OMWATSI W’ERIGHA 14
OLHWIMBO 8 Yehova Ni Busaghiro Bwethu
“Muyisoghe . . . Oyo Mwasyakolera”
“Nikwa ingye n’ekithunga kyaghe, thwasyakolera Omwami Mukulhu [Yehova].”—YOS. 24:15.
EKIGHENDERERWA
Erithwibukya esyonzumwa esyaleka ithwathwamu erikolera Yehova.
1. Ni kyahi ekyo thutholere ithwakolha erithoka eribana etseme y’okwenene, kandi busana naki? (Isaya 48:17, 18)
THATHA wethu w’elhubulha athwanzire kutsibu, kandi anzire ithwatsemera engebe lino n’omwa buthuku obukasa. (Omu. 3:12, 13) Mwathuhangika n’amaaka w’embaghane aw’erithoka erikolha ebindu birebe, aliwe mwathathuha amaaka w’erithoka eriyithabalhako kutse eriyithwiramu ekihikire n’ekithahikire. (Omu. 8:9; Yer. 10:23) Anakyasi ngoku ithwe erithoka eribana etseme y’okwenene, thutholere ithwamukolera kandi ithwaghendera okwa bihano biwe.—Soma Isaya 48:17, 18.
2. Ni mabehi wahi agho Sitani anzire ithw’ikirirya, kandi Yehova abirikolha kyahi busana n’amabehi ayo?
2 Sitani anzire ithwikirirya thuthi sithuli yithagha Yehova eribana etseme, athi abandu bangana thoka eriyithabalhako ahabwabu. (Enz. 3:4, 5) Yehova mwayira eky’erikolha okw’isubirya amabehi ayo omw’ilighira abandu eriyithabalhako ahabw’akathuku kake. Kyolhobire eriyilhangirira ngoku obuthabali bw’abandu bwabirilemwa. Okwa lhundi lhuhandi, omwa Masako mwoswire eby’erileberyako eby’abalhume n’abakali ababana etseme busana n’erikolera Yehova. Omw’ibo, Yesu Kristo ni w’erimbere. Erithatsuka, thulebaye esyonzumwa esyaleka iniathwamu erikolera Yehova. Neryo, thukendi lebya ekikaleka Thatha wethu w’elhubulha iniabya iya thutholere eriramya. Erighunzerera, thukendi lebya esyonzumwa ndebe esikaleka ithwathwamu erikolera Yehova.
EKYALEKA YESU INIATHWAMU ERIKOLERA YEHOVA
3. Ni kyahi ekyo Sitani alhaghanisaya Yesu, aliwe Yesu mwathwamu erikolhaki?
3 Iniane okwa kihugho, Yesu mwabya w’erithwamu nga nindi oyo angakolera. Buthuku buke Yesu alibatizibirwe, Sitani mwayilhagha erimuhererya amami wosi w’ekihugho anamathakolha kindu kighuma kisa ekikakanganaya kw’amamuramya. Yesu mwasubirya athi: “Ulhua hano, Sitani! Kundi kihandikire kithi: ‘Yehova Nyamuhanga wawu ya wutholere iwaramya, kandi iyo musa ya wutholere iwakolera omubiiri owabuyirire.’” (Mt. 4:8-10) Ni kyahi ekyaleka Yesu iniathwamu athya? Thulebaye esyonzumwa ndebe esyaleka.
4-5. Ni nzumwa nga syahi esyaleka Yesu iniathwamu erikolera Yehova?
