Урок 4

Дявӧл, коді сійӧ сэтшӧмыс?

Кытысь лои Сатана Дявӧлыс? (1, 2)

Кыдзи Сатана ылӧдлӧ йӧзсӧ? (3—7)

Мыйла миянлы колӧ водзсасьны Дявӧллы? (7)

1. «Дявӧл» кывйӧн шуӧны сійӧс, коді лёкысь пӧръясьӧ мӧд йылысь. «Сатана» лоӧ «вӧрӧг» либӧ «паныд мунысь». Татшӧм нимъясӧн шусьӧ Енлӧн медшӧр вӧрӧг. Медводз сійӧ вӧлі тыр-бур ангелӧн, коді оліс Енкӧд енэжын. Но сёрӧнджык сійӧ кутіс вывті уна мӧвпавны ас йывсьыс да кӧсйис, медым служитісны сылы, мый вылӧ правоыс эм сӧмын Енлӧн (Матвейсянь 4:8—10).

2. Тайӧ ангелыс, Сатанаыс, змей пыр кутіс сёрнитны Евакӧд. Сатана пӧрйӧдлӧмӧн ышӧдіс сійӧс Енлы кывзысьтӧм вылӧ. Тадзи Сатана лӧгпырысь критикуйтіс Енлысь «ыджыдалӧмсӧ», либӧ Ставвывсаыслысь пыдди пуктана местасӧ. Сатана сувтӧдіс юалӧм: веськыда-ӧ Енмыс ыджыдалӧ да тӧждысьӧ-ӧ Сы дор сулалысьяс вӧсна? Сатана сідзжӧ сувтӧдіс юалӧм: видзас-ӧ кӧть ӧти морт Енлы став сьӧлӧмсяньыс сетчӧмсӧ? Татшӧмторсӧ вӧчӧмӧн Сатана лои Енлы паныд мунысьӧн. Со мый вӧсна сійӧс кутісны шуны Сатана Дявӧлӧн (Олӧм 3:1—5; Иов 1:8—11; Восьтӧм 12:9).

3. Сатана зільӧ ылӧдлыны йӧзсӧ, медым найӧ служитісны сылы (2 Коринфӧ 11:3, 14). Сылӧн медводдза способ йӧзсӧ пӧрйӧдлыны — ылӧдлана религия. Религия кӧ велӧдӧ пӧръясьны Ен йылысь, сійӧ служитӧ Сатаналӧн могъяслы (Иоансянь 8:44). Ылӧдлана религия дор сулалысьяс вермӧны сьӧлӧмсяньыс мӧвпавны, мый служитӧны збыль Енлы. Но веськыда кӧ шуны, найӧ служитӧны Сатаналы. Сійӧ «ен тайӧ нэмас» (2 Коринфӧ 4:4, СИ).

4. Спиритизм — Сатаналӧн нӧшта ӧти способ кыскыны йӧзӧс ас дорас. Йӧзыс корӧны ловъясӧс, медым ловъясыс видзисны найӧс, вӧчисны лёк мукӧд йӧзлы, висьталісны, мый водзӧ лоӧ да вӧчисны шензьӧданаторъяс. Та сайын сулалӧ лёк вын — Сатана. Медым лоны Енлы шогманаӧн, миянлы некутшӧм ногӧн оз позь йитчыны спиритизмкӧд (Мӧд Индӧд 18:10—12; Уджъяс 19:18, 19).

5. Таысь кындзи, Сатана пӧръялӧ йӧзсӧ сійӧн, мый ызйӧдӧ нация серти вылӧ пуксьӧмӧ да ышӧдӧ найӧс служитны политическӧй котыръяслы. Йӧзыс мукӧддырйи лыддьӧны, мый налӧн войтырыс либӧ расаыс бурджык мукӧдсьыс. Но тайӧ абу тадзи (Уджъяс 10:34, 35). Сідзжӧ эм сэтшӧм видзӧдлас, мый йӧзлысь сьӧкыдлунъяссӧ бырӧдасны политическӧй котыръяс. Та вылӧ эскысь йӧз ӧтдортӧны Енлысь Царствосӧ. Но йӧзлысь сьӧкыдлунъяссӧ бырӧдас сӧмын Енлӧн Царство (Даниил 2:44).

6. Ышӧдны йӧзсӧ омӧль кӧсйӧмъяс вылӧ — тайӧ Сатаналӧн нӧшта ӧти ылӧдлан ног. Иегова тшӧктӧ мынтӧдчыны мыжа оласногсьыс. Сійӧ тӧдӧ, мый татшӧм олӧмыс вайӧ лёк (Галатӧ 6:7, 8). Кодсюрӧяс, кодъяс велалӧмаӧсь мыж вӧчны, вермас лоны, кӧсйӧны, медым тэ ӧтувтчин накӧд да на моз кутін овны. Но тӧд, мый збыль вылас тайӧс тэсянь кӧсйӧ Сатана (1 Коринфӧ 6:9, 10; 15:33).

7. Медым ӧтдортны тэнӧ Иегова дінысь, Сатана вермас панлыны дзескӧдӧм да прӧтивитчӧм. Кодкӧ тэнад матыссаяссьыд вермас тэ вылӧ ёна скӧрмыны сы вӧсна, мый тэ велӧдан Библия. Мукӧдыс, гашкӧ, кутасны серавны тэ вылын. Но коді тэныд сетіс олӧмтӧ? Сатана кӧсйӧ повзьӧдны тэнӧ, медым тэ дугдін водзӧ тӧдмавны Иегова йылысь. Эн лэдз Сатаналы вермыны асьтӧ! (Матвейсянь 10:34—39; 1 Петырлӧн 5:8, 9). Дявӧлыслы кӧ тэ водзсасян, то сійӧн ваян Иеговалы радлун да петкӧдлан, мый тэ Сылӧн ыджыдалӧм дор (Нӧдкывъяс 27:11).

[Иллюстрации, страница 9]

Йӧзӧс тӧлк вылысь воштӧны ылӧдлана религия, спиритизм да национализм.

[Иллюстрация, страница 9]

Иегова йылысь тӧдмалігӧн водзсась Сатаналы