Кыдзи аддзыны веськыд религия

Кӧсъян кӧ тэ лоны Енлы ёртӧн, тэныд колӧ висьтавны сійӧ религиясӧ, кодӧс ошкӧ Ен. Исус висьталіс, мый «веськыда служитысьяс» кутасны служитны Енлы «збыль» серти (Иоансянь 4:23, 24). Эм сӧмын ӧти сикас веськыда служитӧм Енлы (Ефесӧ 4:4—6). Веськыд религияыс нуӧдӧ помасьтӧм олӧмӧ, а ылӧдлана религияыс нуӧдӧ пӧгибӧ (Матвейсянь 7:13, 14).

Тэ верман тӧдмавны веськыд религиясӧ, видзӧдыштан кӧ йӧз бӧрсяыс, кодъяс висьталӧны сы йылысь. Иегова — бур Ен, сідзкӧ сылӧн веськыда служитысьяслы колӧ лоны бур вӧчысь йӧзӧн. Бур апельсин пулӧн плодъясыс — бур апельсинъяс, сідзжӧ и плодъясыс веськыд религиялӧн — бур йӧз (Матвейсянь 7:15—20).

Енлӧн ёртъяс ёна пыдди пуктӧны Библия. Найӧ тӧдӧны, мый Библияыс Енсянь. Найӧ лэдзӧны, мед Библияас гижӧмыс веськӧдліс налӧн олӧмӧн, отсаліс шогъяссьыс мынны да тӧдмавны Ен йылысь (2 Тимофейлы 3:16). Найӧ зільӧны овны сідзи, кыдзи мукӧдсӧ велӧдӧны.

Енлӧн ёртъяс петкӧдлӧны ӧта-мӧд дорас радейтӧмсӧ. Исус петкӧдліс, мый радейтӧ йӧзсӧ, кор велӧдіс найӧс Ен йылысь да бурдӧдіс висьысьяссӧ. Найӧ, кодъяс олӧны веськыд религия серти, сідзжӧ радейтӧны мукӧдсӧ. Сідзжӧ, кыдзи Исус, найӧ оз кыпӧдны асьнысӧ гӧль либӧ мӧд нацияса йӧз водзын. Исус висьталіс, мый йӧзыс тӧдмаласны сылысь велӧдчысьяссӧ, кор аддзасны, мый найӧ радейтӧны ӧта-мӧднысӧ (Иоансянь 13:35).

Енлӧн ёртъяс пыдди пуктӧны Енлысь Иегова нимсӧ. Кодкӧ кӧ оз кӧсйы шыасьны тэ дорӧ нимнад, лоас-ӧ тэныд сійӧ матысса ёртӧн? Оз! Эм кӧ миян ёрт, ми шыасям сы дорӧ нимнас да висьталам сы йылысь мукӧдыслы буртор. Сідзжӧ и налы, кодъяс кӧсйӧны лоны Енлы ёртӧн, колӧ шыасьны сы дорӧ нимнас да висьтавны сы йылысь мукӧдыслы. Иегова кӧсйӧ, мед ми тадзи вӧчим (Матвейсянь 6:9; Римсалы 10:13, 14).

Исус моз жӧ Енлӧн ёртъяс велӧдӧны йӧзсӧ Енлӧн Царство йылысь. Енлӧн Царствоыс — тайӧ енэжса правительство, коді вӧчас мусӧ Райӧн. Енлӧн ёртъясыс юксьӧны Енлӧн Царство йылысь нимкодь юӧрнас мукӧдыскӧд (Матвейсянь 24:14).

Иеговалӧн Висьталысьяс зільӧны лоны Енлы ёртъясӧн. Найӧ пыдди пуктӧны Библиясӧ да эм на костын радейтӧмыс. Сідзжӧ найӧ шуӧны да пыдди пуктӧны Енлысь нимсӧ да велӧдӧны мукӧдсӧ Енлӧн Царство йылысь. Талун му вылын веськыд религия йылысь висьталӧны Иеговалӧн Висьталысьяс.