4 Enzumwa ngulhu eyaleka Yesu iniathwamu erikolera Yehova lhw’olhwanzo—Yesu awithire Thatha wiwe y’olhwanzo lhunene kandi olhuthe thwika. (Yn. 14:31) Eryongera okw’ekyo, Yesu akakolera Yehova kundi ky’ekitholere erikolhwa. (Yn. 8:28, 29; Erib. 4:11) Anasi ngoku Yehova ya nzuko y’engebe kandi ngoku ni muyiketherwa kandi mwenge. (Esy. 33:4; 36:9; Yak. 1:17) Yehova iniakabera eribwira Yesu y’okwenene kandi yuwamuha ebyosi ebyabya awithe. (Yn. 1:14) Mbaghane na Yehova, Sitani iyo abirilethera abandu b’olhuholho. Omururu wiwe n’eriyitsomana bikaleka iniabya mubehi. (Yn. 8:44) Yesu eribya inianasi ebi, mwathalengekania nahake okwa ky’erigherererya Sitani omw’iyisamambulha oku Yehova.—Fil. 2:5-8.
5 Eyindi nzumwa eyaleka Yesu iniathwamu erikolera Yehova yiri yithi mwalindirira kutsibu ebyanga lhwiririre omw’ikolera Yehova buthaleghulha. (Ebr. 12:2) Mwaminya ngoku amasighalha muthaleghulha, ang’erirye erina lya Thatha wiwe n’erihiraho enzira eyikendi syaleka ikyathokekana erighunzaho eriaghalhwa eryo Diabolo alethaho.
EKIKALEKA ITHWABYA ITHUTHOLERE ERIRAMYA YEHOVA
6-7. Busana naki abangyi munabwire sibali kolera Yehova, aliwe busana naki iyo musa ya thutholere ithwaramya?
6 Abangyi munabwire sibalikolera Yehova kundi sibasi emibere yiwe mibuya kandi sibasi ebibuya ebyosi ebyo abiribakolera. Ku kyabya kithya n’okw’abandu abo omukwenda Paulo athulira e Atene.—Emib. 17:19, 20, 30, 34.
7 Paulo mwasoborera ababya bamuhulikirire ngoku Nyamuhanga w’okwenene “akaha abandu abosi b’engebe n’omuka n’ebindu ebyosi.” Kandi mw’ongerako athi: “Erilhabira omw’iyo thuwithe engebe, thukaghenda, n’eribyaho.” Nyamuhanga ni Muhangiki, oyo “erilhabira omwa mundu mughuma, mwahangika obuli kihanda ky’abandu,” neryo n’iyo musa oyo thutholere ithwaramya.—Emib. 17:25, 26, 28.
8. Ni kyahi ekya Yehova athe angakolha? Soborera.
8 Yehova ng’Omuhangiki kandi Muthabali w’obuhangwa bwosi, anganakakire abandu erimukolera. Aliwe, Yehova syanga kolha ekyo. Omwakanya k’ekyo, akathukanganaya ebikaleka ithwakakasya ngoku aneho kandi ngoku anzire kutsibu obuli mughuma w’okw’ithwe. Kyamathokekana, anzire abandu bangyi ibabya banywani biwe erihika kera na kera. (1 Tim. 2:3, 4) Busana n’ekyo, Yehova abirithuthendeka erikangirirya abandi ebihambire okwa bighendererwa biwe n’eribabwira okwa bindu bibuya eby’akendi syakolera abandu. (Mt. 10:11-13; 28:19, 20) Abirithutheghekania omw’ithuhira omwa bithunga kandi abirihiraho abalebererya ab’olhwanzo erithutsomana.—Emib. 20:28.
9. Olhwanzo lhwa Yehova lhukalhangirika lhuthi?
9 Olhwanzo lhwa Yehova lhulhangirikire omwa mibere eyo akathwaliramo abakagheghena eky’eribugha indi aneho. Thalengekania oku bino: Erilhua kera, esyobbiliyoni sy’abandu babiribya ibanemuthwamu erighendera okwa ebyo ibo bakalhangira ng’ebihikire kutse ng’ebiwire. Nomwabine, busana n’olhukeri, Yehova abiribaha ebyo bakayithagha erithoka eribyaho n’eritsemera engebe. (Mt. 5:44, 45; Emib. 14:16, 17) Abirileka ibathoka eribana abanywani, eribya n’esyofamile, n’eritsemera ebikalhwiririra omwa mibiiri yabu. (Esy. 127:3; Omu. 2:24) Kilhangirikire ndeke ngoku Thatha wethu w’elhubulha anzire abandu bosi. (Eri. 34:6) Thuthayibukya esyonzumwa ndebe esikaleka ithwathwamu erikolera Yehova nayu ng’akathuhemba athi.
