Кыдзи тэ верман унджык тӧдмавны ен йылысь

Тэ унджык верман тӧдмавны Иегова йылысь Библия лыддигӧн. Ёна водзджык Ен бӧрйис некымын мортӧс, медым найӧ гижисны сылысь мӧвпъяссӧ. Тайӧ гижӧдъясыс шусьӧны Библияӧн. Талун ми тӧдмасям Енкӧд Библия лыддигӧн. Сы вӧсна, мый Библияас гижӧма Иеговалысь кыв, либӧ юӧр, сійӧс сідзжӧ шуӧны Ен Кывйӧн. Ми вермам эскыны Библиялы сы вӧсна, мый Иегова некор оз пӧрйӧдлы. «Некыдз оз скодит, мед Ен пӧръяліс» (Еврейяслы 6:18). Ен кывйын збыльыс (Иоансянь 17:17).

Библия — тайӧ медся дона козинъясысь ӧти, кодӧс сетіс миянлы Ен. Сійӧс позьӧ орччаӧдны юӧркӧд, кодӧс мӧдӧдӧ аслас челядьлы радейтысь бать. Сійӧ висьталӧ, мый Ен кӧсйысьӧ лӧсьӧдны му пасьталаыс шуда оланін — Рай. Сійӧ висьталӧ, мый Ен вӧчис водзті, вӧчӧ ӧні да кутас вӧчны локтан кадӧ аслас вернӧй челядьыслы. Сійӧ сідзжӧ отсалӧ миянлы венны сьӧкыдлунъяс да аддзыны шуд (2 Тимофейлы 3:16, 17).

Иеговалӧн Висьталысьяс — тайӧ Енлӧн ёртъяс; найӧ отсаласны тэныд гӧгӧрвоны, мыйӧ велӧдӧ Библия. Тэныд колӧ сӧмын висьтавны налы, мый тэ кӧсъян велӧдны Библия. Велӧдӧмсьыс найӧ оз босьтны сьӧм (Матвейсянь 10:8). Сідзжӧ тэ верман волывлыны христианалӧн чукӧртчылӧмъяс вылӧ. Найӧс нуӧдӧны служитан местаясын, кодъяс шусьӧны Царство Залъясӧн. Кутан кӧ ветлыны христианалӧн чукӧртчылӧмъяс вылӧ, тэ ӧдйӧ босьтан уна тӧдӧмлун Ен йылысь.

Тэ верман тӧдмавны Ен йылысь, кутан кӧ туявны сылысь вӧчӧмторъяссӧ. Сідз, Библияас висьталӧма: «Ен вӧчис енэж да му» (Олӧм 1:1). Кор Иегова лӧсьӧдіс «енэжсӧ», сійӧ вӧчис шонді. Мый тайӧ вермас висьтавны миянлы Ен йылысь? Та серти ми тӧдмалам, мый Иеговалӧн зэв ыджыд вын. Сӧмын сійӧ вермис вӧчны татшӧм ыджыд шонді, коді зэв ёна югъялӧ. Сідзжӧ тайӧ висьталӧ миянлы сы йылысь, мый Иегова зэв ыджыд мывкыда, сы вӧсна мый, медым вӧчны шонді, коді сетӧ шоныд да югыд, но век жӧ оз кус, колӧ мывкыдлун.

Иеговалӧн вӧчӧмторйыс петкӧдлӧ, мый сійӧ радейтӧ миянӧс. Мӧвпалышт, мыйта сикас плод быдмӧ му вылас. Иегова вермис сетны миянлы сӧмын ӧти сикас плод, либӧ нинӧм не сетны. Но Иегова сетіс миянлы зэв уна плод — быдсяма формаа, ыдждаа, рӧма да кӧра. Тайӧ петкӧдлӧ, мый Иегова — радейтысь, лышкыд, тӧждысьысь да бур Ен (Псалом 103:24).