OMWATSI W’ERIGHA 23
OLHWIMBO 2 Yehova Lyo Lina Lyawu
Erina lya Yehova ni ry’Omughaso Lithi Embere Syawu?
“‘Inywe muli bema baghe,’ Yehova athya.”—ISA. 43:10, NWT.
EKIGHENDERERWA
Erikangania olhukwamirwa olhwa thuwithe omw’iyira erina lya Yehova mwalibuyirire n’erily’erya.
1-2. Thukaminya thuthi ngoku erina lya Yehova lyabya ly’omughaso embere sya Yesu?
ERINA lya Yehova ni ly’omughaso munene embere sya Yesu. Y’ow’embere-mbere omw’iminyikalya erina lya Thatha wiwe. Ngoku omwatsi w’ahanyuma anakanganaya, Yesu abya inianayitheghekire eriha obwema busana n’erina lya Yehova n’ebyosi ebyo lik’imanira. (Mk. 14:36; Ebr. 10:7-9) Kandi Emyaka Rukumi ey’Erithabalha liwe yikendisyabya yikahwa, ahathe erikakwa Yesu akendi syasubulirya Nyamuhanga y’obuthabali nuku erina lya Yehova liyirawe mwa libuyirire. (1 Kor. 15:26-28) Kandi olhwanzo olho Yesu awithire erina lya Nyamuhanga lhukabisulha bingyi okwa bughuma bwiwe na Thatha wiwe. Lhukakanganaya ndeke-ndeke ngoku Yesu anzire Omwinye lina eryo.
2 Yesu mwasa okwa kihugho omwa lina lya Thatha wiwe. (Yn. 5:43; 12:13) Mwaminyisya abigha biwe b’erina lya Thatha wiwe. (Yn. 17:6, 26) Mwakangirirya omwa lina lya Yehova kandi mwakolha ebithiko-thiko omwa lina eryo. (Yn. 10:25) Kandi nibya, Yesu mwasaba Yehova athi atheghaye abigha biwe ‘busana n’erina liwe.’ (Yn. 17:11) Neryo, Yesu amabya imwanayowa athya busana n’erina lya Yehova, omundu angathoka athi eribugha athi ni mwigha wa Kristo w’okwenene kandi isyasi erina lya Thatha wiwe kutse erilikolesya?
3. Thukendi kania okuki omo mwatsi ono?
3 Ithwe ng’Abakristayo abakalengaho erikwama olhughobe lhwa Yesu, thukalhangira erina lya Thatha wiwe mwa ly’obughuli. (1 Pet. 2:21) Omo mwatsi ono, thukendi lhangira erina lya Yehova nga likaminyikalhaya lithi abakathulhughanaya “engulhu yuwene y’obwami.” (Mt. 24:14) Kandi thukendi minya erina lya Yehova nga likaghasira lithi obuli mundu ahabwiwe.
“ABANDU BUSANA N’ERINA LIWE”
4. (a) Ni mubiiri wahi ogho Yesu aha abigha biwe athali asuba elhubulha? (b) Ni kibulyo kyahi ekikabuthukaho busana n’omubiiri oyo?
4 Yesu abere athali asuba elhubulha, mwabwira abigha biwe athi: “Mukendi syahebwa amaaka omughulhu omulimu abuyirire akendi syabahikako, kandi mukendi syabya bema baghe e Yerusalemu, omwa Yudea yosi ne Samaria, n’erihika omwa bitsweka by’ehaali eby’ekihugho.” (Emib. 1:8) Neryo engulhu yuwene yanga thulhughanibirwe iyalhaba okwa mithano ye Israeli. Erighunzerera, abandu b’ebihanda byosi bangabwene akaghisa ak’eribya bigha ba Yesu. (Mt. 28:19, 20) Aliwe Yesu mwabugha athi: “Mukendi syabya bema baghe.” Mbwino abigha abahyaka aba banga yithaghire eriminya erina lya Yehova, kutse banga kwamire kyabya bema ba Yesu lisa? Emyatsi eyiri omwa Emibiiri y’Abakwenda 15 yikathuwathikaya erisubirya ekibulyo ekyo.
