BUKU MUTANSHI WA SAMWELA

1 Kwajinga mwanamulume waikalanga mu Lamataimu-zofimu*+ mu kibunji kya mitumba kya Efelaimu+ jizhina janji wajinga Elekana,+ mwana wa kwa Yelohama, Yelohama mwana wa kwa Elihu, Elihu mwana wa kwa Tohu, Tohu mwana wa kwa Zufi, mwina Efelaimu. 2 Wasongwele banabakazhi babiji; jizhina ja umo wajinga Hana ne mukwabo wajinga Penina. Penina wajinga na baana, bino Hana kechi wasemenepo baana ne. 3 Uno mwanamulume wafumanga mu muzhi mo aikalanga, wayanga ku Shilo pa mwaka pa mwaka na kupopwela* ne kutapisha bitapisho kwi Yehoba wa mabumba.+ Akwa ko kwaingijilanga baana ba kwa Eli babiji ba Hofini ne Finease+ mwingilo wa buñanga kwi Yehoba.+

4 Juba jimo Elekana byo atapishenga kitapisho, wapelepo Penina mukazhanji ne baana banji bonse ba balume ne ba bakazhi bitumba,+ 5 bino Hana wamupeletu kitumba kimo kyawamisha, mambo Hana ye ye atemenwe bingi; bino Yehoba kechi wamupelepo baana* ne. 6 Kabiji mpaji nanji wamwendelekangatu kimye kyonse, pa kuba’mba amuzhingijishe mambo Yehoba kechi wapelepo Hana baana ne. 7 Abino byo byo aubanga pa mwaka pa mwaka; kimye kyonse Hana kyo ayanga ku nzubo ya Yehoba,+ mpaji nanji wamwendelekanga bingi kya kuba Hana waendangatu na kujila ne kuja ne. 8 Bino mwatawanji aye Elekana wamwambijile’mba: “Hana, mambo ka o ubena kujijila, mambo ka o ubena kubujila kuja, kabiji mambo ka o waikela na bulanda?* Nanchi amiwa kechi nawama kwi obewa kukila baana ba balume jikumi nenyi?”

9 Byo bapwishishe kuja ne kutoma mu Shilo, Hana waimene. Pa kyokya kimye, Eli ñanga saka aikala pa kipona kwipi na jishiki ja kibelo kya nzubo*+ ya Yehoba. 10 Hana wajinga na bulanda* bukatampe, kabiji watatwile kulomba kwi Yehoba+ ne kujila bingi. 11 Kabiji wachipile luno luchipo amba: “Anweba Yehoba wa mabumba, inge mumone lumanamo lwami amiwa wa mwingilo wenu ne kumvuluka, kabiji mwabula kundubako amiwa wa mwingilo wenu ne kumpa mwana wa mulume amiwa wa mwingilo wenu,+ ne amiwa nkamupana kwi anweba Yehoba moba onse a bumi bwanji, kabiji kechi bakamutendapo nsuki ne.”+

12 Byo alombelenga kwi Yehoba pa kimye kyabaya, Eli wamutajilengatu pa kanwa. 13 Hana waambijilenga mu muchima, byatunwa byanji byo byavwevwetelengatu, bino jiwi janji kechi jaumvwanyikilenga ne. Onkao mambo, Eli walangulukile’mba wapendwa. 14 Eli wamwambijile’mba: “Ñanyi kimye kyo ukaleka kupendwa? Kileke kutoma binyu.” 15 Ponkapo Hana wakumbwile’mba: “Ine, nkambo! Amiwa nemwanamukazhi uji na bulanda bukatampe; kechi natoma binyu nangwa bintu bipendañana ne, bino mbena kubuula Yehoba bintu byonse biji ku muchima wami.+ 16 Kange mummone amiwa wa mwingilo wenu amba nemwanamukazhi watutu ne, mambo naji kwambangatu kufika ne luno na mambo a binyenge bikatampe ne bulanda bonji nabo.” 17 Kepo Eli amwambijile’mba: “Yanga mu mutende, kabiji Lesa wa Isalela akupe kintu kyo waji kumulomba.”+ 18 Ne aye waambile’mba: “Mwane twajijilai kumubila lusa wa mwingilo wenu.” Kabiji uno mwanamukazhi wayile ne kuja wajiile, ne kilungi kyanji kechi kyaubilepo bulanda jibiji ne.

19 Kepo babuukile lukelokelo ne kufukama kwi Yehoba, byo bapwishishe, babwelele ku nzubo yabo ku Lama.+ Elekana walaajile na mukazhanji Hana, kabiji Yehoba wamutelekele.*+ 20 Mu mwakatu* umo, Hana waimichile ne kusema mwana wa mulume ne kumutumba’mba+ Samwela,* mambo waambile’mba, “namulombele kwi Yehoba.”

21 Mu kuya kwa moba, Elekana wayile na ba mu nzubo yanji bonse na kutapisha kitapisho kya pa mwaka pa mwaka kwi Yehoba+ ne kupana mulambo wanji wa luchipo. 22 Pakuba Hana kechi wayileko ne,+ mambo waambijile mwatawanji amba: “Mwana byo akasumukatu, nkamuleta; po po akamweka kwi Yehoba, kabiji kufumatu kyokyo kimye ukekalanga konkakwa.”+ 23 Kepo mwatawanji aye Elekana amwambijile’mba: “Uba kyakuwamina.* Ikalanga pa nzubo kufikatu ne byo ukamusumuna. Yehoba afikizhe kyo waamba.” Byonkabyo, uno mwanamukazhi waikelenga pa nzubo saka amisha mwananji kufikatu ne byo amusumwine.

24 Byo amusumwinetu, wamutwajile ku Shilo, pamo na ñombe wa myaka isatu, bunga bwa kipimo kya efa* umo ne mulondo mukatampe wa binyu,+ kabiji wafikile ku nzubo ya Yehoba mu Shilo+ pamo na uno kalombwana. 25 Kepo baipayile ñombe ne kuleta uno kalombwana kwi Eli. 26 Ponkapo uno mwanamukazhi waambile’mba: “Anweba nkambo yami, monka mo mwaikela na bumi,* yami mwanamukazhi waimene mu ino mpunzha na kulomba kwi Yehoba.+ 27 Uno kalombwana ye ye nalombele, ne Yehoba wampele kintu kyo namulombele.+ 28 Ne amiwa pano namwashimisha kwi Yehoba. Mu moba anji onse, namwashimisha kwi Yehoba.”

Kabiji aye* wafukamine kwi Yehoba konkakwa.

2 Kabiji Hana walombele’mba:

11 Kabiji Elekana wabwelele ku nzubo yanji ku Lama, bino kalombwana waikele ke wa mwingilo* wa Yehoba,+ saka bamutangijila kwi Eli ñanga.

12 Baana ba kwa Eli batamine bingi;+ kechi bamunemekele Yehoba ne. 13 Abino byo byo baubanga ku bantu kwingijisha luusa lwabo lwa buñanga:+ Inge muntu watapisha kitapisho, kalume wa kwa ñanga wasendanga foloko wajinga na meno asatu kimye nyama saka iji pa mujilo, 14 kabiji watwezhanga foloko mu mpuki, mu mpuki ya mikota ibiji, mu mwipika mukatampe nangwa mu mpuki ya mukota umo. Nyama yonse yo ashikulanga na foloko yaikalanga ya kwa ñanga. Abino byo byo baubanga mu Shilo ku bena Isalela bonse baiyanga kokwa. 15 Kabiji nangwatu muntu ubena kutapisha saka akyangye kusoka mafuta,+ kalume wa kwa ñanga waiyanga ne kumwambila’mba: “Papo ñanga nyama kuba’mba oshe, aye kechi usakutambula nyama ya kuteka kwi obewa ne, ubena kukebatu ibishi.” 16 Inge muntu wamwambila’mba: “Patanshi bakisoke mafuta,+ apa bino mushikulepo byo mubena kukeba,”* aye wamwambilanga’mba: “Ine, mpe lonka luno; mambo inge ne, nsakukwangata!” 17 Onkao mambo, bubi bwa bano bakalume bwabayile bingi kwi Yehoba,+ mambo bano banabalume kechi banemekele milambo ya Yehoba ne.

18 Samwela waingijilanga+ Yehoba, saka avwala* kajilaya kabula maboko ka kisapi kya linenyi+ nangwa kya kuba wajingatu kalombwana. 19 Kabiji inanji wamusonenanga kamukangyo kabula maboko, ne kumuletela pa mwaka pa mwaka kimye kyo aiyanga na mwatawanji na kutapisha kitapisho kya pa mwaka pa mwaka.+ 20 Kabiji Eli wapesheshe Elekana ne mukazhanji amba: “Yehoba akupe mwana mu uno mukazhobe ukapingakena pa uno ye wapana kwi Yehoba.”+ Ne abo babwelelemo kwabo. 21 Kabiji Yehoba wamubijile bibusa Hana, kya kuba ne aye waimichilenga;+ kabiji wasemene baana ba balume bakwabo basatu ne baana ba bakazhi babiji. Kabiji kalombwana aye Samwela wakomenenga saka bamubila bibusa kwi Yehoba.+

22 Eli wakotele bingi, kabiji waumvwinenga bintu byonse byaubilenga baana banji ba balume+ ku bena Isalela bonse ne byo balaalanga na banabakazhi baingijilanga ku kibelo kya tente wa lusambakeno.+ 23 Aye wibambilanga baana banji amba: “Mambo ka o mubena kubila bino bintu? Mambo bintu byo mbena kumvwa pe anweba kufuma ku bantu bonse byatama. 24 Ine, baana bami, jashi jo mbena kumvwa mu bantu ba Yehoba kechi jawama ne. 25 Inge muntu walenga mukwabo mambo, muntu umo wakonsha kumulombelako kwi Yehoba;* bino inge muntu walenga Yehoba mambo,+ ñanyi wakonsha kumulombelako?” Pakuba abo bakaine kumvwina shabo, mambo Yehoba wafuukwilepo kwibepaya.+ 26 Nangwa byonkabyo, kalombwana Samwela wakomenenga mu kimino kabiji Yehoba ne bantu bamubijilenga bibusa.+

27 Muntu wa Lesa waishile kwi Eli ne kumwambila’mba: “Yehoba waamba’mba: ‘Nanchi kechi nesolwele patoka ku ba mu nzubo ya bashobe byo bakijinga bazha mu Ijipita mu nzubo ya kwa Felo nenyi?+ 28 Kabiji namusalulwile kufuma mu mikoka ya bena Isalela+ kwikala ñanga wami ne kuya ku kya kusokelapo bitapisho kyami+ na kutapisha bitapisho, kulambula bya kufutumuna,* ne kuvwala kajilaya kabula maboko ku meso ami; kabiji napele ba mu nzubo ya mushakulu wobe milambo yonse ya bena Isalela* ya kusoka pa mujilo.+ 29 Mambo ka anweba banabalume o mwabujila kunemeka* kitapisho ne mulambo wami ye nakambizhe mu mpunzha yami mwa kwikala?+ Mambo ka o unemekela baana bobe kukila amiwa ne kuja anwe bene byawamisha bifuma ku milambo ya bantu bami bena Isalela?+

30 “‘O ene mambo Yehoba Lesa wa Isalela o aambila’mba: “Kine naambile namba ba mu nzubo yobe ne ba mu nzubo ya mushakulu wobe bakañingijilanga kimye kyonse.”+ Pano Yehoba waamba’mba: “Kechi nakonsha kuba kino ne, mambo aba bannemeka nkebanemeka,+ bino aba bandengulula nkebalengesha bumvu.” 31 Umvwa! Moba abena kwiya o nkapwisha bulume* bobe ne bwa ba mu nzubo ya bashobe, pa kuba’mba mu nzubo yobe mukabule kwikala mukote nangwa umo ne.+ 32 Kabiji ukamona mulwanyi mu mpunzha yami ya kwikalamo, mukachi ka bintu byonse byawama byo bakobila bena Isalela,+ kabiji mu nzubo yobe kechi mukekalapo mukote jibiji ne. 33 Muntu wa mwi obewa ye nkashapo kuba’mba engijilenga ku kya kusokelapo bitapisho kyami ukalengela meso obe kuleka kumona ne kukuletela bulanda,* bino bavula ba mu nzubo yobe bakebepaya ku bantu na mpoko.+ 34 Kabiji kintu kikamwekela baana bobe babiji, Hofini ne Finease, kikekala ke kiyukilo kwi obewa: Bonse babiji bakafwatu juba jimo.+ 35 Kepo nkekebela ñanga wa kishinka.+ Aye ukobanga monka mwayila bisaka muchima wami;* kabiji nkamushimikila nzubo ya myaka, ne aye ukekala mushingwa wami kimye kyonse. 36 Yense ukashalapo pa ba mu nzubo yobe ukeya kwi aye ne kumufukamina kuba’mba engijile mali ne shinkwa ne kwamba’mba: “Mwane bantwezhe mwingilo wa buñanga pa kuba’mba njepo tukajo.”’”+

3 Kalombwana aye Samwela waingijilenga+ Yehoba saka bamutangijila kwi Eli, bino mu oa moba jiwi ja Yehoba kechi jaumvwanyikanga javula ne; kabiji bimwesho+ nabyo kechi byavujile ne.

2 Juba jimo Eli walaajile mo alaalanga kimye kyonse, ne pa meso panji pafiichile; kabiji kechi wamonanga ne.+ 3 Lampi wa Lesa+ wakiteemenenga, ne Samwela walaajile mu nzubo*+ ya Yehoba, mwajinga Jikwachi ja Lesa. 4 Kepo Yehoba amwichile Samwela. Ne aye waitabile’mba: “Mwane.” 5 Ponkapo wayile lubilo kwi Eli ne kumwambila’mba: “Amiwa bano, mambo mwaji kungita.” Bino aye wamwambijile’mba: “Kechi naji kukwita ne. Yanga kalaale.” Ne aye wayile na kulaala. 6 Yehoba wamwichile jibiji amba: “Samwela!” Ponkapo Samwela wabuukile ne kuya kwi Eli ne kumwambila’mba: “Amiwa bano, mambo mwaji kungita.” Bino aye wamwambijile’mba: “Mwanami, kechi naji kukwita ne. Bwela ukalaale.” 7 (Samwela kechi wakimuyukishe Yehoba ne, ne byambo bya Yehoba byaji bikyangye kusololwa kwi aye.)+ 8 Byonkabyo Yehoba wamwichile ja busatu amba: “Samwela!” Ponkapo wabuukile ne kuya kwi Eli ne kumwambila’mba: “Amiwa bano, mambo mwaji kungita.”

Kepo Eli ayukile’mba Yehoba ye ubena kumwita kalombwana. 9 Onkao mambo, Eli waambijile Samwela amba: “Yanga kalaale, inge akwite witabe’mba, ‘Mwane bambenga, anweba Yehoba, kalume wenu ubena kuteleka.’” Kabiji Samwela wayile na kulaala mo alaalanga.

10 Yehoba waishile ne kwimana konkakwa kabiji waichile byonkatu byo aichile bimye bikwabo amba: “Samwela, Samwela!” Ponkapo Samwela waitabile’mba: “Mwane bambenga, kalume wenu ubena kuteleka.” 11 Yehoba waambijile Samwela amba: “Umvwa! Nsakuba kintu mu Isalela kya kuba bonse bakekyumvwa kikebalengela kukankamanatu.*+ 12 Pa joja juba nkafikizha bintu byonse kwi Eli byo naambile pa mambo a ba mu nzubo yanji, kufumatu ku ntendekelo kufika ne ku mpelo.+ 13 Umubuule kuba’mba mbena kuleta luzhachisho lwa myaka pa ba mu nzubo yanji na mambo a bubi bo ayuka,+ mambo baana banji babena kunena Lesa,+ bino aye kechi wibakajipila ne.+ 14 O ene mambo o nachipila ku ba mu nzubo ya kwa Eli namba bubi bwa ba mu nzubo ya kwa Eli kechi bakebufuta na bitapisho nangwa na milambo ne.”+

15 Samwela walaajile poso ne byo bwakile; kepo ashinkwile binzhilo bya ku nzubo ya Yehoba. Samwela wachiine kumubuula Eli kimwesho. 16 Bino Eli waichile Samwela amba: “Samwela, mwanami!” Ne aye waitabile’mba: “Mwane.” 17 Kepo amushikishe’mba: “Ñanyi byambo byo aji kukubuula? Kange umfye ne. Lesa akukambule nangwa kukilapo inge ubule kumbuula byonse byo aji kukubuula.” 18 Onkao mambo, Samwela wamubuujile byonsetu, kabiji kechi wamufilepo kintu nangwa kimo ne. Eli waambile’mba: “Kino kintu kyafuma kwi Yehoba. Obe kyonse kyo amona’mba kyawama.”

19 Samwela wakomenenga, ne Yehoba wajinga nanji+ kabiji pa byambo byonse byo aambile kafwapo kyabujile kufika* ne. 20 Bena Isalela bonse kufumatu ku Danyi kukafika ne ku Belesheba, bayukile’mba Samwela pano bamutongola kwikala ngauzhi wa Yehoba. 21 Kabiji Yehoba watwajijile kumweka mu Shilo, mambo Yehoba wisolwele aye mwine kwi Samwela mu Shilo kupichila mu byambo bya Yehoba.+

4 Kabiji byambo bya kwa Samwela byafikile ku bena Isalela bonse.

Kepo bena Isalela bayile na kulwa na bena Filishitiya; bakatebelejile kwipi na Ebeneza, kabiji bena Filishitiya batebelejile ku Afeki. 2 Bena Filishitiya betanchikile kulwa na bena Isalela, bino ino nkondo yatamine bingi kabiji bena Isalela bebashinjile ku bena Filishitiya, baipayile banabalume nobe 4,000 konka ko balwijilenga. 3 Bashilikale byo babwelele ku kampu, bakulumpe ba bena Isalela baambile’mba: “Mambo ka Yehoba o etulekela kuba’mba bena Filishitiya betushinde* lelo?+ Twayai ku Shilo tukasende jikwachi ja lulayañano lwa Yehoba,+ pa kuba’mba jikale ne atweba ne kwitupokolola mu maboko a balwanyi betu.” 4 Onkao mambo, bantu batumine banabalume ku Shilo, ne abo bakasendele jikwachi ja lulayañano lwa Yehoba wa mabumba, yenka waikala peulu* ya bakelubi.+ Baana babiji ba kwa Eli, abo ba Hofini ne Finease+ nabo bajinga konka pamo na jikwachi ja lulayañano lwa Lesa wa kine.

5 Jikwachi ja lulayañano lwa Yehoba byo jafikiletu mu kampu, bena Isalela bonse batatwile kubijika kya kuba ne ntanda yonse yasunkena. 6 Bena Filishitiya byo baumvwine kiwowo, baambile’mba: “Mambo ka mu kampu wa Bahebelu o mwaubila kiwowo?” Kepo bayukile’mba Jikwachi ja Yehoba jafika mu kampu. 7 Bena Filishitiya baumvwine moyo, mambo baambile’mba: “Lesa waiya mu kampu!”+ Kabiji baambile’mba: “Bintu bitutamina, mambo kintu kya uno mutundu kikyangye kumwekapo kala! 8 Bintu bitutamina! Ñanyi usakwitupokolola mu kuboko kwa uno Lesa wa bulume? Uno ye Lesa waipayile bena Ijipita bavula bingi mu kiselebwa.+ 9 Anweba bena Filishitiya, chinchikai ne kwikala nobe banabalume, pa kuba’mba mukabule kwingijilanga Bahebelu byonkatu byo bemwingijila.+ Ikalai nobe banabalume ne kulwa!” 10 Onkao mambo, bena Filishitiya balwile na bena Isalela ne kushinda bena Isalela,+ ne abo pa muntu pa muntu banyemejile ku matente abo awu ku wanji awu ku wanji. Bo baipayile bavujile bingi; ku lubaji lwa bena Isalela, bashilikale benda panshi 30,000, bafwile. 11 Kabiji Jikwachi ja Lesa bejangachile, ne baana babiji ba kwa Eli abo ba Hofini ne Finease bafwile.+

12 Mwanamulume mwina Benjamina wanyemeneko ku nkondo wafikile mu Shilo pa jonkaja juba ne bivwalo byanji saka byatabauka ne maloba ku mutwe.+ 13 Uno mwanamulume byo afikile, Eli waikele pa kipona kwapela jishinda saka akenkenta, mambo muchima wanji wabambilenga na mambo a Jikwachi ja Lesa wa kine.+ Uno mwanamulume watwelele mu muzhi na kubulañana kyamwekele, ne bantu bonse mu muzhi batendekele kujila mabingo. 14 Eli byo aumvwine mabingo, washikishe’mba: “Nanchi akyo kiwowo kyatala mu ka?” Ponkapotu awa yenka mwanamulume wapelawizhizhe kwiya na kumubuula Eli kyamwekele. 15 (Eli wajinga na myaka 98, kabiji watajile kulutwe, bino kechi wamwenenga ne.)+ 16 Kepo awa mwanamulume aambijile Eli amba: “Yami nafuma ku nkondo! Lelo jino, nanyematu ku nkondo.” Ponkapo aye wamushikishe’mba: “Mwanami, ki ka kyamweka?” 17 Awa waletele sawakya wakumbwile’mba: “Bena Isalela banyema bena Filishitiya, kabiji bantu bebepaya bingi;+ ne baana benu babiji, ba Hofini ne Finease bafwa,+ kabiji baangata Jikwachi ja Lesa wa kine.”+

18 Byo atongweletu Jikwachi ja Lesa wa kine, Eli waponene kampaba kufuma pa kipona po aikele kwipi na kibelo, kabiji nshingo yanji yachimukile ne kufwa wafwile, mambo wakotele ne kunema. Pa myaka 40 watangijilenga bena Isalela. 19 Mulokazhi wanji muka Finease wajinga na jimi kabiji wajingatu pepi kusema. Byo aumvwine sawakya wa kuba’mba baangata Jikwachi ja Lesa wa kine ne kuba’mba bako banji ba balume ne bamwatawanji bafwa, wafukamine panshi ne bisanso byamukwachile ponkapotu kabiji wasemene ne kusema. 20 Byo ajinga pepi kufwa, banabakazhi baimene kwipi ne aye bamwambijile’mba: “Kwakamwa ne, mambo wasema mwana wa mulume.” Aye kechi wibakumbwile ne, kabiji kechi wateleko muchima ne. 21 Nangwa byonkabyo, aye watumbile uno mwana amba Ikabodi,*+ ne kwamba’mba: “Lukumo lwafuma mu bena Isalela lwaya mu buzha,”+ waambilenga pa Jikwachi ja Lesa wa kine jo baangachile ne pa kyamwekejile bako banji ba balume ne bamwatawanji.+ 22 Waambile’mba: “Lukumo lwafuma mu bena Isalela lwaya mu buzha, mambo baangata Jikwachi ja Lesa wa kine.”+

5 Bena Filishitiya byo baangachile Jikwachi+ ja Lesa wa kine, bejifumishe ku Ebeneza ne kwijitwala ku Ashadoda. 2 Bena Filishitiya bashikwile Jikwachi ja Lesa wa kine ne kwijitwezha mu nzubo ya kwa Dagona ne kwijitula kwipi ne Dagona.+ 3 Bena Ashadoda byo babuukile lukelo juba jalondejilepo, bataaine Dagona wapona panshi kinkuvumene kulutwe ya Jikwachi ja Yehoba.+ Kepo bashikwile Dagona ne kumubwezha po ajinga.+ 4 Byo babuukile lukelo juba jalondejilepo, bataaine Dagona wapona panshi kinkuvumene kulutwe ya Jikwachi ja Yehoba. Mutwe wa kwa Dagona ne maboko anji byachibikileko kabiji byaponejile pa kibelo. Kwashajiletu kipepe kyo balengele nobe jisabi.* 5 O ene mambo kufika ne lelo jino, bañanga ba kwa Dagona ne bonse batwela mu nzubo ya kwa Dagona o babujila kunyanta pa kibelo kya kwa Dagona mu Ashadoda.

