Nanchi Mwamulenga Mambo Mupashi Wazhila Nyi?
“Ko aji mambo aleta lufu.”—1 YOANO 5:16.
1, 2. Twayuka byepi kuba’mba muntu wakonsha kumulenga mambo mupashi wazhila wa Lesa?
“NELANGULUSHA bingi ne kwizhachisha mu muchima kuba’mba namulengele mambo mupashi wazhila.” Bino byo byanembele mwanamukazhi umo mu Germany, nangwa kya kuba wakitwajijile na kwingijila Lesa. Nanchi mwina Kilishitu kine wakonsha kumulenga mambo mupashi wazhila, nangwa’mba ngovu ya Lesa nyi?
2 Ee, muntu wakonsha kumulenga mambo mupashi wazhila wa Yehoba. Yesu waambile’mba: “Mambo onse ne mwenga yense bikebalekelwa bantu; pakuba kumuba mwenga mupashi kechi kukebalekelwa ne.” (Mateo 12:31) Betujimunako amba: ‘Umvwe twalenga mambo a mu lupata byo twatambula kala maana a bukine, kechi kwakishala kitapisho kikwabo kya mambo ne, poso luketekelo luleta moyo lwa kuketekela luzhachisho.’ (Bahebelu 10:26, 27) Kabiji mutumwa Yoano wanembele’mba: “Ko aji mambo aleta lufu.” (1 Yoano 5:16) Pano bino nanchi kino kibena kulumbulula amba muntu walenga mambo akatampe mwine ye wakonsha kuyuka’mba walenga “mambo aleta lufu” nyi?
Lulapilo Lufumya Muntu mu Mambo
3. Kumvwa ku muchima kutama amba twalenga mambo kumwesha ka?
3 Yehoba ye mwine Mutonyi uchiba mambo a bangubabibi. Atweba bonse tukeambila mambo kwi Yehoba, kabiji aye uba byaoloka kimye kyonse. (Ntendekelo 18:25; Loma 14:12) Yehoba ye uyuka kana twalenga mambo a kubula kulekelwa nangwa ne, kabiji ye wakonsha ne kwitwangata mupashi wanji. (Salamo 51:11) Bino, umvwe twaumvwa ku muchima kutama amba twalenga mambo, kino kimwesha kuba’mba twalapila kya kine. Nanchi lulapilo lwa kine lo lu ka?
4. (a) Nanchi lulapilo lo lu ka? (b) Mambo ka byambo bya mu Salamo 103:10-14 kyo byaikela bya lutekenesho?
4 Lulapilo lulumbulula kupimpula ne kusha byubilo byetu byatama nangwa’mba kubula kuba bintu byatama byo tubakebenga kuba. Kilumbulula kuba’mba twaumvwa ku muchima kutama pa kintu kyo twaubile kabiji twaja nyenye ne kwikisankilapo. Umvwe twalenga mambo a bulala, pano bino twalondela mashinda afwainwa amwesha’mba twalapila ne kwaluluka kya kine, twakonsha kutekeneshiwa na byambo bya nyimbi wa masalamo bya kuba’mba: ‘[Yehoba] kechi witubila monka mwafwainwa mambo etu ne, Nangwa kwitufweta monka mwayila bibi byetu ne. Mambo jiulu byo jiji kwalepesha na ntanda, Byo biji ne bukata bwa lusa lwanji kwi boba bamwakamwa. Monka mwalepela kufuma ku musela ne kufika ku muzhika, Mo monka mo aabenya mizhilulwila yetu ne atweba. Shabo monka mo ebobila lusa baana banji, Mo monka ne Yehoba naye wibobila lusa bamwakamwa. Mambo aye wayuka mibiji yetu byo iji; Aye uvuluka’mba, bo ba lukungu.’—Salamo 103:10-14.
5, 6. Ambai kishinka kiji mu 1 Yoano 3:19-22, ne kulumbulula mwatala byambo bya mutumwa.
