Урок 8

Енлы шогмана семьякостса олӧм

Верӧс — кутшӧм сылӧн местаыс семьяын? (1)

Кыдзи верӧслы колӧ овны гӧтыркӧд? (2)

Мый пырӧ батьлӧн могъясӧ? (3)

Кутшӧм могъяс босьтӧ ас вылас гӧтыр? (4)

Мый Ен тшӧктӧ бать-мамлы да челядьлы? (5)

Кыдзи Библия видзӧдӧ торйӧн олӧм да юксьӧм вылӧ? (6, 7)

1. Библияын висьтавсьӧ, мый верӧс — семьяын юр (1 Коринфӧ 11:3). Верӧслы колӧ овны сӧмын ӧти гӧтыркӧд. Верӧслы да гӧтырлы колӧ гижӧдны гӧтрасьӧмсӧ странаын лэдзӧм закон серти (1 Тимофейлы 3:2; Титлы 3:1).

2. Верӧслы колӧ радейтны гӧтырӧс асьсӧ моз. Сылы колӧ лоны сэтшӧмӧн, кутшӧмӧн вӧлі Исус ас бӧрся мунысьяс дорас (Ефесӧ 5:25, 28, 29). Верӧслы оз позь нӧйтны гӧтырӧс либӧ кыдзкӧ мӧд ногӧн лоны лёкӧн сы дорӧ. Мӧдарӧ, сылы колӧ бурӧ пуктыны да донъявны сійӧс (Колоссӧ 3:19; 1 Петырсянь 3:7).

3. Батьлы быть колӧ ёна уджавны, медым тӧждысьны аслас семья вӧсна. Сылы колӧ могмӧдны гӧтырсӧ да челядьсӧ сёян-юанӧн, кӧм-паськӧмӧн да оланінӧн. Батьлы колӧ могмӧдны аслас семьяын духовнӧй коланлунсӧ (1 Тимофейлы 5:8). Сійӧ босьтӧ ас вылас мог отсавны семьяыслы тӧдмавны Енмӧс да Сылысь кӧсйысьӧмъяссӧ (Мӧд Индӧд 6:4—9; Ефесӧ 6:4).

4. Гӧтырлы колӧ лоны бур отсасьысьӧн верӧсыслы (Олӧм 2:18). Сылы колӧ отсавны верӧсыслы быдтыны да велӧдны челядьӧс (Нӧдкывъяс 1:8). Иегова тшӧктӧ, медым гӧтыр сьӧлӧмсяньыс тӧждысис аслас семья вӧсна (Нӧдкывъяс 31:10, 15, 26, 27; Титлы 2:4, 5). Сылы колӧ ёна пыдди пуктыны верӧссӧ (Ефесӧ 5:22, 23, 33).

5. Ен тшӧктӧ, медым челядь кывзысисны бать-мамлысь (Ефесӧ 6:1—3). Сійӧ индӧ бать-мамлы велӧдны да бур туйӧ веськӧдны ассьыныс челядьсӧ. Бать-мамлы колӧ торйӧдны кад, медым велӧдны накӧд Библия да тӧждысьны налӧн духовнӧй да эмоциональнӧй коланлун вӧсна (Мӧд Индӧд 11:18, 19; Нӧдкывъяс 22:6, 15). Бать-мамлы оз позь быдтыны челядьӧс лёк ногӧн да чорыда (Колоссӧ 3:21).

6. Кор гозъялы сьӧкыд лӧсявны ӧта-мӧдныскӧд, налы колӧ кывзыны Библияысь сӧветъяс. Библия тшӧктӧ радейтны да прӧститны (Колоссӧ 3:12—14). Енлӧн Кыв оз ошкы гозъяӧс неыджыд сьӧкыдлун вӧсна овны торйӧн. Но гӧтыр вермас мунны верӧс дінысь, кор 1) верӧсыс некыдзи оз кӧсйы тӧждысьны семья вӧсна, 2) сэтшӧм чорыдӧн асьсӧ пуктӧ, мый вермӧ вӧчны омӧльтор гӧтырлӧн дзоньвидзалунлы да олӧмыслы, либӧ 3) яра прӧтивитчӧ сылӧн Иеговалы служитӧмлы (1 Коринфӧ 7:12, 13).

7. Гозъялы колӧ лоны вернӧйӧн ӧта-мӧдныслы. Семья кост торкӧм — сійӧ мыж Ен да верӧс либӧ гӧтыр водзын (Еврейяслы 13:4). Библия серти сӧмын ӧти помка вӧсна позьӧ юксьыны да мӧдысь гӧтрасьны — эм кӧ семьяысь бокын мусукасьӧм (Матвейсянь 19:6—9; Римсалы 7:2, 3). Иегова мустӧмтӧ, кор йӧзыс торйӧдчӧны Библияса подувтӧг да гӧтрасьӧны мӧд морткӧд (Малахия 2:14—16).

[Иллюстрации, страницы 16, 17]

Радейтысь бать могмӧдӧ ассьыс семьясӧ духовнӧй да судзсяна олӧмӧн.

[Иллюстрация, страница 17]

Ен индӧ бать-мамлы велӧдны да бур туйӧ веськӧдны ассьыныс челядьсӧ.