Nkalata Itanshi ku Bena Kolinda
14 Kebeshainga butemwe, ne kwibikishako kukeba* bya bupe bya ku mupashi, kikatakata kya bupe kya kwaula.+ 2 Mambo awa wambila mu lujimi ungi, kechi wamba ku bantu ne, wamba kwi Lesa, mambo kafwako umvwa,+ bino aye wamba byafyamika byazhila+ na mupashi. 3 Nangwa byonkabyo, awa waula ukomesha ne kutundaika ne kutekenesha bantu na byambo byanji. 4 Awa wambila mu lujimi ungi wikomesha mwine, pakuba awa waula ukomesha kipwilo. 5 Nakonsha kukeba anweba bonse kwambila mu njimi ingi,+ bino nakebesha namba mwaule.+ Awa wambila mu njimi inge wabula kulumbulula* pa kuba’mba akomeshe kipwilo, ko kuba’mba bamukila ku yewa waula. 6 Balongo bami, umvwe pa kino kimye naiya kwi anweba saka ñambila mu njimi ingi, nanchi kino kikemukwasha nyi? Umvwe nkeba kwimukwasha, nafwainwa kwamba kwi anweba na lumwekesho lwafuma kwi Lesa+ nangwa na bintu byo nayuka+ nangwa na bungauzhi nangwa na lufunjisho.
7 Kijitu nobe bintu bibula kupema bivuma, nabiji mumpempe nangwa kyansa. Umvwe kuvuma kwabyo kechi kwapusana ne, akya kyo babena kwimba na mumpempe nangwa na kyansa kikayukanyikwa byepi? 8 Mambo umvwe ntolompita yavuma kivumevume, ñanyi ukemana kuya ku nkondo? 9 Kyo kimotu, ne anweba mwambila mu njimi ingi, inge mwabula kwamba byambo byapela kumvwa, muntu ukayuka byepi kyo mwaamba? Kikekala nobe mubena kwambatu mu mwela. 10 Kwakonsha kwikala milaka yapusana pusana yambiwa pano pa ntanda, bino yonse iji na mo yumvwanyikila bulongo. 11 Mambo umvwe nabula kukwatakanya mwatala byambo, nkekala ke ungi ku yewa ubena kwamba, ne yewa ubena kwamba naye ukekala ungi kwi amiwa. 12 Onkao mambo, ne anweba byo mwakebesha bya bupe bya mupashi, bikebeshainga kuba’mba mwikale nabyo byavula bya kukomesha kipwilo.+
13 Onkao mambo, awa wambila mu lujimi ungi alombe kuba’mba amone mwa kulumbulwila* byambo byanji.+ 14 Mambo umvwe mbena kulombela mu lujimi ungi, mbena kulomba na mambo a kya bupe kya mupashi, bino kechi ngyuka mo kyatala ne. 15 Ki ka kyo nafwainwa kuba? Nkalomba na kya bupe kya mupashi, kabiji nkalomba lulombelo lo nayuka mo lwatala. Nkemba nyimbo ya kutota Lesa na kya bupe kya mupashi, kabiji nkemba nyimbo ya kutota Lesa yo nayuka mo yatala. 16 Mambo umvwe mwatota Lesa na kya bupe kya mupashi, nga muntutu ye muji nanji ukamba byepi amba, “Amena” ku lusanchilo lwenu, byo abula kumvwa kyo mwaamba? 17 Ibyo kuba’mba lusanchilo lwenu lwawama, bino muntu mukwabo kechi mubena kumukomesha ne. 18 Namusanchila Lesa, mambo ñambila mu njimi yavula kukila anweba bonse. 19 Nangwa byonkabyo, mu kipwilo, kyawama naamba byambo bitanu byo bakonsha kumvwa mo byatala pa kuba’mba nebafunjishe bakwetu, kukila kwamba byambo biumbi jikumi mu lujimi ungi.+