5. Abakwenda n’abalhume bakulhu be Yerusalemu mubakangania bathi ngoku abandu abosi batholere ibaminya erina lya Yehova? (Lebaya n’ekisasani.)
5 Omwa mwaka 49 E.K., abakwenda n’abalhume bakulhu e Yerusalemu mubahindana haghuma erikania okwa ekyo ab’ebihanda abathabanibwe babya batholere erikolha nuku balighawe ng’Abakristayo. Okw’ighunzerera ly’erikanirania, Yakobo, mughalha wobu Yesu, mwabugha athi: “[Petero] abirithukanirya ndeke-ndeke ngoku engendo y’erimbere Nyamuhanga mwalengekania okwa ab’ebihanda akasombolhamo abandu busana n’erina liwe.” Yakobo abya akamanyisya erina lyandi? Akasuba omwa ebya omuminyereri Amosi abugha, mw’ongerako athi: “Nuku abandu abasighereyo banga sondekania Yehova erilhua okwa muthima, haghuma n’abandu b’ebihanda byosi, abandu abakahulhawa omwa lina lyaghe, Yehova athya.” (Emib. 15:14-18) Sibugha indi abigha abahyaka aba bang’ighire oku Yehova lisa, aliwe kandi babya ‘b’eryahulhwa omwa lina liwe.’ Eki mukyamanyisya kithi babya b’eryahulhwa omwa lina lya Nyamuhanga kandi iryabaminyikalya.
Okwa muhindano w’akathunga akakasondolha ak’omwa kighana ky’erimbere, abalhume abathaleghulha abo mubakiminya ndeke ngoku Abakristayo batholere ibabya bandu busana n’erina lya Nyamuhanga (Lebaya enungu 5)
6-7. (a) Ni kyahi ekyaleka Yesu iniasa okwa kihugho? (b) Ni yindi nzumwa yahi ngulhu eyaleka Yesu iniasa okwa kihugho?
6 Erina lya Yesu likamanyisaya “Yehova Ni Mulhamu,” kandi mwabya nzira eyo Yehova akalhamirayamo abak’ikiriraya. Yesu mwasa okwa kihugho erihayo engebe yiwe busana n’abandu. (Mt. 20:28) Omw’ithuha endongolya, mwaleka ikyathokekana abandu erilhamibwa n’erihebwa engebe y’erikotha.—Yn. 3:16.
7 Aliwe busana naki abandu mubayithagha erilhamibwa? Busana n’ekyabya omw’irima lye Edeni. Ngoku kiri omwa mwatsi w’ahanyuma, ababuthi b’erimbere ab’abandu, Adamu na Eva, mubayisamambulha oku Yehova neryo bamaherya akaghisa ak’eribyaho kera na kera. (Enz. 3:6, 24) Aliwe, habya ihane ekindu eky’omughaso munene kwilhaba omulhamu w’abakolha-nabi. Erina lya Yehova lyabya iryabirikinibwa. (Enz. 3:4, 5) Neryo omulhamu w’abaana ba Adamu na Eva abya ahambene n’omwatsi mukulhu kutsibu—erina lya Yehova eriyirwa mwa libuyirire. Kundi Yesu mw’imanira Yehova n’eryahulhwa omwa lina liwe, mwaberererya olhukwamirwa lhukulhu omw’iyira erina lya Yehova mwa libuyirire.
Omundu angathoka athi eribugha athi ni mwigha wa Kristo w’okwenene kandi isyasi erina lya Thatha wiwe kutse erilikolesya?
