Ku Bahebelu

11 Lwitabilo ke kintu kimulengela kushiinwa’mba akya kyo mwaketekela kikamweka,+ kyo kiyukilo kimwesha’mba akya kyo mwaitabila kya kine nangwa kya kuba kechi mwikimona ne. 2 Mambo monka mu lwitabilo, bantu bajingako kala* bashimwinwe’mba Lesa wibaswa.

3 Lwitabilo lo lwitulengela kuyuka’mba buno bwikalo* bwaikajikilwe monka mwayijile jiwi ja Lesa, kya kuba’mba akya kyo tumona kyaishile kwikalako kufuma ku bintu byo tubula kumona.

4 Lwitabilo lo lwalengejile Abela kupana kitapisho kyanema kyakijile kya kwa Kaina,+ kabiji na mambo a luno lwitabilo kyashimwinwe pe aye amba waoloka, mambo Lesa waswile* bupe bwanji,+ nangwa kya kuba wafwile, ne luno ukyamba+ na mambo a lwitabilo lwanji.

5 Lwitabilo lo lwalengejile Enoka+ kumuvilula pa kuba’mba abule kufwa, kabiji ko ayile kechi kwayukanyikilwe ne, mambo Lesa wamuvilwile;+ mambo saka bakyangye kumuvilula, kyashimwinwe pe aye amba watokeshe Lesa ku muchima. 6 Kabiji kwa kubula lwitabilo kechi kyakonsheka kutokesha Lesa ku muchima ne, mambo yense usolomoka Lesa wafwainwa kuketekela’mba koaji kabiji ye ufweta aba bamukebesha.+

7 Lwitabilo lo lwalengejile Nowa+ byo bamujimwineko kwi Lesa pa bintu byaji bikyangye kumweka,+ kumwesha moyo wa kwakamwa Lesa ne kufiika bwato+ bwa kupulushishamo ba mu nzubo yanji; kabiji na mambo a luno lwitabilo wazhachishe ba pano pa ntanda,+ ne kwikala nswanyi wa bololoke bwiya na mambo a lwitabilo.

8 Lwitabilo lo lwalengejile Abalahama+ kukookela kimye kyo bamwambijile kuya ku mpunzha ingi yo bamulayile kumupa kwikala ke ya buswanyi; wayile nangwa kya kuba kechi wayukile ko ayilenga ne.+ 9 Lwitabilo lwamulengejile kwikala bwenyi mu yoya ntanda ya mulaye yabujile yanji,+ saka bekala mu matente+ ne Izaka ne Yakoba, banswanyi pamo ne aye ba awa mulaye umo.+ 10 Mambo aye watengejilenga muzhi uji na bitendekesho bya kine, sendwe mwine ne ntungi ye Lesa.+

11 Lwitabilo lo lwalengejile Sala naye kutambula bulume bwa kwimita mwana,* nangwa kya kuba wapichile pa jifumbi ja kusema,+ mambo waketekejile’mba awa wamulayile ye wa kishinka.* 12 Na mambo a kino, kufuma ku muntu umo wamwekelenga nobe wafwa,+ ko kwasemekelwe baana+ bavula nobe tubangabanga twa mwiulu, kabiji bavula nobe busenga bwa kukankalwa kubala buji ku kitulu kya kalunga ka mema.+

13 Bano bonse bafwijile mu lwitabilo nangwa kya kuba kechi batambwijile abya byalailwe ne;+ bino bebimwene saka biji palepa+ ne kusangalela monka kabiji besolwele amba bo benyi bajinga pa lwendo mu ntanda mo baikelenga. 14 Mambo aba bamba bino, bamwesha’mba babena kukebesha mpunzha yabo bene ya kwikalamo. 15 Kabiji umvwe bavulukilenga aya mpunzha yo bafumineko,+ inge bamwene mwa kubwelela konka. 16 Bino babena kukebesha mpunzha yawama, ko kuba’mba iji mwiulu. Onkao mambo, Lesa kechi wibomvwina bumvu, pa kutelwa’mba Lesa wabo ne,+ mambo wibanengezhezha muzhi.+

17 Lwitabilo lo lwalengejile Abalahama kukeba kulambula Izaka kimye kyo bamwesekele+—uno muntu watambwile milaye na lusekelo, wakebele kulambula mwananji yenkawa umotu+— 18 nangwa kya kuba bamwambijile’mba: “Awa ukatelwa’mba mwanobe* ukafuma mwi Izaka.”+ 19 Bino walangulukile’mba Lesa wakonsha kumusangula mu bafu, kabiji watambwijile mwananji kufuma ku lufu mu bukifwanyikizho.+