6 Yehoba wakambwile bena Ashadoda, kabiji wibonawine byo aletele bilonda* mu Ashadoda ne mu manyaunda onse.+ 7 Bantu ba mu Ashadoda byo bamwene kyamwekelenga, baambile’mba: “Kange muleke Jikwachi ja Lesa wa bena Isalela jikale ne atweba ne, mambo aye witumanyika bingi pamo ne lesa wetu Dagona.” 8 Onkao mambo, batumine mawi ne kukonkanya pamo bamfumu bonse ba bena Filishitiya ne kwibashikisha’mba: “Tusakuba byepi na Jikwachi ja Lesa wa bena Isalela?” Abo bakumbwile’mba: “Jikwachi ja Lesa wa bena Isalela jitwalai ku Gata.”+ Byonkabyo, Jikwachi ja Lesa wa bena Isalela bejitwajile konkakwa.

9 Byo bejitwajile kokwa, Yehoba wakambwile bantu ba mu yewa muzhi, ne kwibalengela kwakamwa bingi. Wamanyikile bantu ba mu muzhi, kutatwilatu ku mwanyike kufika ne ku mukulumpe, kabiji bilonda bibatumbile.+ 10 Kepo Jikwachi ja Lesa wa kine bejitwajile ku Ekelona,+ bino Jikwachi ja Lesa wa kine byo jafikiletu mu Ekelona, bena Ekelona batendekele kujila amba: “Betuletela Jikwachi ja Lesa wa bena Isalela, kuba’mba betwipaishe atweba ne bantu betu!”+ 11 Kabiji batumine mawi ne kukonkanya pamo bamfumu bonse ba bena Filishitiya ne kwamba’mba: “Twalai Jikwachi ja Lesa wa bena Isalela; jibwele ku mpunzha yajo pa kuba’mba atweba ne bantu betu tubule kufwa.” Mambo moyo wa kuchina lufu wakumbene muzhi yense; kabiji konkakwa Lesa wa kine wibakambwile bingi,+ 12 ne bantu babujile kufwa, bilonda bibatumbile. Kabiji kujila kwa bantu ba mu muzhi kwafikile mwiulu.

6 Jikwachi+ ja Yehoba jaikajile mu nyaunda ya bena Filishitiya bañondo batanu na babiji. 2 Bena Filishitiya baichile bañanga ba balesa ne bañanga ba lubuko+ ne kwibashikisha’mba: “Tusakuba byepi na Jikwachi ja Yehoba? Tubuulai byo tusakwijibwezha ku mpunzha yajo.” 3 Abo bakumbwile’mba: “Inge mubwezhe jikwachi ja lulayañano lwa Yehoba, Lesa wa Isalela, kange mwijibwezhe kwa kubula mulambo ne. Mwafwainwa kumupa mulambo wa mambo.+ Inge mube bino po po musakubukwa kabiji musakuyuka ene mambo o abujila kuleka kwimumanyika.” 4 Onkao mambo, bashikishe’mba: “Ñanyi mulambo wa mambo ye tusakumutumina?” Bakumbwile’mba: “Monka mwayila kuvula kwa bamfumu ba bena Filishitiya,+ mutume bipashañano bya ngolode bitanu byapasha bilonda* ne bipashañano bya bampuku bya ngolode bitanu, mambo mwalo muntutu umo wimumanyika anweba ne bamfumu benu. 5 Mwafwainwa kulenga bipashañano bya bilonda byenu+ ne bya bampuku babena konauna kyalo kyenu, kabiji mwafwainwa kunemeka Lesa wa Isalela. Kampe ukaleka kwimumanyika anweba ne balesa benu ne kyalo kyenu.+ 6 Mambo ka o mwafwainwa kukosesha michima yenu byonka byaubile bena Ijipita ne Felo?+ Byo ebakambwile,+ abo baswishishe bena Isalela kuya, ne abo bayile.+ 7 Pano nengezhai kikochikala kya katataka ne bañombe babiji baji na baana, bo bakyangye kukasapo kikonkoji. Bano bañombe mwibakashile ku kikochikala, bino baana babo mwibabwezhe ku muzhi, kwalepa na bainabo. 8 Mushikule Jikwachi ja Yehoba ne kwijibika pa kikochikala, kabiji bipashañano bya ngolode bya mulambo wa mambo byo mubena kumutumina mwibibike mu kakibokoshi kwipi na jikwachi.+ Kepo musakwijituma 9 kabiji mwijitalenga: Inge jiye mu jishinda jaya ku Bete-shemeshi+ ku nyaunda yajo, ko kuba’mba aye ye waleta kino kintu kyatama pe atweba. Pano inge ne, tusakuyuka’mba kechi ye witumanyika ne; ko kuba’mba kitumwekelatu.”

10 Bantu baubile byonka byo bebambijile. Baletele bañombe babiji bajinga na baana ne kwibakashila ku kikochikala, kabiji baana bebashinkijile mu kipaka ku muzhi. 11 Kepo babikile Jikwachi ja Yehoba pa kikochikala, pamo na kakibokoshi mwajinga bipashañano bya bampuku ne bya bilonda byabo. 12 Kabiji bañombe bashinkamenetu mu jishinda jaya ku Bete-shemeshi.+ Bayilengatu monka mu mukwakwa saka bapumbula; kechi basendukijile ku kilujo nangwa ku kipiko ne. Byo bayilenga, bamfumu ba bena Filishitiya balondejilenga panyuma kukafika ne ku mupaka wa Bete-shemeshi. 13 Bantu ba mu Bete-shemeshi banowenenga wichi mu musanza. Byo bainukile ne kumona Jikwachi, basangalele bingi pa kwijimona. 14 Kikochikala kyatwelele mu bujimi bwa kwa Yoshua mwina Bete-shemeshi ne kwimana monka kwipi na jibwe jikatampe. Kepo batetawile mapulanga a kikochikala, kabiji balambwile bañombe+ ke mulambo wa kusoka kwi Yehoba.

15 Kabiji bena Levi+ baikizhe Jikwachi ja Yehoba ne kakibokoshi kajinga kwipi najo mwajinga bipashañano bya ngolode, kabiji bebitujile pa jibwe jikatampe. Bantu ba mu Bete-shemeshi+ balambwile kwi Yehoba milambo ya kusoka ne bitapisho pa jonkaja juba.

16 Bamfumu batanu ba bena Filishitiya byo bamwene kino, babwelele ku Ekelona pa jonkaja juba. 17 Abino byo bipashañano bya ngolode byapasha bilonda bena Filishitiya byo batumine kwikala mulambo wa mambo kwi Yehoba:+ kimo kya ku Ashadoda,+ kimo kya ku Gaza, kimo kya ku Ashekelona, kimo kya ku Gata+ ne kimo kya ku Ekelona.+ 18 Nambala ya bipashañano bya bampuku bya ngolode yaesakene pamo na kuvula kwa mizhi ya bena Filishitiya yajinga ya bamfumu batanu—mizhi ya masakwa yonse ne mizhi yabula masakwa.

Ne jibwe jikatampe po batujile Jikwachi ja Yehoba jaikele ke kamonyi kufika ne lelo jino mu bujimi bwa kwa Yoshua mwina Bete-shemeshi. 19 Pano bino, Lesa waipayile bantu ba mu Bete-shemeshi, mambo bamwene Jikwachi ja Yehoba. Waipayile bantu 50,070,* kabiji bantu batendekele kujila mambo Yehoba waipayile bantu bavula bingi.+ 20 Onkao mambo, bantu ba mu Bete-shemeshi bashikishe’mba: “Ñanyi wakonsha kwimana kwipi ne Yehoba, uno Lesa wazhila,+ kabiji kwi bañanyi ko asakuya kuba’mba afume kwi atweba?”+ 21 Kepo batumine baluwe kuya ku bena Kiliata-yealimu+ ne kwibambila’mba: “Bena Filishitiya babwezha Jikwachi ja Yehoba. Iyai kuno mwijisende.”+

7 Bantu ba ku Kiliata-yealimu baishile na kusenda Jikwachi ja Yehoba ne kwijitwala mu nzubo ya kwa Abinadaba+ yajinga pa katumbatumba, kabiji bazhijikile Eleaza mwananji kuba’mba asopenga Jikwachi ja Yehoba.

2 Papichile kimye kyabaya bingi, myaka yonse pamo yajinga 20, kufuma pa juba jo batwajile Jikwachi ku Kiliata-yealimu, ne bena Isalela bonse batendekele kukeba* Yehoba.+ 3 Kepo Samwela aambijile bena Isalela bonse amba: “Inge mukeba kubwela kwi Yehoba na michima yenu yonse,+ tayai balesa bangi+ ne bipashañano bya Ashatoleta+ byo muji nabyo ne kuteshatu michima yenu kwi Yehoba ne kumwingijila aye yenkatu,+ ne aye ukemupokolola mu maboko a bena Filishitiya.”+ 4 Ponkapo bena Isalela batayile Baela ne bipashañano bya Ashatoleta ne kwingijilatu Yehoba kwapwa.+

5 Kepo Samwela aambile’mba: “Konkanyai bena Isalela bonse ku Mizipa,+ ne amiwa nsakwimulombelako kwi Yehoba.”+ 6 Byonkabyo, bakonkene ku Mizipa kabiji batapwile mema ne kwiechila panshi ku meso a Yehoba, kabiji bazhikilwe na nzala aja juba.+ Konkakwa baambile’mba: “Twamulenga mambo Yehoba.”+ Kabiji Samwela waikele ke mutonyi+ wa bena Isalela konkakwa ku Mizipa.

7 Bena Filishitiya byo baumvwine’mba bena Isalela bakonkana ku Mizipa, bamfumu ba bena Filishitiya+ bayile na kulwisha bena Isalela. Bena Isalela byo baumvwine kino, baumvwine moyo na mambo a bena Filishitiya. 8 Onkao mambo, bena Isalela baambijile Samwela amba: “Kange muleke kumujijila Yehoba Lesa wetu ne, pa kuba’mba etukwashe+ ne kwitupokolola mu maboko a bena Filishitiya.” 9 Kepo Samwela ashikwile mwana mukooko ukyamwa ne kumulambula ke mulambo wa kusoka+ kwi Yehoba; kabiji Samwela wamujijiile Yehoba amba akwashe bena Isalela, ne Yehoba wamukumbwile.+ 10 Samwela byo alambwilenga mulambo wa kusoka, bena Filishitiya baishile na kulwa na bena Isalela. Pa joja juba Yehoba wibalulumijile+ bena Filishitiya, ne kwibavulañanya,+ kabiji bebashinjile ku bena Isalela.+ 11 Kabiji banabalume bena Isalela bafumine ku Mizipa ne kupupila bena Filishitiya, saka bebatapa kukafikatu ne ku kabeta ka ku bulenge bwa Bete-ka. 12 Kepo Samwela ashikwile jibwe+ ne kwijimika pakachi ka Mizipa ne Yeshana ne kwijitumba’mba Ebeneza,* mambo waambile’mba: “Yehoba watwajijila kwitukwasha kufika ne lelo jino.”+ 13 Byonkabyo, bena Filishitiya bebashinjile, kabiji kechi baishilepo jibiji mu nyaunda ya bena Isalela ne;+ kabiji kuboko kwa Yehoba kwatwajijile kukanya bena Filishitiya mu moba onse a kwa Samwela.+ 14 Kabiji mizhi bena Filishitiya yo baangachile ku bena Isalela beibwezhezhe ku bena Isalela, kufuma ku Ekelona kukafikatu ne ku Gata, ne bena Isalela batambwile nyaunda yabo ku bena Filishitiya.

Kabiji bena Isalela baikele mu mutende na bena Amoli.+

15 Samwela watwajijile kuchibila mambo bena Isalela moba onse a bumi bwanji.+ 16 Pa mwaka pa mwaka wayanga ku Betele,+ ku Giligala+ ne ku Mizipa,+ kabiji wachibijilenga mambo bena Isalela mu ano mapunzha onse. 17 Bino wabwelanga ku Lama,+ mambo ko kwajinga nzubo yanji, kabiji akwa nako wachibilanga mambo bena Isalela. Kabiji konkakwa washimikile kya kusokelapo bitapisho kwi Yehoba.+

8 Samwela byo akotele, watongwele baana banji ba balume kwikala bamitonyi ba bena Isalela. 2 Jizhina ja mwananji mubeji wajinga Yoela, ne wa bubiji wajinga Abiya;+ abano bajinga bamitonyi mu Belesheba. 3 Pano bino, baana banji kechi baendanga mu mashinda anji ne; bakebeshanga kumwenamo nsubu mu bujimbijimbi,+ batambulanga mazhikakanwa,+ kabiji bachibilanga mambo mungi.+

4 Mu kuya kwa kimye, bakulumpe bonse ba bena Isalela bakonkene pamo ne kwiya kwi Samwela ku Lama. 5 Abo bamwambijile’mba: “Talai! Mwakota kala, bino baana benu ba balume kechi babena kwenda mu mashinda enu ne. Pano tutongwelai mfumu wa kwituchibila mambo byonka biji bisaka byonse bya bantu.”+ 6 Bino Samwela kyamufichile ku muchima* byo baambile’mba: “Mwitutongwele mfumu wa kwituchibila mambo.” Kepo Samwela alombele kwi Yehoba, 7 kabiji Yehoba waambijile Samwela amba: “Umvwa byonse bibena kukubuula bantu; mambo kechi yobe bakana ne, pakuba bakana amiwa kwikala mfumu wabo.+ 8 Babena kubatu byonka byo baubile kimye kyo nebafumishe mu Ijipita kufika ne lelo jino; batwajijile kunkana+ ne kwingijila balesa bangi,+ kabiji byo byo babena kuba ne kwi obewa. 9 Umvwa byo babena kwamba. Pano bino, wafwainwa kwibajimunako; wibabuule bintu bikakebanga mfumu ukebalamanga.”

10 Byonkabyo, Samwela wabuujile bantu bakebelenga mfumu byambo byonse byamubuujile Yehoba. 11 Wibambijile’mba: “Abino byo bintu bikakebanga mfumu ukemulamanga:+ Ukasenda baana benu+ ba balume ne kwibabika mu makalaki anji+ ne kwibalula ke bantu banji ba kwenda pa bambili,+ kabiji bamo bakatangilangako lubilo kulutwe ya makalaki anji. 12 Kabiji uketongwela aye mwine bakulumpe ba pa bantu biumbi+ ne bakulumpe ba pa bantu makumi atanu,+ kabiji bamo bakamujiminanga,+ kunowa kajo,+ ne kumulengela bilwilo bya nkondo ne makalaki.+ 13 Ukasenda baana benu ba bakazhi ne kwibalula ke ba kuvwangakanya* manyi anunka bulongo, ba kuteeka kajo, ne ba kosha bashinkwa.+ 14 Ukasenda byawamisha bya mu majimi enu, bya mu majimi enu a miñanzañanza ne bya mu majimi enu a maolivi,+ kabiji ukebipana ku bakalume banji. 15 Ukasenda bya bujikumi bya mu majimi enu a kajo ne bya mu majimi enu a miñanzañanza, kabiji ukebipana ku bakapitao banji ne bakalume banji. 16 Kabiji ukasenda bakalume benu ba balume ne ba bakazhi, matanga enu awamisha ne bambongolo benu, ne kwibengijisha ku mwingilo wanji.+ 17 Ukasenda bya bujikumi bya matanga enu,+ ne anweba mukekala bakalume banji. 18 Juba jikafika jo mukajila na mambo a mfumu ye mukesajila anwe bene,+ pano bino Yehoba kechi ukemukumbula ne.”

19 Nangwa byonkabyo, bantu bakaine kumvwa bibambijile Samwela, kabiji baambile’mba: “Ine, atweba tubena kukebatu kwikala na mfumu. 20 Tukekalatu byonka biji bisaka byonse, ne mfumu wetu uketuchibilanga mambo ne kwitutangijila ne kwitulwilako makondo etu.” 21 Samwela byo aumvwine byambo byonse byaambile bantu, wabuujile Yehoba. 22 Yehoba wamwambijile Samwela amba: “Umvwa byo baamba, ne kwibatongwela mfumu wa kwibalama.”+ Kepo Samwela aambijile banabalume bena Isalela amba: “Anweba bonse pa muntu pa muntu mwafwainwa kubwela ku mizhi yenu.”

9 Kwajinga mwanamulume mwina Benjamina jizhina janji Kisha,+ mwana wa kwa Abiela, Abiela mwana wa kwa Zelola, Zelola mwana wa kwa Bekolati, Bekolati mwana wa kwa Afiya, mwina Benjamina+ kabiji wanonkele bingi. 2 Wajinga na mwana wa mulume Saulo,+ nsongwalume walambile bingi, kafwako mwanamulume mu bena Isalela walambile kukila aye ne, kabiji walepele ne bantu bonse bamupelangatu mu bipuzhi byanji.

3 Bambongolo* ba kwa Kisha, shanji Saulo, byo baelekele, Kisha waambijile mwananji Saulo amba: “Sendapo wa mwingilo umo uye nanji na kukeba bambongolo.” 4 Bapichile mu mpunzha ya mitumba ya Efelaimu mu kyalo kya Shalisha, kabiji kechi bebataaine ne. Bakapichile ne mu kyalo kya Shalimu, nako kechi bebataaineko bambongolo ne. Bapitañene mu kyalo kyonse kya bena Benjamina, kabiji kechi bebataaine ne.

5 Byo bafikile mu kyalo kya Zufi, Saulo waambijile wa mwingilo wanji ye ajinga nanji amba: “Twaya tubwelemo, pa kuba’mba batata baleke kwakamwa atweba bakamweko bambongolo.”+ 6 Bino wa mwingilo wamwambijile’mba: “Umvwai, mu uno muzhi muji muntu wa Lesa, ye banemeka bingi. Byonsetu byo amba bimweka.+ Twayai tuyeko lonka luno. Kampe wakonsha kwitubuula kwa kuya.” 7 Saulo washikishe wa mwingilo wanji amba: “Inge tuye, ñanyi bintu byo tusakumupa uno muntu? Mu mafukuta etu kafwamo bashinkwa; kafwako bupe bo tusakutwajila muntu wa Lesa wa kine ne. Ñanyi bintu byo tuji nabyo?” 8 Kepo wa mwingilo akumbwile Saulo jibiji amba: “Talai! Nji na kichika kya shekele* wa siliva mu kuboko kwami. Nsakumupana ku muntu wa Lesa wa kine, ne aye usakwitubuula kwa kuya.” 9 (Kala mu bena Isalela, inge muntu ubena kuya na kukeba Lesa waambanga’mba: “Twayai tuye ku muntu umona bimwesho.”+ Mambo muntu ye batela’mba ngauzhi ano moba, kala bamutelanga amba muntu umona bimwesho.) 10 Ponkapo Saulo waambijile wa mwingilo wanji amba: “Bintu byo waamba byawama. Twaya tuyenga.” Byonkabyo bayile ku muzhi kwajinga muntu wa Lesa wa kine.

11 Byo batuntukilenga pa kuya ku muzhi, basambakene bansongwakazhi bayilenga na kutapula mema. Bebashikishe amba: “Nanchi muntu umona bimwesho+ uji mu ino mpunzha nyi?” 12 Ne abo bakumbwile’mba: “Ee mwane, mo aji. Uji konka ko mubena kuya. Pelawizhai, mambo lelo waiya mu muzhi, mambo bantu babena kutapisha kitapisho+ lelo jino ponka patuntama.+ 13 Byo musakufikatu mu muzhi, musakumutaana saka akyangye kuya patuntama na kuja. Bantu kechi basakuja ne, posotu afike, mambo ye upesha kitapisho. Umvwe wauba kino, aba bo baita po po bakonsha kuja. Yainga lonka luno, kabiji musakumutaana.” 14 Byonkabyo, bayile mu muzhi. Byo bafikile mukachi ka muzhi, Samwela wayile na kwibatundaila kuba’mba baye patuntama.

15 Juba jafumineko Saulo saka akyangye kwiya, Yehoba wamubuujile* Samwela amba: 16 “Kesha pa kyonka kino kimye, nkatuma muntu kwi obewa ukafuma mu kyalo kya bena Benjamina.+ Wafwainwa kumushinga manyi kwikala ntangi wa bantu bami bena Isalela,+ ne aye ukapokolola bantu bami mu maboko a bena Filishitiya. Mambo namona kumanama kwa bantu bami, ne kujila kwabo kwafika kwi amiwa.”+ 17 Samwela byo amwene Saulo, Yehoba wamubuujile’mba: “Uno ye muntu ye nakubuujile namba, ‘Ye ukalama bantu* bami.’”+

18 Kepo Saulo ayile kwi Samwela ku kibelo ne kumushikisha’mba: “Mwane bambuuleko, kwepi kuji nzubo ya muntu umona bimwesho?” 19 Samwela wamukumbwile Saulo amba: “Yami mmona bimwesho. Tangilako uye patuntama, lelo usakujiila pamo ne amiwa.+ Lukelo po po nkakuleka ukaye, kabiji nkakubuula byonse byo ukeba kuyuka.* 20 Pa mambo a bambongolo baelekele moba asatu apitapo,+ kange wakamwe ne, mambo bebataana. Nanchi bintu byonse byawama bya bena Isalela bya bañanyi? Nanchi kechi byobe ne bantu bonse ba mu nzubo ya bashobe nenyi?”+ 21 Ponkapo Saulo wakumbwile’mba: “Nanchi amiwa kechi ne mwina Benjamina, mukoka wakepesha pa mikoka ya bena Isalela,+ ne kisemi kyami kyo kyakepesha mu mukoka wa bena Benjamina nenyi? Pano mambo ka o mwambuujila bino?”

22 Kepo Samwela asendele Saulo ne wa mwingilo wanji ne kwibatwala mu kibamba kya kujiilamo kabiji wibapele pa kwikala pamo na boba bo baichile; kwajinga banabalume nobe 30. 23 Samwela waambijile wateekanga kajo amba: “Leta kyokya kitumba kyo naji kukupa ne kukwambila’mba, ‘Kitule pa bunke.’” 24 Ponkapo wateekanga kajo washikwile kijoma ne byajingapo ne kwikitula mu kyenyi kya kwa Saulo. Kabiji Samwela wamwambijile’mba: “Bakupa byo baji kukushilapo, Janga, mambo baji kwibilamina obewa pa kino kijiilo. Mambo naji kwibabuula’mba, ‘Kuji benyi bo naji kwita.’” Onkao mambo, Saulo wajijiile pamo ne Samwela aja juba. 25 Kepo bakunkulukile kufuma patuntama+ kuya mu muzhi, kabiji Samwela watwajijile kwisamba ne Saulo peulu ya nzubo. 26 Babuukile lukelokelo, kabiji juba byo jasamine Samwela wabijikile Saulo peulu ya nzubo amba: “Inengezhe, kuba’mba nkuleke uyenga.” Byonkabyo, Saulo winengezhe kabiji aye ne Samwela balupukijile pangye. 27 Byo banangijilenga kwapela muzhi, Samwela waambijile Saulo amba: “Mwambile wa mwingilo+ atangileko,” byonkabyo ne aye watangijileko. “Pakuba obewa, imana, pa kuba’mba nkubuule byaamba Lesa.”

