Olhwanzo Lhwa Nyamuhanga Lhukakotha

1-2. Ni kitsibuki ekya Abakristayo bangyi bakabana?

THATHERA akasasani obwathu ibune omwa kathi-kathi k’ekiyagha kinene. Ebisunda binene-binene ibinemuhungya-hungya obwathu. Obwathu obo ibukendi ghenda eyo ebisunda bikabulholeraya, mbwino ihanalyabya oyukabuboherako enaanga. Enaanga yikendileka obwathu ibwasika n’ebisunda ibithabuhungya-hungya.

² Omughulhu wukayiyiniraya ekitsibu ekikalire, iwanganabya ng’obwathu obo. Iwangana yibulha-bulha. Munabwire wanganabya iwunayikethere ngoku Yehova akwanzire kandi ngoku akendi kuwathikya; ekindi kiro iwabulha Yehova ng’analhangire ebya wukalhabamo. (Esy. 10:1; 13:1) Obundi omunywani iniakubwira ebikahumulikanaya, iwayowa ndeke habw’akathuku kake. (Emi. 17:17; 25:11) Aliwe kandi enyuma waho iwathasyatsuka erithika-thika. Nibya iwanganabulha Yehova ng’abirikulekerania. Wanga kolhaki erithoka erisika, eribya ng’oyuboherweko enaanga, omughulhu wuwithe ekitsibu? Ni bugha ambu, wanga kakasya wuthi—kandi iwasighalha iwunakakasirye—ngoku Yehova akwanzire kandi kw’akendi kuwathikya?

3. Ebiri omwa Esyonyimbo 31:7 na 136:​1, bikathweghesayaki okwa lhwanzo lhwa Yehova n’obuthaleghulha, kandi busana naki ithwabugha thuthi Yehova ni ky’erileberyako ekilengireyo omw’ikangania emibere eyi? (Lebaya n’ekisasani.)

³ Enguma y’okwa syonzira esyanga kuwathikya erisikira ekitsibu ly’eribuka olhwanzo lhwa Yehova olhutheleghulha. (Soma Esyonyimbo 31:7; 136:1.) Ekinywe olhwanzo olhuthaleghulha mwamuli owundi ery’amakirira owundi buthalhwika. Yehova ni ky’erileberyako ekilengireyo omw’ikangania olhwanzo olhutheleghulha. Kandi nibya, e Biblia yikamukanayako ‘ng’oyuwoswire n’obwenge bw’olhwanzo [olhwanzo olhutheleghulha].’ (Eril. 34:​6, 7) Kandi e Biblia yikakanaya oku Yehova yithi: ‘Woswire n’olhwanzo olhuthaleghulha busana n’abosi abakakulhakira.’ (Esy. 86:5) Thalengekania ebi nga bikamanyisayaki: Yehova syali sighanaya abaghombe biwe abathaleghulha! Eryibuka ngoku Yehova syali leghulha kyangana kuha amaaka w’erisika omughulhu wuli omwa kitsibu ekikalire.—Esy. 23:4.

IBUKA NGOKU OLHWANZO LHWA YEHOVA NI NGANGIRIRYA YE BIBLIA EY’OMUSINGYI

4. Iha eby’erileberyako eby’esyongangirirya esye Biblia esy’omusingyi, kandi soborera ekyanga leka ithuthathebibwa lhuba-lhuba.

⁴ Eyindi nzira eyanga kuwathikya erisikira ekitsibu ly’erilhangira olhwanzo lhwa Yehova ng’engangirirya ye Biblia ey’omusingyi. Wukalengekanaya ebinywe “engangirirya ye Biblia y’omusingyi” bikamanyisayaki? Obundi wukalengekanaya okwa syongangirirya ndebe esyo wabir’igha omwa Kinywe kya Nyamuhanga. Ng’eky’erileberyako, wabir’igha ngoku erina lya Nyamuhanga ni Yehova, ngoku Yesu ni Mughalha ekyusa kya Nyamuhanga, ngoku abaholi sibasiki, kandi ngoku abandu bakendi syikalha kera na kera omwa kihugho paradiso. (Esy. 83:18; Omu. 9:5; Yn. 3:16; Erib. 21:​3, 4) Wabere wabiriligha esyongangirirya esi, muwabya isiwanga thasyathebibwa. Busana naki? Kundi muwaminya ngoku siseghemere okwa kwenene. Thulebaye ngoku erilhangira olhwanzo lhwa Yehova ng’engangirirya ye Biblia y’omusingyi kikendi kuwathikya erighana amalengekania aw’eribugha indi Yehova syalhangire kutse syatsomene ebya wukalhabamo.

