Itanshi ya kwa Yoano
5 Yense witabila’mba Yesu ye Kilishitu, ye wasemwa kwi Lesa.+ Kabiji yense watemwa Lesa, watemwa ne yense wasemwa kwi aye. 2 Muno mo twayukila’mba twatemwa baana ba Lesa,+ umvwe twatemwa Lesa ne kulondela mikambizho yanji. 3 Mambo kutemwa Lesa kulumbulula’mba tulondelenga mikambizho yanji;+ kabiji mikambizho yanji kechi yakatazha ne,+ 4 mambo yense* wasemwa kwi Lesa ushinda pano pa ntanda.+ Kabiji lwitabilo lwetu lo lwashinda pano pa ntanda.+
5 Ñanyi wakonsha kushinda pano pa ntanda?+ Nanchi kechi yewa waitabila’mba Yesu ye Mwana Lesa nenyi?+ 6 Uno ye yewa waishile na mema ne na mashi, ye Yesu Kilishitu, kechi waishiletu na mema onka ne,+ poso na mema ne na mashi.+ Kabiji mupashi ye umushimuna,+ mambo mupashi ye bukine. 7 Mambo kuji bintu bisatu bishimuna bukamonyi: 8 mupashi+ ne mema+ ne mashi;+ kabiji bino byonse bisatu byayila mumo.
9 Umvwe twaswa kushimuna kwa bantu, kushimuna kwa Lesa kwakilapo. Mambo kushimuna kwa Lesa ko kuno, kushimuna ko ashimuna Mwananji. 10 Muntu waitabila mu Mwana Lesa uji na bukamonyi mwi aye mwine. Muntu ubula kwitabila mwi Lesa wamwalula ke wa bubela,+ mambo kechi waitabila kushimuna kwa Lesa pa mambo a Mwananji ne. 11 Kabiji kushimuna kwanji ko ko kuno amba, Lesa witupele bumi bwa myaka ne myaka,+ ne buno bumi buji mu Mwananji.+ 12 Awa uswa Mwana, uji na buno bumi; awa ukana Mwana Lesa, kechi uji na buno bumi ne.+
13 Amiwa nemunembela bino bintu anweba mwaitabila mu jizhina ja Mwana Lesa,+ kuba’mba mwikale na bumi bwa myaka ne myaka.+ 14 Kabiji luno lo luketekelo* lo tuji nalo mwi aye+ amba kintu kyonse kyo twakonsha kumulomba mwayila kyaswa muchima wanji, aye witumvwa.+ 15 Kabiji inge twayuka’mba witumvwa pa mambo a kintu kyonse kyo tulomba, twayuka’mba tukatambula bintu byo twamulomba, byo kiji kuba’mba twibilomba kwi aye.+
16 Umvwe muntu wamona mulongo wanji na kulenga mambo abula kuleta lufu, wafwainwa kumulombelako ne Lesa* ukamupa bumi.+ Buno bumi bupanwatu ku boba babula kulenga mambo aleta lufu. Kuji mambo aleta lufu.+ Kechi namubuula awa muntu kulombelako muntu walenga mambo aleta lufu ne. 17 Byubilo byonse byabula koloka bo bundengamambo,+ bino kuji mambo abula kuleta lufu.
18 Twayuka’mba muntu yense wasemwa kwi Lesa kechi ulengalenga mambo ne, bino awa wasemwa kwi Lesa* umulama, kabiji mubi kechi wakonsha kumuba kintu nangwa kimo ne.+ 19 Twayuka’mba twi ba kwa Lesa, pakuba pano pa ntanda ponse paji mu bulume bwa kwa aye mubi.+ 20 Bino twayuka’mba Mwana Lesa waiya,+ kabiji witupa maana pa kuba’mba tuyuke bulongo awa wa kine. Kabiji twakwatankana ne aye wa kine+ kupichila mwi Mwananji Yesu Kilishitu. Uno ye Lesa wa kine kabiji ye upana bumi bwa myaka ne myaka.+ 21 Anweba baana, chinuzhukainga kupopwela bankishi.+