5 Lutekenesho lukwabo ke byambo bya mutumwa Yoano bya kuba’mba: ‘Monka muno mo tukayukila namba, twi ba bukine, ne kwikosesha michima yetu ku meso anji monse monse mo ituzhachisha michima yetu, mambo Lesa ye wakila michima yetu, ne kuyuka wayuka byonse. Anweba batemwe, umvwe michima yetu kwituzhachisha ne, twaikala na kuchinchika kuji Lesa nangwa’mba kukasuluka pa kwisamba ne aye; kabiji byonse byo tulomba tutambula kwi aye, mambo tulama mikambizho yanji ne kuba byonka byawama ku meso anji.’—1 Yoano 3:19-22.
6 ‘Twayuka namba, twi ba bukine’ mambo tumwesha butemwe bwa kutemwa balongo kabiji kechi tulengalengatu mambo ne. (Salamo 119:11) Umvwe michima yetu ibena kwituzhachisha pa mambo a bintu bimo, twafwainwa kuvulukanga kuba’mba “Lesa ye wakila michima yetu, ne kuyuka wayuka byonse.” Yehoba witubila lusa mambo wayuka “butemwe bwa kine bwa kutemwa balongo,” bulwi bwetu bwa bundengamambo, ne byo twibikako kuba kyaswa muchima wanji. (1 Petelo 1:22) Muchima wetu ‘kechi uketuzhachisha’ ne, umvwe twaketekela mwi Yehoba, twatemwa balongo, ne kubula kulengelamotu mambo kya nshiji. ‘Tukasuluka pa kwisamba ne Lesa’ mu lulombelo, kabiji witukumbula mambo tulama mikambizho yanji.
Bya Kumwenako bya Bantu Bamulengele Mambo Mupashi
7. Ki ka kimwesha kana mambo alenga muntu akonsha kulekelwa nangwa ne?
7 Ñanyi mambo abula kulekelwa? Pa kuba’mba tukumbule buno bwipuzho, twayai twisambepo bya kumwenako bimo bya mu Baibolo. Bino byakonsha kwitutekenesha umvwe twalapila nangwa kya kuba muchima ukituzhachisha pa mambo o twalenga. Twafwainwa kuyuka’mba kubaya kwa mambo kechi ko kumwesha kuba’mba muntu walenga mambo a kubula kulekelwa ne; bino ke kintu kyalengela kuba’mba tulenge mambo, muchima byo aji, ne nshiji yaubiwa pa kulenga mambo byo bimwesha umvwe ao mambo akonsha kulekelwa nangwa ne.
8. Bantangi ba bupopweshi bwa Bayudea ba mu kitota kya myaka kitanshi bamunenene byepi mupashi wazhila?
8 Bantangi ba bupopweshi bwa Bayudea bajingako mu kitota kya myaka kitanshi balengulwile Yesu Kilishitu ne kumuba nshiji, bamulengele mambo mupashi wazhila. Bayukile kuba’mba Yesu wajinga na mupashi wa Lesa byo aubile bya kukumya byalengejile kuba’mba Yehoba anemekwe. Pano bino, bano balwanyi ba kwa Kilishitu baambile’mba abwa bwaji bulume bwa kwa Satana Diabola. Kwesakana na byaambile Yesu, aba bamunenene bibi mupashi wazhila wa Lesa balengele mambo akabula kulekelwa “nangwa mu yino myaka, nangwa mu myaka ikeya” ne.—Mateo 12:22-32.
9. Mwenga ye mu ka, kabiji Yesu waambilepo’mba ka?
9 Mwenga ke kubabañana, kunenañana, nangwa’mba ñambilo yatama. Pakuba mupashi wazhila byo aji bulume bwa Lesa, umvwe muntu wamunena bibi, ko kuba’mba ubena kunena Yehoba. Muntu uji na mwenga wa uno mutundu, ubula kulapila kechi ukalekelwa mambo ne. Kintu kyalengejile Yesu kwamba pa mambo abula kulekelwa kimwesha kuba’mba Yesu watelelenga boba bantu balengulwilamotu kya nshiji bingila mupashi wazhila wa Lesa. Bafaliseo byo bamwene kuba’mba Yesu wajinga na mupashi wa Yehoba, bino abo amba buno ke bulume bwa Diabola, kyamwesheshe kuba’mba bamunenene bibi mupashi. Onkao mambo Yesu waambile’mba: “Aye ukamuba mwenga mupashi wazhila, mambo anji kechi akamulekelwe myaka yonse ne, mambo walenga mambo a myaka.”—Mako 3:20-29.
