E BIBLIA ERISUBIRYA OKWA BIBULYO

Ekiro ky’Eritswera niki?

Kera, Nyamuhanga mwanakolesya abatsweri erilhamya abandu biwe b’okw’inubibwa. (Abatsweri 2:18) E Biblia yikakanganaya ngoku Ekiro ky’Eritswera bukendisyabya buthuku bw’etseme, omughulhu Yehova, Omutsweri mukulhu w’ekihugho kyosi akendi syalhamya abandu okw’inubibwa.​—Soma Esyonyimbo 96:12, 13; Isaya 26:9.

Nyamuhanga abirisombolha Yesu ng’omutsweri w’obulingirirania okwa baliho n’abaholire. (Emibiri 10:42; 17:31) Abandu bangyi babiriholha isibasi Nyamuhanga. Omwa buthuku bw’Ekiro ky’Eritswera, Yesu akendi syalhubukya abandu abo nuku baminye n’eryanza Nyamuhanga w’okwenene.​—Soma Emibiri y’Abakwenda 24:15.

Busana naki Ekiro ky’Eritswera kikendi syathwalha myaka rukumi?

Omwa buthuku bw’emyaka rukumi obo, abandu bakendi syalhubuka. (Eribisulirwa 20:4, 12) Bakendi syayithagha obuthuku bw’erikangiriribwa ebihano bya Nyamuhanga nuku banga mughondera. E Biblia yikabugha eky’embaghane okwa kya bangyi basi okw’itswerwa, yithi abandu bakendi syatswerwa erisighikira okwa bya bakendi syakolha babirilhubuka.​—Soma Abanya Roma 6:7.

E Biblia yikakanaya n’okwa kindi kiro ky’eritswera ekikendi syasa kitsumbukirania, emyaka rukumi yithe yatsuka. Ekiro ekyo kandi kik’ahulhawa mwa nduli, ngoku kikanganibwe omwa myatsi eyitsukire omwa gazeti eno. Okwa kiro ekyo, Nyamuhanga akendi syaherya ababi abosi. (2 Petero 3:7) Neryo busana n’ekyo, thutholere ithwalengaho erikakangania ku thwanzire Nyamuhanga.​—Soma 2 Petero 3:9, 13.