10 Kepo Samwela ashikwile kamulondo ka manyi ne kwietulwila pa mutwe wa kwa Saulo.+ Kabiji wamufyompele ne kumwambila’mba: “Yehoba kine wakushinga manyi kwikala ntangi+ wa bantu banji.+ 2 Byo usakufuma kwi amiwa lelo, usakutaana banabalume babiji kwipi na kilende kya kwa Lechela+ mu nyaunda ya kwa Benjamina ku Zeluza, ne abo basakukubuula’mba, ‘Bambongolo bo wayile na kukeba bebataana, bino bashobe balubako ku bambongolo+ kabiji baakamwa na mambo a obewa. Babena kwamba’mba: “Nsakuba byepi mwanami byo abula kubwela?’” 3 Kufuma kokwa uyengatu ne byo usakufika ku kichi kikatampe kiji mu Tabola, ko usakusambakana banabalume basatu babena kuya ku Betele na kupopwela Lesa wa kine,+ umo wasenda baana ba bambuzhi basatu, mukwabo wasenda bashinkwa basatu ne mukwabo wasenda mulondo mukatampe wa binyu. 4 Basakukwimuna ne kukupa bashinkwa babiji, ne obewa wafwainwa kutambula bashinkwa bo basakukupa. 5 Kepo usakufika ku katumbatumba ka Lesa wa kine, kuji bashilikale ba bena Filishitiya. Byo usakufika mu muzhi, usakusambakana jibumba ja bangauzhi saka bakunkuluka kufuma patuntama aku saka babena kwaula, kabiji kulutwe yabo kusakwikala babena kujizha kijimba kya mizhinge, munsakayi, mumpempe ne kyansa. 6 Mupashi wa Yehoba usakukupa bulume,+ ne obewa usakwawilanga pamo nabo kabiji usakwaluka ke muntu ungi.+ 7 Bino biyukilo byo bisakumweka, ube kyonse kyo wakonsha kuba na maboko obe, mambo Lesa wa kine uji ne obewa. 8 Kabiji utangileko ku Giligala,+ ne amiwa nkeya konkakwa na kutapisha bitapisho bya kusoka ne bitapisho bya mutende. Ukampembelele konkakwa moba atanu na abiji poso nkeye. Kepo nkakubuula byo wafwainwa kuba.”

9 Saulo byo aalulukiletu kufuma kwi Samwela, Lesa watendekele kupimpula muchima wa kwa Saulo kwikala nobe wa muntu ungi, ne bino biyukilo byonse byamwekele pa jonkaja juba. 10 Byonkabyo, bafumine kokwa ne kuya ku katumbatumba kabiji bamusambakene ku jibumba ja bangauzhi. Ponkapo mupashi wa Lesa wamupele bulume,+ ne aye watendekele kwawila+ pamo nabo. 11 Aba bonse bamuyukile kala byo bamumwene saka aula pamo na bangauzhi, beshikishenga bene na bene amba: “Ki ka kyamwekela mwana wa kwa Kisha? Nanchi Saulo naye ngauzhi nyi?” 12 Muntu umo konkakwa washikishe’mba: “Nanchi shabo ñanyi?” Onkao mambo, ino yaalukile ke ñambilo* ya kuba’mba: “Nanchi Saulo naye ngauzhi nyi?”+

13 Byo apwishishe kwaula, wayile patuntama. 14 Mulongo wa bashanji Saulo wamwipwizhe aye ne wa mwingilo amba: “Mwayile pi?” Aye wakumbwile’mba: “Twayile na kukeba bambongolo,+ bino byo twabujile kwibataana, twayile kwi Samwela.” 15 Mulongo wa bashanji Saulo wamwipwizhe’mba: “Mbuule, ñanyi bintu byakubuujile Samwela?” 16 Saulo wamukumbwile’mba: “Witubuujile’mba bambongolo bebataana kala.” Bino Saulo kechi wamubuujile bintu byamubuujile Samwela pa mambo a bufumu ne.

17 Kabiji Samwela wakonkenye pamo bantu kwi Yehoba ku Mizipa+ 18 ne kwambila bena Isalela amba: “Yehoba Lesa wa Isalela waamba’mba: ‘Yami nemufumishe anweba bena Isalela mu Ijipita ne kwimupokolola mu maboko a bena Ijipita+ ne mu maboko a bamfumu bonse bemumanyikilenga. 19 Bino lelo jino mwamukana Lesa+ wenu wimupokolwele mu makatazho enu onse ne mu bya malwa, kabiji mwaambile’mba: “Ine, tutongwelai mfumu wa kwitulama.” Pano imanai kwi Yehoba monka mwayila mikoka yenu ne bisemi byenu.’”

20 Onkao mambo, Samwela waletele kwipi mikoka ya bena Isalela yonse,+ ne mukoka wa bena Benjamina bamusajile.+ 21 Kepo aletele kwipi mukoka wa bena Benjamina monka mwayijile bisemi byabo, ne kisemi kya bena Matili bekisajile. Kabiji Saulo mwana wa kwa Kisha, bamusajile.+ Bino byo bayile na kumukeba, kechi bamutaaine ne. 22 Onkao mambo, baipwizhe Yehoba amba:+ “Nanchi uno muntu waiya kala kuno nyi?” Yehoba wakumbwile’mba: “Awa wakafyama mu bipe.” 23 Ponkapo banyemejileko ne kumuleta kufuma ko ajinga. Byo aimene mukachi ka bantu, walepele kabiji bantu bonse bapelelengatu pa bipuzhi byanji.+ 24 Samwela waambijile bantu bonse amba: “Nanchi mwamumona muntu ye asala Yehoba,+ amba kafwako muntu nangwa umo uji nobe aye mu bantu bonse nyi?” Kabiji bantu bonse batendekele kubijika amba: “Mfumu ekale myaka yavula!”

25 Samwela wabuujile bantu bintu byonse bikeba bamfumu+ ne kwibinemba mu buku ne kumutula ku meso a Yehoba. Kepo Samwela aambijile bantu bonse kuya, au kwanji, au kwanji. 26 Saulo naye wayile kwanji ku Gibea, pamo na bashilikale bo bakookeshe michima kwi Yehoba. 27 Pano bino, bantu bamo bancha baambile’mba: “Uno muntu uketupokolola byepi?”+ Onkao mambo, bamulengulwile kabiji kechi bamupelepo bupe ne.+ Bino aye kechi waambilepo kyambo nangwa kimo ne.*

11 Nahashi mwina Amonyi+ waishile ne kwinengezha kulwa na bena Yabeshi+ mu Gileada. Bantu bonse ba mu Yabeshi baambijile Nahashi amba: “Layañanai lulayañano* ne atweba, kabiji tukemwingijilanga.” 2 Nahashi mwina Amonyi wibambijile’mba: “Nsakulayañana nenu inge mube kino: inge bonse nemusabe meso enu a ku kilujo. Nkooba kino kuba’mba ndengeshe bena Isalela bonse bumvu.” 3 Bakulumpe ba mu Yabeshi bamukumbwile’mba: “Mwitupe moba atanu na abiji kuba’mba tutume baluwe mu nyaunda yonse ya bena Isalela. Inge tukabule kutaana muntu wa kwitupokolola, tukepana kwi anweba.” 4 Kabiji miluwe yafikile ku Gibea+ kwaikalanga Saulo ne kubuula bantu bino byambo, kabiji bantu bonse bajijile bingi.

5 Bino Saulo wafuminenga mu jisaka saka alondela jitanga panyuma, kabiji Saulo washikishe’mba: “Ñanyi lukatazho luji na bantu? Mambo ka o babena kujijila?” Kepo bamubuujile byambo byaambile bena Yabeshi. 6 Saulo byo aumvwine bino byambo, mupashi wa Lesa wamupele bulume,+ kabiji wazhingijile bingi. 7 Ponkapo washikwile bañombe balume babiji ne kwibachibaula mu bipimvwa, kabiji watumine baluwe kutwala bipimvwa mu nyaunda yonse ya bena Isalela, baambile’mba: “Yense usakubula kulondela Saulo ne Samwela ayuke’mba bañombe banji bakeboba byonkabye!” Kabiji bantu bamuchiine bingi Yehoba, kya kuba bonse baishile na muchima umo.* 8 Kepo ebabajile mu Bezeke, bena Isalela bajinga 300,000 ne banabalume bena Yuda bajinga 30,000. 9 Kabiji baambijile baluwe baishile amba: “Abino byo byo musakubuula bangikazhi ba mu Yabeshi ku Gileada amba, ‘Kesha inge mute wazonga, bakemupokolola.’” Ponkapo baluwe bayile na kubuula bena Yabeshi, ne abo basangalele bingi. 10 Onkao mambo, bena Yabeshi baambile’mba: “Kesha tukepana kwi anweba, ne anweba muketube kyonse kyo mukamona’mba kyawama.”+

11 Juba jalondejilepo, Saulo waabenye bantu mu mabumba asatu, ne abo bayile mukachi ka kampu ku makya* ne kutapa bena Amonyi+ kufika ne mute byo azongele. Aba bapulukile bapalañenejilemo, kya kuba kafwako bantu bashajile babiji babiji ne. 12 Kepo bantu baambijile Samwela amba: “Bañanyi baambilenga’mba, ‘Nanchi Saulo wafwainwa kwikala mfumu wetu nyi?’+ Baletai kuno, twibepaye.” 13 Pano bino, Saulo waambile’mba: “Kafwako muntu ye bafwainwa kwipaya lelo ne,+ mambo juba ja lelo Yehoba wapokolola bena Isalela.”

14 Kepo Samwela aambijile bantu amba: “Twayai ku Giligala+ tukambe jibiji amba Saulo ye mfumu.”+ 15 Byonkabyo, bantu bonse bayile ku Giligala, kabiji konkakwa ku Giligala ko ko bakamubikile Saulo pa bufumu ku meso a Yehoba. Kepo batapishishe bitapisho bya mutende kwi Yehoba,+ kabiji Saulo ne bena Isalela bonse baikele na kijiilo ne kusangalala bingi.+

12 Kabiji Samwela waambijile bena Isalela bonse amba: “Nauba* byonse byo mwakebelenga, kabiji natongwele mfumu wa kwimulama.+ 2 Uno ye mfumu ubena kwimutangijila!*+ Pakuba amiwa, nakota ne mvwi too ku mutwe, ne baana bami muji nabo,+ kabiji nemutangijilenga kufuma ku bwanyike bwami kufika ne lelo jino.+ 3 Amiwa bano. Nshinawinai kwi Yehoba ne ku mushingwa wanji:+ Ñanyi ye naangachilepo ñombe nangwa mbongolo?+ Nangwa ñanyi ye naibijilepo kintu nangwa kumumanyika? Ñanyi ye natambwileko mazhikakanwa kuba’mba mbule kutako muchima ku byo aubile?+ Inge naubile bino, nsakwimubwezhezhabyo.”+ 4 Abo bamukumbwile’mba: “Kechi mwitwibijilepo nangwa kwitumanyika nangwa kutambula kintu nangwa kimo kwi atweba ne.” 5 Kepo ebambijile’mba: “Yehoba ye kamonyi wa kwimushinawina, ne mushingwa wanji ye kamonyi lelo jino kuba’mba kechi mwantaana na kintu kya kunshinawinapo* ne.” Ne abo baambile’mba: “Aye ye kamonyi.”

6 Byonkabyo, Samwela waambijile bantu amba: “Yehoba yenka waingijishe Mosesa ne Alona, yenka wafumishe bashakulu benu mu kyalo kya Ijipita,+ ye kamonyi. 7 Pano imanaitu, ne amiwa nsakwimuchibila mambo ku meso a Yehoba monka mwayila mingilo yonse yaoloka Yehoba yo emubila anweba ne bashakulu benu.

8 “Yakoba byo afikiletu mu Ijipita+ ne bashakulu benu byo batendekele kumujijila Yehoba amba ebakwashe,+ Yehoba watumine Mosesa+ ne Alona amba batangijile bashakulu benu kufuma mu Ijipita ne kwibaleta mu kino kyalo.+ 9 Nangwa byonkabyo, bamuvulamine Yehoba Lesa wabo, ne aye wibapoteshe+ kwi Sisela+ mukulumpe wa nzhita ya ku Hazola ne ku bena Filishitiya+ ne ku mfumu wa bena Moabu,+ ne abo balwile nabo. 10 Kabiji bamujijiile Yehoba amba ebakwashe+ ne kwamba’mba, ‘Twalenga mambo,+ mambo twamukana Yehoba ne kwingijila Babaela+ ne bipashañano bya Ashatoleta;+ pano tupokololai mu maboko a balwanyi betu kuba’mba twimwingijilenga.’ 11 Kepo Yehoba atumine Yelubaela+ ne Bedana ne Yefita+ ne Samwela+ ne kwimupokolola mu maboko a balwanyi bemuzhokolokele, kuba’mba mwikale ku matwi nzoo.+ 12 Byo mwamwene’mba Nahashi+ mfumu wa bena Amonyi waiya na kulwa ne anweba, mwañambijilenga’mba, ‘Ine, twakebesha bingi kwikala na mfumu wa kwitulama!’+ nangwa kya kuba Yehoba Lesa wenu ye Mfumu wenu.+ 13 Pano uno ye mfumu ye mwasala, yenka ye mwakebelenga. Talai! Yehoba watongola mfumu wa kwimulama.+ 14 Inge mukakamwenga Yehoba+ ne kumwingijila+ ne kumvwina jiwi janji,+ kabiji mukabule kulengulula mikambizho ya Yehoba, kabiji anweba ne mfumu ukemulamanga mukalondelenga Yehoba Lesa wenu, abya kyawama. 15 Bino inge mukabule kumvwina jiwi ja Yehoba kabiji mukalengulule mikambizho ya Yehoba, Yehoba ukemukambula anweba ne bashenu+ pamo. 16 Pano, imanaitu ne kumona kino kintu kyakukumya kibena kuba Yehoba ku meso enu. 17 Nanchi jino kechi jo juba ja kunowenamo wichi nenyi? Nsakumulomba Yehoba kuba’mba atume kilulumo ne kunokesha mvula; kepo musakuyuka kintu kyatama kyo mwauba kwi Yehoba byo mwikebela mfumu.”+

18 Ponkapo Samwela wamulombele Yehoba, ne Yehoba watumine kilulumo ne kunokesha mvula aja juba, kya kuba bantu bonse bamuchiine bingi Yehoba ne Samwela. 19 Kabiji bantu bonse baambijile Samwela amba: “Tulombelaiko atweba bakalume benu kwi Yehoba Lesa wenu,+ mambo kechi tubena kukeba kufwa ne, mambo pa bubi bwetu bonse twanungapo ne bubi bukwabo na mambo a kulomba mfumu.”

20 Kepo Samwela aambijile bantu amba: “Kuba moyo ne. Ee kine mwauba buno bubi bonse. Pano bino, kange muleke kumulondela Yehoba ne,+ saka mumwingijila Yehoba na muchima wenu yense.+ 21 Kange musenduke ne kulondela bintu byatutu,*+ bikabula kwimukwasha+ nangwa kwimupokolola ne, mambo byo byatutu.* 22 Na mambo a jizhina janji jikatampe,+ Yehoba kechi ukebasha bantu banji ne,+ mambo Yehoba wafuukulapo aye mwine kwimwalula ke bantu banji.+ 23 Pakuba amiwa, kechi nakonsha kumulenga mambo Yehoba ne kuleka kwimulombelako ne, nkatwajijila kwimufunjisha mu jishinda jawama kabiji jaoloka. 24 Akamwaingatu Yehoba+ ne kumwingijila mu bukishinka* na muchima wenu yense, vulukai bintu byakukumya byo emubila.+ 25 Bino inge mukoobengatu bintu byatama, bakemuvizha+ anweba ne mfumu wenu pamo.”+

13 Saulo wajinga na myaka ya kusemwa . . .* byo aikele mfumu,+ kabiji walamine bena Isalela myaka ibiji. 2 Saulo wasajile banabalume 3,000 mu bena Isalela; pa bano, banabalume 2,000 bajinga ne Saulo ku Mikimashi ne mu mpunzha ya mitumba ya Betele, kabiji banabalume 1,000 bajinga ne Yonafwanyi+ ku Gibea+ wa mu Benjamina. Bantu bonse bashala wibambijile kubwela ku matente abo. 3 Kabiji Yonafwanyi watapile bashilikale ba bena Filishitiya+ bajinga mu Geba,+ ne bena Filishitiya baumvwine kino. Saulo wavuminye lusengo+ mu kyalo kyonse ne kubijika’mba: “Bahebelu bomvwe!” 4 Bena Isalela bonse baumvwine uno sawakya wa kuba’mba: “Saulo watapa bashilikale ba bena Filishitiya, pano bena Isalela bebashikwa ku bena Filishitiya.” Onkao mambo, bantu bebakambizhe kulondela Saulo ku Giligala.+

5 Bena Filishitiya nabo bakonkene pamo amba balwe na bena Isalela, bajinga na makalaki a nkondo 30,000 ne benda pa bambili bajinga 6,000 ne bashilikale bavujile bingi nobe busenga bwa ku kitulu kya kalunga ka mema;+ kabiji bayile ne kukatebelela ku Mikimashi ku musela wa Bete-avena.+ 6 Kabiji bena Isalela bamwene’mba baji mu lukatazho, mambo bapelejilwe bingi; onkao mambo, bantu bakafyamine mu mayengo,+ mu mimbwa, mu mabwe akatampe, mu bibamba bya panshi* ne mu mishima* mwabula mema. 7 Bahebelu bamo baabukile Yodano ne kuya ku kyalo kya Gadi ne Gileada.+ Bino Saulo washajile mu Giligala, ne bantu bonse bamulondejilenga bazakaminenga. 8 Wapembelejilenga pa moba atanu na abiji poso kimye kyatongwele Samwela byo kyafikile, bino Samwela kechi waishile ku Giligala ne, kabiji bantu batendekele kumupalañana Saulo. 9 Kepo Saulo aambile’mba: “Ndetelai bitapisho bya kusoka ne bitapisho bya mutende.” Kabiji watapishishe kitapisho kya kusoka.+

10 Bino byo apwishishetu kutapisha kitapisho kya kusoka, Samwela wasolomokele. Kepo Saulo ayile na kumutundaila ne kumwimuna. 11 Ponkapo Samwela wamushikishe’mba: “Ñanyi kintu kyo wauba?” Saulo wamukumbwile’mba: “Naji kumona’mba bantu babena kumpalañana,+ ne anweba kechi mwaji kufika pa kimye kyo mwatongwele ne, kabiji bena Filishitiya bakonkenenga pamo ku Mikimashi.+ 12 Onkao mambo, naji kulanguluka namba, ‘Bena Filishitiya basakwiya na kulwa ne amiwa ku Giligala, kabiji kechi nalomba kala bibusa* kwi Yehoba ne.’ Onkao mambo, naji kumona’mba nafwainwa kutapisha kitapisho kya kusoka.”

13 Ponkapo Samwela waambijile Saulo amba: “Wauba kintu kya kubula maana. Kechi wakookela mukambizho Yehoba Lesa wobe ye akukambizhe ne.+ Inge waji kukookela, Yehoba inge waikajika bufumu bobe kikupu pa bena Isalela. 14 Pano bufumu bobe kechi bukekala myaka yavula ne.+ Yehoba ukamonapo muntu wamutokela ku muchima,+ kabiji Yehoba ukamutongola kwikala ntangi wa bantu banji,+ mambo obewa kechi wakookela byakukambizhe Yehoba ne.”+

15 Ponkapo Samwela wafumineko ku Giligala ne kuya ku Gibea wa mu Benjamina, kabiji Saulo wabajile bantu; bo ashajile nabo bajinga nobe banabalume 600.+ 16 Saulo, mwananji aye Yonafwanyi ne bantu bo bashajile nabo baikelenga mu Geba+ wa mu Benjamina, kabiji bena Filishitiya batebelejile ku Mikimashi.+ 17 Kabiji mazhita afumanga mu kampu wa bena Filishitiya mu bipanyi bisatu. Kipanyi kimo kyayanga mu jishinda jaya ku Ofula, ku kyalo kya Shuwala; 18 kipanyi kya bubiji kyayanga mu jishinda jaya ku Bete-holona;+ ne kipanyi kya busatu kyayanga mu jishinda jaya ku mupaka watalañana na kimpachiko kya Zeboimu, kiji kwipi na kiselebwa.

19 Mu bena Isalela kechi mwajingapo muntu nangwa umo wayukile kubunda ne, o ene mambo bena Filishitiya o baambilenga’mba: “Bahebelu bakeya kubunda mapoko nangwa mafumo.” 20 Onkao mambo, bena Isalela bonse bayangatu ku bena Filishitiya na kunonesha mapulao, mapiki, tupasa ne bikwakwa byabo. 21 Mutengo wa kunonesha mapulao, mapiki, mafoloko a meno asatu, tupasa ne mingele ya kusenda pa kufunga banyama wajinga pimu* umo. 22 Kabiji mu juba ja nkondo, kafwako muntu wajinga na mpoko nangwa jifumo pa bantu bajinga ne Saulo ne Yonafwanyi ne;+ kanatu Saulo ne mwananji aye Yonafwanyi bo bajinga na bilwilo.

23 Kabiji jibumba* ja bashilikale ba bena Filishitiya jayile ne kukapita ku kinkunenke kya ku Mikimashi.+

14 Juba jimo Yonafwanyi+ mwana wa kwa Saulo waambijile wa mwingilo wamusendelanga bilwilo amba: “Twaya twabukile ku bushiya ku kampu wa bashilikale ba bena Filishitiya.” Bino kechi wabuujile bashanji ne. 2 Saulo waikele kunsa ya muzhi wa Gibea+ munshi ya kichi kya mapomegulanchi ku Migilona, kabiji wajinga na banabalume nobe 600.+ 3 (Kabiji Ahiya mwana wa kwa Ahituba,+ mulongo wa kwa Ikabodi,+ mwana wa kwa Finease,+ Finease mwana wa kwa Eli,+ ñanga wa Yehoba wa ku Shilo,+ wavwajile kajilaya kabula maboko.)+ Ne bantu kechi bayukile’mba Yonafwanyi waya ne. 4 Kabiji pakachi ka bimpachiko Yonafwanyi po akebelenga kwabukila amba aye ku kampu wa bashilikale bena Filishitiya, pajinga bimabwe bikatampe bibiji byapasha meno ku mbaji yonse ibiji; jizhina ja jibwe jimo jajinga Bozeza ne jikwabo jajinga Sene. 5 Jibwe jikatampe jimo jajinga nobe jishiki ku kabeta ka ku buyeke kutala ku Mikimashi, ne jikwabo jajinga ku kabeta ka ku bulenge kutala ku Geba.+

6 Yonafwanyi waambijile wamusendelanga bilwilo amba: “Twaya twabukile ku kampu wa bano bashilikale babula kuya ku mukanda.+ Apo kampe Yehoba wakonsha kwitulwilako, mambo kafwako kintu kyakonsha kukanya Yehoba kupokolola bantu kwingijisha bantu bavula nangwa bacheche ne.”+ 7 Ponkapo wamusendelanga bilwilo wamwambijile’mba: “Ubai kyonse kyasaka muchima wenu. Yainga konse ko mukeba, ne amiwa nsakwimulondelanga konse kusaka kuya muchima wenu.” 8 Kepo Yonafwanyi aambile’mba: “Tusakwabukila ku bano bantu ne kwisolola kwi abo. 9 Inge betwambile’mba, ‘Imanaitu poso twiye ko muji!’ tusakwimana ponka po tuji kwa kubula kuya ko baji. 10 Pano inge bambe’mba, ‘Iyai mulwe ne atweba!’ tusakuya, mambo Yehoba usakwibapana kwi atweba. Kino kyo kisakwikala kiyukilo kyetu.”+

11 Kepo bonse babiji besolwele ku bashilikale ba bena Filishitiya. Bena Filishitiya baambile’mba: “Talai! Bahebelu babena kwiya kufuma mu mimbwa mo baji kufyama.”+ 12 Kepo banabalume bajinga mu kampu baambijile Yonafwanyi ne wamusendelanga bilwilo amba: “Iyai kuno, twimukambule!”+ Ponkapo Yonafwanyi waambijile wamusendelanga bilwilo amba: “Ndondele, mambo Yehoba usakwibapana mu maboko a bena Isalela.”+ 13 Kabiji Yonafwanyi watuntukile na kukalaba, ne wamusendelanga bilwilo wamulondejilenga; kabiji Yonafwanyi watendekele kwipaya bena Filishitiya, ne wamusendelanga bilwilo wamulondejilenga saka ebepaya. 14 Kimye kitanshi Yonafwanyi ne wamusendelanga bilwilo kyo balukukile, baipayile banabalume 20 pa mpunzha palepa nobe mweeo ujima bañombe mu juba jimo.