20 Balongo bami, kange mwikale nobe baana ba bacheche mu kukwatakanya bintu ne,+ bino mwafwainwa kwikala nobe baana ba bacheche ku bintu byatama;+ ne kwikala bakoma mu kukwatakanya bintu.+ 21 Mu Mizhilo kyanembwa’mba: “‘Nkesamba na bano bantu mu milaka ya bantu bangi ne kwamba byambo bya benyi, nangwa byonkabyo bakakana kuñumvwa,’ byo byaamba Yehoba.”*+ 22 Onkao mambo, kwamba mu njimi ingi kechi kyo kiyukilo kya baitabila ne,+ ke kya boba babula kwitabila, pakuba kwaula kechi kwa babula kwitabila ne, bino kwa boba baitabila. 23 Onkao mambo, umvwe kipwilo kyonse kyapwila pa mpunzha imo ne bonse saka bamba mu njimi ingi, bino bantutu nangwa babula kwitabila batwela, nanchi kechi bakalanguluka’mba mwakonya nenyi? 24 Bino umvwe bonse mubena kwaula ne wabula kwitabila nangwa muntutu watwela, byambo byo mubena kwamba anweba bonse bikamushiina ne kumulengela kwipima bulongo aye mwine. 25 Kabiji byafyamika bya mu muchima wanji bikasoloka kabiji ukapona kinkuvumene ne kupopwela Lesa ne kwamba’mba: “Lesa kine muji nanji.”+
26 Balongo bami, nanchi ki ka kyo twafwainwa kuba? Inge mwapwila pamo, umo wikala na kya bupe kya salamo, mukwabo kya kufunjisha, mukwabo kya lumwekesho, mukwabo kya kwambila mu lujimi ungi, kabiji mukwabo na kya bupe kya kulumbulula.+ Bintu byonse mwibyubenga mu kwikomesha. 27 Umvwe muntu umo wambila mu lujimi ungi, bekaletu bantu babiji nangwa basatu kabiji bepimpulenga, kabiji umo wafwainwa kwikala wa kulumbulula.*+ 28 Bino umvwe kafwako wa kulumbulula,* wafwainwa kuzhindama mu kipwilo ne kwamba kwi aye mwine ne kwi Lesa. 29 Bangauzhi babiji nangwa basatu+ baule, ne bakwabo bayuke mo byatala. 30 Bino umvwe umo watambula kya bupe kya lumwekesho saka aikala monka, ñambi mutanshi azhindamepo. 31 Mambo anweba bonse mwakonsha kushilañana pa kwaula, pa kuba’mba bonse bafunde ne kutundaikwa.+ 32 Kabiji bangauzhi bafwainwa kuyuka bulongo bya kwingijisha bya bupe byabo bya mupashi. 33 Mambo Lesa ye Lesa wa mutende kechi wa bimvulañanya ne.+
Byonka byo kiji mu bipwilo byonse bya bazhijikwa, 34 banabakazhi bazhindame mu bipwilo, mambo kechi kibafwainwa kwamba ne.+ Bino abo banekenenenga+ byonka byaamba Mizhilo. 35 Umvwe bakeba kuyuka kintu kimo, bafwainwa kwipuzha bamwatawabo ku mazubo, mambo kyo kya bumvu mwanamukazhi kwamba mu kipwilo.
36 Nanchi mambo a Lesa afumine kwi anweba, nangwa afikiletu kwi anweba yenkatu nyi?
37 Umvwe muntu walanguluka’mba ye ngauzhi nangwa’mba uji na kya bupe kya mupashi, wafwainwa kuyuka’mba bintu byo mbena kwimunembela yo mikambizho ya Nkambo. 38 Bino inge umo walengulula kino, naye bakamulengulula.* 39 Onkao mambo, balongo bami, ibikishaingako na kwaula,+ bino kange mukanyenga kwamba mu njimi ingi ne.+ 40 Pakuba bintu byonse byubiwe na mushingi ne mo byalondankena.*+