10. Mambo ka Yesu kyo atelejile Yudasa amba “mwana wa lonaiko”?
10 Kabiji monai ne kya kumwenako kya kwa Yudasa Isakaliota. Kechi wajinga na bukishinka ne, mambo waibilenga mali mu fukuta ye apewe kulama. (Yoano 12:5, 6) Kyapeleleko Yudasa wayile ku bantangi ba Bayudea ne kumupotesha Yesu na ndalama makumi asatu. Kine muchima wamuzhachishishe Yudasa panyuma ya kusolola Yesu, pano bino kechi walapijile pa mambo anji o alengele kya nshiji ne. Onkao mambo, Yudasa kechi wafwainwa kusangulwa ne. Kyo kine kintu Yesu kyo amutelejile’mba “mwana wa lonaiko.”—Yoano 17:12; Mateo 26:14-16.
Bya Kumwenako bya Bantu Babujile Kumulenga Mambo Mupashi
11-13. Mfumu Davida walengele byepi mambo na Batesheba, kabiji ñanyi lutekenesho lo tufunda mu byo achibile mambo Lesa?
11 Kimye kimo bena Kilishitu balapila pa mambo abo a bulala o balengele kabiji bo bakwashapo kala ku bakulumpe mu kipwilo kuba’mba batwajijile kwikala bakosa ku mupashi, bakonsha kuba saka balangulukatu pa mambo o balengele a kulala muzhilo wa Lesa. (Yakoba 5:14) Umvwe tubena kuyanda na mulanguluko wa uno mutundu, twakonsha kutekeneshiwa pa kufunda Binembelo byo byaamba pa bantu balengelepo mambo ne kulekelwa.
12 Mfumu Davida walengele mambo a bulala na muka Uliya, aye Batesheba. Davida byo ajinga peulu ya mutenge wa nzubo, wamwene uno mwanamukazhi walambile bingi saka owa. Kepo atumine muluwe na kumuleta ne kuba nanji bukende. Byo bamubujile kuba’mba Batesheba waimita, wakebelepo jishinda jimo ja kuba’mba Uliya alaajilemo na mukazhanji kuchina kyakayukanyikwa amba waubile bukende. Mfumu byo amwene kuba’mba jino jishinda kechi jaingila ne, wanengezhezhe kuba’mba Uliya epaiwe ku nkondo. Panyuma ya bino, Batesheba waikajile ke mukazhanji Davida kabiji wasemene ne mwana waishile kufwa.—2 Samwela 11:1-27.
13 Yehoba wachibile mambo alengele Davida ne Batesheba. Lesa wamulekejileko mambo Davida, na mambo a kuba walapijile, ne na mambo a lulayañano lwa Bufumu lo alayañene nanji. (2 Samwela 7:11-16; 12:7-14) Batesheba nanji walapijile, kabiji wajinga na jishuko ja kwikala inanja Mfumu Solomone ne kwikala kakolwe mwaishile kusemenwa Yesu Kilishitu. (Mateo 1:1, 6, 16) Umvwe ne atweba twalenga mambo, kyawama bingi kuvuluka kuba’mba Yehoba umona inge kya kuba twamwesha lulapilo nangwa ne.
14. Lulekelo lwa mambo lwamweshiwe byepi mu jishinda Lesa jo achibijilemo mambo a kwa Mfumu Manase?
14 Lulekelo lwa mambo lwamweshiwe ne mu jishinda Yehoba jo achibijilemo mambo a kwa Manase Mfumu wa bena Yuda. Manase waubilenga byatama ku meso a Yehoba. Washimikile bya kusokelapo bya kwa Baela, wapopwejile “byonse bya mwiulu,” kabiji mu bipango bibiji bya ku nzubo ya Lesa washimikilemo bya kusokelapo bya balesa ba bubela. Wasokele baana banji ba balume ke mulambo wa kusoka, waubilenga ne bya buñanga, kabiji waongwele bena Yuda ne baikajilenga mu Yelusalema, “kya kuba’mba baubilenga byabipisha kukila byo yaubilenga mikoka yo aonawine Yehoba ku meso a bena Isalela.” Kechi baumvwijile lujimuno lwibajimwinenga bañanga ba Lesa ne. Kyapeleleko, Manase bamukwachile ne kumusenda ke muzha kwi mfumu wa Asilya. Byo akijinga monka buzha, Manase walapijile kabiji wipelwile ne kulomba kwi Lesa. Lesa wamulekejileko mambo ne kumubwezha pa bufumu mu Yelusalema, kabiji wabwelele katundaike mpopwelo ya kine.—2 Byambo bya Moba 33:2-17.