5. Soborera nga kyanga thokekana kithi omundu erighanira ighuma esyongangirirya sy’amabehi.

⁵ Wabere wukatsuka erigha e Biblia, ni kyahi ekya kuwathikaya erighana esyongangirirya sy’amabehi? Wangabya imuwawathikibwa omw’ilinganisya ebyo wakangiriribawa omwa dini eyo wabyamu n’ebyo Amasako akakangiriraya. Ng’eky’erileberyako: Thubughe thuthi wabya w’ikirirye wuthi Yesu ni Nyamuhanga Omuthoki w’Ebyosi. Aliwe wabere wunemw’igha e Biblia, muwayibulya wuthi, ‘Engangirirya eyi nina y’okwenene?’ Wabere wabiriyilhangirira ekwenene eyiri omwa Masako, muwathoka erisubirya wuthi eyihi. Neryo muwasubya omo mwanya w’engangirirya y’amabehi eyo mw’ekwenene eyiri omwa Masako eno: Yesu “ni mughalha akambere oyulhabire ebyosi ebyahangikawa,” “Omughalha ekyusa kya Nyamuhanga.” (Kol. 1:15; Yn. 3:18) Omo kwenene, esyongangirirya sy’amabehi syangana ‘handa emirihi’ kandi ikyakalha erisikunungulha. (2 Kor. 10:​4, 5) Aliwe, wabere wabirithoka erikolha ekyo, muwuthasubira esyongangirirya esya wabya iwabirisighania.—Flp. 3:13.

6. Busana naki iwayikethera ngoku olhwanzo lhwa Yehova olhutheleghulha lhukakotha?

⁶ Wangana kolha ekiri ng’ekyo bikahika okwa ebya Biblia yikakangiriraya okwa lhwanzo lhwa Yehova. Omughulhu wukabana ekitsibu, wamatsuka erithika-thika Yehova ng’anakwanzire, yibulhaye, ‘Mbwino amalengekania waghe anahikire?’ Linganisaya erithika-thika lyawu ery’eribulha Yehova ng’anakwanzire n’ebinywe ebiri omwa Esyonyimbo 136:1—erisako erihirikirire omwatsi ono. Busana naki Yehova akakanaya okwa lhwanzo lhwiwe ng’olhuthe leghulha? Busana naki ebinywe “olhwanzo lhwiwe olhuthyusa [olhuthaleghulha] lhukakotha” ibyasubwamu emirundi 26 omwa lhwimbo olhu? Ngoku thwamabirilhangira, olhwanzo lhwa Yehova olhutheleghulha olhw’awithire abandu biwe ni ngangirirya ye Biblia ey’omusingyi, ng’esindi ngangirirya esyawabiriligha omwa Kinywe kya Nyamuhanga. Eky’eribugha indi Yehova akakulhangira ng’oyuthawithe mughaso kutse sy’akwanzire ni mabehi. Ghana engangirirya eyo, ngoku wangana ghana eyindi ngangirirya y’amabehi iwunasikire!

7. Ahulha amasako malebe awakathukakasaya ngoku Yehova athwanzire.

⁷ Omwa Biblia muli amasako mangyi awakathukakasaya ngoku Yehova athwanzire. Ng’eky’erileberyako, Yesu mwabwira abigha biwe athi: “Muli b’obughuli bunene kwilhaba ehindegheya hingyi.” (Mt. 10:31) Yehova iyuwene-wene mwabwira abandu biwe athi: “Ngendi kuha amaaka, kwenene, ngendi kuwathikya, kwenene ngendi kuwathirira omwa byalha bya mali by’erithunganene lyaghe.” (Isa. 41:10) Lhangira ngoku ebinywe ebi bikahumulikanaya. Yesu syalibugha athi ‘Mwanganabya b’obughuli,’ na Yehova syalibugha athi ‘Nangana bawathikya.’ Omwakanya k’ekyo, bakabugha bathi: ‘muli b’obughuli bunene’ kandi ‘ngendi kuwathikya.’ Wamabya iwanathika-thikire Yehova ng’anakwanzire omughulhu wabana ekitsibu, amasako ng’aya anganaleka iwayowa ndeke; kandi iniakuwathikya eriminya ngoku Yehova akwanzire. Amasako aya aseghemere okwa kwenene. Omw’isaba, ghaniraya okwa kyanga kuwathikya eryibuka ebinywe ebiri omu 1 Yn. 4:16: ‘Nethu thwabiriminya, kandi thwikirirye olhwanzo olhwa Nyamuhanga abirithwanzamo.’a

