Урок 14
Иеговалӧн Висьталысьяс. Кутшӧм тайӧ организацияыслӧн тэчасыс?
Кор кутісны висьтавны бур юӧрсӧ ӧнія кадся Иеговалӧн Висьталысьяс? (1)
Кыдзи нуӧдсьӧны Иеговалӧн Висьталысьяслӧн собраниеясыс? (2)
Кутшӧм тшӧтысь мынтыссьӧ рӧскодыс? (3)
Коді собраниеын босьтӧ ас вылас веськӧдлӧм? (4)
Кутшӧм быд вося ыджыд чукӧртчылӧмъяс нуӧдсьӧны? (5)
Кутшӧм удж нуӧдсьӧ медшӧр управлениеын да филиалъясын? (6)
1. Ӧнія кадся Иеговалӧн Висьталысьяслӧн бур юӧр висьталӧмыс заводитчис 1870-ӧд воясӧ. Водзын найӧ шусисны Библия Туялысьясӧн. Но 1931 воын Библия Туялысьяс босьтісны аслыныс Библия вылын подулалӧм ним — Иеговалӧн Висьталысьяс (Исайя 43:10). Первойсяньыс неыджыд котыртчӧмӧ ӧні пырӧ уна миллион Висьталысь, кодъяс сьӧлӧмсяньыс паськӧдӧны бур юӧр 230 сайӧ странаын.
2. Иеговалӧн Висьталысьяслӧн унджык собраниеас вежоннас аддзысьлӧны куимысь. Став окотитысьыс вермӧ волыны на пиысь любӧй вылӧ (Еврейяслы 10:24, 25). Кызвыныс, мый велӧдсьӧ,— Библия. Собраниеясыс заводитчӧны да помасьӧны кевмӧмӧн. Унджык вылас сьылӧны «Ловсянь бурсьылӧмъяс» (Ефесӧ 5:18, 19). Пырны позьӧ быдӧнлы, деньга оз корны (Матвейсянь 10:8).
3. Унджык собраниеыс аддзысьлӧмъяссӧ нуӧдӧны Царство Залъясын. Пырджык тайӧ прӧстӧй стрӧйбаяс, кодъясӧс лэптісны ас окотаӧн уджалысьяс Висьталысьяс пӧвстысь. Стрӧйба пытшкас абу ни ӧбразъяс, ни распятиеяс, ни мукӧд сэтшӧмтор. Рӧскодъясыс вештыссьӧны ас окотаысь сетӧм пожертвованиеясӧн. Налы, кодъяс кӧсйӧны сетны пожертвование, пуктӧма та вылӧ вӧчӧм ящикъяс (2 Коринфӧ 9:7).
4. Быд собраниеын эм старейшинаяс, либӧ надзирательяс. Сэні найӧ веськӧдлӧны велӧдӧмӧн (1 Тимофейлы 3:1—7; 5:17). Налы отсалӧны служебнӧй отсасьысьяс (1 Тимофейлы 3:8—10, 12, 13). Собраниеын тайӧ служитысьясыс абу вылынджыкӧсь мукӧд христианаысь (2 Коринфӧ 1:24). Торъя титулыс налӧн абу (Матвейсянь 23:8—10). Пасьтасьӧны найӧ сідзжӧ, кыдзи и ставыс. Налӧн уджыс оз вештыссьы. Старейшинаяс ас окотаысь тӧждысьӧны собраниелӧн духовнӧй коланлун вӧсна. Найӧ вермӧны пальӧдны шог да сетны сӧвет сьӧкыдлун дырйи (Яковлӧн 5:14—16; 1 Петырсянь 5:2, 3).
5. Сыысь кындзи, Иеговалӧн Висьталысьяслӧн овлӧны быд вося ыджыд чукӧртчылӧмъяс, либӧ конгрессъяс. На вылын уна собрание ӧтпырйӧ кывзӧны Библия вылын подулалӧм торъя программа. Пырджык конгресс вылын нуӧдсьӧ выль велӧдчысьяслӧн пыртчӧм (Матвейсянь 3:13—17; 28:19, 20).
6. Ставмирса медшӧр управлениеыс Иеговалӧн Висьталысьяслӧн Нью-Йоркын. Сэні уджалӧ Веськӧдлан сӧвет — опытнӧй старейшинаяслӧн юрнуӧдан ӧтчукӧр, коді тӧждысьӧ ставмирса собрание вӧсна. Сыысь кындзи, уна странаын уджалӧ 100-ысь унджык филиал. Сэні ас окотаысь уджалысьяс отсалӧны печатайтны да ыстыны библейскӧй литература. Сідзжӧ филиалъяс веськӧдлӧны бур юӧр паськӧдӧм уджӧн. Мыйла эськӧ абу мӧвпыштны матысса филиалӧ ветлӧм йылысь?