8. Ni kyahi ekyo abosi abikirirye omu Yesu batholere ibaminya?
8 Abosi abang’ikirirye omu Yesu, Abayuda n’ab’ebihanda, babya b’eriminya Enzuko y’omulhamu wabu, ni bugha ambu, Thatha wa Yesu, Yehova Nyamuhanga. (Yn. 17:3) Eryongera okw’ekyo, nga Yesu, bangabere ibakahulhawa omwa lina lya Yehova. Kandi babya batholere ibaminya omughaso w’eryerya erina eryo. Omulhamu wabu abya aseghemere okw’ekyo. (Emib. 2:21, 22) Neryo abigha ba Yesu abathaleghulha abosi babya batholere erigha ebihambire oku Yehova kuthya na Yesu. Ky’ekyaleka Yesu iniaghunzerera omusabe wiwe owali omu Yohana 17 n’ebinywe bino: “Nabiriminyisya erina lyawu kandi ngendi liminyisya, nuku olhwanzo olho wanyazamo lhwangabya omw’ibo naghe ingane bughuma nabu.”—Yn. 17:26.
“MULI BEMA BAGHE”
9. Thwanga kangania thuthi ngoku erina lya Yehova ni ly’omughaso embere syethu?
9 Busana n’ekyo, abigha ba Yesu abosi ab’okwenene, batholere ibalhangira bathi bakayira erina lya Yehova mwa libuyirire. (Mt. 6:9, 10) Batholere ibalhangira bathi erina lya Yehova likabya likulhu okwa mena wosi. Eki kikabayithaghako eriyira eky’erikolha. Aliwe thwanga sangira thuthi omw’iyira erina lya Yehova mwa libuyirire, kutse erililhusyako amabehi agho Sitani abiririhirako?
10. Ni musango wahi owali omwa koti y’omusyo owakanibweko omwa sura 42 erihika 44 esy’ekitabu kya Isaya? (Isaya 43:9; 44:7-9) (Lebaya n’ekisasani.)
10 Ekikaleka olhukwamirwa lhwethu ilhwabya lhw’omughaso omw’iyira erina lya Yehova mwa libuyirire kikanganibwe omwa sura 42 erihika 44 esy’ekitabu kya Isaya. Esyosura esyo sikakanaya okwa lhubanza olhuli omwa koti y’omusyo olhuhambire oko mwatsi w’oyutholere eribya Nyamuhanga. Yehova akabugha athi esyosi esikayahulhamo syonyamuhanga sikanganaye nga nina sy’okwenene. Kandi akabirikira abak’imira esyonyamuhanga esi athi base bahe obwema obukakanganaya nga nina syonyamuhanga. Aliwe sihali n’oyukathoka!—Soma Isaya 43:9; 44:7-9.
Omwa syonzira nyingyi, omusango owali omwa koti y’omusyo athuhambireko (Lebaya enungu 10-11)
11. Ni kyahi ekyo Yehova akabwira abandu biwe, ngoku kiri omu Isaya 43:10-12?
11 Soma Isaya 43:10-12. Yehova akabugha okwa bandu biwe athi: “ Inywe muli balhangiri [Abema], . . . Ingye indi Nyamuhanga.” Yehova akababwira athi basubiraye ekibulyo kino: “Hali Nyamuhanga athe ingye kwehi?” (Isa. 44:8) Busana n’ekyo, nethu thuwithe olhusunzo lhw’erisubirya ekibulyo ekyo. Omwa mibughire yethu n’omwa mikolere, thukaha obwema ngoku Yehova ya Nyamuhanga musa ow’okwenene. Erina liwe lirengire awandi mena wosi. Thukakanganaya omwa ngebe yethu yosi ngoku kwenene thwanzire Yehova kandi ngoku thuli bathaleghulha okw’iyo—Sitani nomwanga lengaho athi erithulemesya. Thwamakolha ekyo, thuwithe akaghisa ak’eriyira erina liwe mwa libuyirire.
