Lholha Embere Erikwama Yesu Enyuma w’Eribatizibwa

1-2. Ni mighisa yahi ey’omundu akabana enyuma w’eribatizibwa?

THUKATSEMA thukabatizibwa n’eribya omw’ihiika lya Yehova. Ababirithunga olhusunzo olhu bakalighirana n’omuhandiki w’esyonyimbo Dawudi, oyuwabugha athi: “Obutseme buli okw’abo wukayisogha, abo wukaletha er’ikalha aho wawu ahabuyirire!”—Esy. 65:4.

² Yehova syalikwama kyaletha owosi-wosi y’omw’ihiika liwe. Ngoku kiri omo mwatsi w’ahanyuma, akathwamu eriyithunda okwa bakakanganaya ku banzire eribya n’obunywani bw’ahakuhi nayu. (Yak. 4:8) Wukabya wukayihayo oku Yehova n’eribatizibwa, wukayithunda hakuhi-kuhi na Yehova omwa nzira y’embaghane. Wangana yikethera ngoku enyuma waho akendi ‘kukyungulira amadirisa w’elhubulha n’erikuthulirako omughisa, isihangabanika obwagha.’—Mal. 3:10; Yer. 17:7, 8.

3. Abakristayo abayihereyo kandi ababatizibirwe bawithe lhukwamirwaki lhukulhu? (Omugambuli 5:4, 5)

³ Ni kwenene, olhubatizo ni tsuka. Wukendibya wabirithwa ekiika ekyo, wukendyanza erikolha ngoku wanga thoka eriberererya eriyilhagha lyawu ly’eriyihayo, nibya n’omughulhu erikirirya lyawu likalengawako kutse hali ebitsibu. (Soma Omugambuli 5:4, 5.) Iwe ng’omwigha wa Yesu, wukendi kwama eky’erileberyako kiwe n’ebihano biwe ngoku wanga thoka. (Mt. 28:19, 20; 1 Pet. 2:21) Omwatsi ono akendi kuwathikya erikolha ekyo.

LHOLHA EMBERE ERIKWAMA YESU NOMUHANE EBITSIBU N’ERILENGWAKO

4. Abigha ba Yesu bakaheka omuthi w’amaghali omwa nziraki? (Luka 9:23)

⁴ Isiwalengekanaya wuthi wukendibya omwa ngebe eyithe mw’ebitsibu enyuma w’eribatizibwa. Kundi nibya, Yesu mwakikangania ndeke-ndeke ngoku abigha biwe bangahekire omuthi w’amaghali. Kandi banga kikolire “obuli kiro.” (Soma Luka 9:23.) Mbwino Yesu aby’akabugha athi abigha biwe bangabere bakaghalhwa obuli kiro? Eyihi na hake. Abya iniakakanganaya ngoku eryongera okwa mighisa eyo bangathungire, bangabwene ebitsibu. Ebighuma by’okwa bitsibu ebyo nibya byangabalethere obulhumi.—2 Tim. 3:12.

5. Ni mighisa yahi eyo Yesu alhagha abakayithalhaya okwa bindi?

⁵ Obundi wabiribana erihakanisya erilhua okwa bahughu, kutse obundi wabiriyithalya okwa bindu birebe by’ekinyamubiri nuku wuhire emyatsi y’Obwami y’embere. (Mt. 6:33) Kyamabya ikwakiri kithya, iwangana yikethera ngoku Yehova akabya inianalhangire emibiiri yawu ey’obuthaleghulha. (Ebr. 6:10) Obundi wabiriyilhangirira okwenene kw’ebinywe bya Yesu bino: “Sihali oyukasigha enyumba, kutse baghalha babu, kutse bali babu, na koyo, n’ise, kutse abaana, kutse ebithaka, busana naghe, na busana n’engulhu yuwene, oyuthendi syasubuliribwa ngendo ighana oko mighulhu ono, amanyumba n’abaghalha babu, n’abali babu, n’abakoyo, n’abaana, n’ebithaka, haghuma n’eriendereribwa; n’engebe y’erikotha oko mughulhu owakendisyasa.” (Mk. 10:29, 30) Emighisa eyo wabiribana yilengire kutsibu ekyosi-kyosi ekyo wukayithalhayako.—Esy. 37:4.