EKIKALEKA ITHWATHWAMU ERIKOLERA YEHOVA
10. (a) Enzumwa ngulhu eyikaleka ithwakolera Yehova y’eyahi? (Matayo 22:37) (b) Wabirighasirwa wuthi omw’ighumisirizya lya Yehova? (Esyonyimbo 103:13, 14)
10 Nga Yesu, enzumwa ngulhu eyikaleka ithwakolera Yehova ni busana n’olhwanzo lhunene olho thumuwithire. (Soma Matayo 22:37.) Thukayithunda hakuhi nayu na Yehova thwam’igha okwa mibere yiwe. Ng’eky’erileberyako, thalengekania okwa mibere Yehova akathughumisirizayamo. Omughulhu Abaisraeli baghana erimwowa, mwabalemba-lemba athi: “Mubunukale, buli mundu aleke enzira yiwe nyibi.” (Yer. 18:11) Yehova ak’ibuka ngoku sithuhikene kandi ngoku thuli muthaka. (Soma Esyonyimbo 103:13, 14.) Wukabya wamaghanirya okw’ighumisirizya lya Yehova n’okwa yindi mibere yiwe mibuya, mbwino sikirileka wukanza erimukolera kera na kera?
11. Ni sindi nzumwa syahi esikaleka ithwathwamu erikolera Thatha wethu w’elhubulha?
11 Kandi thukanza ithwakolera Yehova kundi ky’ekitholere erikolhwa. (Mt. 4:10) N’ekindi, thunasi ekikendi syalhwiririra omw’ikolera Yehova buthaleghulha. Ithwe erisighalha bathaleghulha, kikayira erina lya Yehova mwa libuyirire, kikakanganaya ngoku Diabolo ni mubehi, kandi ikyatsemesya omuthima wa Thatha wethu. Kandi thwamathwamu erikolera Yehova lino, ithukendibya n’amaha w’erisyamukolera kera na kera!—Yn. 17:3.
12-13. Ekyalholirweko kya Jane na Pam kikathweghesayaki?
12 Omughulhu thukine balere kutsibu, thwangana thungira Yehova y’olhwanzo lhunene, olhwanzo olhukabya ilhunemuy’ongera thunemukulha. Thuthalebya eky’erileberyako kya bali bethu babiri abasubeneko ya Jane na Pam.a Jane abya w’emyaka 11 na Pam abya w’emyaka 10 bakatsuka erigha e Biblia. Nomwakine indi ababuthi b’abo mubathanza erigha, mubalighira Jane na Pam eribya bak’igha n’Abema ba Yehova aliwe omwa wikendi ibaghenda n’ab’efamile yabu okwa kanisa. Jane akabugha athi, “Ebyo Abema banyeghesaya erilhua omwa Biblia, mubyangwathikya erirwanisya akahathikano k’ab’emyaka yaghe ak’erikolesya ebibatsi ebikathamiraya n’obusingiri.”
13 Abasika abosi babiri mubabya bathuliri ibakisiya ibaghunza emyaka yabu y’obulengwa. Obuthuku mubwahika, bamabya batemburi ibanemutsomana ababuthi babu abali okw’ikulha omwa myaka. Jane akabya ak’ibuka ebyo balhabamo, akabugha athi: “Munayilhangirira ngoku Yehova akatsomana buthaleghulha abanywani biwe, kandi ngoku 2 Timoteo 2:19 hakabugha, ‘Omukama [Yehova] anasi abandu biwe nga ni bahi.’” Ahathe erithika-thika, Yehova akatsomana abakathwamu erimwanza n’erimukolera!