12. Obuminyereri obuli omu Isaya 40:3, 5 mubwabererera buthi?
12 Thukabya thukasighika erina lya Yehova, thukabya ithwamagherererya Yesu Kristo. Na Isaya mwalhaghulha athi omundu mulebe ‘angatheghekanirye enzira ya Yehova.’ (Isa. 40:3) Ekyo mukyabererera kithi? Yohana omubatizya mwatheghekanirya Yesu y’enzira, Yesu oyuwasa omwa lina lya Yehova kandi oyuwakanaya omwa lina lya Yehova. (Mt. 3:3; Mk. 1:2-4; Lk. 3:3-6) Kandi obuminyereri obu mubwabugha buthi: ‘Olhukengerwa lhw’Omwami Mukulhu [Yehova] lhwasyabisulhwa.’ (Isa. 40:5) Ekyo mukyabererera kithi? Yesu abere asa okwa kihugho, mw’imanira Yehova ya ndeke-ndeke kyamabya Yehova iyuwene-wene ng’abiryasa okwa kihugho.—Yn. 12:45.
13. Thwanga gherererya thuthi Yesu?
13 Nethu nga Yesu, thuli bema ba Yehova. Thukahulhawa omwa lina lya Yehova kandi thukabwira abosi abo thukabana okwa mibiiri yiwe eyikaswekaya. Nomwabine, erithoka erikolha eki kya ndeke, thutholere ithwaminyikalya olhukwamirwa lhukulhu lhwa Yesu omw’iyira erina lya Yehova mwa libuyirire. (Emib. 1:8) Yesu ya mwema wa Yehova ow’erimbere, kandi thukakwama obusondoli bwiwe. (Erib. 1:5) Aliwe erina lya Yehova litholere iryabya ly’omughaso lithi embere sy’obuli mughuma w’okw’ithwe?
ESINDI NZIRA ESYA THUKAKANGANIRAYAMO NGOKU ERINA LYA YEHOVA NI LY’OMUGHASO
14. Ngoku kiri omwa Esyonyimbo 105:3, thukayowa thuthi okwa lina lya Yehova?
14 Thukayisyethera erina lya Yehova. (Soma Esyonyimbo 105:3.) Yehova akatsema kutsibu thukayihalhambira erina liwe. (Yer. 9:23, 24; 1 Kor. 1:31; 2 Kor. 10:17) ‘Eriyihalhambira omu Yehova’ kikamanyisaya eriyisyethera Yehova nga Nyamuhanga wethu. Thukalhangira ini lhusunzo erisikya erina liwe n’erilisighika. Sithutholere thukakwa esisoni eribwira abo thukakolha nabu, abo thukasoma nabu, abataka, n’abandi ngoku thuli bema ba Yehova! Diabolo anzire ithwaleka eribwira abandi okwa lina lya Yehova. (Yer. 11:21; Erib. 12:17) Kundi nibya, Sitani n’abaminyereri biwe b’amabehi banzire abandu ibibirirwa erina lya Yehova. (Yer. 23:26, 27) Aliwe olhwanzo olho thuwithire erina lya Yehova lhukaleka ithwatsema omwa “musibo wosi.”—Esy. 5:11; 89:16.
15. Kikamanyisayaki eribirikira okwa lina lya Yehova?
15 Thukalholha embere eribirikira okwa lina lya Yehova. (Yoe. 2:32; Abar. 10:13, 14) Eribirikira okwa lina lya Yehova sikirisubulira okw’iriminya n’erilikolesya. Thukaminya Nyamuhanga ng’Omundu, ithwamuyikethera, n’erimusaba obuwathikya n’obusondoli. (Esy. 20:7; 99:6; 116:4; 145:18) Kandi thukabwira abandi b’erina liwe n’emibere yiwe, eribahira mw’omuhwa w’eriyisubamo n’eriyira eky’erikolha nuku basimawe na Yehova.—Isa. 12:4; Emib. 2:21, 38.