6. Busana naki wukendi yithagha erilholha embere erirwanisya “esyongumbu sy’omubiri” enyuma w’eribatizibwa?

⁶ Wukendibya iwukinarwanisaya “esyongumbu sy’omubiri” enyuma w’eribatizibwa. (1 Yn. 2:16) Kundi wukendibya iwukine mwana omukolha-nabi wa Adamu. Hanganayira eriyowa lyawu iryabya ng’ery’omukwenda Paulo. Mwahandika athi: “Ngaligha n’obutseme, omughambo wa Nyamuhanga omwisi w’omuthima waghe. Nikwa ngabana owundi mughambo owakakolha omwa mubiri waghe owakalhwa n’omughambo w’obulengekania bwaghe, kandi ngayirawa mwa mundu w’omuliki w’omughambo w’ebibi ebikere omo bitsuko byaghe.” (Abar. 7:22, 23) Iwanganahwa amani busana n’eribya iwuli mukolha-nabi. Aliwe erilengekania okw’iyilhagha lyawu wukayihayo oku Yehova lyangana ghumya erithwamu lyawu ly’erirwanisya erilengwako. Okwenene kuli kuthi wukendibya wukalengwako, eriyilhagha lyawu ly’eriyihayo likendi kuwathikya. Lithi?

7. Eriyihayo oku Yehova kikendi kuwathikya kithi erisighalha muthaleghulha okw’iyo?

⁷ Wukabya wukayihayo oku Yehova, wukayighana. Eki kikamanyisaya kithi wukendi ghana esyongumbu syawu n’ebilhubirirwa ebithetsemesaya Yehova. (Mt. 16:24) Neryo iwukendibya wukalengwako, isiwenditsandya buthuku wukabulha nga wukoleki. Wukendibya iwabirisangwa wathwamu ekighuma kisa ekyo wanga kolha—erithendi leghulha oku Yehova. Iwukendi sighalha iwunamakirire erithwamu lyawu ly’eritsemesya Yehova. Omwa nzira eyo iwukendibya nga Yobu. Nomwanabana ebitsibu ebikalire kutsibu, inianasikire mwabugha athi: “Erihika okw’iholha lyaghe sinendisyaghana erithunganene lyaghe.”—Yobu 27:5.

8. Erighanirya okwa musabe wawu w’eriyihayo kyanga kuwathikya kithi erirwanisya erilengwako?

⁸ Omw’ighanirya okwa musabe wawu w’eriyihayo oku Yehova, iwukendi bana amaaka w’erirwanisya erilengwako lyosi-lyosi. Ng’eky’erileberyako, iwunemwendi tsuka eriyanzirirya okwa mwanze wabene? Eyihi nahake! Iwukendibya iwabirisangwa waghana ekyo. Aho iwukendi yibalya okwa bulhumi obo wangabwene eriyowa erithatholere liryakubyamo. Iwukendi ‘yihighulha’ oko “nzira y’ababi.”—Emi. 4:14, 15.

9. Erilengekania okwa musabe wawu w’eriyihayo nakyo kyanga kuwathikya kithi eribya iwunemuhira emibiiri y’obunyakirimu y’embere?

⁹ Kandi ibbwa wamahebwa omubiiri owakendi leka iwuthahindana mughulhu wosi okwa mihindano y’Ekikristayo? Iwukendibya iwunasi eky’erikolha. Nibya wuthewahebwa omubiiri oyo, iwukendi sangwa waghanagho. Neryo isiwendi lengekania wuthi wanganayira ekyo wukakolha nuku erithwamu erithuwene lilhwiririre mw’ebibuya. Omw’ibuka erithwamu lya Yesu ery’eritsemesya Thatha wiwe, omwa byalhuba kandi iwunasikire iwukendilhuaho iwaghana ekyosi-kyosi ekyo wunasi ku kithetsemesaya Nyamuhanga oyo wabiriyihayo okw’iyo.—Mt. 4:10; Yn. 8:29.

10. Yehova akendi kuwathikya athi erilholha embere erikwama Yesu enyuma w’eribatizibwa?

¹⁰ Okwenene kuli kuthi ebitsibu n’erilengwako bikakuha akaghisa k’erikangania ku wabirithwamu erilholha embere erikwama Yesu. Wamakolha ekyo iwukendi yikethera ngoku Yehova akendi kuwathikya. E Biblia yikabugha yithi: “Erilengwako eryo likabahikako lya n’eryo lyo likanahika oko bandi bandu; Nyamuhanga syalireghulha, syendisyaligha mukalengwako kwilhaba amaaka wenyu; nikwa omw’irengwako eryo asyabaha amaaka w’eriyiyinia, n’enzira y’eribalha.”—1 Kor. 10:13.