8. Wanga kolhaki hamayira wukasa mw’erithika-thika ery’eribulha Yehova ng’anakwanzire?

⁸ Kandi, ibbwa, wamabya ihakanayira iwasa mw’erithika-thika ery’eribulha Yehova ng’anakwanzire? Linganisaya eriyowa lyawu n’ebya wasi. Eriyowa siryanga yiketherwa ngoku wanga yikethera ekwenene, aliwe olhwanzo lhwa Yehova ngoku lhunakanibweko omwa Masako ni kwenene. Thwamathendi ligha ngoku Yehova athwanzire, ithwamagheghena omubere wiwe mukulhu—olhwanzo.—1Yn 4:8.

GHANIRAYA OKWA LHWANZO OLHO YEHOVA AKUWITHIRE

9-10. Yesu aby’akakania okuki akabugha athi “Thatha iyuwene-wene abanzire,” ebiri omu Yohana 16:​26, 27? (Lebaya n’ekisasani.)

⁹ Thwangana minya bingyi ebihambire okwa lhwanzo olho Yehova athuwithire omw’ilebya ebinywe ebya Yesu abwira abigha biwe bino: “Thatha iyuwene-wene abanzire.” (Soma Yohana 16:​26, 27.) Yesu syabugha ebinywe ebi habw’erithanza abigha biwe bayowe ndeke. Omo kwenene, omwatsi wosi akabisulha ngoku okwa ndambi eyo syabya akakania okw’iyowa lyabu. Aliwe, abya akakania okwa wundi mwatsi—erisaba.

¹⁰ Yesu abya imwanamabwira abigha biwe athi ibalhabya emisabe yabo omw’iyo butsira erimusaba. (Yn. 16:​23, 24) Kyabya kikulhu ibo eriminya ekyo. Yesu abere abirilhubuka, abigha biwe bangabya imubanza erimusaba. Kundi nibya, babya ibabiriminya Yesu ng’omunywani wabu. Bangabya imubalengekania bathi olhwanzo olhw’abawithire lhukendi leka iniahulikirira emisabe yabu n’erihikyayo oku Thatha wiwe. Aliwe, Yesu mwababwira athi sibatholere bakabya n’amalengekania ng’ayo. Busana naki? Kundi, mwababwira athi: ‘Thatha iyuwene-wene abanzire.’ Ekwenene eyo ni nguma y’okwa syongangirirya sye Biblia esyo musingyi isihambire okwa musabe. Thalengekania ekyo nga kikakughasira kithi: Erilhabira omw’igha lyaghu lye Biblia, wabiriminya Yesu n’erimwanza. (Yn. 14:21) Aliwe ng’abigha ab’omwa kighana ky’erimbere, wangana saba Nyamuhanga iwunasikire, iwunasi ngoku ‘iyuwene-wene akwanzire.’ Wukakanganaya ku wuyikethere ebinywe ebi obuli erisaba Yehova.—1 Yn. 5:14.

MINYA AHO ERITHIKA-THIKA LIKALHUA

11. Ni kyahi ekyanga leka Sitani iniatsema thwamatsuka eryasa mw’erithika-thika ery’eribulha Yehova ng’anathwanzire?

¹¹ Erithika-thika ery’eribulha Yehova ng’anathwanzire likalhua hayi? Iwangana subirya wuthi likalhua oku Sitani, kandi hane ekwenene eyikakanganaya ekyo. Sitani akasonda erithulya, kandi iniakendi tsema thwamabya mw’erithika-thika ery’eribulha Yehova ng’anathwanzire. (1 Pet. 5:8) Kundi nibya, olhwanzo lhwa Yehova mulhwaleka iniahayo endongolya—ekindu ekya Sitani akanza ithwayowa nga sikithutholere. (Ebr. 2:9) Neryo nindi oyukatsema thwamasa mw’erithika-thika ery’eribulha Yehova ng’anathwanzire? Ni Sitani. Kandi ni kighendererwa kyandi ekikabererera thwamaleghulha omughulhu thuwithe ebitsibu? Ekya Sitani. Lengekanaya okwa ebya Sitani akakolha nuku thubye mw’erithika-thika ery’eribulha Yehova ng’anathwanzire. Omo kwenene, Yehova syanzire Sitani. Busana n’ekyo, ekighuma ky’okwa “bithegho” bya Sitani, ly’erianza nethu thuyowe Yehova nga syathwanzire kandi ng’abirithughana. (Efe. 6:11) Thwamabiriminya ekyo enzighu yethu yikanza erikolha, ithwangana ghumya erithwamu lyethu “ery’erilhwa na Sitani.”—Yak. 4:7.

