Урок 7

Кыдзи матысмыны Енкӧд кевмысьӧм пыр

Мыйла колӧ велавны кевмысьны? (1)

Код дорӧ колӧ кевмӧмӧн шыасьны да кыдзи? (2, 3)

Мый йылысь позьӧ кевмысьны? (4)

Кор колӧ кевмысьны? (5, 6)

Кывзӧ-ӧ Енмыс став кевмӧмъяссӧ? (7)

1. Кевмӧм — сійӧ Енкӧд рам сёрни. Колӧ велавны кевмысьны Енлы. Тадзи тэ матысман сыкӧд, кыдз дона ёрткӧд. Иегова кӧть и ёна ыджыд да зэв вына, сійӧ кывзӧ миянлысь кевмӧмъяс! Пыр-ӧ тэ кевмысян Енлы? (Псалом 64:3; 1 Фессалоникӧ 5:17).

2. Кевмӧм — служитӧмлӧн юкӧн. Та вӧсна кевмысьны колӧ сӧмын Енлы — Иеговалы. Кор Исус вӧлі му вылын, сійӧ пыр кевмысис аслас Батьыслы, а эз кодлыкӧ мӧдлы. Миянлы колӧ вӧчны сідзжӧ (Матвейсянь 4:10; 6:9). Но ассьыным кевмӧмъяснымӧс колӧ висьтавны Исус ним пыр. Тайӧн ми петкӧдлам, мый пыдди пуктам Исусӧс да эскам сылӧн мынтысян жертваӧ (Иоансянь 14:6; 1 Иоансянь 2:1, 2).

3. Кевмысигӧн миянлы колӧ сёрнитны Енкӧд сьӧлӧмсянь. Миянлы оз ков висьтавлыны кевмӧмъяссӧ кывъяс велӧдӧмӧн либӧ лыддьыны найӧс небӧгысь (Матвейсянь 6:7, 8). Кевмысьны позьӧ кӧть кутшӧм, но пыдди пуктана позаӧн, любӧй кадӧ да кӧть кӧні. Ен кылӧ весиг кевмӧмъяс, кодӧс ми висьталам ас пытшкын, сьӧлӧмын (1 Царъяс 1:12, 13). Тэнад кевмӧмыд сӧмын кӧ ассяньыд, то бур кевмысьны йӧзтӧминын (Марксянь 1:35).

4. Мый йылысь позьӧ кевмысьны? Быдтор йылысь, мый лӧсялӧ сыкӧд ёртасьӧмлы (Филиппӧ 4:6, 7). Образцовӧй кевмӧмысь тыдалӧ, мый колӧ кевмысьны Иегова ним да Сылӧн кӧсйысьӧм йылысь. Сідзжӧ позьӧ корны колана эмбур вылӧ отсӧг, мыж прӧститӧм да отсӧг, медым видзны асьнымӧс ылалӧмысь (Матвейсянь 6:9—13). Оз позь кевмысьны горшасьӧм могысь. Кевмысьны колӧ сӧмын сы йылысь, мый лӧсялӧ Енлӧн тшӧктӧмлы (1 Иоансянь 5:14).

5. Кевмысьны позьӧ пыр, кор тэнад сьӧлӧмыд ышӧдӧ аттьӧавны да ошкыны Енмӧс (1 Чужанним 29:10—13). Кевмысьны колӧ сьӧкыдлунъяс дырйи да кор тӧдмавсьӧ тэнад эскӧмыд (Псалом 54:23; 119:1). Бур кевмысьны сёйӧм водзвылын (Матвейсянь 14:19). Иегова ышӧдӧ кевмысьны «быд кадӧ» (Ефесӧ 6:18).

6. Медъёна колӧ кевмысьны, кор тэ ыджыд мыж вӧчин. Та дырйи колӧ ёна кевмысьӧмӧн Иеговалысь бурлун да прӧща корны. Тэ кӧ висьталан сылы ассьыд мыжъястӧ да сэсся кутан ёна зільны найӧс водзӧ не вӧчны, то Енмыс лоас тэ дінӧ «абу стрӧг» (Псалом 86:5, 1922 воын лэдзӧм «Важ да Выль кӧсйысьӧмлӧн Священнӧй небӧгъяс» [85:5]; Нӧдкывъяс 28:13).

7. Иегова кывзӧ кевмӧмъяссӧ сӧмын бурноголыся йӧзлысь. Медым Ен кывзіс тэнсьыд кевмӧмъястӧ, тэныд колӧ зільны вӧчны ставсӧ, медым овны сылӧн законъяс серти (Нӧдкывъяс 15:29; 28:9). Кевмысигӧн тэныд колӧ лоны рамӧн (Лукасянь 18:9—14). Да колӧ уджавны сы вылын, мый тэ коран Енмыслысь. Тадз тэ петкӧдлан, мый эскан да збыльысь висьталан сійӧс, мый мӧвпалан. Сӧмын сэки Иегова кутас вочавидзны кевмӧмъяс вылӧ (Еврейяслы 11:6).