15 Kabiji moyo wakwachile bantu bonse bajinga mungye ne bonse bajinga mu kampu wa bashilikale, ne mazhita abo+ aumvwine moyo. Ntanda yatendekele kujikima, ne moyo wa kuchiina Lesa wibakwachile. 16 Bakasopa ba kwa Saulo bajinga mu Gibea+ wa mu Benjamina, baumvwine’mba kiwowo kyakumbana konse.+

17 Saulo waambijile bantu bo ajinga nabo amba: “Balai bantu, mumone inge paji wafumapo.” Byo babajile bantu, bataaine kuba’mba Yonafwanyi ne wamusendelanga bilwilo bafwapo. 18 Kepo Saulo aambijile Ahiya+ amba: “Letai Jikwachi ja Lesa wa kine kuno!” (Mambo Jikwachi ja Lesa wa kine jajinga na bena Isalela pa kyokya kimye.*) 19 Saulo byo aambilenga na ñanga, kiwowo mu kampu wa bena Filishitiya kyayilengatu na kubaya. Ponkapo Saulo waambijile ñanga amba: “Leka byo ubena kuba.”* 20 Onkao mambo, Saulo ne bantu bonse bo ajinga nabo bakonkene pamo ne kuya ku nkondo, kabiji bataaine kuba’mba bena Filishitiya bealukilamo abo bene na mapoko, ne milukuchi yabayile bingi. 21 Kabiji ne Bahebelu bajinga ku lubaji lwa bena Filishitiya bo baishile nabo mu kampu, benungile ku bena Isalela bo batangijilenga kwi Saulo ne Yonafwanyi. 22 Banabalume bonse bena Isalela bafyamine+ mu kibunji kya mitumba kya mu Efelaimu byo baumvwine’mba bena Filishitiya banyema, ne abo baishile na kwinungako ne kwibapupila mu nkondo. 23 Onkao mambo, Yehoba wapokolwele bena Isalela mu joja juba,+ kabiji balwilenga nabo kukafikatu ne ku Bete-avena.+

24 Bino banabalume bena Isalela bajinga mu lukatazho lukatampe pa joja juba, mambo Saulo wachipishe bantu amba: “Wafingwa muntu yense usakuja kajo* saka jikyangye kuzhika nangwa saka nkyangye kushinkanya na balwanyi bami!” Byonkabyo, kafwako muntu nangwa umo wajiilepo kajo ne.+

25 Ne bantu* bonse bayile mu jisaka, kabiji bataaine buki panshi. 26 Bantu byo bayile mu jisaka, bamwene buki saka busuuma, bino kafwako nangwa umo wajiilepo ne, mambo bachiine luchipo. 27 Bino Yonafwanyi kechi waumvwine bashanji byo bachipishenga bantu ne,+ onkao mambo, watanyikile kamama kajinga mu kuboko kwanji ne kutumpa mu buki. Byo abwezhezhe kuboko pa kanwa kanji ne kuja, meso anji ayemenenga. 28 Ponkapo muntu umo waambile’mba: “Bashenu baji kuchipisha bantu kyakosa amba, ‘Wafingwa muntu yense usakuja kajo lelo!’+ O ene mambo bantu o bakookela.” 29 Nangwa byonkabyo, Yonafwanyi waambile’mba: “Batata baleta lukatazho lukatampe* mu kyalo. Talai meso ami byo abena kuyema na mambotu a kuba’mba naji kutompa pa buki bucheche. 30 Inge kyaji kuwama bantu kukasuluka kuja+ ku bipukulwa bya balwanyi babo byo baji kutaana lelo jino! Inge kyajinga bino, bena Filishitiya bavula bingi inge bafwa.”

31 Pa joja juba, batwajijile na kutapa bena Filishitiya kufuma ku Mikimashi kukafika ne ku Ayalona,+ kabiji bantu bakookele bingi. 32 Onkao mambo, bantu baubile lwiso ne kunyemena pa bipukulwa, kabiji basendele mikooko ne bañombe ne baana ba bañombe ne kwibepaila panshi, kabiji bajiile nyama kumo na mashi ayo.+ 33 Kepo bamubuujile Saulo amba: “Bantu bamulenga mambo Yehoba mambo baja nyama iji na mashi.”+ Ponkapo aye wibambijile’mba: “Mwauba kintu kya kubula bukishinka. Alumunai jibwe jikatampe ne kwijileta kwi amiwa lonka luno.” 34 Kepo Saulo aambile’mba: “Yainga ku bantu bonse ne kwibabuula amba, ‘Muntu yense wafwainwa kuleta ñombe ne mukooko wanji ne kumwipayila kuno ne kumuja. Kange mumulenge mambo Yehoba na mambo a kuja nyama iji na mashi ne.’”+ Byonkabyo muntu yense waletele ñombe wanji abwa bufuku ne kumwipayila konkakwa. 35 Kabiji Saulo washimikile kya kusokelapo bitapisho kwi Yehoba.+ Kino kyo kya kusokelapo bitapisho kitanshi kyo ashimikijile Yehoba.

36 Kepo Saulo aambile’mba: “Twayai tupupile bena Filishitiya bufuku ne kwibapukula bintu kufika ne lukelo. Kechi tusakupulushapo muntu nangwa umo ne.” Ne abo baambile’mba: “Ubai kintu kyonse kyo mwamona’mba kyawama.” Kepo ñanga aambile’mba: “Twayai tufwenye kwipi kwi Lesa wa kine ponka pano.”+ 37 Ne Saulo wamwipwizhe Lesa amba: “Nanchi nebapupile bena Filishitiya nyi?+ Abya musakwibapana mu maboko a bena Isalela nyi?” Bino aja juba Lesa kechi wamukumbwile ne. 38 Onkao mambo, Saulo waambile’mba: “Iyai kuno, anweba bakulumpe ba bantu bonse, muyuke bubi bo twauba lelo jino. 39 Mambo byonkatu Yehoba byo aji na bumi, yenka wapulwishe bena Isalela, nangwatu tutaane’mba Yonafwanyi mwanami, wafwainwa kufwa.” Bino kafwako muntu nangwa umo wamukumbwile ne. 40 Kepo aambijile bena Isalela bonse amba: “Ikalai ku lubaji lumo, ne amiwa ne Yonafwanyi mwanami tusakwikala ku lubaji lukwabo.” Ponkapo bantu baambijile Saulo amba: “Ubai kyonse kyo mwamona’mba kyawama.”

41 Kepo Saulo aambijile Yehoba amba: “Anweba Lesa wa Isalela, kumbulai kupichila mu Tumimu!”+ Kabiji Yonafwanyi ne Saulo bebasajile, ne bantu bonse bakasulukile. 42 Ponkapo Saulo waambile’mba: “Tai bubale+ tuyuke inge amiwa nangwa mwanami Yonafwanyi.” Ne Yonafwanyi bamusajile. 43 Kepo Saulo ashikishe Yonafwanyi amba: “Mbuule, ñanyi kintu kyo wauba?” Ponkapo Yonafwanyi wamukumbwile’mba: “Naji kutompapotu tubuki tucheche na kamama kajinga mu kuboko kwami.+ Amiwa bano! Ngipayai!”

44 Kepo Saulo aambile’mba: “Lesa ankambule bingi inge ubule kufwa obewa Yonafwanyi.”+ 45 Bino bantu baambijile Saulo amba: “Pano Yonafwanyi yenka waleta lupulukilo lukatampe+ mu Isalela afwe byepi? Akyo kizhila! Byonkatu Yehoba byo aji na bumi, kafwako lusuki nangwa umo wa ku mutwe wanji usakuponena panshi ne, mambo Lesa ye waji kumukwasha pa byo aji kuba lelo jino.”+ Byonkabyo, bantu bamupokolwele* Yonafwanyi, kabiji kechi wafwile ne.

46 Kabiji Saulo wikilekele kupupila bena Filishitiya, ne bena Filishitiya bayile ku nyaunda yabo.

47 Saulo wakoseshe bufumu bwanji mu bena Isalela kabiji walwile na balwanyi banji konse konse, walwile na bena Moabu,+ bena Amonyi,+ bena Edomu,+ bamfumu ba ku Zoba+ ne bena Filishitiya;+ kabiji konse ko ayilenga wibashinjilenga. 48 Kabiji walwile kwa kubula moyo ne kushinda bena Amaleki+ ne kupokolola bena Isalela ku maboko a bebapukwilenga bintu.

49 Baana ba kwa Saulo bajinga Yonafwanyi, Ishivi ne Malikishua.+ Kabiji wajinga ne na baana ba bakazhi babiji; mukulumpe wajinga Melaba,+ ne mwanyike wajinga Mikala.+ 50 Jizhina ja muka Saulo wajinga Ahinoamu mwana wa kwa Ahimaza. Jizhina ja mukulumpe wa nzhita yanji wajinga Abina+ mwana wa kwa Nela, mulongo wa bashanji Saulo. 51 Shanji Saulo wajinga Kisha,+ kabiji Nela+ shanji Abina wajinga mwana wa kwa Abiela.

52 Kwajinga nkondo ikatampe na bena Filishitiya mu moba onse a kwa Saulo.+ Saulo waubangatu inge wamona muntu wakosa ne kuchinchika, wamutwezha bushilikale.+

15 Kepo Samwela aambijile Saulo amba: “Yehoba wantumine kukushinga manyi amba wikale mfumu wa bantu banji bena Isalela;+ pano umvwa byaamba Yehoba.+ 2 Yehoba wa mabumba waamba’mba: ‘Nkazhachisha bena Amaleki pa bintu byo baubile ku bena Isalela byo bebalwishishenga kimye kyo bajinga pa lwendo kufuma mu Ijipita.+ 3 Pano yanga, ukepaye bena Amaleki,+ ne kwibonawina+ pamo na bintu byonse byo baji nabyo. Kechi wafwainwa kwibaleka* ne; wafwainwa kwibepaya,+ banabalume ne banabakazhi, baana ne baana bakyamwa, bañombe ne mikooko, ne bangamela ne bambongolo.’”+ 4 Saulo waichile bantu ku Telaimu ne kwibabala: Bajinga bashilikale 200,000 benda panshi ne banabalume bena Yuda 10,000.+

5 Saulo wayile kwipi na muzhi wa Amaleki ne kubelamina mu kimpachiko.* 6 Kepo Saulo aambijile bena Keni+ amba: “Fumaiko ku bena Amaleki, kuchina’mba nakemwipayila pamo nabo.+ Mambo anweba mwamwesheshe butemwe bubula kwaluka ku bena Isalela+ bonse kimye kyo bafuminenga mu Ijipita.” Byonkabyo bena Keni bafumineko ku bena Amaleki. 7 Byo apwishishe kuba bino, Saulo waipayile bena Amaleki+ kufuma ku Havila+ kukafika ne ku Shula,+ kwipi na Ijipita. 8 Wakwachile Agagi+ mfumu wa Amaleki kwa kubula kumwipaya, bino bantu bonse bashala wibepayile na mpoko.+ 9 Nangwa byonkabyo, Saulo ne bantu banji bakaine kwipaya* Agagi ne bilelwa byonse byawama, bañombe balume, banyama banuna, mikooko ilume, ne bintu byonse byawamine.+ Kechi bakebelenga kwibyonauna ne. Pakuba bintu byonse byabujile kunema ne byo babujilenga kukeba, byonse bebyonawine.

10 Kepo Yehoba abuujile Samwela amba: 11 “Nelangulusha* byo natongwele Saulo kwikala mfumu, mambo waleka kundondela kabiji kechi wauba byo naambile ne.”+ Samwela wazhingijile bingi, kabiji watwajijiletu na kujijila Yehoba bufuku bonse.+ 12 Samwela byo aimene lukelo kuya na kusambakana Saulo, Samwela bamubuujile’mba: “Saulo wayile ku Kamela,+ kabiji waimikile kibumbwaloba kyanji konkakwa.+ Kepo afumineko ne kuya ku Giligala.” 13 Samwela byo afikile ko ajinga, Saulo wamwambijile’mba: “Yehoba emupeshe. Nauba byonka byaambile Yehoba.” 14 Bino Samwela waambile’mba: “Nanchi kuno kujila kwa banyama ne kujila kwa bañombe ko mbena kumvwa kwatala mwepi?”+ 15 Kepo Saulo amukumbwile’mba: “Bebafumishe ku bena Amaleki, mambo bantu bakaine kwipaya* banyama bawama ne bañombe kuba’mba bakebalambule kwi Yehoba Lesa wenu; pakuba byonse byashajile twibyonawine.” 16 Ponkapo Samwela waambijile Saulo amba: “Kileke! Leka nkubuule byaji kuñambila Yehoba bufuku.”+ Ne aye wamwambijile’mba: “Ambai!”

17 Samwela waambile’mba: “Nanchi kechi wimwenengatu wabula kunema+ kimye kyo bakutongwele kwikala ntangi wa mikoka ya bena Isalela, ne Yehoba byo akushingile manyi amba wikale mfumu wa bena Isalela nenyi?+ 18 Yehoba wakupele mwingilo ne kukwambila’mba, ‘Yanga ukonaune bena Amaleki bantu babi.+ Ukalwe nabo kufikatu ne byo ukebonauna.’+ 19 Pano mambo ka o wabujile kukookela jiwi ja Yehoba? Pakuba obewa wanyemejile pa bipukulwa+ na mambo a lwiso ne kuba bintu byatama kwi Yehoba!”

20 Nangwa byonkabyo, Saulo waambijile Samwela amba: “Bino nakookejile byaambile Yehoba! Nayile ko antumine Yehoba, kabiji naletele Agagi mfumu wa bena Amaleki, kabiji naipayile bena Amaleki.+ 21 Bino pa bintu byo bafwainwe konauna, bantu basendelepo mikooko ne bañombe bawama kuba’mba bakebalambule kwi Yehoba Lesa wenu ku Giligala.”+

22 Kepo Samwela aambile’mba: “Nanchi Yehoba usekela mu milambo ya kusoka ne mu bitapisho+ kukila kukookela jiwi ja Yehoba nyi? Umvwa! Kukookela kwanema kukila kitapisho,+ ne kuta muchima ku bintu kwanema kukila mafuta+ a mikooko ilume; 23 mambo bunsatuki+ bujitu pamo na mambo a kupongesha,+ ne kuba bintu na kwilundumika po pamotu na kuba bingelekezha ne kupopwela bankishi.* Byo wakana byaambile Yehoba,+ ne aye wakukana kwikala mfumu.”+

24 Kepo Saulo aambijile Samwela amba: “Nalenga mambo, mambo kechi nalondejile mukambizho wa Yehoba ne byambo byenu ne, mambo nachiine bantu ne kumvwina byo baambile. 25 Pano napopwela, ndekelaiko mambo, kabiji tuyile pamo kuba’mba nkafukame kwi Yehoba.”+ 26 Bino Samwela waambijile Saulo amba: “Kechi nsakubwela ne obewa ne, mambo wakana byaambile Yehoba, ne Yehoba wakukana kutwajijila kwikala mfumu wa bena Isalela.”+ 27 Samwela byo aalulukile amba ayenga, Saulo wamukwachile ku mufumo wa mukangyo wabula maboko, bino watabukile. 28 Kepo Samwela amwambijile’mba: “Lelo jino Yehoba watabula bufumu bwa Isalela kufuma kwi obewa, kabiji ukebupana ku mukwenu wawama kukila obewa.+ 29 Kabiji aye wa Bulume wa bena Isalela+ kechi ubepa+ nangwa kupimpula milanguluko yanji* ne, mambo aye kechi muntu kya kuba’mba apimpule milanguluko yanji* ne.”+

30 Ponkapo waambile’mba: “Nalenga mambo. Bino nnemekai ku bakulumpe ba bantu bami ne ku bena Isalela. Tubwelele pamo, ne amiwa nkamufukamina Yehoba Lesa wenu.”+ 31 Kabiji Samwela wayile kunyuma ya kwa Saulo, ne Saulo wafukamine kwi Yehoba. 32 Kabiji Samwela waambile’mba: “Muletai kwi amiwa Agagi mfumu wa bena Amaleki.” Ne Agagi wayile kwi aye kwa kubula kwakamwa,* mambo Agagi walangulukilenga amba: ‘Kechi basakungipaya ne.’ 33 Nangwa byonkabyo, Samwela waambile’mba: “Byonkatu mpoko yobe byo yalengela banabakazhi kufwisha baana, ne bainobe nabo basakukilamo kwikala na bulanda pa banabakazhi bonse.” Ponkapo Samwela watetawile Agagi mu bipimvwa ku meso a Yehoba ku Giligala.+

34 Kepo Samwela ayile ku Lama, ne Saulo wayile ku nzubo yanji ku Gibea. 35 Samwela kechi wamonañenepo ne Saulo jikwabo ne, kufikatu ne juba jo afwile, mambo Samwela wayile na kumujila Saulo.+ Kabiji Yehoba wilangulwishenga pa kutongola Saulo kwikala mfumu wa bena Isalela.+

16 Kepo Yehoba ashikishe Samwela amba: “Myaka inga yo ukekala na kujila Saulo+ byo namukana kwikala kalama wa bena Isalela?+ Yuzha manyi mu lusengo wobe+ ne kuya. Nsakukutuma kwi Yese+ mwina Betelema, mambo pa baana banji ba balume nesajilapo mfumu.”+ 2 Bino Samwela waambile’mba: “Nakonsha kuya byepi? Mambo Saulo inge akomvwe kino, ukangipaya.”+ Yehoba wakumbwile’mba: “Senda mwana ñombe mulume ne kwamba’mba, ‘Naiya na kutapisha kitapisho kwi Yehoba.’ 3 Ukete Yese ku kitapisho; po po nkakubuula bya kuba. Wafwainwa kumushinga manyi muntu ye nkakubuula.”+

4 Samwela waubile byaambile Yehoba. Byo afikile ku Betelema,+ bakulumpe ba mu muzhi bazakaminenga byo bamumwene, kabiji baambile’mba: “Mwaiya mu mutende nyi?” 5 Aye wibakumbwile’mba: “Ee, naiya mu mutende. Naiya na kutapisha kitapisho kwi Yehoba. Izhijikai ne kuya ne amiwa ku kitapisho.” Wazhijikile Yese ne baana banji, kabiji wibechile ku kitapisho. 6 Byo baishilenga, wamwene Eliaba+ ne kwamba’mba: “Kinetu awe waimana ku meso a Yehoba ye mushingwa wanji.” 7 Bino Yehoba wabuujile Samwela amba: “Kange ute muchima pa byo abena kumweka nangwa kulepa kwanji ne,+ mambo namukana. Mambo muntu byo amona kechi byo bimona Lesa ne, mambo muntu umonatu pangye ya mubiji, pakuba Yehoba utala mu muchima.”+ 8 Kepo Yese aichile Abinadaba+ ne kumuleta kwi Samwela, bino aye waambile’mba: “Nangwatu uno kechi bamusala kwi Yehoba ne.” 9 Kabiji Yese waletele Shama,+ bino aye waambile’mba: “Nangwatu uno kechi bamusala kwi Yehoba ne.” 10 Byonkabyo, Yese waletele baana banji batanu na babiji kwi Samwela, bino Samwela waambijile Yese amba: “Pa bano kafwapo Yehoba ye asala ne.”

11 Kepo Samwela ashikishe Yese amba: “Nanchi bano bo baana bobe ba balume bonse nyi?” Aye wakumbwile’mba: “Kwashalatu mukala;+ ubena kujiisha mikooko.”+ Kepo Samwela aambijile Yese amba: “Tumai bakumwita, mambo kechi tusakwikala na kuja ne, poso eye kuno.” 12 Byonkabyo, watumine ba kuya na kumwita kabiji bamuletele. Aye wajinga wachila bulongo, wajinga na meso atoka kabiji walambile bingi.+ Kepo Yehoba aambile’mba: “Imana umushinge manyi, mambo awe ye iye!”+ 13 Onkao mambo, Samwela washikwile lusengo wa manyi+ ne kumushinga manyi ne bakolojanji saka bamonako. Kabiji mupashi wa Yehoba watendekele kupa Davida bulume kufuma pa joja juba kuya ne kulutwe.+ Byo apwishishe, Samwela waimene ne kuya ku Lama.+

14 Kabiji mupashi wa Yehoba wafuminepo pe Saulo,+ ne Yehoba waswishishe mupashi watama kutendeka kumukatazha.+ 15 Bakalume ba kwa Saulo bamwambijile’mba: “Mwamona’mba Lesa waswisha mupashi watama ubena kwimukatazha. 16 Pano nkambo, kambizhai bakalume benu kuba’mba bakebe muntu wayuka kujizha kyansa.+ Kimye kyonse inge Lesa waswisha mupashi watama kwiya pe anweba, aye ukajizhanga kyansa, kabiji mukomvwanga bulongo.” 17 Byonkabyo, Saulo waambijile bakalume banji amba: “Nkebelai muntu wayuka kujizha, kabiji mumulete kwi amiwa.”