NGOKU WANGA LHOLHA EMBERE ERIKWAMA YESU

11. Enguma y’okwa syonzira mbuyanga esyo wanga lholeramo embere erikwama Yesu y’eyahi? (Lebaya n’ekisasani.)

¹¹ Yesu aby’awithe omuhwa, kandi mwathwamu eribya inianemuyithunda hakuhi na Yehova omw’isaba. (Lk. 6:12) Omo kwenene, enguma y’okwa syonzira mbuyanga esyawanga lholeramo embere erikwama Yesu enyuma w’eribatizibwa ly’eribya n’omubere w’erikolha ebindu ebikendi kuthunda hakuhi na Yehova. E Biblia yikabugha yithi: “Nikwa aho thwabirihika, thusike erikwamirirabyo thuthya.” (Fil. 3:16) Ngendo nyingyi, wukendyowa ebyalholirweko by’abalikyethu ababirikanyirirya omubiiri wabu w’erithulira. Obundi babirighenda okwa Sukuru y’Abathuliri b’Obwami kutse erighenda eyiri obuyithawa bunene. Wamabya iwangana hiraho ekilhubirirwa ng’ekyo, lhangira wuthi wukakiberereraya. Abandu ba Yehova banzire kutsibu erikanyirirya omubiiri wabu. (Emib. 16:9) Kandi ibbwa wamabya isiwangathoka erikolha ekyo? Isiwalengekanaya wuthi abanga thoka bakulengire. Amathangwa w’Ekikristayo muli eriyiyinia. (Mt. 10:22) Isiwaghaya ebyo wukakolera Yehova erikwamana n’amaaka wawu n’emibere eya wulimo. Eyo y’enzira ngulhu eyo wanga lholeramo embere erikwama Yesu enyuma w’eribatizibwa.—Esy. 26:1.

12-13. Wanga kolhaki omuhwa wawu amatsuka erikeha? (1 Abanya Korinto 9:16, 17) (Lebaya n’akasanduko “Ibya Iwune Omwa Mathangwa.”)

¹² Kandi ibbwa ahabw’obuthuku, wamayowa wuthi emisabe yawu siyikilhua okwa muthima kutse siwukitsemera erithulira? Kandi ibbwa erisoma lyawu lye Biblia lyamabya isirikikughasira nga kera? Wamabya omwa mibere ng’eyo enyuma w’eribatizibwa, isiwaghunzerera wuthi siwukiri kw’omulimu wa Yehova. Siwuhikene, kandi eriyowa lyawu lyanganabya irinemuhinduka. Omuhwa wawu amatsuka erikeha, lengekanaya okwa ky’erileberyako ky’omukwenda Paulo. Nomwakine indi mwalengaho erigherererya Yesu, mwaminya ngoku hanganayira iniaghana erithunga omuhwa ngoku alhue okwa yindi ndambi. (Soma 1 Abanya Korinto 9:16, 17.) Mwabugha athi: “Nikwa namakolha n’erikunwa, ni mubiiri ngahabawa.” Ni bugha ambu, Paulo mwathwamu eriberererya omubiiri wiwe nomwangayowire athi okwa buthuku obo.

¹³ Kuthya, isiwalighira eriyowa lyawu erithahikene, likasondolha erithwamu lyawu. Ithwamu erikolha ekihikire nomuwangayowa wuthi. Endambi yangana hika ebya wukakolha ibyahamba ndeke okw’iyowa lyawu. Neryo eribya n’endegheka eyuwene ey’obunyakirimu kikendi kuwathikya erilholha embere erikwama Yesu enyuma w’eribatizibwa. Eriyiyinia lyawu nalyu lyangana himba balikyethu.—1 Tes. 5:11.