15. Ki ka kyamwekejile mutumwa Petelo mu bwikalo bwanji kimwesha kuba’mba Yehoba ulekelako mambo “onsetu”?
15 Pa kupitapo myaka yavula, mutumwa Petelo walengele mambo a bulala pa kumukana Yesu. (Mako 14:30, 66-72) Bino, Yehoba wamulekejileko “mambo anji onsetu” Petelo. (Isaya 55:7) Mambo ka? Mambo Petelo walapijile kya kine. (Luka 22:62) Kyamweshiwatu patoka kuba’mba Petelo bamulekejileko mambo kwi Lesa, mambo byo papichile moba makumi atanu, wajinga na jishuko pa juba ja Pentekosita ja kusapwila na mukoyo pa mambo a Yesu. (Byubilo 2:14-36) Nanchi ano moba Lesa kuba walekelako mambo bena Kilishitu balapila kya kine nenyi? Nyimbi wa masalamo waimbile’mba: “Anweba Yehoba, inge mwaji mulondalonda kulenga-mambo kwetu, Anweba Nkambo, inge ñanyi ukakonsha kupuluka? Pakuba kwi anweba ko kuji lulekelo lwa mambo.”—Salamo 130:3, 4.
Kubula Kwikala na Moyo wa Kuba’mba Twamulenga Mambo Mupashi Wazhila
16. Mu ñanyi mashinda Lesa mo etulekelako mambo?
16 Bya kumwenako byaambiwapo kala byafwainwa kwitukwasha kubula kubambisha michima na mambo a kulenga mambo mupashi wazhila. Bino byamwesha kuba’mba Yehoba ulekelako mambo bandengamambo balapila. Kintu kimo kyanema ke kulomba kwi Lesa na mukoyo. Umvwe twalenga mambo, twafwainwa kulomba lulekelo lwa mambo kupichila mu kitapisho kya bukuzhi bwa kwa Yesu, lusa lwa Yehoba, bundengamambo bwetu bo twaswana, ne mwingilo wetu ye twaingila mu bukishinka. Umvwe twayuka kuba’mba Yehoba uji bingi na lusa, twakonsha kulomba lulekelo lwa mambo ne kuketekela kuba’mba uketulekelako mambo etu.—Efisesa 1:7.
17. Twafwainwa kuba byepi umvwe twalenga mambo kabiji tubena kukeba bukwasho ku mupashi?
17 Twakonsha kuba byepi umvwe twalenga mambo, pano twakankalwa kulomba na mambo a kuba’mba ano mambo etulengela kukolwa ku mupashi? Mwana wa bwanga Yakoba waambapo pa kino byo anembele’mba: “[Uno muntu] ete bakulumpe ba mu kipwilo; bamulombele ne kumushinga manyi mu jizhina ja Nkambo: kabiji lulombelo lwa lwitabilo lukamupulusha aye ukolwa, ne Nkambo ukamubusha; kabiji umvwe walengele mambo akamulekelwa.”—Yakoba 5:14, 15.