18 Wa mwingilo umo waambile’mba: “Umvwai! Amiwa nakyumvwapo kala mwana wa kwa Yese mwina Betelema byo ajizha bulongo, ye kilobo wachinchika ne kukosa.+ Aye wayuka kwamba kabiji walamba bingi,+ kabiji Yehoba uji nanji.”+ 19 Ponkapo Saulo watumine miluwe kwi Yese ne kumwambila’mba: “Mutumai kwi amiwa mwanenu Davida, yenka ubena kufunga jitanga.”+ 20 Kabiji Yese washikwile shinkwa ne fukuta wa binyu ne mwana mbuzhi ne kwibibika pa mbongolo, kabiji wibitumine kwi Saulo pamo na mwananji aye Davida. 21 Byonkabyo, Davida waishile kwi Saulo ne kutendeka kumwingijila.+ Saulo wamutemenwe bingi, kabiji waikele ke wa kumusendela bilwilo. 22 Saulo watumine mawi kwi Yese amba: “Mwane mulekai Davida ekale na kuñingijila, mambo namutemwa bingi.” 23 Kimye kyonse Lesa kyo aswishanga mupashi watama kwiya pe Saulo, Davida washikulanga kyansa ne kwikijizha, kabiji Saulo waumvwanga bulongo, ne mupashi watama wafumanga pe aye.+

17 Bena Filishitiya+ bakonkenye nzhita* yabo pamo ne kuya na kulwa nkondo. Bakonkene pamo ku Soko+ wa mu Yuda, kabiji batebelejile pakachi ka Soko ne Azeka+ mu Efesa-daimu.+ 2 Saulo ne banabalume bena Isalela bakonkene pamo ne kutebelela mu Kimpachiko* kya Ela,+ kabiji betanchikile kuya na kulwa na bena Filishitiya. 3 Bena Filishitiya bajinga ku bushiya bumo bwa mutumba, ne bena Isalela nabo bajinga ku bushiya bukwabo bwa mutumba, pakachi pajinga kimpachiko.

4 Kabiji mu kampu wa bena Filishitiya mwafumine kitonzhi umo; wa ku Gata,+ jizhina janji wajinga Goliata.+ Kabiji walepele makyubichi atanu na umo ne kichika.* 5 Wavwajile kampompo ka mukuba, kabiji wavwajile ne kivwalo kyajinga na byela byatentakana nobe mabamba. Kino kivwalo kya byela bya mukuba kyanemene mashekele 5,000.*+ 6 Ku mikupa yanji wavwajileko byela bya mukuba, kabiji wasendele ne mpula+ ya mukuba munyuma. 7 Musako wa jifumo janji wajinga nobe kakonkolo ko bapikwilapo bisapi,+ ne kyela kya jifumo jine kyanemene mashekele 600;* ne wamusendejilenga jikebo janji watangijileko kulutwe. 8 Kepo aimene ne kubijika ku nzhita ya bena Isalela+ amba: “Mambo ka o mwaishila ne kwitanchika? Nanchi amiwa kechi nemwina Filishitiya, kabiji anweba kechi mwi bakalume ba kwa Saulo nenyi? Pano salai mwanamulume wa kwimulwilako, kabiji mumuleke eye kwi amiwa. 9 Inge alwe ne amiwa ne kungipaya, tusakwikala bakalume benu. Pano inge namushinde ne kumwipaya, musakwikala bakalume betu kabiji muketwingijilanga.” 10 Kabiji uno mwina Filishitiya waambile’mba: “Lelo mbena kukosamika* nzhita ya bena Isalela.+ Mpai mwanamulume wa kulwa nanji!”

11 Saulo ne bena Isalela bonse byo baumvwine byambo bya uno mwina Filishitiya, baakaminwe bingi ne kuba moyo mukatampe.

12 Davida wajinga mwana wa mwina Efulata+ wa ku Betelema+ wa mu Yuda wa jizhina ja Yese,+ yenka wajinga na baana ba balume batanu na basatu,+ kabiji mu moba a kwa Saulo aye saka akota kala. 13 Baana ba kwa Yese basatu bakulumpe bayile ne Saulo ku nkondo.+ Mazhina a bano baana basatu bayile ku nkondo bajinga Eliaba+ mubeji, Abinadaba+ ndondela mubeji ne Shama+ wa busatu. 14 Davida ye wajinga mwanyike pa bonse,+ kabiji bano bakolojanji basatu bo balondejile Saulo.

15 Davida wayanga kwi Saulo ne kubwela na kufunga mikooko+ ya bashanji ku Betelema. 16 Uno mwina Filishitiya waiyanga lukelo ne mabanga na kwimana pa mpunzha pantutu pamo pa moba 40.

17 Yese waambijile mwananji aye Davida amba: “Senda uno efa* wa kajo kakukanga ne bano bashinkwa jikumi utwajile bukiji bakolojobe ku kampu. 18 Usende ne bino bibese jikumi bya mukaka wachimba utwajile mukulumpe wa kiumbi; kabiji ukamone bakolojobe inge bajitu bulongo, bino wiye witubuule.” 19 Abo bajinga ne Saulo ne banabalume bonse bena Isalela mu Kimpachiko* kya Ela,+ kuba’mba balwe na bena Filishitiya.+

20 Byonkabyo, Davida wabuukile lukelokelo ne kushila muntu umo mikooko; kepo alongele bipe ne kuya byonkatu Yese byo amukambizhe. Byo afikile ku kampu, bashilikale balupukilenga kuya ku nkondo saka boba kiwowo kya nkondo. 21 Bena Isalela ne bena Filishitiya betanchikile, kabiji ano mazhita onse atalañene. 22 Ponkapo Davida washile bipe byanji ku muntu ulama bipe ne kunyemena kwajinga nzhita. Byo afikile, waimwine bakolojanji.+

23 Byo akisambilenga nabo, kwaishile kitonzhi wa jizhina ja Goliata,+ mwina Filishitiya wa ku Gata. Wafumine kwajinga nzhita ya bena Filishitiya ne kutendeka kunenañana byonka byo akelwanga kuba,+ kabiji Davida wamumvwine. 24 Banabalume bonse bena Isalela byo bamumwene, bamunyemene saka baakamwa.+ 25 Banabalume bena Isalela baambilenga’mba: “Mwamumona awa muntu ubena kwiya? Wiya na kukosamika* bena Isalela.+ Mfumu ukapana bya bunonshi ku muntu ukepaya yewa muntu, ukamupa mwananji wa mukazhi+ kabiji ba mu nzubo ya bashanji bakekala baana ba bene mu Isalela.”

26 Davida watendekele kushikisha bantu baimene kwipi ne aye amba: “Ñanyi kintu kyo bakamubila muntu ukepaya yewa mwina Filishitiya waimana popa ne kufumya bumvu pa bena Isalela? Nanchi uno mwina Filishitiya wabula kuya ku mukanda ye ñanyi kya kuba’mba akosamikenga* nzhita ya Lesa mumi?”+ 27 Kepo bantu bamubuujile byonkatu byo bamubuujile patanshi amba: “Abino byo byo bakamubila muntu ukamwipaya.” 28 Eliaba+ kolojanji mubeji byo aumvwine saka esamba na bantu, wamuzhingijile Davida ne kumushikisha’mba: “Mambo ka o waishila kuno? Kabiji ñanyi ye washila yoya mikooko ichechetu mungye?+ Nayukishatu bulongo kwitota kobe ne bintu byatama biji mu muchima wobe; waiyatu na kutamba nkondo.” 29 Ponkapo Davida wakumbwile’mba: “Nanchi nauba ka? Naji kushikishangatu!” 30 Onkao mambo, waalukijile ku mukwabo ne kumwipuzha bwipuzho buntutu bumo,+ ne bantu bamukumbwile byonkatu byo bamukumbwile patanshi.+

31 Byambo byaambile Davida byaumvwanyikile kabiji bamubuujile ne Saulo. Ne aye watumine bakumwita. 32 Davida wabuujile Saulo amba: “Muntu nangwa umo kange akamwe na mambo a uno muntu ne. Amiwa kalume wenu nsakuya na kulwa na uno mwina Filishitiya.”+ 33 Bino Saulo waambijile Davida amba: “Kechi wakonsha kulwa na uno mwina Filishitiya ne, mambo wimwanyike,+ kabiji aye watendekele bushilikale* kufumatu ku bwanyike bwanji.” 34 Kepo Davida abuujile Saulo amba: “Amiwa kalume wenu nafungilenga jitanga ja batata, kabiji kwaishile bokwe,+ ne mbeyala, kabiji byonse bino byakwachilepo mukooko pa jitanga. 35 Namulondejile ne kumukozha ne kupokolola mukooko ku kanwa kanji. Byo ambuukijile bukaji, namukwachile ku mubanga kabiji namwimbile ne kumwipaya. 36 Amiwa kalume wenu naipayile bokwe ne mbeyala, ne uno mwina Filishitiya wabula kuya ku mukanda usakwikala nobe bano banyama, mambo wakosamika* nzhita ya Lesa mumi.”+ 37 Kabiji Davida wanungilepo’mba: “Yehoba yenka wampokolwele ku ngala ya bokwe ne ya mbeyala, ye usakumpokolola ku maboko a uno mwina Filishitiya.”+ Ponkapo Saulo waambijile Davida amba: “Yanga, kabiji Yehoba ekale ne obewa.”

38 Saulo wavwikile Davida bivwalo byanji. Wamuvwikile kampompo ka mukuba, kabiji wamuvwikile ne kivwalo kya byela. 39 Kabiji Davida wakashijile mpoko ku kivwalo kyanji ne kweseka kwenda, bino wakankelwe, mambo kechi wapijilwe ne. Davida waambijile Saulo amba: “Nakankalwa kwenda na bino bintu, mambo kechi nebipijilwa ne.” Ponkapo Davida wibivuujile. 40 Kepo Davida asendele kamama kajinga mu kuboko kwanji ne kusala mabwe anguzha alezhima a mu mukola ne kwiabika mu fukuta wanji wa bukafunga, kabiji wajinga na kinzhipunzhipu+ mu kuboko kwanji. Kabiji watendekele kuya kwajinga uno mwina Filishitiya.

41 Mwina Filishitiya waishilengatu ku bwipi ne Davida, awa wamusendejile jikebo janji wajinga kulutwe yanji. 42 Mwina Filishitiya byo amumwene Davida, wamulengulwile mambo wajingatu mwanyike wachila bulongo ne kulamba.+ 43 Kabiji mwina Filishitiya waambijile Davida amba: “Nanchi amiwa nji nobe kabwa+ pa kuba’mba wiyenga kwi amiwa na bichi nyi?” Ponkapo mwina Filishitiya wafingile Davida mu jizhina ja balesa banji. 44 Mwina Filishitiya waambijile Davida amba: “Iya kuno, kabiji nsakupana mubiji wobe ku bañonyi ba mwiulu ne ku banyama ba mungye.”

45 Davida wakumbwile mwina Filishitiya amba: “Obewa waiya kwi amiwa na mpoko ne jifumo ne mpula,+ bino amiwa naiya kwi obewa mu jizhina ja Yehoba wa mabumba,+ Lesa wa nzhita ya bena Isalela, yenka ye wakosamika.*+ 46 Lelo jonka Yehoba usakukupana mu maboko ami,+ kabiji nsakukwipaya ne kukuchiba mutwe; kabiji lelo nsakupana mibiji ya bena Filishitiya ku bañonyi ba mwiulu ne ku banyama ba mungye; ne bantu bonse ba pano pa ntanda bakayuka’mba mu bena Isalela muji Lesa.+ 47 Bonse bakonkana kuno* basakuyuka’mba Yehoba kechi upokolola na mpoko nangwa na jifumo ne,+ mambo nkondo yo ya kwa Yehoba,+ kabiji anweba bonse usakwimupana mu maboko etu.”+

48 Ponkapo mwina Filishitiya waimene kaiye ne kwiya kwipi ne Davida, bino Davida wayile lubilo kwajinga nzhita na kusambakana mwina Filishitiya. 49 Davida wakujile kuboko mu fukuta wanji ne kutolamo jibwe ne kwijasa na kinzhipunzhipu. Waashile mwina Filishitiya pa kilungi, kabiji jibwe jatwelele pa kilungi, ne aye waponejile panshi kinkuvumene.+ 50 Byonkabyo Davida washinjile mwina Filishitiya na kinzhipunzhipu ne na jibwe; waashile mwina Filishitiya ne kumwipaya, nangwa kya kuba Davida kechi wajinga na mpoko mu kuboko kwanji ne.+ 51 Kepo Davida atwajijile kunyema ne kukemana pajinga mwina Filishitiya. Wakwachile mpoko ya mwina Filishitiya+ ne kwiisomona mu kikwa, kabiji washiinwe kuba’mba wafwa byo amuchibileko mutwe na mpoko yanji. Bena Filishitiya byo bamwene’mba kitonzhi wabo wafwa, banyemene.+

52 Ponkapo banabalume ba bena Isalela ne bena Yuda baimene ne kubijika kabiji bapupijile bena Filishitiya kufuma ku kimpachiko+ kukafika ne ku bibelo bya ku Ekelona,+ ne bena Filishitiya bo baipayile balalazhaminetu mu jishinda kufuma ku Shalaimu+ kufika ku Gata ne ku Ekelona. 53 Bena Isalela byo babwelele kufuma ko bapupijilenga bena Filishitiya, bapukwile makampu abo.

54 Kabiji Davida wasendele mutwe wa mwina Filishitiya ne kumutwala ku Yelusalema, pakuba bilwilo bya mwina Filishitiya wibibikile mu tente wanji.+

55 Kimye Saulo kyo amwene Davida saka aya na kusambakana mwina Filishitiya, washikishe Abina mukulumpe wa nzhita amba: “Abina,+ awe mwanyike+ mwana bañanyi?” Abina wakumbwile’mba: “Byonkatu byo muji na bumi,* anweba mfumu, amiwa kechi nayuka ne!” 56 Mfumu waambile’mba: “Kashikishe uyuke bashanji uno mwanyike.” 57 Davida byo abweleletu kufuma ko aipayijile mwina Filishitiya, Abina wamusendele ne kumutwala kwi Saulo saka asenda ne mutwe wa mwina Filishitiya+ mu kuboko kwanji. 58 Kepo Saulo amwipwizhe’mba: “Wi mwana wa bañanyi obewa mwanyike?” aye Davida wakumbwile’mba: “Nemwana ba Yese+ bakalume benu bena Betelema.”+

18 Davida byo apwishishetu kwamba ne Saulo, Yonafwanyi+ ne Davida baikele ke balunda ba pa muchima,* kabiji Yonafwanyi wamutemenwe byonkatu byo etemenwe aye mwine.*+ 2 Kufumatu jo ja juba, Saulo watendekele kwikala ne Davida, kabiji kechi wamuswishishe kubwela ku nzubo ya bashanji ne.+ 3 Kabiji Yonafwanyi ne Davida balayañene lulayañano,+ mambo wamutemenwe byonka byo etemenwe aye mwine.*+ 4 Yonafwanyi wavuujile mukangyo wabula maboko ye avwajile ne kupa Davida pamo na bivwalo bikwabo, mpoko yanji, buta bwanji bwa mukanda ne mushipi wanji. 5 Davida wayanga konse ko bamutumanga kwi Saulo kabiji waubanga bintu bulongo.*+ Onkao mambo, Saulo wamutongwele kwikala mukulumpe wa nzhita,+ kabiji kino kyasangajikile bantu bonse ne bakalume ba kwa Saulo.

6 Davida ne bantu bakwabo byo bafumine na kwipaya bena Filishitiya, banabakazhi baishile na kutundaila Mfumu Saulo kufuma mu mizhi yonse ya bena Isalela saka bemba+ ne kuzha ne kusangalala, saka bajizha minsakayi+ ne masense. 7 Banabakazhi basekejilenga ne kwimba’mba:

8 Saulo wazhingijile bingi,+ ne uno lwimbo wamufichishe ku muchima, mambo waambile’mba: “Davida bamutakaika na makumi a biumbi, pakuba amiwa bantakaikatu na biumbi. Kwashalatu kumupa bufumu!”+ 9 Kufumatu jonkaja juba, Saulo watajilenga Davida na kichima.

10 Juba jalondejilepo Lesa waswishishe mupashi watama kwiya pe Saulo,+ kabiji watwelele mu nzubo ne kutendeka kuba bintu nobe mukonye,* kimye Davida kyo aimbilenga nyimbo na kyansa+ byonka byo aubanga bimye bikwabo. Saulo watolele jifumo,+ 11 kabiji watayile jifumo+ saka amba’mba: ‘Nsakumwasa Davida alamachile ne ku lubumbulu!’ Bino Davida wapulukile kwi aye jibiji. 12 Saulo wamuchiinenga Davida mambo Yehoba wajinga nanji,+ pakuba kwi Saulo wafumineko.+ 13 Onkao mambo, Saulo wamufumisheko ko aingijilanga kwipi ne aye ne kumutongola kwikala mukulumpe wa kiumbi, kabiji Davida watangijilanga nzhita pa kuya ku nkondo.*+ 14 Davida watwajijile kuba bulongo*+ mu byonse byo aubanga, kabiji Yehoba wajinga nanji.+ 15 Kabiji Saulo byo amwene’mba ubena kuba bulongo, wamuchiinenga. 16 Bino bena Isalela bonse ne bena Yuda batemenwe Davida, mambo wibatangijilanga pa kuya ku makondo abo.

17 Mu kuya kwa moba Saulo waambijile Davida amba: “Tala, mwanami wa mukazhi mukulumpe aye Melaba.+ Nsakukupaye umusongole.+ Pano bino, wafwainwa kutwajijila kuchinchika ne kulwa makondo a Yehoba.”+ Mambo Saulo waambilenga mu muchima amba: ‘Amiwa kechi nkamwipaye ne. Bena Filishitiya bo bakamwipaya.’+ 18 Ponkapo Davida waambijile Saulo amba: “Yami ñanyi, kabiji balongo bami, ba mu kisemi kya batata bo bañanyi mu Isalela, kya kuba’mba ngikale muko wa mfumu?”+ 19 Nangwa byonkabyo, kimye byo kyafikile kya kupana Melaba mwana wa kwa Saulo kwi Davida, wataaine bamusongwesha kala kwi Aduliela+ mwina Mehola.

20 Bino Mikala,+ mwana wa mukazhi wa kwa Saulo, wamutemenwe Davida, kabiji Saulo bamubuujile, ne aye watemenwe. 21 Kepo Saulo aambile’mba: “Nsakumupaye ekale kitewa kwi aye, pa kuba’mba bena Filishitiya bakamwipaye.”+ Kepo Saulo abuujile Davida ja bubiji amba: “Usakwikala muko wami lelo.” 22 Kabiji Saulo wakambizhe bakalume banji amba: “Mwisambe ne Davida ku mbaji ne kumubuula’mba, ‘Umvwa! Mfumu wakutemwa, ne bakalume banji bonse bakutemwa. Onkao mambo, songola mwana mfumu.’” 23 Bakalume ba kwa Saulo byo bamubuujile Davida bino bintu, Davida wibashikishe’mba: “Nanchi mubena kulanguluka’mba kyapela kusongola mwana mfumu amiwa muyanji kabiji wabula kunema nyi?”+ 24 Kepo bakalume ba kwa Saulo bamubuujile’mba: “Abino byo byambo byaji kwamba Davida.”

25 Ponkapo Saulo waambile’mba: “Mwafwainwa kumubuula Davida amba, ‘Mfumu kechi ubena kukeba mali a masongola ne,+ ubena kukebatu tulomolomo 100+ twa bena Filishitiya, pa kuba’mba ashinkanye na balwanyi ba mfumu.’” Mambo Saulo wakebelenga amba Davida bakamwipaye ku bena Filishitiya. 26 Byonkabyo, bakalume banji bamubuujile Davida bino byambo, kabiji kino kyamutokejile ku muchima Davida kusongola mwana mfumu.+ Kimye kyo batongwele saka kikyangye kufika, 27 Davida wayile na bantu banji ne kwipaya banabalume bena Filishitiya 200, kabiji Davida waletele tulomolomo tonse kwi mfumu kuba’mba asongole mwana mfumu. Onkao mambo, Saulo wamupele Mikala mwananji wa mukazhi kwikala mukazhanji.+ 28 Saulo wayukile’mba Yehoba uji ne Davida+ ne kuba’mba mwananji Mikala wamutemwa.+ 29 Kino kyalengejile Saulo kumuchiina bingi Davida, kabiji Saulo waikele ke mulwanyi wa kwa Davida mu moba onse a bumi bwanji.+

30 Babinemanga ba bena Filishitiya bayanga na kulwa nkondo, bino kimye kyonse kyo bayanga, Davida wibashindanga* kukila bakalume bonse ba kwa Saulo;+ kabiji jizhina janji jayile bingi nkuwa.+

19 Mu kuya kwa moba, Saulo wabuujile Yonafwanyi mwananji ne bakalume banji bonse pa mambo a kwipaya Davida.+ 2 Na mambo a kuba Yonafwanyi mwana wa kwa Saulo wamutemenwe bingi Davida,+ Yonafwanyi wabuujile Davida amba: “Batata ba Saulo babena kukeba kukwipaya. Jimuka, kesha lukelo ukaye ku mpunzha kwafyamika ne kufyama konkakwa. 3 Nkalupuka ne kwimana kwipi ne batata mu bujimi mo ukafyama. Nkesamba ne batata pe obewa, kabiji byonse bikamweka, kine nkakubuula.”+

4 Onkao mambo, Yonafwanyi waambile byawama pe Davida+ kwi shanji Saulo. Wibabuujile’mba: “Anweba mfumu, kange mu mulenge mambo kalume wenu aye Davida ne, mambo aye kechi wimulengapo mambo ne, kabiji bintu byo auba bimulengela kumona byawama. 5 Aye wabikile bumi bwanji mu kizumba* byo aipayile mwina Filishitiya,+ ne Yehoba walengejile bena Isalela bonse kushinda.* Ne anweba mwamwene kino, kabiji mwasangalele bingi. Pano mambo ka o mubena kukebela kwichila mashi abula mambo byo mubena kukeba kwipaya Davida pa kubula mambo?”+ 6 Saulo waumvwine byaambile Yonafwanyi, ne kuchipa wachipile’mba: “Byonkatu Yehoba byo aji na bumi, kechi nkamwipaya ne.” 7 Ponkapo Yonafwanyi waichile Davida ne kumubuula bino bintu byonse. Kepo Yonafwanyi aletele Davida kwi Saulo, ne aye watwajijile kumwingijila byonka byo aubanga kala.+

8 Mu kuya kwa kimye, kwabukile nkondo jikwabo ne Davida wayile na kulwa na bena Filishitiya, kabiji wibepayile bavula bingi, ne abo bamunyemene.

9 Kabiji Yehoba waswishishe mupashi watama kwiya pe Saulo+ byo aikele mu nzubo yanji saka aji na jifumo mu kuboko kwanji, kimye Davida kyo aimbilenga nyimbo na kyansa.+ 10 Saulo watayile jifumo amba ase Davida kuba’mba amushenkakenye ku lubumbulu, bino aye waleyele jifumo jatayile Saulo, kabiji jafikijile mu lubumbulu. Davida wabombokele bonkabwa bufuku. 11 Byo amwene bino, Saulo watumine baluwe kuya na kubelamina ku nzubo ya kwa Davida amba bakamwipaye lukelo,+ bino muka Davida aye Mikala wamubuujile’mba: “Inge mubule kubomboka* bufuku buno, kesha bakemwipaya.” 12 Ponkapotu Mikala walupwijile Davida pa kipenze, kuba’mba abomboke ne kunyema. 13 Mikala washikwile nkishi* ne kumulaajika pa mwanya, kabiji washikwile kisapi kya meso meso kyalengwa na boya bwa mbuzhi ne kwikibika ku mitwe, kabiji wikivwetele kisapi.

