Ebaruha y’Erimbere eya Petero

5 Busana n’ekyo, ng’omusyakulhu mulikyenyu, oyuwayilhangirira eriaghalhwa lya Kristo kandi oyukasangira omwa lhukengerwa olhukendi syabisulhwa, ngalemba-lemba* abasyakulhu abali omwa kathi-kathi kenyu indi: 2 Mulisaye ekihyo kya Nyamuhanga ekiri omwa butheya bwenyu, erikolha ng’abalebererya,* butsira omw’ikakwa aliwe omw’iyanzira embere sya Nyamuhanga; isi busana n’erianza eriyibanira amaghoba, aliwe omwanza erikolha; 3 butsira erithabalha okw’abo abali mwandu wa Nyamuhanga, aliwe eribya by’erileberyako okwa kihyo. 4 Neryo omulisya mukulhu akendi syabya abiriminyikalibwa, mukendi syahebwa embiitha y’olhukengerwa eyithehwaho.

5 Omwa nzira iyan’eyo, inywe balhwana, mughondere abalhume bakulhu.* Aliwe inywe bosi mwambale eriyikehya owundi embere sy’owundi, kundi Nyamuhanga akahakanisaya ab’emiyiheko, aliwe akakanganaya abakayikehaya b’olhukogho.

6 Neryo muyikehaye omwa byalha by’amaaka bya Nyamuhanga, nuku angasyabahamya okwa buthuku obutholere, 7 imunemumughusira erihangya-hangya lyenyu lyosi, kundi akabatsomana. 8 Mubye imunabukire omwa bulengekania, mubye imunatheghirye! Enzighu yenyu, Diabolo, akathimba-thimba ng’endale, akasondekania oyo angalya. 9 Aliwe mulhwe nayu imunasikire omw’ikirirya, kundi olhughanda lhwosi lhw’abalikyenyu omwa kihugho banemubana eriaghalhwa ng’eryo. 10 Aliwe enyuma w’eriaghalhwa habw’akathambi kake, Nyamuhanga w’olhukogho olhwosi, oyuwababirikira omwa lhukengerwa lhwa kera na kera omw’imathikana na Kristo, iyo akendi ghunzerera erithendekwa lyenyu. Akendi baghumya, akendi baha amaaka, akendi bahanda ndeke. 11 Obuthoki bubye bwiwe kera na kera. Amina.

12 Erilhabira omu Silvano, oyo ngaghanza nga mughalha wethu omuthaleghulha, nabiribahandikira ebinywe bike nuku ngabahumulikanaye n’eribaha obwema eribakakasya ngoku olhu lhw’olhukogho lhwa Nyamuhanga olhw’okwenene. Musike mulho. 13 Omukali oyuli e Babeli,* omusombolhwa ng’inywe, amabaramukya, kuthya na Mariko, mughalha waghe. 14 Muramukanganaye omw’ilyatsirirana ly’olhwanzo.

Inywe bosi abamathikene na Kristo mubye n’obuholho.