Урок 9
Енлӧн служитысьяслы колӧ лоны сӧстӧмӧн
Мыйла миянлы колӧ лоны сӧстӧмӧн быдторйын? (1)
Лоны духовнӧя сӧстӧмӧн — мый сійӧ сэтшӧмыс? (2) нравственнӧя? (3) мӧвпъясын? (4) физическӧя? (5)
Кутшӧм пеж сёрниысь колӧ видзны асьтӧ? (6)
1. Иегова Ен сӧстӧм да вежа. Сійӧ виччысьӧ, мый сылӧн служитысьяс видзасны духовнӧй, нравственнӧй, физическӧй сӧстӧмлун, сідзжӧ сӧстӧмлун мӧвпъясын (1 Петырлӧн 1:16). Кӧсъям кӧ ми лоны Ен водзын сӧстӧмӧн, миянлы колӧ ёна уджавны ас вылын. Ми олам лёк мирын. Таысь кындзи, миянлы ковмылӧ вермасьны асланым омӧль кӧсйӧмъяскӧд. Но миянлы оз ков сетчыны.
2. Духовнӧй сӧстӧмлун. Кӧсъям кӧ ми служитны Иеговалы, миянлы оз ков кутчысьны ылӧдлана религиялӧн велӧдӧмъясӧ да обычайясӧ. Миянлы колӧ петны ылӧдлана религияысь да нинӧмӧн сылы не отсавны (2 Коринфӧ 6:14—18; Восьтӧм 18:4). Ен йылысь збыльсӧ тӧдмалӧм бӧрын миянлы колӧ видзны асьнымӧс йӧзысь, кодъяс велӧдӧны пӧръясьны (2 Иоансянь 10, 11).
3. Нравственнӧй сӧстӧмлун. Иегова кӧсйӧ, медым сылӧн служитысьяс олісны збыль христиана моз (1 Петырсянь 2:12). Сійӧ аддзӧ ставсӧ, мый ми вӧчам, весиг гусяторъяссӧ (Еврейяслы 4:13). Миянлы колӧ видзны асьнымӧс лёк ног мусукасьӧмысь да тайӧ мирысь быдсяма омӧль велалӧмъясысь (1 Коринфӧ 6:9—11).
4. Сӧстӧмлун мӧвпъясын. Тыртам кӧ ми ассьыным вежӧрнымӧс сӧстӧм мӧвпъясӧн, миян олан сямным сідзжӧ лоӧ сӧстӧмӧн (Филиппӧ 4:8). Тыртам кӧ пежӧн, то и кутам вӧчны омӧльтор (Матвейсянь 15:18—20). Миянлы колӧ видзны асьнымӧс сэтшӧм гажӧдчӧмысь, коді вермас лёк вайны вежӧрлы. Ми вермам тыртны вежӧрнымӧс сӧстӧм мӧвпъясӧн, кутам кӧ велӧдны Енлысь Кыв.
5. Физическӧй сӧстӧмлун. Христиана — Енлӧн представительяс, та вӧсна налы колӧ видзны ассьыныс вир-яйсӧ да паськӧмсӧ сӧстӧмӧн. Колӧ мыськыны ки асмогасянінӧ ветлӧм бӧрын да сідзжӧ сёйӧм да сёян лӧсьӧдӧм водзвылын. Керка пытшкын кӧ лючки канализационнӧй системаыс абу, то асмогтӧ колӧ гуавны (Мӧд Индӧд 23:12, 13). Физическӧй сӧстӧмлун — дзоньвидзалунлы бур подув. Христианинлӧн керкаыс должен лоны сӧстӧм да пельк кыдзи пытшсяньыс, сідзи и ортсысяньыс. Колӧ, медым сӧстӧмлуннас сійӧ торъяліс мукӧд керкаясысь.
6. Сӧстӧм сёрни. Енлӧн служитысьяслы пыр колӧ висьтавны збыльтор. Пӧръясьысьяс оз пырны Енлӧн Царствоӧ (Ефесӧ 4:25; Восьтӧм 21:8). Христиана оз сёрнитны пеж сёрниӧн. Найӧ оз висьтавлыны да оз кывзыны пеж шмонь да мисьтӧм вӧвлӧмторъяс. Асланыс сӧстӧм сёрниӧн найӧ торъялӧны йӧзысь, кодъяскӧд ӧтлаын уджалӧны либӧ велӧдчӧны, да сідзжӧ сэтчӧс олысьясысь (Ефесӧ 4:29, 31; 5:3).
[Иллюстрации, страницы 18, 19]
Енлӧн служитысьяслы колӧ лоны сӧстӧмӧн быдторйын.