18. Ki ka muntu walenga mambo kya kuba wapangiwa ne mu kipwilo kyo akonsha kulekelwa mambo?
18 Umvwe muntu walenga mambo ne kulapila ne, kabiji wabwela wapangiwa mu kipwilo, kechi kilumbulula’mba walenga mambo a kubula kulekelwa ne. Mutumwa Paulo wanembele kutazha ku mushingwa ngubabibi wapangiwe mu Kolinda amba: “Muntu wa byonkabyo lwamuwaina lonkalwa lukabisho lo atambula ku babula; onkao mambo pano mwafwainwa kumulekela mambo ne kumukwasha, kuchina’mba, wa byonkabyo wakafwijijila na bulanda bwavula.” (2 Kolinda 2:6-8; 1 Kolinda 5:1-5) Bino muntu walenga mambo pa kuba’mba akoseshe bumupashi bwanji, wafwainwa kulondela bukwasho bwa ku mupashi bwa mu Baibolo kufuma ku bakulumpe mu kipwilo kya bwina Kilishitu, ne kumwesha lulapilo lwa kine. Wafwainwa ‘kupanga bipangwa byafwainwa lulapilo.’—Luka 3:8.
19. Ki ka kyakonsha kwitukwasha kutwajijila kwikala “balumbuluka mu lwitabilo”?
19 Ki ka kyakonsha kwitulengela kulanguluka amba twamulenga mambo mupashi wazhila? Kubula kwikala na butuntulu bwa mubiji bwawama ne kuyanjishiwa na milanguluko. Umvwe kyaikala bino, kyawama kulomba ne kukokolokako. Kikatakata kechi twafwainwa kuleka Satana kwitulefula kya kuba twaleka ne kwingijila Lesa ne. Yehoba byo abula kusangalela mu lufu lwa mubi, ko kuba’mba kechi utemwa kumona bantu banji saka baya mu jishinda jingi ne. Onkao mambo, umvwe ketulanguluke kuba’mba twamulenga mambo mupashi, twafwainwa kutwajijilatu na kuja kajo ka mu Mambo a Lesa, kuvwangakotu ne byambo bya lutekenesho biji mu Masalamo. Twafwainwa kutwajijila na kutanwa ku kupwila ne mu mwingilo wa kusapwila pa mambo a Bufumu. Kuba bino kuketukwasha kwikala “balumbuluka mu lwitabilo” kabiji kechi tukabambisha michima yetu ne kulanguluka kuba’mba twalenga mambo a kubula kulekelwa ne.—Titusa 2:2.
20. Ki ka kyakonsha kukwasha muntu kumona amba kechi wamulenga mambo mupashi wazhila ne?
20 Muntu yense ulanguluka kuba’mba wamulenga mambo mupashi wazhila wakonsha kwishikisha’mba: ‘Nanchi namulenga mambo mupashi wazhila nyi? Byo nalapila pa mambo o nalengele, abya nkilanguluka amba kechi nalapila nenyi? Nanchi nji na lwitabilo mu lulekelo lwa mambo lwa Lesa nyi? Abya ne muntu wabula kulapila kabiji wasenduka mu lwitabilo wakana kyeya kya ku mupashi nyi?’ Umvwe muntu wiipuzha bino, kampe wakonsha kutana amba kechi wamulenga mambo mupashi wazhila wa Lesa, nangwa kusenduka mu lwitabilo ne. Walapila kabiji uji na lwitabilo mu lulekelo lwa mambo lwa Yehoba. Umvwe ibyo, ko kuba’mba kechi wamulenga mambo mupashi wazhila wa Yehoba ne.
21. Ñanyi mepuzho akambiwapo mu mutwe walondelapo?
21 Byo kyawamapo kuyuka kuba’mba kechi twamulenga mambo mupashi wazhila ne! Mepuzho amo aamba pa mambo a mupashi wazhila aambiwapo mu mutwe walondelapo. Kya kumwenako, twakonsha kwishikisha’mba: ‘Nanchi mbena kutangijilwa na mupashi wazhila wa Lesa nyi? Abya mbena kumwesha bipangwa bya mupashi mu bwikalo bwami nyi?’
Musakukumbula’mba Ka?
• Mambo ka o twakonsha kwambila’mba kyakonsheka kumulenga mambo mupashi wazhila?
• Nanchi lulapilo lo lu ka?
• Bañanyi bamulengele mambo mupashi kimye Yesu kyo ajinga panopantanda?
• Ki ka kyakonsha kwitukwasha kubula kulanguluka’mba twalenga mambo a kubula kulekelwa?
[Kipikichala pa peja 8]
Nangwa kya kuba Petelo wamukaine Yesu, kechi walengele mambo a kubula kulekelwa ne