Урок 6

Енлӧн Царство, мый сійӧ сэтшӧмыс?

Кӧні Енлӧн Царствоыс? (1)

Коді сылӧн Царыс? (2)

Веськӧдлӧны-ӧ Царкӧд ӧттшӧтш нӧшта кодкӧ? Веськӧдлӧны кӧ, то кымынӧн? (3)

Мый серти тӧдчӧ, мый ми олам бӧръя лунъясӧ? (4)

Мый вӧчас Енлӧн Царство локтан кадӧ морт рӧдлы? (5—7)

1. Кор Исус вӧлі му вылын, сійӧ велӧдіс ас бӧрся мунысьяссӧ кевмысьны Енлӧн Царство локтӧм йылысь. Царство — сійӧ правительство, кӧні юралӧ цар. Енлӧн Царство — сійӧ торъя правительство. Сійӧс лӧсьӧдӧма енэжын да кутас веськӧдлыны муӧн. Царствоыс вежӧдас Енлысь нимсӧ, да сы отсӧгӧн Енлысь тшӧктӧмсӧ кутасны пӧртны олӧмӧ оз сӧмын енэжын, но и му вылын (Матвейсянь 6:9, 10).

2. Ен кӧсйысис, мый Сылӧн Царствоын Царӧн лоӧ Исус (Лукасянь 1:30—33). Кор Исус вӧлі му вылын, сійӧ петкӧдліс, мый лоӧ бур, веськыдлуна, тыр-бур Веськӧдлысьӧн. Енэжӧ воӧм бӧрын Исус эз дзик пыр пуксьы Енлӧн Царствоын Царлӧн трон вылӧ (Еврейяслы 10:12, 13). Иегова сетіс Исуслы кӧсйысьӧм власьтсӧ 1914 воын. Тайӧ кадсянь Исус лоис енэжса, Иеговаӧн пуктӧм, Царӧн (Даниил 7:13, 14).

3. Сыысь кындзи, Иегова бӧрйис ӧткымын мужичӧйӧс да нывбабаӧс, медым найӧ вуджисны му вывсяньыс енэжӧ. Найӧ лоӧны царъясӧн, суддяясӧн, священникъясӧн да кутасны веськӧдлыны Исускӧд ӧтлаын морт рӧдӧн (Лукасянь 22:28—30; Восьтӧм 5:9, 10). Исус шуис аскӧдыс веськӧдлысьяссӧ, кодъяс пырасны сылӧн Царствоӧ, «ичӧт стадаӧн». Налӧн лыдыс — 144 000 (Лукасянь 12:32, СИ; Восьтӧм 14:1—3).

4. Кор Исус лоис Царӧн, сійӧ вӧтліс Сатанаӧс да сылысь лёк ангелъяссӧ му вылӧ. Со мыйла 1914 восянь олӧмыс му вылас ёна лёкмис (Восьтӧм 12:9, 12). Войнаяс, тшыгъялӧм, пӧрӧсъяс, лёк вӧчӧм содӧм — ставыс тайӧ «тӧдчана паслӧн» юкӧнъяс, кодъяс индӧны, мый Исус веськӧдлӧ да ӧнія системаыслы воисны бӧръя лунъяс (Матвейсянь 24:3, 7, 8, 12, СИ; Лукасянь 21:10, 11; 2 Тимофейлы 3:1—5).

5. Регыд Исус кутас судитны йӧзсӧ. Сійӧ торйӧдас найӧс ӧта-мӧдсьыс, кыдзи скӧт видзысь торйӧдӧ ыжъясӧс кӧзаяс дінсьыс. «Ыжъяс» — найӧ, кодъяс петкӧдласны асьнысӧ сылы сьӧлӧмсяньыс сетчӧм подданнӧйясӧн. Найӧ босьтасны помасьтӧм олӧм му вылын. «Кӧзаяс» — найӧ, кодъяс ӧтдортӧны Енлысь Царствосӧ (Матвейсянь 25:31—34, 46). Регыд Исус бырӧдас став кӧза коддьӧмсӧ (2 Фессалоникӧ 1:6—9). Кӧсъян кӧ тэ лоны Исуслӧн «ыжъяс» пӧвстын, то тэныд колӧ кывзыны Царство йылысь юӧр да кывзӧм сертиыс овны (Матвейсянь 24:14).

6. Ӧні муыс юклӧма уна страналӧн территорияяс вылӧ. Быд странаын аслас правительство. Йӧзыс унаысь тышкасьӧны ӧта-мӧдыскӧд. Но мортлысь став правительствояссӧ вежас Енлӧн Царство. Сійӧ лоӧ дзик ӧти правительствоӧн, коді кутас веськӧдлыны став мунас (Даниил 2:44). Сы дырйи оз лоны войнаяс, лёк вӧчӧм да дзескӧдӧм. Став йӧзыслӧн лоас сӧгласа да ӧтувъя олӧм (Михей 4:3, 4).

7. Исуслӧн Сюрс во Веськӧдлӧм дырйи вернӧй йӧз лоӧны тыр-бурӧн, а муыс лоӧ райӧн. Сюрс во помланьыс Исус пӧртас олӧмӧ ставсӧ, мый тшӧктіс сылы Енмыс. Сэсся сійӧ сетас Царствосӧ бӧр Батьыслы (1 Коринфӧ 15:24). Мыйла эськӧ тэныд абу висьтавны аслад ёртъясыдлы да матыссаясыдлы сы йылысь, мый вӧчас Енлӧн Царство?

[Иллюстрация, страница 13]

Исуслӧн веськӧдлӧм улын оз ло лӧгалӧм да омӧльтӧм.