14 Kepo Saulo atumine baluwe kuya na kuleta Davida, bino mukazhanji wibabuujile’mba: “Bakolwa.” 15 Ponkapo Saulo watumine baluwe kuya na kumona Davida ne kwibambila’mba: “Mumulete kwi amiwa saka aji pa mwanya pa kuba’mba namwipaye.”+ 16 Baluwe byo batwelele, bataaine pa mwanya paji nkishi* ne kisapi kya meso meso kyalengwa na boya bwa mbuzhi saka bekibika ku mitwe. 17 Saulo washikishe Mikala amba: “Mambo ka o wambepela bibye ne kuleka mulwanyi wami+ wabomboka?” Mikala wakumbwile Saulo amba: “Bajikuñambila’mba, ‘Inge unkanye kuya, nsakukwipaya!’”

18 Davida wabombokele, kabiji wayile kwi Samwela ku Lama.+ Wamubuujile byonse byamubile Saulo. Kepo aye ne Samwela bayile ne kukekala mu Nayota.+ 19 Mu kuya kwa kimye, Saulo bamubuujile’mba: “Davida uji mu Nayota ku Lama.” 20 Ponkapo Saulo watumine baluwe kuya na kukwata Davida. Byo bamwene bangauzhi bakikulumpe saka baula ne Samwela saka ebatangijila, mupashi wa Lesa waishile pa baluwe ba kwa Saulo, ne abo batatwile kwaula nobe bangauzhi.

21 Saulo byo bamubuujile kino, ponkapotu watumine baluwe bakwabo, ne abo batatwile kwaula nobe bangauzhi. Kepo Saulo atumine jibumba ja busatu ja baluwe, ne abo nabo batatwile kwaula nobe bangauzhi. 22 Kyapeleleko, ne aye mwine wayile ku Lama. Byo afikile ku mushima* mukatampe mu Seku, washikishe’mba: “Samwela ne Davida baji pi?” Bamukumbwile’mba: “Baji mu Nayota+ ku Lama.” 23 Saulo byo afuminenga kokwa kuya mu Nayota ku Lama, mupashi wa Lesa waishile pe aye, kabiji waendelenga saka aula nobe ngauzhi posotu ne byo afikile mu Nayota ku Lama. 24 Kabiji naye wavuujile bivwalo byanji, ne kutatula kwaula nobe ngauzhi ku meso a kwa Samwela, kabiji walaajile konkakwa kwa kubula bivwalo mute yense ne bufuku bonse. O ene mambo o bambila’mba: “Nanchi Saulo naye ngauzhi nyi?”+

20 Kepo Davida anyemene kufuma mu Nayota ku Lama. Kabiji waishile kwi Yonafwanyi ne kumushikisha’mba: “Nanchi nauba ka?+ Nanchi natamisha ka, kabiji ñanyi mambo o nebalenga bashenu o babena kukebela kungipayilapo?” 2 Ponkapo Yonafwanyi wamukumbwile’mba: “Akyo kuba kyaubiwa ne!+ Kechi ukafwa ne. Umvwa! Batata kechi bakonsha kuba kintu kikatampe nangwa kicheche kwa kubula kumbuula ne. Mambo ka batata o bafwainwa kumfila kino kintu? Kino kechi kikobiwa ne.” 3 Bino Davida wachipile ne kwamba’mba: “Kine bashenu bayukishatu kuba’mba mwantemwa,+ onkao mambo, bakalanguluka’mba, ‘Yonafwanyi kange ayuke kino ne, kuchina’mba wakazhingila.’ Bino byonkatu Yehoba byo aji na bumi ne anweba* byo muji na bumi, kwashalatu pacheche kungipaya!”+

4 Kepo Yonafwanyi amwambijile Davida amba: “Kyonse kyo usakwamba,* nsakukubilakyo.” 5 Davida waambijile Yonafwanyi amba: “Kesha ñondo ukatentama,+ kabiji nafwainwa kwikala ne kujiila pamo na bamfumu; mwafwainwa kunsuswisha kuya, ne amiwa nkafyama mu bujimi kufikatu ne mabanga pa juba ja busatu. 6 Bashenu inge bakankebenga, mukebabuule’mba, ‘Davida walombele kuba’mba aye bukiji ku Betelema ku muzhi wanji,+ mambo kuji kitapisho kya pa mwaka pa mwaka kya kisemi kyonse.’+ 7 Inge bakambe’mba, ‘Kijitu bulongo,’ ko kuba’mba amiwa kalume wenu nkekala mutende. Bino inge bakazhingile, mukayuka’mba kine bakebeshatu kunguba kyatama. 8 Mmweshai amiwa kalume wenu+ butemwe bubula kwaluka, mambo mwalayañana lulayañano ne amiwa kalume wenu ku meso a Yehoba.+ Bino inge nalenga mambo,+ ngipayai yenka anweba. Mambo ka o mwafwainwa kumpaina ku bashenu?”

9 Kepo Yonafwanyi aambile’mba: “Kange ulangulukenga byo byo ne! Inge nkayuke’mba batata bakebeshatu kukuba kyatama, kine nkakubuula.”+ 10 Kabiji Davida waipwizhe Yonafwanyi amba: “Ñanyi ukambuula inge bashenu bakemukumbule na bukaji?” 11 Yonafwanyi waambijile Davida amba: “Twaya mu bujimi.” Byonkabyo, bonse babiji bayile mu bujimi. 12 Kabiji Yonafwanyi waambijile Davida amba: “Yehoba Lesa wa Isalela ekale kamonyi kuba’mba, kesha pa kyonka kino kimye nangwa keshaja, nkebepuzha batata. Inge bakakumbule bulongo pe obewa, nkatuma mawi kwi obewa ne kukubuula byo kiji. 13 Bino inge batata bakakebe kukuba kyatama, Yehoba akankambule amiwa Yonafwanyi inge nkabule kukubuula ne kukuleka kuya mu mutende. Yehoba ekale ne obewa,+ byonkatu byo ajinga ne batata.+ 14 Nanchi kechi ukammwesha butemwe bubula kwaluka bwa Yehoba byo nkiji mumi, ne byo nkafwa nenyi?+ 15 Kange ukaleke kumwesha ba mu nzubo yami butemwe bubula kwaluka ne,+ nangwatu Yehoba byo akavizha balwanyi bobe bonse obewa Davida pano pa ntanda.” 16 Onkao mambo, Yonafwanyi walayañene lulayañano na ba mu nzubo ya kwa Davida ne kwamba’mba, “Yehoba ukekikeba ne kutotolwesha balwanyi ba kwa Davida.” 17 Onkao mambo, Yonafwanyi wachipishe Davida jibiji na mambo a butemwe bwanji pe aye, mambo wamutemenwe bingi byonkatu byo etemenwe aye mwine.*+

18 Kepo Yonafwanyi amwambijile’mba: “Kesha ñondo ukatentama,+ kabiji bakakukebanga, mambo pa kipona kyobe kafwako ukekalapo ne. 19 Pa juba ja busatu po po bakakilamo kukukeba, kabiji wafwainwa kwiya pa mpunzha po wafyamine joja juba,* ukekele kwipi na jino jibwe konka kuno. 20 Kabiji nkataya miketo isatu ku lubaji lumo lwa jino jibwe, uba nobe mbena kwasa kintu. 21 Byo nkatuma wa mwingilo, nkamwambila namba, ‘Yanga ukatole miketo.’ Inge nkambile wa mwingilo namba, ‘Tala! Miketo iji ku lulwe lubaji lobe, keitole,’ ko kuba’mba ukeye, mambo byonkatu Yehoba byo aji na bumi, kikamwesha’mba bintu byonse bijitu bulongo kwi obewa kabiji kafwako kyatama ne. 22 Bino inge nkambile kalombwana namba, ‘Tala! Miketo iji kulutwe yobe,’ ko kuba’mba wafwainwa kunyema, mambo Yehoba ye wakutuma. 23 Pa mambo a mulaye ye twalayañana,+ amiwa ne obewa, Yehoba ekale pakachi ketu myaka ne myaka.”+

24 Byonkabyo, Davida wakafyamine mu bujimi. Ñondo byo atentamine, mfumu waikele na kuja kajo.+ 25 Mfumu waikele pa kipona kyanji ponka po aikalanga kimye kyonse kwipi na lubumbulu. Yonafwanyi waikele saka atalañana nanji, ne Abina+ waikele ku lubaji lwa kwa Saulo, bino pa kipona kya kwa Davida kechi pajinga muntu ne. 26 Saulo kechi waambilepo kintu nangwa kimo pa joja juba ne, mambo waambilenga mu muchima amba: ‘Kampe paji kintu kyamweka kyamulengela kwikala wa muzhilo.+ Kine, wafwainwa kechi witokesha ne.’ 27 Kabiji pa juba ja bubiji ñondo byo atentamine, pa kipona kya kwa Davida kechi pajinga muntu ne. Kepo Saulo aipwizhe Yonafwanyi mwananji amba: “Mambo ka mwana wa kwa Yese+ o abujile kwiya ku kijiilo kesha ne lelo?” 28 Yonafwanyi wakumbwile Saulo amba: “Davida wansashijile amba namuswishe aye ku Betelema.+ 29 Wañambijile’mba, ‘Mwane nswishai ngye, mambo tuji na kitapisho kya kisemi mu muzhi, kabiji kolojami wangichile. Onkao mambo, inge mwangubila lusa, ndekai ngye nkamone bakolojami.’ O ene mambo o abujila kwiya ku tebulu wa mfumu.” 30 Kepo Saulo azhingijile Yonafwanyi ne kumwambila’mba: “Obewa mwana wa mwanamukazhi nsatuki, nanchi ubena kulanguluka’mba kechi nayuka’mba wasalapo kumvwañana na mwana wa kwa Yese, ne kwilengesha bumvu obe mwine ne bainobe* nenyi? 31 Inge mwana wa kwa Yese akekale na bumi pano pa ntanda, obewa ne bufumu bobe kechi mukekala kikupu ne.+ Onkao mambo, tuma muntu wa kuya na kumuleta, mambo aye wafwainwa kufwa.”*+

32 Nangwa byonkabyo, Yonafwanyi waipwizhe bashanji ba Saulo amba: “Mambo ka o afwainwa kufwila?+ Wauba ka?” 33 Ponkapo Saulo watayile jifumo amba amwase,+ onkao mambo Yonafwanyi wayukile’mba bashanji bakebeshatu kwipaya Davida.+ 34 Ponkapotu Yonafwanyi wafumineko ku tebulu na bukaji, kabiji kechi wajiilepo kajo pa juba ja bubiji ja kutentama kwa ñondo ne, mambo wazhingijile bingi na mambo a kwa Davida+ kabiji bashanji bamulengeshe bumvu.

35 Lukelo Yonafwanyi wayile mu bujimi byonka byo balayañene ne Davida, kabiji wayile na wa mwingilo mwanyike.+ 36 Waambijile wa mwingilo wanji amba: “Yanga ukatole miketo yo nsakutaya.” Wa mwingilo wayile lubilo, ne Yonafwanyi waashile muketo kulutwe yanji. 37 Wa mwingilo byo afikile pa mpunzha pajinga muketo Yonafwanyi ye aashile, Yonafwanyi wabijikile ku wa mwingilo amba: “Nanchi muketo kechi uji kulutwe yobe nenyi?” 38 Yonafwanyi wabijikile ku wa mwingilo wanji amba: “Endesha! Pelawizha kuya! Kange ubande ne!” Kabiji wa mwingilo wa kwa Yonafwanyi watolawile miketo ne kubwela kwi nkambo yanji. 39 Wa mwingilo kechi wayukilepo kintu nangwa kimo ne; kanatu Yonafwanyi ne Davida bo bayukile mo kyatajile. 40 Kepo Yonafwanyi apele wa mwingilo wanji bilwilo ne kumubuula’mba: “Yanga, bitwale ku muzhi.”

41 Wa mwingilo byo ayile, Davida wasolokele kufuma pa mpunzha po ajinga ku kabeta ka ku bulenge. Kepo aponene kinkuvumene panshi ne kukubama bimye bisatu, kabiji befyompele ne kujila bajijile bonse babiji, bino Davida wakizhizhemo kujila. 42 Yonafwanyi waambijile Davida amba: “Yanga mu mutende, mambo bonse twachipila+ mu jizhina ja Yehoba amba, ‘Yehoba ekale pakachi kobe ne amiwa ne pakachi ka baana* bobe ne baana* bami myaka ne myaka.’”+

Ponkapo Davida waimene ne kuya, ne Yonafwanyi wabwelele mu muzhi.

21 Davida wayile ku Noba+ kwi Ahimeleki ñanga. Ahimeleki byo asambakene Davida, watendekele kuzakama kabiji wamushikishe’mba: “Mambo ka o waishilatu bunke, kwa kubula muntu nangwa umo?”+ 2 Davida wamukumbwile Ahimeleki ñanga amba: “Bamfumu baji kunkambizha kubapo kintu kimo, bino baji kuñambila’mba, ‘Kange ubuulepo muntu nangwa umo pa mwingilo ye mbena kukupa nangwa mikambizho yo nakukambizha ne.’ Naji kumvwañana na bansongwalume bami kuba’mba tusambakene pa mpunzha imo. 3 Pano inge mujipo na bashinkwa batanu, bampai, nangwa kajo konse kajipo.” 4 Bino ñanga wakumbwile Davida amba: “Kechi paji bashinkwa bakwabo ne, pajitu bashinkwa bazhila+—kanatu inge bansongwalume benu kechi balaalapo na banabakazhi* ne.”+ 5 Davida wakumbwile ñanga amba: “Banabakazhi baji kwalepa ne atweba byonkatu byo kyajinga ne pa bimye bikwabo byo nayile na kulwa nkondo.+ Inge mibiji ya bansongwalume yazhila nangwa kya kuba bajitu na mwingilo mukwabo, lelo bakonsha kukilapo kwikala bazhila!” 6 Onkao mambo, ñanga wamupele bashinkwa bazhila,+ mambo kechi pajinga bashinkwa ne, kanatu bashinkwa ba kupana kwi Lesa bo bafumishe kwi Yehoba kuba’mba bapingizhepo bashinkwa ba katataka pa jonka juba jo bebafumisheko.

7 Kabiji kalume umo wa kwa Saulo wajinga konkakwa pa joja juba, saka bamulama kwi Yehoba. Jizhina janji Doega+ mwina Edomu,+ mukulumpe wa bakafunga ba kwa Saulo.

8 Kepo Davida ashikishe Ahimeleki amba: “Nanchi mujipo na jifumo nangwa mpoko nyi? Kechi nasenda mpoko yami nangwa bilwilo byami ne, mambo mwingilo wa bamfumu wajinga wa bukiji bukiji.” 9 Ponkapo ñanga waambile’mba: “Mpoko ya kwa Goliata+ mwina Filishitiya, ye waipayile mu Kimpachiko* kya Ela,+ beipombela mu kisapi kabiji iji kunyuma ya kajilaya kabula maboko.+ Inge ukeba kwiisenda, isende, mambo yo yonkatu ijipo.” Davida waambile’mba: “Kafwako ikwabo yaesakana nayo ne. Mpai.”

12 Davida walangulukilengapo pa bino byambo, kabiji wamuchiine+ bingi Akishi Mfumu wa Gata. 13 Onkao mambo, byo ajinga nabo wibepekezhe+ nobe mukonye ne kutendeka kuba bintu nobe mukonye kwi abo.* Kabiji wakwabawilenga pa binzhilo bya mu kibelo ne kuleka ludenge saka luzumina pa myevu yanji. 14 Kepo Akishi aambijile bakalume banji amba: “Mwayuka’mba awe muntu mukonye! Mambo ka o mwamuletela kwi amiwa? 15 Nanchi bakonye mfwabo, pa kuba’mba ngikale na uno muntu kuba’mba obenga bintu bya bukonye kwi amiwa nyi? Nanchi uno muntu wafwainwa kutwela mu nzubo yami nyi?”

22 Kabiji Davida wafumine kokwa+ ne kunyemena ku jiyengo ja ku Adulama.+ Balongo banji ne bonse ba mu nzubo ya bashanji byo baumvwine, bayile kwi aye konkakwa. 2 Ne bonse bajinga na makatazho, na nkongole, ne boba bajinga na bulanda* baishile kwi aye, kabiji waikele ke mukulumpe wabo. Wajinga na banabalume nobe 400.

3 Davida wafumine kokwa ne kuya ku Mizipa ku Moabu+ ne kwambila mfumu amba: “Nemupopwela, swishai batata ne bamama kwikala ne anweba kufikatu ne kimye kyo nkayuka Lesa byo akangubila.” 4 Onkao mambo, wibashile kwi mfumu wa Moabu, kabiji baikele ne aye moba onse Davida o afyamine mu nkonkoso.+

5 Mu kuya kwa moba, ngauzhi Gadi+ waambijile Davida amba: “Kange wikale mu nkonkoso ne. Fumako yanga ku kyalo kya Yuda.”+ Byonkabyo, Davida wafumineko ne kuya mu jisaka ja ku Heleta.

6 Saulo waumvwine’mba Davida ne bantu banji bebataana. Kabiji Saulo wajinga mu Gibea+ saka aikala patuntama munshi ya kichi kya tamaleshika saka alama ne jifumo mu kuboko, ne bakalume banji bonse bamuzhokolokele. 7 Kepo Saulo aambijile bakalume banji bamuzhokolokele amba: “Umvwai, anweba bena Benjamina. Nanchi mwana wa kwa Yese+ naye ukemupa majimi ne majimi a miñanzañanza anweba bonse nyi? Nanchi aye ukemutongola anweba bonse kwikala bakulumpe ba pa biumbi ne ba pa bitota nyi?+ 8 Anweba bonse mwangalukilamo! Kafwako nangwa umo wambuujile kuba’mba mwanami walayañana lulayañano na mwana wa kwa Yese ne!+ Kafwako nangwa umo pe anweba wangubila lusa ne kumbuulako amba mwanami watundaika kalume wami kumbelamina, byonkatu byo kiji lelo jino ne.”

9 Kepo Doega+ mwina Edomu, mukulumpe wa bakalume ba kwa Saulo konkakwa akumbwile’mba:+ “Namumwene mwana wa kwa Yese byo aishile ku Noba kwi Ahimeleki mwana wa kwa Ahituba.+ 10 Kabiji wamwipuzhizheko kwi Yehoba ne kumupa mpao. Kabiji wamupele ne mpoko ya kwa Goliata mwina Filishitiya.”+ 11 Ponkapotu mfumu watumine ba kuya na kwita Ahimeleki mwana wa kwa Ahituba ñanga ne bañanga bonse ba mu nzubo ya bashanji, bonka bajinga mu Noba. Byonkabyo, bonse baishile kwi mfumu.

12 Kepo Saulo aambile’mba: “Umvwa, obewa mwana wa kwa Ahituba!” ne aye wakumbwile’mba: “Amiwa bano nkambo.” 13 Saulo wamushikishe’mba: “Mambo ka o mwangalukilamo, obewa ne mwana wa kwa Yese, byo wamupa bashinkwa ne mpoko ne kumwipuzhizhako kwi Lesa? Aye undengulula ne kumbelamina, byonkatu byo kiji lelo jino.” 14 Kepo Ahimeleki akumbwile mfumu amba: “Ñanyi mu bakalume benu bonse uji na bukishinka nobe Davida?+ Aye ye muko wa mfumu+ kabiji mukulumpe wa bakapaso benu kabiji bamunemeka mu nzubo yenu.+ 15 Nanchi lelo kyo kimye kitanshi kyo naji kumwipuzhizhako kwi Lesa nyi?+ Abyo byo mwaamba kechi nakonsha kwibyuba ne! Anweba mfumu kange munzhingijile amiwa kalume wenu ne bonse ba mu nzubo ya batata ne, mambo amiwa kalume wenu kafwako kintu nangwa kimo kyo nayuka pa ano mambo ne.”+

16 Bino mfumu waambile’mba: “Kinetu, usakufwa+ Ahimeleki, obewa ne bonse ba mu nzubo ya bashobe.”+ 17 Ponkapo mfumu waambijile bakapaso* bamuzhokolokele amba: “Alulukai mwipaye bañanga ba Yehoba, mambo babena kumvwañana ne Davida! Bayukile’mba wanyema, kabiji kechi bambuujile ne!” Bino bakalume ba mfumu kechi bakebelenga kutapa bañanga ba Yehoba ne. 18 Kepo mfumu aambijile Doega amba:+ “Aluluka wibatape bañanga!” Ponkapotu Doega mwina Edomu+ wayile na kutapa bañanga. Pa joja juba waipayile banabalume 85 bavwajile tumalaya twabula maboko twa kisapi kya linenyi.+ 19 Kabiji waonawine Noba,+ muzhi wa bañanga, wibepayile na mpoko; banabalume ne banabakazhi, baana ne baana bakyamwa, bañombe, bambongolo ne mikooko, wibyonawine na mpoko.

20 Nangwa byonkabyo, mwana wa mulume umo wa kwa Ahimeleki mwana wa kwa Ahituba, wa jizhina ja Abiata,+ wapulukile ne kunyemena kwi Davida. 21 Abiata wabuujile Davida amba: “Saulo waipaya bañanga ba Yehoba.” 22 Kepo Davida aambijile Abiata amba: “Doega mwina Edomu byo ajingapo aja juba,+ nayukile namba kwa kubula nangwa kuzhinaukatu ne, ukamubuula Saulo. Yami naipayisha ba mu nzubo ya bashobe bonse.* 23 Ikala ne amiwa. Kange ube moyo ne, mambo yense ubena kukeba bumi* bobe, ubena kukeba ne bumi* bwami; amiwa nsakukuzhikijilanga.”+

23 Mu kuya kwa kimye Davida bamubuujile’mba: “Bena Filishitiya babena kulwa na bena Keila,+ kabiji balukuka bipujilo bya kajo.” 2 Onkao mambo, Davida wamwipwizhe Yehoba+ amba: “Nanchi ngye na kutapa bena Filishitiya nyi?” Yehoba wamukumbwile amba: “Yanga, ukebatape bena Filishitiya ne kupokolola bena Keila.” 3 Bino banabalume ba kwa Davida bamwambijile’mba: “Umvwai! Twauba moyo byo tuji muno mu Yuda;+ kabiji kikakilapo inge tukaye ku Keila na kulwa na bashilikale ba bena Filishitiya!”+ 4 Davida wamwipwizhe jibiji Yehoba.+ Kepo Yehoba amukumbwile’mba: “Imana; yanga ku Keila mambo nsakupana bena Filishitiya mu kuboko kobe.”+ 5 Onkao mambo, Davida ne bantu banji bayile ku Keila na kulwa na bena Filishitiya; wasendele bilelwa byabo kabiji waipayile bantu bavula bingi, Davida wapulwishe bangikazhi ba mu Keila.+

6 Abiata+ mwana wa kwa Ahimeleki byo anyemejile kwi Davida ku Keila, wasendele kajilaya kabula maboko. 7 Kabiji Saulo bamubuujile’mba: “Davida waiya ku Keila.” Kepo Saulo aambile’mba: “Lesa wampaye,*+ mambo wishinkila aye mwine byo atwela mu muzhi uji na binzhilo byo bashinkako na tupingilo.” 8 Onkao mambo, Saulo waichile bantu bonse kuya ku nkondo, kuba’mba baye ku Keila na kumushinkila Davida ne bantu banji. 9 Davida byo ayukile’mba Saulo ubena kukeba kwiya na kulwa ne aye, waambijile Abiata ñanga amba: “Leta kajilaya kabula maboko kuno.”+ 10 Kepo Davida aambile’mba: “Anweba Yehoba Lesa wa Isalela, amiwa kalume wenu naumvwa’mba Saulo ubena kwiya ku Keila na konauna muzhi na mambo a amiwa.+ 11 Nanchi bantangi* ba mu Keila basakumpana kwi aye nyi? Abya Saulo usakwiya kuno byonkatu byo naumvwa amiwa kalume wenu nyi? Anweba Yehoba Lesa wa Isalela, napopwela mbuulai amiwa kalume wenu.” Kepo Yehoba amukumbwile’mba: “Usakwiya.” 12 Davida waipwizhe’mba: “Nanchi bantangi ba mu Keila basakumpana amiwa ne bantu bami mu kuboko kwa kwa Saulo nyi?” Yehoba wamukumbwile’mba: “Basakukupana.”

