Mepuzho Kufuma ku Batanga
Nanchi Muzhilo wa Lesa uji mu Yelemiya 7:16 ulumbulula’mba bena Kilishitu kechi bafwainwa kulombelako muntu wapangiwa mukipwilo kyabwina Kilishitu mambo akuba’mba ndengamambo wabula kulapila nenyi?
Panyuma yakuzhachisha bena Yuda babujile bukishinka, Yehoba waambijile Yelemiya amba: “Kechi wibalombele bano bantu ne, nangwa kusansula jiwi ja kwibajijilako ne, nangwa ja kwibalombelako ne, nangwa kunsashijila amiwa ne, mambo kechi nkakumvwe ne.”—Yelemiya 7:16.
Mamboka Yehoba oakanyishe Yelemiya kulombelako bena Isalela? Wamukanyishe mambo bakijishemo kuzhilulula Mizhilo yanji. ‘Baibilenga, kwipayañana, kuba bukende, kuchipa bubela, kusoka byakufutumuna kwi Baela, nekongolokela ku balesa bangi,’ luntunanwatu kumvwa nebumvune. Namambo abino byubilo byabo, Yehoba wabujile bano Bayudea babujile lwitabilo amba: “Amiwa nkemutaya ne kwimufumya ku meso ami, byonka byo nebatayile balongo benu bonse, bo bonse ba mu kisaka kya Efelaimu.” Kyakine, kechi kyafwainwe kuwama Yelemiya, nangwatu uji yense, kulomba Yehoba amba ekileke kwibakabishane.—Yelemiya 7:9, 15.
Mutumwa Yoano wanembelepo byambo bimo pamambo alulombelo lwafwainwa kwi Lesa. Patanshi wabujile bena Kilishitu’mba: “Umvwe twalomba kintu, nangwa ki ka, mwayila muchima wanji, aye witumvwa.” (1 Yoano 5:14) Kepo mukulombelako bakwetu, Yoano waambile’mba: “Umvwe muntu wamona mulongo wanji kasa alenga mambo a kubula kuleta lufu; ukalomba, ne aye Lesa ukamupa bumi bwa abo balenga mambo a kubula kuleta lufu. Ko aji mambo aleta lufu: kechi na ao o naamba namba, akalombe ne.” (1 Yoano 5:16) Yesu naye waambilepo pabubi bubula ‘kulekelwa,’ buno ke bubi bwakuba mwenga mupashi wazhila.—Mateo 12:31, 32.
Nanchi kino kilumbulula’mba aba bonse bapangiwa mukipwilo kyabwina Kilishitu balenga mambo kwakubula kulapila, balenga mambo aleta lufu afwainwa kubula kwibalombelakonenyi? Kechi byobyo kijine, namambo akuba, mambo amo kechi ekala mambo aleta lufune. Kwambatu kishinka, kyakatazha bingi kuyuka amba awo mambo umvwe byobyoaji. Wakumwenako mukino ke Mfumu Manase wa Yuda. Washimikile byakusokelapo bitapisho byabalesa babubela nekutapisha baana banji babalume bakwisemena, wapopwejilenga mipashi, nekutula bankishi bakusonga munzubo ya Yehoba. Baibolo yamba nekuba’mba Manase nebantu baubilenga “byabipisha kukila byo yaubilenga mikoka yo aonawine Yehoba ku meso a bena Isalela.” Namambo akino, Yehoba wamukabishe Manase nekumutwala mubuzha ku Babilona kasa bamukasa mashimbi.—2 Bamfumu 21:1-9; 2 Byambo bya Moba 33:1-11.
Nangwa kyakuba bubi bwakwa Manase bwabaile, nanchi bwajinga bobwa buleta lufunyi? Kimweka nobe kechi ibyone, mambo byambo byamba’mba: “Pakuba byo amwene bya malwa wasashijilenga Yehoba Lesa wanji, ne kwipelula kya kine kine ku meso a Lesa wa bashakulu banji. Kabiji wamulombele; kepo Lesa aitabile kusashijila kwanji ne kumvwa lulombelo lwanji ne kumubwezha wamubwezhezhe ku Yelusalema mu bufumu bwanji. Kabiji ponkapo Manase wayukile’mba: Yehoba ye Lesa.”—2 Byambo bya Moba 33:12, 13.
Onkao mambo, kechi kyawama bukiji-bukiji ponkapotu kwamba’mba muntu walenga mambo aleta lufu, mambo akuba wapangiwa mukipwilone. Kimo kimye pabanda bingi pakubatu’mba byubilo byamumuchima wamuntu biyukanyikwe. Javula nkebelo imo yakupangila muntu mukipwilo keyakukwasha yewa walenga mambo amba alubuluke muchima nekulapila nekuleka byubilo byanji byabipa.
Awe muntu byoabula mukipwilo, bantu batanshi bakonsha kuyuka byoabena kwaluluka mumuchima nekupimpula bwikalo bwanji kebalongo banji nabiji mukwabo wamumasongola nangwa mulongo wanjitu mukwabo mukisemi. Aba babena kumona uno muntu bakonsha kulanguluka’mba awe muntu kechi walengele mambo aleta lufune. Kimo kimye bakonsha nekumulombelako amba Byambo bya Lesa byanembeshiwa bimukoseshe nekulomba kuba’mba Yehoba engile kuyewo ndengamambo monka mwayila kyaswa muchima Wanji.—Masalamo 44:21; Musapwishi 12:14.
Nangwa kyakuba bamo bakonsha kumona biyukilo byakuyukilako’mba muntu walapila, kechi kilumbulula’mba bonse byobyo bekimonane. Bakonsha kukumya, kukatazhiwa nekwibatuntwisha umvwe baumvwa umo kalombeleko ndengamambo pamvula-bantu. Namambo akino, aba bekimona kuba’mba bakonsha kulombelako yewo muntu walenga mambo bakonsha kumulombelako kumbaji, nekushila byonse mu maboko abakulumpe mukipwilo babena kutala paoo mambo.
[Caption on page 30]
Manase bamulekejileko bubi bwanji bukatampe byoepelwile mwine kwi Yehoba
[Picture credit line on page 29]
Kyakopwa jibiji kufuma mu Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s