14. Ebyo thukabugha n’erikolha bikawathikaya bithi okw’erya erina lya Yehova? (Lebaya n’ebisasani.)
14 Thwanzire ithwawathikya okw’erya erina lya Yehova kw’ebitsumi ebyosi. Thalengekania oku kino: Iwabya iwunawithe omunywani ow’olhukeri, omwenge, kandi oyukaghanyira. Neryo kiro kighuma iwowa omundu akakania nabi oku munywani wawu oyo athi ni mutsurumi kandi syali mw’okwenene. Iwukendi kolhaki? Iwukendi mulhwirako. Kuthya, omughulhu Sitani n’abo abirithebya bakalengaho eritsandya erina lya Yehova omw’imulhalhania kw’amabehi, thukathwamu erithulha ekwenene eyihambire oku Yehova, erilhwira okwa lina lya Yehova n’omuhwa munene. (Esy. 34:1; Isa. 43:10) Thukakanganaya ngoku thwanzire erikolera Yehova n’omuthima wosi omwa ebya thukabugha n’omwa mikolere.
Wune mwendi wathikya erilhwira okwa rina lya Yehova? (Lebaya enungu 14)b
15. Omukwenda Paulo mwaghasirwa omw’ikolha esyombinduka omwa bilhubirirwa biwe? (Abanya Filipi 3:7, 8)
15 Ahathe erikakwa, thukakolha esyombinduka omwa bilhubirirwa byethu nuku thukolere Yehova omwa nzira eyo akaligha kutse erithasyakolha bingyi omwa mubiiri wiwe. Ng’eky’erileberyako, omukwenda Paulo mwathwamu erisighania obuminywa obo aby’awithe ewabu nuku akwame Kristo n’erikolera Yehova. (Gal. 1:14) Ekyalhwiririramu, mwabya n’engebe eyiwithe ekighendererwa akakolera Yehova kandi amabana akaghisa ak’erisyathabalha na Kristo omwa lhubulha. Mwathayikubyabwomo busana n’erithwamu erikolera Yehova, kandi nethu sithwanga yikubyabwomo.—Soma Abanya Filipi 3:7, 8.
16. Ekyalholirweko kya Julia kikathweghesayaki? (Lebaya n’ebisasani.)
16 Thwamahira erikolera Yehova ly’embere omwa ngebe yethu, iniakendi thuhemba lino n’omwa buthuku obukasa. Thalengekania okwa kyalholirweko kya mwali wethu ya Julia. Julia athal’igha ekwenene iniak’imbira omwa kwaya y’ekanisa iniakine musika mulere. Omwimbi nyakabara mwalhangira iniawithe ekihembo eky’eryimba neryo amamuthendeka. Buthuku buke-buke Julia mwaminywa kutsibu amatsuka n’eribya ak’imbira omwa myanya eyasibwe. Abere anemusomera okwa sukuru nyamurangwa eyikakangiriraya eby’eryimba, oyo bakasoma nayu mwatsuka erimukanirya oku Nyamuhanga n’erimusoborera ngoku Nyamuhanga anawithe erina, Yehova. Hathe halhaba buthuku buuli, Julia mwatsuka erigha e Biblia kabiri omwa wiki. Erighunzerera, mwathwamu erihwerya engebe yiwe omw’ikolera Yehova omwakanya k’erikwamirira eby’eryimba. Erithwamu eryo siryabya lyolhobire. Mwabugha athi: “Abandu bangyi mubambwira bathi, ng’itha ekihembo kyaghe kya bbule, aliwe ingye nabya ingabirithwamu erihwerya engebe yaghe omw’ikolera Yehova.” Akayowa athi busana n’erithwamu eryo akolha emyaka 30 enyuma? Akabugha athi: “Ngawithe obuholho bw’omuthima, kandi ng’ayikethere ngoku Yehova akendi sy’ughuthya eriyisunza ly’omuthima waghe omwa buthuku obukasa.”—Esy. 145:16.