13 Ponkapotu Davida ne bantu banji baimene, banabalume nobe 600,+ bafumineko ku Keila ne kuya konse ko bakonsheshe kuya. Saulo byo bamubuujile’mba Davida wanyemako ku Keila, aye kechi wamupupijile ne. 14 Davida waikele mu kiselebwa mu mapunzha mwakatazha kufika, mu kibunji kya mitumba kya kiselebwa kya Zifu.+ Saulo wamukebelenga kimye kyonse,+ bino Yehoba kechi wamupaine kwi aye ne. 15 Davida wayukile’mba* Saulo waimanatu pa kukeba bumi* bwanji, kimye Davida kyo ajinga mu kiselebwa kya Zifu ku Holesha.

16 Kepo Yonafwanyi mwana wa kwa Saulo ayile kwi Davida ku Holesha, kabiji wamukwashishe* kuketekela mwi Yehoba.+ 17 Wamwambijile’mba: “Kuchina ne, mambo batata ba Saulo kechi bakakutaana ne; kabiji obewa ukekala mfumu wa bena Isalela,+ ne amiwa nkekala wa kibiji kwi obewa; ne batata ba Saulo nabo bayuka kino.”+ 18 Kepo bonse babiji balayañene lulayañano+ ku meso a Yehoba, kabiji Davida waikele mu Holesha, kabiji Yonafwanyi wabwelele ku nzubo yanji.

19 Kepo banabalume bena Zifu bayile kwi Saulo ku Gibea+ ne kumubuula’mba: “Davida wafyama kwipi ne atweba+ mu mapunzha mwakatazha kufika, mu Holesha,+ ku katumbatumba ka Hakila+ kaji ku kabeta ka ku bulenge* bwa Yeshimonyi.*+ 20 Ponse po mukakebela kwiya, anweba mfumu, mukeye, kabiji ne atweba tukamupana kwi anweba mfumu.”+ 21 Ponkapo Saulo waambile’mba: “Yehoba emupeshe, mambo mwangubila lusa. 22 Nemusashijila namba, yainga mukakebe bulongo ko aji ne kuyuka muntu wamumwene, mambo bambuula’mba wajimuka bingi. 23 Muyuke bulongo mapunzha onse o afyamamo kabiji mukabwele kwi amiwa na kiyukilo. Ne amiwa popo nkaya ne anweba, kabiji inge uji monka mu kyalo, nkamukeba monka mukachi ka biumbi* bya mu Yuda.”

24 Kepo bafumineko ne kutangilako kuya ku Zifu+ Saulo saka ashala kunyuma, bino Davida ne bantu banji bajinga mu kiselebwa kya Maona,+ mu Alaba+ ku kabeta ka ku bulenge bwa Yeshimonyi. 25 Kepo Saulo aishile na bantu banji na kumukeba.+ Davida byo bamubuujile, ponkapo waimene ne kuya ku jibwe jikatampe+ ne kwikala mu kiselebwa kya Maona. Saulo byo aumvwine kino, wamupupijile Davida mu kiselebwa kya Maona. 26 Saulo byo afikile ku bushiya bumo bwa mutumba, Davida ne bantu banji bajinga ku bushiya bukwabo bwa mutumba. Davida wanyemenenga lubilo+ kuchina Saulo, bino Saulo ne bantu banji banangijilenga kwi Davida ne bantu banji amba bebakwate.+ 27 Bino kwaishile muluwe kwi Saulo ne kumubuula’mba: “Iyai bukiji, mambo bena Filishitiya balukuka kyalo!” 28 Ponkapo Saulo wikilekele kupangisha Davida+ kabiji wayile na kulwa na bena Filishitiya. O ene mambo aya mpunzha o beitumbijile’mba Jibwe ja Mabano.

29 Kepo Davida afumine kokwa ne kuya na kwikala mu mapunzha mwakatazha kufika, mu Enagedi.+

24 Saulo byo abweleletu kufuma ko ayile na kupupila bena Filishitiya, bamubuujile’mba: “Umvwai! Davida uji mu kiselebwa kya Enagedi.”+

2 Onkao mambo, Saulo wasendele banabalume 3,000 bo asajile mu bena Isalela bonse ne kuya na kukeba Davida ne bantu banji ku mabwe kwikala bikwinji. 3 Saulo wafikile ku bipaka bya mikooko bya mabwe kunsa ya mukwakwa kwajinga jiyengo, kabiji watwelele mu jiyengo na kupambuka, Davida ne bantu banji saka baikala mukachi mwine mu jiyengo.+ 4 Bantu ba kwa Davida bamwambijile’mba: “Lelo Yehoba wimwambila’mba, ‘Tala! Napana mulwanyi wobe mu kuboko kobe,+ kabiji umube kyonse kyo wamona’mba kyawama.’” Byonkabyo, Davida waimene ne kuchiba kisapi kishinshi kunsa ya mukangyo wabula maboko wa kwa Saulo. 5 Byo apwishishe kuba kino, muchima* wamukatezhenga Davida,+ mambo wachibile kisapi kunsa ya mukangyo wabula maboko wa kwa Saulo. 6 Waambijile bantu banji amba: “Kwesakana na mumwena Yehoba, kechi kyayilamo kuba’mba ngube kino kintu kwi nkambo yami, mushingwa wa Yehoba, kya kutanyika kuboko kwami pe aye ne, mambo aye ye mushingwa wa Yehoba.”+ 7 Onkao mambo, Davida wakainye* bantu banji na bino byambo, kabiji kechi wibaswishishe kulukuka Saulo ne. Kabiji Saulo walupukilemo mu jiyengo ne kuya kaye.

8 Kepo Davida aimene ne kulupukamo mu jiyengo kabiji wabijikile kwi Saulo amba: “Nkambo yami mfumu!”+ Saulo byo atajile kunyuma, Davida wafukamine ne kukunyika kilungi kyanji panshi ne kuponena panshi kinkuvumene. 9 Davida waambijile Saulo amba: “Mambo ka o mumvwina byambo bya bantu bamba’mba, ‘Umvwai! Davida ubena kukeba kwimuba kintu kyatama’?+ 10 Lelo meso enu amona Yehoba byo aji kwimupana kwi amiwa mu jiyengo. Bino muntu umo byo aji kuñambila’mba nemwipaye,+ naji kwimumvwina lusa ne kwamba’mba, ‘Kechi nsakutanyika kuboko kwami pe nkambo yami ne, mambo aye ye mushingwa wa Yehoba.’+ 11 Kabiji tata, talai kisapi kya kunsa ya mukangyo wenu wabula maboko kiji mu kuboko kwami; mambo byo naji kuchiba kino kisapi kunsa ya mukangyo wenu wabula maboko, kechi naji kwimwipaya ne. Pano mwamona ne kuyuka’mba kechi nkeba kwimuba kintu kyatama nangwa kwimusatukila ne, kabiji kechi nemulengapo mambo ne,+ bino anweba mubena kunkebakeba amba monaune bumi* bwami.+ 12 Yehoba etuchibile mambo anweba ne amiwa,+ kabiji Yehoba anshinkenyeko ne anweba,+ bino kuboko kwami kechi kukemuba kintu kyatama nangwa kimo ne.+ 13 Byonkatu byaamba kishimpi kya kala amba, ‘Bubi bufuma ku babi,’ bino kuboko kwami kechi kukemuba kintu kyatama nangwa kimo ne. 14 Nanchi mfumu wa bena Isalela ubena kukebakeba ñanyi? Ñanyi ye mubena kupangisha? Kabwa wafwa nyi? Inyi lubalebale?+ 15 Yehoba ekale mutonyi, kabiji uketuchibila mambo anweba ne amiwa, kabiji ukamona ne kuñambilako mambo+ ne kunchibilako mambo ne kumpokolola mu kuboko kwenu.”

16 Davida byo apwishishetu kwamba bino byambo kwi aye, Saulo waambile’mba: “Nanchi jino jo jiwi jobe, obewa mwanami Davida nyi?”+ Ponkapo Saulo watendekele kujila jibingo. 17 Waambijile Davida amba: “Obewa waoloka kukila amiwa, mambo wangubila byawama, pakuba amiwa nakubila byatama.+ 18 Lelo jino, wambuula kintu kyawama kyo waji kuba pa kubula kungipaya Yehoba byo aji kumpana mu kuboko kobe.+ 19 Ñanyi muntu wakonsha kutaana mulwanyi wanji ne kumulekatu amba ayenga kwa kubula kumukozha? Yehoba ukakufweta bintu byawama+ na mambo a kintu kyo wangubila lelo. 20 Pano umvwa! Nayuka namba kine ukekala mfumu+ ne kuba’mba bufumu bwa bena Isalela bukekala kikupu mu kuboko kobe. 21 Pano chipa kwi amiwa mu jizhina ja Yehoba+ amba kechi ukavizha ba mu kisemi* kyami ne, ne kuba’mba kechi ukazhimañanya jizhina jami mu nzubo ya batata ne.”+ 22 Byonkabyo, Davida wachipile kwi Saulo, kabiji Saulo wabwelele ku nzubo.+ Bino Davida ne bantu banji bayile mu nkonkoso.+

25 Mu kuya kwa moba Samwela+ wafwile; kabiji bena Isalela bonse bakonkene pamo na kumujila, kabiji bamuzhiikile ku nzubo yanji ku Lama.+ Kepo Davida aimene ne kuya mu kiselebwa kya Palana.

2 Kwajinga muntu umo mu Maona+ waingijilanga ku Kamela.*+ Uno muntu wanonkele bingi; wajinga na mikooko 3,000 ne bambuzhi 1,000, kabiji watendelenga mikooko yanji monka mu Kamela. 3 Jizhina janji wajinga Nabala,+ ne mukazhanji wajinga Abigaila.+ Mukazhanji wajinga na milangwe kabiji walambile bingi, bino mwatawanji aye mwina Kaleba,+ wakanamine kabiji wajinga na byubilo byatama.+ 4 Davida byo ajinga mu kiselebwa, waumvwine’mba Nabala ubena kutenda mikooko yanji. 5 Ponkapo Davida watumine bansongwalume jikumi kwi aye, kabiji Davida waambijile bano bansongwalume amba: “Yainga ku Kamela, kabiji byo musakumutaana Nabala mumwimune mu jizhina jami. 6 Apa bino mumwambile’mba, ‘Mwikale myaka yavula kabiji mutende ekale pe anweba ne pa ba mu nzubo yenu ne pa bintu byonse byo muji nabyo. 7 Naumvwa’mba mubena kutenda mikooko. Bakafunga benu byo bajinga ne atweba, kechi twibobile kintu kyatama ne,+ kabiji kimye kyonse kyo bajinga mu Kamela kafwapo kintu nangwa kimo kyo bataaine kyaeleka ne. 8 Mushikishe bansongwalume benu, ne abo basakwimubuula. Mwibobile bibusa bansongwalume bami, mambo twaiya pa kimye kya lusekelo.* Mwane bapai bakalume benu ne amiwa mwanenu Davida byonse byo mwakonsha kupana.’”+

9 Onkao mambo, bansongwalume ba kwa Davida bayile ne kumubuula Nabala byonse bibambijile Davida. Byo bapwishishe kwamba, 10 Nabala waambijile bakalume ba kwa Davida amba: “Davida ye ñanyi, kabiji mwana wa kwa Yese ye ñanyi? Ano moba bakalume bavula babena kunyema bankambo yabo.+ 11 Nanchi nafwainwa kushikula bashinkwa bami, mema ne nyama yo naipayila bantu bami batenda mikooko ne kwibipana ku bantu bo nabula kuyuka ko bafuma nyi?”

12 Ponkapo bansongwalume ba kwa Davida babwelelemo ne kumubuula bino byambo byonse. 13 Ponkapotu Davida waambijile bantu banji amba: “Muntu yense akase mpoko yanji!”+ Byonkabyo bonse bakashile mapoko abo, ne Davida naye wakashile mpoko yanji, kabiji bantu nobe 400 bayile ne Davida, pakuba bantu 200 bashajile na bipe.

14 Kabiji kalume umo wayile na kubuula Abigaila muka Nabala amba: “Umvwai! Davida waji kutuma baluwe kufuma ku kiselebwa kwiya na kwimuna nkambo yetu, bino abo baji kwibambila mwenga.+ 15 Bano bantu betulamine bingi bulongo. Kechi betubilepo kintu kyatama ne, kabiji kafwako kintu nangwa kimo kyaelekele kimye kyonse kyo twajinga nabo mungye ne.+ 16 Bajinga nobe nsakwa ituzhokoloka bufuku ne mute, kimye kyonse kyo twajinga nabo na kufunga jitanga. 17 Pano monai byo musakuba, mambo bya malwa bisakumwekela nkambo yetu ne bonse ba mu nzubo yabo,+ abo baji nobe muntu wabula* maana+ kabiji kafwako muntu wakonsha kwisamba nabo.”

18 Onkao mambo, Abigaila+ wapelawizhe kusenda bashinkwa 200, milondo ikatampe ya binyu ibiji, mikooko itanu yo basuba, bipimo bya seya* bitanu bya kajo ka kukanga, bashinkwa 100 bo balenga na mañanzañanza auma, ne bashinkwa 200 bo balenga na makuyu o bafina kabiji wibibikile byonse pa bambongolo.+ 19 Kepo aambijile bakalume banji amba: “Tangilaipo; amiwa nsakwimulondela.” Bino kechi wabuujile mwatawanji aye Nabala ne.

20 Byo aendelenga pa mbongolo saka akunkuluka mutumba kwazhitama, pa kyonkakya kimye Davida ne bantu banji bakunkulukilenga kwiya ko ajinga, ne aye wibasambakene. 21 Kabiji Davida waambilenga amba: “Nalaminenga kyatu bintu byonse bya uno muntu mu kiselebwa. Kafwako kintu kyanji nangwa kimo kyaelekele ne,+ bino aye wangubila byatama pa bintu byawama.+ 22 Lesa ashinkanye na balwanyi ba kwa Davida,* kabiji ebakambule bingi inge mpulushepo mwanamulume* umo pa bantu banji pa kufika lukelo.”

23 Abigaila byo amwene Davida, wapelawizhe kwikilapo pa mbongolo ne kufukama kwi Davida, kabiji wakunyikile kilungi kyanji panshi. 24 Kepo afukamijile ku maulu a kwa Davida ne kumwambila’mba: “Nkambo, lekai buno bubi bwikale pe amiwa; nswishai amiwa wa mwingilo wenu wa mukazhi kwisamba nenu, kabiji muñumvwe byo nsakwimubuula amiwa wa mwingilo wenu wa mukazhi. 25 Mwane nkambo kange mute muchima ku uno muntu wabula maana Nabala ne,+ mambo ubatu bintu monka mwayila jizhina janji. Nabala* jo jizhina janji, kabiji bumbulwamaana buji mwi aye. Bino amiwa wa mwingilo wenu wa mukazhi, kechi nebamwene bansongwalume benu anweba nkambo bo mwatumine ne. 26 Pano nkambo, byonkatu Yehoba byo aji na bumi ne anweba byo muji* na bumi, Yehoba ye wimukanya+ kwikala na mambo a mashi+ ne kushinkanya* na kuboko kwenu. Balwanyi benu ne boba bakeba kwimuba kyatama anweba nkambo bekale nobe Nabala. 27 Pano buno bupe*+ bo naleta amiwa wa mwingilo wenu wa mukazhi kwi anweba nkambo bebupane ku bansongwalume babena kwimulondela anweba nkambo.+ 28 Mwane, ndekelaiko mambo amiwa wa mwingilo wenu wa mukazhi, mambo kine Yehoba ukemushimikila nzubo+ ya myaka anweba nkambo yami, mambo nkambo mubena kulwa makondo a Yehoba,+ kabiji kafwako bubi bwatanwa mwi anweba mu moba enu onse ne.+ 29 Muntu inge akemane na kwimupupila ne kukeba bumi* bwenu, bumi* bwenu anweba nkambo bakebuzhikijila kwi Yehoba Lesa wenu byonkatu muntu byo azhikijila bintu bya buneme mu fukuta, bino bumi* bwa balwanyi benu ukebutaya nobe mabwe o bataya na kinzhipunzhipu.* 30 Kabiji Yehoba byo akafikizha bintu byonse byawama byo emulaya anweba nkambo ne kwimutongola kwikala ntangi wa bena Isalela,+ 31 kechi mukekala na bulanda nangwa kwilangulusha* mu muchima wenu na mambo a kwichila mashi pa kubula mambo ne na mambo a kuswisha kuboko kwenu kushinkanya* ne.+ Yehoba byo akemubila byawama anweba nkambo, mukamvuluke amiwa wa mwingilo wenu wa mukazhi.”

32 Ponkapo Davida waambijile Abigaila amba: “Atotwe Yehoba Lesa wa Isalela, yenka wakutuma lelo jino na kuntundaila! 33 Ne maana obe atotwe! Ubilwe bibusa na mambo a kunkanya lelo jino kwikala na mambo a mashi+ ne kushinkanya* na maboko ami. 34 Mambo inge ne, byonkatu Yehoba Lesa wa Isalela byo aji na bumi, yenka wankanya kwimuba kintu kyatama,+ kabiji inge ne kwiya bukiji na kuntundaila ne,+ pa kukya lukelo inge kafwako mwanamulume* nangwa umo wa kwa Nabala washajilepo ne.”+ 35 Ponkapo Davida watambwile bintu byo amuletejile ne kumwambila’mba: “Bwela mu mutende ku nzubo yobe. Umvwa, naumvwa byo waamba, kabiji nkakubila kintu kyo walomba.”

36 Kepo Abigaila abwelele kwi Nabala, wajinga na kijiilo mu nzubo yanji nobe mfumu, kabiji Nabala* wasangalele, kabiji wapendelwe bingi. Mukazhanji kechi wamubuujilepo kintu nangwa kimo ne, kufikatu ne lukelo. 37 Lukelo Nabala byo apendulukile, mukazhanji wamubuujile bino bintu. Kabiji muchima wa kwa Nabala waikeletu nobe wa muntu wafwa, kabiji wakookeletu zubulu ne kwikala nobe jibwe. 38 Byo papichile moba nobe jikumi, Yehoba wakambwile Nabala, ne kufwa wafwile.

39 Davida byo aumvwine’mba Nabala wafwa, waambile’mba: “Atotwe Yehoba yenka wafumyapo pe amiwa mwenga+ wa kwa Nabala+ kabiji yenka wakanya kalume wanji kuba kintu kyatama,+ kabiji Yehoba wabika bubi bwa kwa Nabala pa mutwe wanji mwine!” Kepo Davida atumine mawi a kwipanguzha Abigaila kuba’mba ekale mukazhanji. 40 Byonkabyo bakalume ba kwa Davida baishile kwi Abigaila ku Kamela ne kumwambila’mba: “Ba Davida betutuma kuba’mba twimusende mukekale bakazhi babo.” 41 Ponkapotu waimene ne kukunyika kilungi kyanji panshi ne kwamba’mba: “Amiwa bano muzha wenu, wa mwingilo wakovwa ku maulu+ a bakalume bankambo yami.” 42 Kepo Abigaila+ apelawizhe kwimana ne kuya pa mbongolo wanji ne ba mingilo banji ba bakazhi batanu bamulondejilenga; wayijile pamo na baluwe ba kwa Davida kabiji waikele ke mukazhanji.

43 Kabiji Davida wasongwele ne Ahinoamu+ wa ku Yezelela,+ kabiji bonse babiji baikele ke bakazhi banji.+

44 Bino Saulo wasongweshe Mikala+ mwananji wa mukazhi muka Davida kwi Palati+ mwana wa kwa Laishi wa ku Galimu.

26 Mu kuya kwa moba banabalume ba ku Zifu+ baishile kwi Saulo ku Gibea,+ ne kumubuula’mba: “Davida wafyama mu katumbatumba ka Hakila katalañana na Yeshimonyi.”*+ 2 Onkao mambo, Saulo waimene ne kuya ku kiselebwa kya Zifu na banabalume bena Isalela 3,000 bo basajile, kuya na kukeba Davida mu kiselebwa kya Zifu.+ 3 Saulo watebelejile ku mbaji ya mukwakwa ku katumbatumba ka Hakila katalañana na Yeshimonyi. Pa kyokya kimye Davida waikelenga mu kiselebwa, kabiji waishile kuyuka’mba Saulo waiya na kumukeba mu kiselebwa. 4 Onkao mambo, Davida watumine ba kuya na kumona inge kya kine Saulo waiya. 5 Kepo Davida ayile ku mpunzha kwatebelejile Saulo, kabiji Davida wamwene pa mpunzha palaajile Saulo ne Abina+ mwana wa kwa Nela, mukulumpe wa nzhita yanji; Saulo walaajile pakachi ne bashilikale saka bamuzhokoloka. 6 Kepo Davida aipwizhe Ahimeleki mwina Hiti+ ne Abishai+ mwana wa kwa Zeluya,+ mulongo wa kwa Yoaba amba: “Ñanyi ye nsakuya nanji ku kampu wa kwa Saulo?” Abishai wakumbwile’mba: “Nsakuya nenu.” 7 Onkao mambo, Davida ne Abishai bayile kwajinga bashilikale bufuku, kabiji bataaine Saulo walaala mukachi ka bashilikale saka asumpa ne jifumo janji panshi kwipi na mutwe wanji; Abina ne bashilikale balaajile saka bamuzhokoloka.

8 Kepo Abishai aambijile Davida amba: “Lelo Lesa wapana mulwanyi wenu mu kuboko kwenu.+ Pano nswishai, namwase jifumo jimotu jipulankane jisumpe ne mu mushiji, kabiji kechi nsakumwasa jibiji ne.” 9 Pano bino, Davida waambijile Abishai amba: “Kange umube kyatama ne, mambo ñanyi wakonsha kutanyika kuboko kwanji pa mushingwa wa Yehoba+ ne kwikala kwa kubula mambo?”+ 10 Davida watwajijile kwamba’mba: “Kine byonkatu Yehoba byo aji na bumi, Yehoba mwine ukamukambula,+ nangwa juba janji jikafika+ jo akafwa, nangwa ukaya ku nkondo ne kufwa.+ 11 Kwesakana na mumwena Yehoba, kechi kyailamo kuba’mba ntanyike kuboko kwami pa mushingwa wa Yehoba ne!+ Pano senda jifumo jiji kwipi na mutwe wanji ne mulondo wa mema, ne kuya tuyenga.” 12 Onkao mambo, Davida wasendele jifumo ne mulondo wa mema byajinga ku bwipi na mutwe wa kwa Saulo, kabiji bafumineko ke baye ne kuya. Kafwako nangwa umo wibamwene+ nangwa wayukile nangwa wabuukile ne, mambo bonse bajinga mu tulo, mambo tulo tukatampe twafumine kwi Yehoba twibakwachile. 13 Kepo Davida ayile ku bushiya ne kukemana kwalepa peulu ya mutumba saka paji mpunzha ikatampe pakachi kabo.

