mwathulha engulhu ‘eyikalhunga ababbunikire omwa muthima.’ (Isa. 61:1) Mwakokya ‘abakanuba n’eriheka ebirithohire’ eryasa okw’iyo, amabaghumya ngoku bakendi ‘bana erilhuhuka’ omwa mithima yabu. (Mt. 11:28-30) Mwakakasya abigha biwe ngoku Nyamuhanga akatsomana obuli muramya Wiwe, nibya ‘n’abaana balere,’ ni bugha ambu, abandu abakalhangirika ng’abahisi omwa kihugho.​—Mt. 18:12-14; Lk. 12:6, 7.

GHERERERAYA OLHUKERI LHWA YESU

14. Thwanga thoka thuthi erikangania abandi b’olhukeri?

¹⁴ Thwanga gherererya thuthi Yesu omw’ikangania olhukeri? Omw’iyowa lyethu. Emibere ng’eyi sithuli buthanawa nayu, aliwe e Biblia yikathuhira mw’omuhwa w’erikulha-kulhania yo. ‘Omuthima w’erighanyira’ kutse ow’erikwira abandi b’obulighe ni kitsweka ky’okwa mundu muhya-muhya oyo Abakristayo abosi batholere ibambalha. (Soma Abanya Kolosai 3:9, 10, 12.) Wangathoka wuthi erikangania abandi b’olhukeri? Bakyungulire omuthima wawu. (2 Kor. 6:11-13) Hulikirira ndeke omundu akakubwira eriyowa liwe n’ebikamulyambaya. (Yak. 1:19) Thayihira kyoko n’eriyibulya wuthi: ‘Kunabya in’ingye iyo, ambi ngayowa indi? Nanganzire inawathikibwa indi?’​—1 Pet. 3:8.

15. Thwanga kolhaki eriwathikya abali ng’olhuseke olhuthulhangire kutse ng’akatadoba akakayalima?

¹⁵ Omwa mikolere yethu. Olhukeri lhukaleka ithwanza eriwathikya abandi erithasyabya ndeke, kwilhabirirya abali ng’olhuseke olhuthulhangire kutse ng’akatadoba akakanza eririma. Thwanga bawathikya thuthi? Abanya Roma 12:15 hakabugha hathi, ‘Mulire haghuma n’abakalira.’ Oyuli omwa bulighe angana tsemera eribya nayu omwa bulighe kwilhaba erimubwira eky’erikolha. Mwali wethu mughuma oyuwahumulikanibawa n’abalikyethu enyuma w’eriholerwa mwali wiwe, akabugha athi: “Munanza omughulhu banywani baghe basa n’erilira haghuma naghe.” Kandi thwangana kangania olhukeri omw’iwathikya abandi. Mbwino hane omukwakali omw’inywe oyuwithe enyumba eyikayithagha erikokothibwa? Mbwino hane mulikyethu oyukekelhuhire oyukayithagha eriwathikibwa erithoka erihika okwa mihindano, erighenda omw’ithulira, kutse erighenda okwa sipatara? Nibya n’erikolha kandu kake buyira lyangana wathikya kutsibu mulikyethu oyukayithagha obuwathikya. (1 Yn. 3:17, 18) Ekikulhu kutsibu, ithukendi kangania abandi b’olhukeri omw’isangira ndeke omwa mubiiri w’erithulira. Sihali yindi nzira eyilengire eyi eyathwanga wathikirya mw’ab’omuthima mwolho!

16. Thwanga kolesya binyweki eriwathikya abali omwa malighe?

¹⁶ Ebinywe by’olhukeri. Olhukeri olhwathuwithire abandi lhukaleka ‘ithwahamirya ab’omuthima owasikerere,’ ni bugha ambu, erihumulikania ab’amalighe. (1 Tes. 5:14) Thwanga kolesya binyweki eriwathikya abandu ng’aba? Thwangana kolesya ebinywe by’eribahumulikania omw’ibakangania ku thubatsomene kutsibu. Thwangana basima busana n’ebibuya ebya bakakolha nuku balhangire ngoku banawithe emibere mibuya n’ebingyi ebya bakathoka. Thwangana b’ibukya ngoku Yehova eribaletha oku Mughalha wiwe kikamanyisaya indi ni b’obughuli embere siwe. (Yn. 6:44) Thwangana bakakasya ngoku Yehova akatsomana kutsibu abaghombe biwe ‘ab’emithima yibbunangikire’ kutse ‘abathawithe maha.’ (Esy. 34:18) Ebinywe byethu by’olhukeri byangana lhamya abakayithagha erihumulikanibwa.​—Emi. 16:24.

17, 18. (a) Yehova anzire abasyakulhu ibatheya bathi esyombuli siwe? (b) Thukendi syakania okuki omwa mwatsi ow’akakwamako?

¹⁷ Abasyakulhu b’ekithunga, Yehova anzire imwatheya esyombuli siwe omwa lhukeri. (Emib. 20:28, 29) Mwibuke ngoku ni lhukwamirwa lhwenyu erilisya, erihimba, n’erihumulikania esyombuli siwe. (Isa. 32:1, 2; 1 Pet. 5:2-4) Busana n’ekyo, omusyakulhu oyuwithe olhukeri syalithabalha okwa syombuli, erihira h’ebilhayiro kutse eribubahisya nuku bakole bingyi nibya n’emibere yabu isiyiri balighira. Aliwe, akalengaho eribawathikya bathunge etseme, inianayikethere ngoku olhwanzo lhwabu oku Yehova lhukendi leka ibamukolera ndeke ngoku bangathoka.​—Mt. 22:37.

¹⁸ Thukabya thukaghanirya ndeke okw’iyikehya lya Yesu n’olhukeri lhwiwe, ahathe erithika-thika kikaleka ithwanza kutsibu erikwama-kwamania ndeke olhughobe lhwiwe. Omwa mwatsi ow’akakwamako, thukendi syakania okwa yindi mibere ibiri ya Yesu eyikatsemesaya​—obuthubaha n’eribya w’amenge.