16. Thwanga kangania thuthi ngoku Sitani ni mubehi?
16 Thunayitheghekire eriaghalhwa busana n’erina lya Yehova. (Yak. 5:10, 11) Thukabya thukasighalha bathaleghulha oku Yehova omughulhu thukaghalhawa, thukakanganaya ngoku Sitani ni mubehi. Omwa biro bya Yobu, Sitani mwahangirira abakakolera Yehova athi: “Omundu anganaha ebyosi awithe busana n’engebe yiwe.” (Yobu 2:4) Sitani mwabugha athi abandu ibakendi kolera Yehova omwa mighulhu eyuwene misa kandi athi ibakendi sighania Yehova bamabana ebitsibu. Omuthaleghulha Yobu mwakangania ngoku ayo ni mabehi. Nethu thuwithe olhusunzo lhw’erikakangania ngoku Sitani nomwanga kolhaki erianza erithulemesya, sithwendi syalholya oku Yehova kw’omughongo. Thwangana yikethera ngoku Yehova akendi lholha embere erithutheya busana n’erina liwe.—Yn. 17:11.
17. Ni kindi kyahi ekyo thwanga kolha nuku erina lya Yehova lihebawe olhukengerwa, ngoku kiri omu 1 Petero 2:12?
17 Thukasikaya erina lya Yehova. (Emi. 30:9; Yer. 7:8-11) Kundi thuk’imanira Yehova kandi thukahulhawa omwa lina liwe, thwangana leka erina liwe iryapipwa kutse ithwaleka iryathahebwa ekitsumbi. (Soma 1 Petero 2:12.) Busana n’ekyo, thwanzire ithwakolha kutsibu ngoku thwanga thoka nuku erina lya Yehova lipipawe busana n’emibughire n’emikolere yethu. Thwamakolha ekyo, ithukendi lethera erina liwe ly’olhukengerwa nibya n’omwa buthahikana bwethu.
18. Ni yindi nzira yahi eyo thwanga kanganiryamo ngoku erina lya Yehova ni ly’omughaso embere syethu? (Lebaya n’omwatsi ahikwa.)
18 Thutsomene kutsibu erina lya Yehova kwilhaba eriyikolera erina. (Esy. 138:2) Busana naki eki ni kikulhu? Kundi olhwanzo olhwa thuwithire erina lya Yehova lhwangana leka abathuthimbireko ibathuthungako amalengekania mabi.a Yesu abya inianayitheghekire eriholha olhuholho olhukahemulha ng’engoli y’ebibi nuku asikaye erina lya Yehova. Mwathalighira esisoni sikaleka akayowa nabi kutse akayiponera busana n’ebyo abandi bakamulengekanirayamo. (Ebr. 12:2-4) Amalengekania wiwe abya okw’ikolha erisonda lya Nyamuhanga.—Mt. 26:39.
19. Erina lya Yehova likaleka iwayowa wuthi, kandi busana naki?
19 Thukayisyethera erina lya Yehova kandi thukayowa ithuli b’ekitsumbi eryahulhwamo Abema ba Yehova. Busana n’ekyo, thunayitheghekire erighumira ebitsumi ebyosi-byosi ebyo thwanga bana. Erina lya Yehova ni ly’omughaso munene embere syethu nibya kwilhaba n’erina lyethu. Neryo ka thuthwemu erilholha embere eripipa erina lya Yehova Sitani nomwanga kolhaki erithulemesya. Omwa nzira eyi, thukendi kangania ngoku erina lya Yehova ni ly’omughaso munene embere syethu, ngoku line oku Yesu Kristo.
OLHWIMBO 10 Thupipe Yehova, Nyamuhanga Wethu!
a Nibya n’omulhume omuthaleghulha Yobu mwalengemeribwa omughulhu banywani biwe basathu bamukanayako nabi. Okw’itsuka, abere aherya abaana biwe n’ebindu biwe, “Yobu mwathakolha erilholho kutse eryahulha Nyamuhanga mwa mukiru.” (Yobu 1:22; 2:10) Aliwe, Yobu abere ahangirirwa indi abirikolha erilholho, mwabugha buthalengekania. Mwahira embere y’eky’erilhwira okwa lina liwe omwakanya k’eriyira erina lya Nyamuhanga mwa libuyirire.—Yobu 6:3; 13:4, 5; 32:2; 34:5.