12-13. Emibere y’ekibi eyo thwabirisighalya yanga leka yithi ithwasa mw’erithika-thika ery’eribulha Yehova ng’anathwanzire?

¹² Erithika-thika ery’eribulha Yehova ng’anathwanzire lyanganalhua ahandi. Ni yahi? Emibere y’ekibi eyo thwabirisighalya. (Esy. 51:5; Abar. 5:12) Ekibi kyabirighabulha omundu oko Muhangiki wiwe. Kandi kyabiritsandya obulengekania, omuthima, n’omubiri wiwe.

¹³ Ekibi kyabirihamba nabi okw’iyowa lyethu, erileka ithwayowa nga thuli kw’olhubanza, ithwabya omwa maghaniryo, eriyowa isithuli omwa butheya, n’erihemuka. Thwangana yowa thuthya thwamakolha ekibi. Aliwe ebi byanganabya kundi mughulhu wosi thunasi ku thuli omwa mibere y’obukolha nabi—emibere eyithahambene nahake n’emibere thwahangikawamo. (Abar. 8:​20, 21) Ngoku ematoka eyiwithe omupira owathulikire siyanga thoka eryanguha, ithwe, ng’abandu abathahikene, sithwanga kolha ndeke ngoku kitholere erikwamana n’emibere thuhangikirwe. Neryo sikiriswekaya eribya okwa bundi buthuku, ithukanasa mw’erithika-thika ery’eribulha Yehova ng’anathwanzire. Ekyo kyamabya, thutholere ithw’ibuka ngoku Yehova ni Nyamuhanga mukulhu kandi ow’eriswekera oyukakanganaya abamwanzire kandi abakatheghaya ebihano biwe b’olhwanzo olhutheleghulha.—Neh. 1:5.

14. Erighanirya okwa ndongolya kyanga thuwathikya kithi erighana eky’eribugha indi Yehova syanga thwanza nahake? (Abanya Roma 5:8) (Lebaya akasanduko “Yitheghaye Okwa ‘Mathebo w’Amaaka w’Ekibi.’”)

¹⁴ Ni kwenene, hanganayira ithwayowa Yehova nga syatholere erithwanza. Kandi erithabugha okwenene, ekyo sikithutholere—ekyo kikaleka ikyabya kindu ekikaswekaya. Sihali ekya thwanga kolha nuku Yehova athwanze. Nomwabine, endongolya yikakuningira ebibi byethu, kandi Yehova mwathuha endongolya kundi athwanzire. (1 Yn. 4:10) Kandi wibuke ngoku, Yesu asa erisyalhamya abakolha-nabi, butsira abandu abahikene. (Soma Abanya Roma 5:8.) Sihali n’omughuma w’okw’ithwe oyuwanga kolha ebindu omwa nzira eyihikene, kandi Yehova syali thuyithagha kw’ekyo. Thwamaminya ngoku obuthahikana bwethu bukaleka ithwasa mw’erithika-thika ery’eribulha Yehova ng’anathwanzire, ithukendi thwamu eryongera erirwanisya amalengekania ayo.—Abar. 7:​24, 25.

ITHWAMU ERISIGHALHA MUTHALEGHULHA

15-16. Thwamasighalha bathaleghulha oku Yehova, ni yikethera lyahi eryo thwangabya nalyo, kandi busana naki? (2 Samweli 22:26)

¹⁵ Yehova anzire ithwakolha erithwamu erihikire ‘omw’imwamakirira.’ (Ebi. 30:​19, 20) Thwamakolha ekyo, ithukendi yikethera ngoku syendi thuleghulhako. (Soma 2 Samweli 22:26.) Thwamasighalha bathaleghulha oku Yehova, ithukendi yikethera ngoku akendi thuwathikya omwa mibere yosi-yosi eyanga buthuka omwa ngebe yethu.

¹⁶ Ngoku thwamabirilhangira, ni nzumwa nyingyi esyanga leka ithwasighalha ithunasikire thwamabana ebitsibu. Thunasi ngoku Yehova athwanzire kandi kw’akendi thuwathikya. Ekyo kya e Biblia yikakangiriraya. Thwamabya ithwanasire mw’erithika-thika ery’eribulha ng’anathwanzire, thwangana ghanirya okwa byathwasi ku bihikire omwakanya k’eriyowa lyethu. Ka thulhole embere eribya ithunayikethere ekwenene ye Biblia eyikakanganaya ngoku olhwanzo lhwa Yehova olhuthaleghulha lhukakotha kera na kera.