“MUYIRENGEKO . . . MUYITSWERE”

14. Ni byahi ebyo thutholere ithwabya ithunemulebya, kandi busana naki? (2 Abanya Korinto 13:5)

¹⁴ Eribera eriyilebya nakyo kyangana kuwathikya enyuma w’eribatizibwa. (Soma 2 Abanya Korinto 13:5.) Obuli ndambi, lebaya ndeke engebe yawu n’emibere yawu erilhangira nga wunemusaba buli kiro, erisoma n’eriyeghesya e Biblia, erihindana okwa mihindano, n’erisangira omw’ithulira. Lengaho eriminya nga wang’ongera wuthi erighasirwa omwa syonzira sy’eriramiryamo esi. Ng’eky’erileberyako, yibulhaye ebibulyo nga bino: ‘Mbwino nangana thoka erisoborera abandi b’esyongangirirya sy’omusingyi esye Biblia? Mbwino hane ebyo nanga kolha nuku ng’ongere eritsemera erithulira lyaghe? Mbwino nganabugha ekyonyine-nyine omwa misabe yaghe, kandi yikanakanganaya ku ngayikethere ighuma Yehova? Nganahindana mughulhu wosi? Nang’uwania indi emibere yaghe y’erihulikirira okwa mihindano n’erisangira muyo?’

15-16. Wam’ighaki okwa kyalholirweko kya mughalha wethu mughuma ekihambire okw’irwanisya erilengwako?

¹⁵ Kandi kyuwene eribya w’okwenene wukalebya obulemwa bwawu. Mughalha wethu Robert akaha ekyalholirweko ekikakanganaya enzumwa eyo: “Ingane w’emyaka nga 20, nabya ngawithe omubiiri w’erikolha biro bike omwa wiki. Kiro kighuma ingakulhuka, omukali oyo nabya ingakolha nayo mwanyikokya ewiwe. Mwabugha athi thukendibya ithw’ibene kandi ‘ithwatsemera haghuma.’ Okw’itsuka, munamubwira esyonzumwa nyike esithenayo ingayihambulya, aliwe erighunzerera munaghana kandi namamusoborera ekikaleka.” Robert mwarwanisya erilengwako kandi akasimawa busana n’ekyo. Aliwe enyuma waho, mwasubya ameso w’enyuma n’erilhangira ngoku anganakikolire ndeke kwilhaba aho. Akaligha athi: “Munathaghana inganasikire kutse omwa byalhuba ngoku Yozefu aghana mukali wa Potifari. (Enz. 39:7-9) Erithwalira haghuma munasweka ngoku mukyanyikalira erighana. Ekyabya eki mukyangwathikya eriminya ngoku ngayithagha erighumya obunywani bwaghe na Yehova.”

¹⁶ Wangana ghasirwa omw’iyilebya ngoku Robert akolha. Nibya nomuwangathoka erirwanisya erilengwako, yibulhaye, ‘Mukikanyithwalira buthuku bungahi erighana?’ Wamalhangira ah’eryuwania, isiwayitsweba. Tsema kundi wamabiriminya obulemwa obu. Kihire omwa musabe, kandi hiraho ebiika by’erighumiryamo erithwamu lyawu ly’erighendera okwa bihano bya Yehova eby’esyongeso.—Esy. 139:23, 24.

17. Erina lya Yehova mulyahambwako lithi omwa kyalholirweko kya Robert?

¹⁷ Hakine bingyi ebya thwang’ighira okwa kyalholirweko kya Robert. Ak’ongerako athi: “Nabere nabirighana erikokya ly’oyo ngakolha nayu, mwabugha athi, ‘Wamasinga!’ Munamubulya ng’akamanyisayaki. Mwasoborera athi munywani wiwe oyuwanabya Mwema mwamubwira athi abalere abosi Abema bakabya omwa ngebe ibiri kandi athi bamabana akaghisa, bubiso-biso bakakolha ekithahikire. Neryo omukali oyo nabya ingakolha nayu mwabwira munywani wiwe athi akendi nyilengeseryako. Neryo munasima kundi munaleka erina lya Yehova iryasikibwa.”

18. Wamathwamu erikolhaki enyuma w’eribatizibwa? (Lebaya n’akasanduko “Emyatsi eya Wukendi Tsemera.”)

¹⁸ Wukabya wukayihayo oku Yehova n’eribatizibwa, wukakanganaya ngoku wanzire eriyira erina liwe mwa libuyirire nomuhangabyaki. Kandi wangana yikethera ngoku Yehova anasi ebitsibu ebya wukabana n’erilengwako erya wukarwanisaya. Akendi tsumulha akaghalha akawukahiraho ak’erisighalha muthaleghulha. Yikethere ngoku erilhabira omwa mulimu wiwe abuyirire anganakuha amaaka w’erikolha ekyo. (Lk. 11:11-13) Omwa buwathikya bwa Yehova, wukendi thoka erilholha embere erikwama Yesu n’enyuma w’eribatizibwa.