20 Lwitabilo lo lwalengejile Izaka naye kupesha Yakoba+ ne Isao+ pa mambo a bintu bikeya.

21 Lwitabilo lo lwalengejile Yakoba kimye kyo ajinga pepi kufwa+ kupesha baana ba kwa Yosefwa+ ne kupopwela Lesa saka akwata ku mukombo wanji.+

22 Lwitabilo lo lwalengejile Yosefwa byo ajinga pepi kufwa, kwamba pa kulupuka kwa bena Isalela mu Ijipita, kabiji wapaine mukambizho pa mambo a bikupa byanji.*+

23 Lwitabilo lo lwalengejile bansemi ba kwa Mosesa kumufya pa bañondo basatu kufuma kimye kyo asemenwe,+ mambo bamwene’mba uno mwana walamba bingi+ kabiji kechi bachiine mukambizho wa mfumu ne.+ 24 Lwitabilo lo lwalengejile Mosesa byo akomene+ kukana kumutela’mba mwana wa mwana wa mukazhi wa kwa Felo,+ 25 aye wasajilepo kumanamina pamo na bantu ba Lesa kukila kusekela kwa pa kakimye kacheche kwa bundengamambo, 26 mambo aye wanemekele kunenwa byo ajinga Mushingwa* kukila bunonshi bwa mu Ijipita, aye watajilenga ku mfweto yo bakamufweta. 27 Lwitabilo lo lwamulengejile kufuma mu kyalo kya Ijipita,+ bino kechi wachiine bukaji bwa mfumu ne,+ mambo watwajijile kuchinchika nobe ubena kumona yewa ubula kumweka.+ 28 Lwitabilo lo lwamulengejile kwikala na Kijiilo kya Lupitailo ne kusansa mashi ku bibelo kuba’mba awa waipayañenenga abule kwipaya* babeji babo.+

29 Lwitabilo lo lwibalengejile kwabuka Kalunga ka Mema Kachila pa mushiji wauma,+ bino bena Ijipita byo baesekele’mba babuke, bebalobeshe bonse ku mema.+

30 Lwitabilo lo lwalengejile nsakwa ya Yeliko kukunduka byo beizhokolokele ku bantu pa moba atanu na abiji.+ 31 Lwitabilo lo lwalengejile Lehaba pite kubula kufwila pamo na boba babujile lukookelo, mambo aye wibatambwijile mu mutende aba baendejile kyalo.+

32 Nanchi ñambe’mba ka? Mambo kimye kisakunkepela umvwe ntendeke kwamba pa byamwekejile Gidiona,+ Balaka,+ Samisonyi,+ Yefita,+ Davida,+ Samwela+ ne bangauzhi bakwabo. 33 Lwitabilo lwibalengejile kushinda bufumu,+ kuba byaoloka, kutambula milaye,+ kushinka tunwa twa mabokwe,+ 34 kuzhimya bulume bwa mujilo,+ kupuluka ku mpoko,+ kutambula bulume mu kubula kukosa kwabo,+ kwikala bilobo mu nkondo,+ ne kushinda mazhita a balwanyi.+ 35 Banabakazhi batambwijile balongo babo bafwile byo bebasangwile,+ bino bantu bakwabo bebamanyikile mambo kechi balekele kwikala ba kishinka kwi Lesa amba bebakasulule ne, baubile kino kuba’mba bakasangulwe mu lusanguko lwakilamo kuwama. 36 Kabiji bakwabo baesekelwe na myendeleko ne kwibapuma, kabiji bebakashile minyololo+ ne kwibataya mu tuleya.+ 37 Bebashile mabwe,+ bebesekele, kwibachiba mu bipimvwa bibiji na baso, bebepayile na mpoko,+ bapitañenenga saka bavwala biseba bya mikooko, bya bambuzhi,+ saka bakajilwa, mu bya malwa,+ ne kwibamanyika;+ 38 kabiji pano pa ntanda kechi pebafwainwe ne. Bapitañenenga na kukeba mwa kufyama mu biselebwa, mu mitumba, mu mayengo+ ne mu mimbwa ya panshi.

39 Kabiji bano bonse nangwa kya kuba bashimwinwe bulongo na mambo a lwitabilo lwabo, kechi batambwile mulaye walailwe ne, 40 mambo Lesa wamwenejile jimo kintu kituwamina,+ kuba’mba babule kwikala balumbuluka kwa kubula atweba.