Omughulhu thukahira erikolera Yehova ly’embere omwa ngebe yethu, thukabya omwa ngebe eyuwene kutsibu (Lebaya enungu 16)c
LHOLHA EMBERE ERIKOLERA YEHOVA
17. Eriminya ngoku thuli hakuhi n’enduli y’omughulhu ono kikahamba kithi okw’ababirithwamu erikolera Yehova n’abathe bathwamu erimukolera?
17 Thuli hakuhi n’enduli y’omughulhu ono. Omukwenda Paulo mwahandika athi: “Kusangwa hakisiya kathambi kake n’oyukasa asyahika; isyendi syamalha.’” (Ebr. 10:37) Eki kikathuhambako kithi? Eky’erimbere, obuthuku obusighereyo obwa bandu banga thwiramu erikolera Yehova ni buke. (1 Kor. 7:29) Kandi thwamabya ithwabirithwamu erikolera Nyamuhanga, thunakyasi ngoku nomwakine indi thuli b’eriyiyinirya ebitsibu, bikendibya ini ‘by’akathambi kake.’
18. Yesu na Yehova banzire ithwakolhaki?
18 Yesu mwabwira abigha biwe athi bamukwame kandi balhole embere erikolha ekyo. (Mt. 16:24) Neryo thwamabya ithwamabirighunza myaka mingyi ithunemukolera Yehova, ka thuthwemu erithendi bikyako. Thutholere ithwakolha kutsibu erithoka eriberererya erithwamu lyethu ery’erimukolera. Ikyangana kalha, aliwe thalengekania okwa mighisa mingyi n’etseme ebyo thwangabana, nibya na lino!—Esy. 35:27.
19. Ekyalholirweko kya Gene kikathweghesayaki?
19 Abandi bangana yowa bathi erikolera Yehova kikayithagha eriyithalya okwa bingyi. Wamabya iwuli mulere, mbwino wukayowa nga wukendi thalha okwa bindu birebe wamakolera Yehova? Mughalha wethu mughuma omulere ya Gene akabugha athi: “Munayowa eribya Mwema wa Yehova nga ni ngebe y’erithendibya bwiranda. Abandi baana ibakabya nga batsemire busana n’erighenda okwa syopathe, erithethana, kutse erisatha emisathu eyirimo eby’amalhwa, aliwe ingye iningakolesaya obuthuku bwaghe omw’ighenda okwa mihindano n’omw’ithulira.” Amalengekania aya mwahamba athi oku Gene? Akabugha athi: “Munatsukiraho eribya omwa ngebe ibiri, kandi munatsema ahabw’akathuku kake. Aliwe siyabya tseme y’okwenene. Munatsuka erilengekania okwa kwenene ye Biblia eyo nabya ingali okw’ithwamu erigheghena neryo namathwamu erikolera Yehova n’omuthima waghe wosi. Eritsuka-tsukana n’aho, Yehova akabya ng’abirighenda akasubirya emisabe yaghe yosi.”
20. Thutholere ithwathwamu erikolhaki?
20 Omwimbi w’esyonyimbo mwimbira Yehova athi: “Obutseme buli okw’abo wukayisogha, abo wukaletha er’ikalha aho wawu ahabuyirire!” (Esy. 65:4) Ambi nethu ithwathwamu nga Yosua thuthi: “Nikwa ingye n’ekithunga kyaghe, thwasyakolera Omwami Mukulhu [Yehova].”—Yos. 24:15.
OLHWIMBO 28 Eribya Munywani wa Yehova
a Awandi mena abirihindulhwa.
b ERISOBORERA EBISASANI: Omukali akabya abirihulikirira abakathuhakanisaya abali eyihya ahali olhuhindano, akaghenda ahali akaggali k’ebitabu n’erihulikirira ebinywe by’ekwenene.
c ERISOBORERA EKISASANI: Erikolha ngoku kyanabya erikakanganaya erithwamu eryoJulia akolha ery’erihwerya engebe yiwe omw’ikolera Yehova