Урок 3

Исус Христос, коді сійӧ сэтшӧмыс?

Мыйла Исусӧс шуӧма «медводдза чужысь» Енлӧн Пиӧн? (1)

Мыйла сійӧс шуӧма «Кывйӧн»? (1)

Мыйла Исус локтіс му вылас кыдзи морт? (2—4)

Мыйла сійӧ вӧчліс шензьӧданаторъяссӧ? (5)

Мый вӧчас Исус регыд локтан кадӧ? (6)

1. Му вылӧ локтӧдз Исус оліс енэжын да вӧлі ловӧн. Исус — Енлӧн медводдза вӧчӧмтор, сы вӧсна сійӧс шуӧма «медводдза чужысь» Енлӧн Пиӧн (Колоссӧ 1:15; Восьтӧм 3:14). Исус — дзик ӧти Пи, кодӧс Енмыс вӧчис ачыс. Сыӧдз, кыдз Исус лоис мортӧн, сійӧ вӧлі Иеговалӧн «киподтуя отсасьысьӧн» ставсӧ енэжас да му вылас лӧсьӧдігӧн (Нӧдкывъяс 8:22—31, «Ӧнія вуджӧдӧм»; Колоссӧ 1:16, 17). Сідзжӧ сійӧ вӧлі Енлӧн медыджыд представительӧн. Та вӧсна Исусӧс шуӧма «Кывйӧн» (Иоансянь 1:1—3; Восьтӧм 19:13).

2. Ен Ассьыс Писӧ ыстіс му вылӧ сылысь олӧмсӧ Мария кынӧмӧ вуджӧдӧмӧн. Та вӧсна Исуслӧн эз вӧв мувывса батьыс. Та понда сійӧ чужис мыжтӧмӧн да тыр-бурӧн. Ен ыстіс Исусӧс му вылӧ, медым сійӧ: 1) велӧдіс йӧзсӧ Ен йылысь збыльӧ (Иоансянь 18:37), 2) видзис тыр-бур сӧстӧм олӧмсӧ да аслас олӧмнас петкӧдліс, кыдзи миянлы колӧ овны (1 Петырлӧн 2:21), да 3) сетіс ассьыс олӧмсӧ, медым мездыны йӧзӧс мыжысь да кулӧмысь. Мыйла тайӧ ковмис? (Матвейсянь 20:28).

3. Медводдза морт Адам эз кывзы Енлысь тшӧктӧмсӧ да вӧчис сэтшӧмтор, мый Библияын шуӧма «мыжӧн». Та вӧсна Енмыс шуис Адамлы кувны (Олӧм 3:17—19). Сійӧ эз нин лӧсяв Енлӧн нормаяслы да сы вӧсна воштіс тыр-бурсӧ. Адам вочасӧн пӧрысьмис да куліс. Сысянь мыжыс вуджис сылӧн став челядьыслы. Со мыйла ми сідзжӧ пӧрысьмам, висям да кулам. Кыдзи вӧлі позьӧ мездыны йӧзсӧ? (Римсалы 3:23; 5:12).

4. Исус, кыдзи и Адам, вӧлі тыр-бур мортӧн. Но Исус торъяліс Адамысь сійӧн, мый пыр, весиг медыджыд сьӧкыдлун дырйи вӧлі кывзысьысьӧн Енлы. Та вӧсна сійӧ вермис вештысьны Адамлӧн мыжысь ассьыс тыр-бур морт олӧмсӧ сетӧмӧн. Библия серти тайӧ лоӧ «мынтысьӧм». Тадзи Адамлӧн челядьыслӧн лоис позянлун мынтӧдчыны кулӧм вылӧ мыждӧмысь. Налӧн, кодъяс эскӧны Исуслы, став мыжыс вермас прӧститчыны. Татшӧм йӧзыслӧн эм позянлун босьтны помасьтӧм олӧм (1 Тимофейлы 2:5, 6, СИ; Иоансянь 3:16; Римсалы 5:18, 19).

5. Му вылын олігӧн Исус бурдӧдліс висьысьясӧс, вердліс тшыгъялысьясӧс да дугӧдліс ыджыд бушковъяс. Сійӧ весиг ловзьӧдліс кулӧмаясӧс. Мыйла сійӧ вӧчліс шензьӧданаторъяссӧ? 1) Сійӧ жалитіс страдайтысь йӧзсӧ да кӧсйис налы отсавны. 2) Сылӧн шензьӧданаторъясыс петкӧдлісны, мый сійӧ Енлӧн Пи. 3) Найӧ петкӧдлісны, мый сійӧ вӧчас кывзысьысь йӧзлы, кор кутас веськӧдлыны муӧн (Матвейсянь 14:14; Марксянь 2:10—12; Иоансянь 5:28, 29).

6. Исус куліс, вӧлі Енмӧн ловзьӧдӧма кыдз лов да кайис бӧр енэжӧ (1 Петырсянь 3:18). А сёрӧнджык Ен пуктіс сійӧс Царӧн. Регыд Исус бырӧдас му вывсьыс став лёксӧ да шогсӧ (Псалом 36:9—11; Нӧдкывъяс 2:21, 22).

[Иллюстрации, страница 7]

Исуслӧн служитӧмыс вӧлі сыын, мый сійӧ велӧдіс, вӧчаліс шензьӧданаторъяс да сетіс миян вӧсна ассьыс олӧмсӧ.