Урок 10

Делӧяс, кодъясӧс мустӧмтӧ Ен

Кыдзи видзӧдны сы вылӧ, мый Енлы лёк? (1)

Кутшӧм сексуальнӧй оласног лоӧ лӧсявтӧмӧн? (2)

Кыдзи христианалы видзӧдны пӧръясьӧм вылӧ? (3) азартнӧй ворсӧм вылӧ? (3) гусясьӧм вылӧ? (3) дзескӧдӧм вылӧ? (4) спиритизм вылӧ? (5) уна вина юӧм вылӧ? (6)

Кыдзи мортлы мынтӧдчыны омӧльторъяссьыс? (7)

1. Енлӧн служитысьяс радейтӧны бурсӧ. Но налы сідзжӧ колӧ мустӧмтны лёксӧ (Псалом 96:10). Сідзкӧ, миянлы колӧ видзны асьнымӧс сэтшӧмторйысь, мый мустӧмтӧ Ен. Мыйысь?

2. Лёк ног любитчӧм. Гӧтрасьтӧдз любитчӧм, гозъя кост торкӧм, скӧткӧд узьлӧм, вир сорлалӧм да гомосексуализм — тайӧ ыджыд мыж Ен водзын (Левит 18:6; Римсалы 1:26, 27; 1 Коринфӧ 6:9, 10). Кыкӧн гижсьытӧг кӧ ӧтлаын олӧны, лоӧ бур либӧ торйӧдчыны, либӧ гижӧдны гӧтрасьӧмсӧ (Еврейяслы 13:4).

3. Пӧръясьӧм, азартнӧй ворсӧм, гусясьӧм. Иегова Ен некор оз пӧръясь (Титлы 1:2). Налы, кодъяс кӧсйӧны лоны бурӧн сы водзын, оз позь пӧръясьны (Нӧдкывъяс 6:16—19; Колоссӧ 3:9, 10). Став азартнӧй ворсӧмыс ызйӧдӧ горшлун вылӧ. Та вӧсна христиана оз ворсны некутшӧм азартнӧй ворсӧмъясӧн: лотереяӧн, вӧвъяс вылын ордйысьӧмӧн, бингоӧн (Ефесӧ 5:3—5). Христиана сідзжӧ оз гусясьны. Найӧ оз ньӧбны эмбур, тӧдӧны кӧ, мый сійӧ гусялӧм, да юасьтӧг йӧзлысь нинӧм оз босьтны (Петӧм 20:15; Ефесӧ 4:28).

4. Лӧг петкӧдлӧм, дзескӧдӧм. Ӧвсьытӧм лӧгалӧм вермӧ ышӧдны дзескӧдӧм вылӧ (Олӧм 4:5—8). Морт, коді дзескӧдӧ кодӧскӧ, оз вермы лоны Енлы ёртӧн (Псалом 10:5; Нӧдкывъяс 22:24, 25). Водзӧс перйыны да лёк вӧчны лёк вылӧ, кодӧс, гашкӧ, вӧчисны миянлы, абу бур (Нӧдкывъяс 24:29; Римсалы 12:17—21).

5. Тшыкӧдчӧм да спиритизм. Кодсюрӧ корсьӧ отсӧг ловъяслӧн вынын, медым бурдны висьӧмъясысь. Эмӧсь йӧз, кодъяс тшыкӧдӧны налы паныд мунысьяссӧ, медым найӧ висьмисны либӧ весиг кулісны. Вын, коді сулалӧ та сайын,— Сатана. Та вӧсна христианалы оз ков некутшӧм ногӧн участвуйтны татшӧмторъясас (Мӧд Индӧд 18:9—13). Миянӧс тшыкӧдӧмысь медбур видзчысьӧм — Иеговакӧд крепыд йитӧд кутӧм (Нӧдкывъяс 18:10).

6. Уна вина юӧм. Нинӧм лёкыс абу неуна вина, сур да мукӧд сикас курыд юантор юыштӧмысь (Псалом 103:15; 1 Тимофейлы 5:23). Но уна юны да кодавны — абу бур Ен синмын (1 Коринфӧ 5:11—13; 1 Тимофейлы 3:8). Уна вина юӧм понда вермас тшыксьыны дзоньвидзалун да киссьыны семья. Сыысь кындзи морт, коді мера тӧдтӧг юӧ, вермӧ кокньыда сетчыны мукӧд лёк вӧчӧм вылӧ (Нӧдкывъяс 23:20, 21, 29—35).

7. Йӧз, кодъяс вӧчӧны сэтшӧмтор, мый Ен лыддьӧ лёкӧн, «Енлӧн Царствоын оз лоны» (Галатӧ 5:19—21, СИ). Тэ кӧ збыльысь радейтан Енмӧс да кӧсъян лоны шогманаӧн сылы, верман мынтӧдчыны татшӧм делӧяссьыс (1 Иоанлы 5:3). Велӧдчы мустӧмтны сійӧс, мый Ен синмын лёк (Римсалы 12:9). Кут бур йитӧд йӧзкӧд, кодъяслӧн эм нин Енлы шогмана велалӧмъяс (Нӧдкывъяс 13:20). Отсӧг вермасны сетны тыр-бур христиана (Яковлӧн 5:14). Ёнджыкасӧ надейтчы Енлӧн отсӧг вылӧ да кевмысь сылы (Филиппӧ 4:6, 7, 13).

[Иллюстрации, страницы 20, 21]

Ен мустӧмтӧ уна вина юӧм, гусясьӧм, азарта ворсӧмъяс да дзескӧдӧм.