14 Davida wabijikile ku bashilikale ne kwi Abina+ mwana wa kwa Nela amba: “Abina nkumbule!” Ne Abina wakumbwile’mba: “Yobe ñanyi ubena kubijika kwi mfumu?” 15 Davida waipwizhe Abina amba: “Nanchi kechi wi mwanamulume nenyi? Kabiji ñanyi waesakana ne obewa mu Isalela? Mambo ka o waji kubujila kusopa nkambo yobe mfumu? Mambo kwaji kwiya mushilikale wakukebanga kwipaya nkambo yobe mfumu.+ 16 Kintu kyo wauba kechi kyawama ne. Kine byonkatu Yehoba byo aji na bumi, wafwainwa kufwa, mambo kechi waji kusopa nkambo yobe, mushingwa wa Yehoba ne.+ Pano utaletale konse! Jifumo ne mulondo wa mema+ byajinga kwipi na mutwe wa mfumu, biji kwepi?”

17 Kepo Saulo ayukile jiwi ja kwa Davida ne kwipuzha’mba: “Nanchi jino jo jiwi jobe, obewa mwanami Davida nyi?”+ Davida wakumbwile’mba: “Ee mwane, jiwi jami nkambo mfumu.” 18 Kabiji waambile’mba: “Mambo ka anweba nkambo o mubena kumpangishisha amiwa kalume wenu,+ ñanyi kintu kyo nauba, kabiji ñanyi mambo o nalenga?+ 19 Pano anweba nkambo mfumu, nemusashijila kuteleka byo nsakwamba amiwa kalume wenu: Inge Yehoba ye wimutundaika kuñimena, atambule* mulambo wami wa kajo. Bino bantu inge bo bemutundaika,+ bafingwa kwi Yehoba, mambo bampanga kuba’mba ndeke kukwatankana na buswanyi bwa Yehoba,+ ne kuñambila’mba, ‘Yanga ukengijile balesa bangi!’ 20 Pano kange muleke mashi ami asuumine panshi Yehoba saka amona ne, mambo mfumu wa Isalela waiya na kukeba lubalebale,+ uba nobe ubena kupangisha nkwaji pa mitumba.”

21 Kepo Saulo aambile amba: “Nalenga mambo.+ Bwela kuno, mwanami Davida, mambo kechi nkabwezhapo kukuba kyatama ne, mambo lelo jino wibunemeka bumi*+ bwami. Kine, nauba kintu kya kubula maana kabiji nalubankanya bingi.” 22 Davida waambile’mba: “Jifumo ja mfumu je. Ambilai nsongwalume umo eye ejisende. 23 Yehoba ye ukafweta muntu yense pa bololoke bwanji+ ne pa bukishinka bwanji, mambo lelo Yehoba waji kwimupana mu kuboko kwami, bino kechi naji kukebanga kutanyika kuboko kwami pa mushingwa wa Yehoba ne.+ 24 Umvwai! Byonkatu bumi* bwenu byo naji kwibunemeka lelo jino, byonkabyo ne bumi* bwami bwikale bwanema kwi Yehoba, kabiji ampokolole ku bya malwa byonse.”+ 25 Saulo waambijile Davida amba: “Ubilwe bibusa mwanami Davida. Kine ukoba bintu bikatampe, kabiji byo ukobanga bikalumbuluka.”+ Kepo Davida ayile, kabiji Saulo wabwelele kwanji.+

27 Nangwa byonkabyo, Davida waambilenga mu muchima wanji amba: “Juba jimo Saulo ukangipaya. Kyawama kuba’mba nyemene+ ku kyalo kya bena Filishitiya; Saulo po po akaleka kunkeba mu manyaunda onse a bena Isalela,+ kabiji nkapuluka kwi aye.” 2 Byonkabyo, Davida waimene na banabalume 600+ bo ajinga nabo ne kuya kwi Akishi+ mwana wa kwa Maoka, mfumu wa Gata. 3 Davida waikelenga ne Akishi mu Gata, aye ne bantu banji, ne muntu yense wajinga na kisemi kyanji. Davida wajinga na bakazhi banji babiji, Ahinoamu+ wa ku Yezelela ne Abigaila+ mwina Kamela wajinga muka Nabala. 4 Saulo byo bamubuujile’mba Davida wanyemena ku Gata, ponkapo walekele kumukebakeba.+

5 Kepo Davida aambijile Akishi amba: “Inge mwangubila lusa, mpepoi muzhi umo wa mu yoya mizhi icheche kuba’mba ngikalengamo. Mambo ka amiwa kalume wenu o nafwainwa kwikela ne anweba mu muzhi wa mfumu?” 6 Onkao mambo, Akishi wamupele Zikilagi+ pa jonkaja juba. O ene mambo Zikilagi o aikela muzhi wa bamfumu ba mu Yuda kufika ne lelo jino.

7 Kimye* kyaikele Davida mu muzhi mucheche wa bena Filishitiya kyajingatu mwaka umo ne bañondo bana.+ 8 Davida wayanga na kulukuka bena Geshula,+ bena Giliza ne bena Amaleki,+ mambo baikalanga mu kyalo kyafumine ku Tilama kukafika ne ku Shula+ ne kukunkulukila ku kyalo kya Ijipita. 9 Davida inge walukuka kyalo, kechi wapulushangapo mwanamulume nangwa mwanamukazhi ne,+ bino aye wasendangatu mikooko, bañombe, bambongolo, bangamela ne bivwalo, inge wapwisha kuba bino, wabwelanga kwi Akishi. 10 Kabiji Akishi wamushikishanga’mba: “Lelo waji kulukukila kwepi?” Davida wakumbulanga’mba: “Ku kabeta ka ku bulenge* bwa Yuda”+ nangwa’mba “Ku kabeta ka ku bulenge bwa kyalo kya bena Yelamela”+ nangwa’mba “Ku kabeta ka ku bulenge bwa kyalo kya bena Keni.”+ 11 Davida kechi wapulushangapo mwanamulume nangwa mwanamukazhi amba ebalete ku Gata ne, waambilenga’mba: “Kuchina’mba bakebabuula pe atweba amba, ‘Abino byo byaji kuba Davida.’” (Abino byo byo aubanga kimye kyonse kyo aikele mu muzhi mucheche wa bena Filishitiya.) 12 Onkao mambo, Akishi wamuketekejile Davida ne kwamba mu muchima wanji amba: ‘Kine, balongo banji bena Isalela bamushikwa; onkao mambo, aye ukekala ke kalume wami kimye kyonse.’

28 Mu oa moba, bena Filishitiya bakonkenye pamo mazhita abo kuba’mba balwe na bena Isalela.+ Onkao mambo, Akishi waambijile Davida amba: “Kwa kubula nangwa kuzhinaukatu ne, wayuka’mba obewa ne bantu bobe musakuya ne amiwa ku nkondo.”+ 2 Ponkapo Davida waambijile Akishi amba: “Mwayukishatu bulongo kintu kyo nsakuba amiwa kalume wenu.” Akishi waambijile Davida amba: “O ene mambo o nkakutongwela kwikala kapaso wami wa kimye kyonse.”*+

3 Pa kyokya kimye Samwela saka afwa kala, ne bena Isalela bonse bamujijile ne kumuzhiika mu Lama, mu muzhi wanji.+ Kabiji Saulo wapangilemo bantu mu kyalo besamba na mipashi ne bañanga bamba bikamweka kulutwe.+

4 Bena Filishitiya bakonkene pamo ne kuya na kutebelela mu Shunema.+ Saulo naye wakonkenye pamo bena Isalela bonse, ne kutebelela mu Giliboa.+ 5 Saulo byo amwene nzhita ya bena Filishitiya, wachiine bingi, ne muchima wanji walukuchilenga.+ 6 Nangwa kya kuba Saulo wamwipwizhenga Yehoba,+ Yehoba kechi wamukumbwile nangwa mu biloto nangwa na Ulimu+ nangwa kupichila mu bangauzhi ne. 7 Kepo Saulo aambijile bakalume banji amba: “Nkebelaiko mwanamukazhi wisamba na mipashi,+ ngyeko na kumwipuzha.” Bakalume banji bamwambijile’mba: “Ku Ene-dola kuji mwanamukazhi wisamba na mipashi.”+

8 Onkao mambo, Saulo wialwile’mba babule kumuyuka ne kuvwala bivwalo bingi, kabiji wayile bufuku na bantu banji babiji ku uno mwanamukazhi. Wamwambijile’mba: “Nakusashijila, mpongeleko kupichila mu kwisamba na mipashi+ ne kumbuushishako muntu ye nsakukubuula.” 9 Nangwa byonkabyo, mwanamukazhi wamwambijile’mba: “Mwayukishatu bulongo Saulo byo aubile, byo ebapangilemo bantu mu kyalo besamba na mipashi ne bañanga bamba bikamweka kulutwe.+ Pano mambo ka o mubena kukebela kunta* kitewa kuba’mba bangipaye?”+ 10 Kepo Saulo achipile kwi aye mu jizhina ja Yehoba amba: “Byonkatu Yehoba byo aji na bumi, kechi usakwikala na mambo a kino kintu ne!” 11 Kepo mwanamukazhi amushikishe’mba: “Ñanyi ye mubena kukeba’mba nemubuushishe?” Aye wamukumbwile’mba: “Mbuushisheko Samwela.” 12 Mwanamukazhi byo amwene “Samwela,”*+ watamine muteto ne kwambila Saulo amba: “Mambo ka o mwaji kumbepela? Anweba mwi ba Saulo!” 13 Mfumu waambijile mwanamukazhi amba: “Kuchina ne, ki ka kyo wamona?” Mwanamukazhi wamukumbwile Saulo amba: “Namona muntu uji nobe lesa saka eya kufuma mu mushiji.” 14 Ponkapo wamushikishe’mba: “Ubena kumweka byepi?” Ne mwanamukazhi wakumbwile’mba: “Mukote ye ubena kwiya, kabiji wavwala mukangyo wabula maboko.”+ Ponkapo Saulo wayukile’mba ye “Samwela,” kabiji wafukamine ne kukunyika kilungi kyanji panshi ne kumulambila.

15 Kepo “Samwela” ashikishe Saulo amba: “Mambo ka o wankatezha byo wambuusha?” Saulo wamukumbwile’mba: “Nji mu lukatazho lukatampe. Bena Filishitiya babena kulwa ne amiwa, kabiji Lesa wafuma pe amiwa waleka ne kunkumbula, nangwa kupichila mu bangauzhi nangwa mu biloto;+ o ene mambo o nemwichila kuba’mba mumbuule kintu kyo nafwainwa kuba.”+

16 Kepo “Samwela” amushikishe’mba: “Pano mambo ka o ubena kungipwizha, Yehoba byo afuma pe obewa+ ne kwikala mulwanyi wobe? 17 Yehoba ukooba kintu kyo aambile kupichila mwi amiwa: Yehoba ukatabula bufumu buji mu maboko obe ne kwibupana ku mukwenu, aye Davida.+ 18 Mambo kechi wakookejile jiwi ja Yehoba ne, kabiji kechi waipayile bena Amaleki+ bakolomwene bukaji bwanji ne, o ene mambo Yehoba o abena kubila bino kwi obewa lelo jino. 19 Kabiji Yehoba ukapana bena Isalela ne obewa mu maboko a bena Filishitiya,+ kabiji kesha+ obewa ne baana bobe+ ba balume mukekala ne amiwa. Yehoba ukapana ne nzhita ya bena Isalela mu maboko a bena Filishitiya.”+

20 Ponkapo Saulo waponejile panshi, kabiji waumvwine bingi moyo na mambo a byambo byaambile “Samwela.” Kabiji bulume bonse bwamupwile, mambo kechi wajiilepo kajo mute yense ne bufuku bonse ne. 21 Mwanamukazhi byo aishile kwi Saulo ne kumona’mba wakakilwa bingi, wamwambijile’mba: “Amiwa wa mwingilo wenu naji kukookela byo mwaji kwamba, kabiji naji kubika bumi bwami mu kizumba*+ ne kuba byo mwaji kumbuula. 22 Pano nemusashijila, umvwai byo nsakwamba amiwa wa mwingilo wenu. Ubai nemunengezhezhepo shinkwa; muje pa kuba’mba mwikale na ngovu byo musakubwelanga.” 23 Bino aye wakaine ne kwamba’mba: “Kechi nsakuja ne.” Nangwa byonkabyo, bakalume banji ne uno mwanamukazhi bamutundaikilenga. Kepo ebomvwijile ne kubuukapo panshi ne kwikala pa mwanya. 24 Mwanamukazhi walelele mwana ñombe wanuna pa nzubo yanji, onkao mambo, wapelawizhe kumwipaya* ne kushikula bunga ne kwibukanda ne kosha shinkwa wabula mbizho. 25 Waletele kano kajo kwi Saulo ne bakalume banji, ne abo bajiile. Byo bapwishishe, baimene ne kuya bonkabwa bufuku.+

29 Bena Filishitiya+ bakonkenye mazhita abo onse ku Afeki, ne bena Isalela saka batebelela ku nsulo ya mema iji ku Yezelela.+ 2 Kabiji bamfumu ba bena Filishitiya bayilenga na bitota ne biumbi bya bashilikale babo, bino Davida ne bantu banji balondejilenga munyuma pamo ne Akishi.+ 3 Bino babinemanga ba bena Filishitiya baipwizhe’mba: “Nga bano Bahebelu bananga ka kuno?” Akishi wakumbwile babinemanga ba bena Filishitiya amba: “Uno ye Davida, kalume wa kwa Saulo Mfumu wa bena Isalela, yenka ye naikala nanji mwaka umo ne kukilapo.+ Kechi namonamo kyatama mwi aye ne, kufumatu juba jo anyemejile kwi amiwa kufika ne lelo.” 4 Bino babinemanga ba bena Filishitiya bamuzhingijile, kabiji bamwambijile’mba: “Mwambilai abwelemo.+ Abwele ku mpunzha ko mwamupele. Kange mumuleke aye ne atweba ku nkondo ne, kuchina’mba waketwalukilamo pa kulwa nkondo.+ Mambo ñanyi kintu kyo akonsha kuba pa kuba’mba bamutemwe kwi nkambo yanji, kyakila pa kwipaya bantu betu? 5 Nanchi uno kechi ye Davida ye baimbilengapo kimye kyo bazhilenga’mba:

6 Onkao mambo, Akishi+ waichile Davida ne kumwambila’mba: “Byonkatu Yehoba byo aji na bumi, obewa waoloka, kabiji natemwa bingi byo waiya kuba’mba uye ku nkondo na nzhita yami,+ mambo kechi namonamo kyatama mwi obewa ne, kufumatu juba jo waishile kwi amiwa kufika ne lelo.+ Bino bamfumu kechi bakuketekela ne.+ 7 Pano bwela mu mutende, kabiji kange ube kintu nangwa kimo kisakuzhingijisha bamfumu ba bena Filishitiya ne.” 8 Nangwa byonkabyo, Davida waipwizhe Akishi amba: “Ñanyi kintu kyo nauba? Ñanyi bubi bo mwataana mwi amiwa kalume wenu kufumatu juba jo naishile kwi anweba kufika ne lelo jino? Mambo ka o nsakubujila kuya nenu ne kulwa na balwanyi ba nkambo yami mfumu?” 9 Akishi wamukumbwile Davida amba: “Kwesakana na byo nayuka, obewa wawamatu nobe malaika wa Lesa.+ Bino babinemanga ba bena Filishitiya baamba’mba, ‘Kange mumuleke aye ne atweba ku nkondo ne.’ 10 Onkao mambo, ukabuuke ku makya ne bakalume ba nkambo yobe bo waishile nabo; mukemane lukelokelo ne kuya byo pakatokatu.”

11 Byonkabyo, Davida ne bantu banji baimene lukelokelo ne kubwela ku kyalo kya bena Filishitiya, kabiji bena Filishitiya bayile ku Yezelela.+

30 Davida ne bantu banji byo babwelele ku Zikilagi+ pa juba ja busatu, bataaine bena Amaleki+ balukuka kala kyalo kya ku kabeta ka ku bulenge* ne Zikilagi, balukukile muzhi wa Zikilagi ne kumusoka na mujilo. 2 Batwajile mu buzha banabakazhi+ ne byonse byajingamo, kutendekelatu ku kicheche kufika ne ku kikatampe. Kafwako nangwa umo ye baipayile ne, bino bebasendele ne kuya bayile. 3 Davida ne bantu banji byo bafikile mu muzhi, bataaine kuba’mba muzhi bamusoka, kabiji bakazhi babo, baana babo ba balume ne baana babo ba bakazhi bebatwala mu buzha. 4 Ponkapo Davida ne bantu bo ajinga nabo batendekele kujila mabingo, kufikatu ne bulume bwa kujila byo bwapwile. 5 Bakazhi ba kwa Davida babiji nabo bebatwajile mu buzha, Ahinoamu wa ku Yezelela ne Abigaila wajinga muka Nabala mwina Kamela.+ 6 Davida wajinga bingi na bulanda, mambo banabalume baambilenga bya kumwasa mabwe, mambo bantu* bonse bazhingijile bingi na mambo a kwibasendela baana babo ba balume ne baana babo ba bakazhi. Bino Davida wakosele na mambo a bukwasho bwa Yehoba Lesa wanji.+

7 Kepo Davida aambijile Abiata+ ñanga mwana wa kwa Ahimeleki amba: “Nakusashijilapo, leta kajilaya kabula maboko kuno.”+ Ne Abiata waletele kajilaya kabula maboko kwi Davida. 8 Davida waipwizhe Yehoba+ amba: “Nanchi neipupile ino nzhita nyi? Abya nsakwibataana nyi?” Ponkapo Lesa wamwambijile’mba: “Bapupile, mambo kine usakwibataana kabiji usakupokolola byonse.”+

9 Ponkapotu Davida wayile na banabalume 600+ bo ajinga nabo, kabiji bakafikile ne ku Kakola* ka Besola, konka kwakashajile banabalume bamo. 10 Davida watwajijile kwibapupila na banabalume 400, bino banabalume 200 bakookeletu zubulu kya kuba bakankalwa ne kwabuka Kakola ka Besola, bashajile.+

11 Bataaine mwanamulume mwina Ijipita mungye ne kumuleta kwi Davida. Bamupele kajo ne mema a kutoma, 12 ne kibese kya shinkwa ye balengele na makuyu a kufina ne bashinkwa babiji bo balengele na mañanzañanza auma. Byo ajiile, ngovu yabwelelemo,* mambo kechi wajiilepo kajo nangwa kutoma mema pa moba asatu, mute ne bufuku ne. 13 Kepo Davida amwipwizhe’mba: “Obewa wi wa kwa ñanyi, kabiji wafuma kwepi?” Aye wakumbwile’mba: “Ne wa mwingilo mwina Ijipita, muzha wa mwanamulume mwina Amaleki, bino nkambo yami wanshile mambo nakolelwe moba asatu apitapo. 14 Twalukukile kyalo kya bena Keleta+ ku kabeta ka ku bulenge* ne nyaunda ya Yuda ne kyalo kya Kaleba+ ku kabeta ka ku bulenge,* ne muzhi wa Zikilagi twamusokele na mujilo.” 15 Ponkapo Davida wamwipwizhe’mba: “Nanchi wakonsha kuntwala kuji ino nzhita nyi?” Aye wamukumbwile’mba: “Inge muchipe kwi amiwa mu jizhina ja Lesa amba kechi musakungipaya ne, ne kuba’mba kechi musakumpana kwi nkambo yami ne, nsakwimutwala kuji ino nzhita.”

16 Onkao mambo, wamutwajile ku mpunzha ko bajinga saka baikala kukumbana mpunzha yonse, saka baja ne kutoma ne kusangalala na mambo a bintu byavula byo basendele kufuma mu kyalo kya bena Filishitiya ne kyalo kya Yuda. 17 Kepo Davida ebatapile kufumatu ku makya kufika ne mabanga; kafwako muntu nangwa umo wanyemene ne,+ kanatu aba banabalume 400 bakanjijile pa bangamela ne kunyema. 18 Davida waangachile bintu byonse byo basendele bena Amaleki,+ kabiji Davida wapokolwele bakazhi banji babiji. 19 Kafwako kintu kyabo nangwa kimo kyaelekele ne, kutendekelatu ku kicheche kufika ne ku kikatampe. Bapokolwele baana babo ba balume ne baana babo ba bakazhi ne bintu byo bebapukwile;+ Davida waangachile bintu byonse byo basendele. 20 Kabiji Davida wasendele mikooko ne bañombe bonse, bo bafungilenga ne kwibatangizhako kulutwe ya banyama babo. Baambile’mba: “Abino byo bipukulwa bya kwa Davida.”

21 Kepo Davida afikile pajinga banabalume 200 bonka bakookeletu zubulu kya kuba bakankalwa ne kuya ne Davida, aba bonka bashajile ku Kakola ka Besola,+ ne abo bamutundaijile Davida ne bantu bo ajinga nabo. Davida byo afikile kwipi na bano banabalume wibemwine. 22 Nangwa byonkabyo, bantu batama kabiji babula maana bajinga pa boba bayile ne Davida baambile’mba: “Na mambo a kuba’mba kechi bayile ne atweba ne, kechi tusakwibapapo bipukulwa byo twapokolola ne, basakusendatu bakazhi babo ne baana babo ne kuya bayenga.” 23 Bino Davida waambile’mba: “Balongo bami, kange mube kino pa bintu Yehoba byo etupa ne. Wituzhikijile ne kupana mu maboko etu nzhita yaishile na kwitulukuka.+ 24 Ñanyi usakuswa byo mwaamba? Kintu kisakutambula yense wayile ku nkondo, kyo kisakutambula ne yense washajile na bipe.+ Bonse basakutambula.”+ 25 Kabiji kufumatu jonkaja juba kuya ne kulutwe, kino kintu wikilengele kwikala ke jilamuna ne muzhilo ku bena Isalela kufika ne lelo jino.

26 Davida byo abwelele ku Zikilagi, watuminepo bipukulwa bimo ku bakulumpe ba mu Yuda bajinga balunda nanji ne kwamba’mba: “Buno bo bupe* bwenu bwafuma pa bipukulwa bya balwanyi ba Yehoba.” 27 Wibutumine ku boba bajinga ku Betele,+ ne bajinga ku Lamota wa mu Negeba,* ne bajinga ku Yatila,+ 28 ne bajinga ku Aloa, ne bajinga ku Sifumota, ne bajinga ku Eshitemoa,+ 29 ne bajinga ku Lakala, ne bajinga mu mizhi ya bena Yelamela,+ ne bajinga mu mizhi ya bena Keni,+ 30 ne bajinga ku Holama,+ ne bajinga ku Bolashane, ne bajinga ku Ataki, 31 ne bajinga ku Hebulona+ ne mu mapunzha onse mwayanga Davida ne bantu banji.

31 Bena Filishitiya balwilenga na bena Isalela.+ Kabiji banabalume bena Isalela banyemene bena Filishitiya, kabiji bavula bebepayijile pa Mutumba wa Giliboa.+ 2 Bena Filishitiya bamunankamine Saulo ne baana banji ba balume, kabiji bena Filishitiya batapile baana ba kwa Saulo abo ba Yonafwanyi,+ Abinadaba ne Malikishua.+ 3 Nkondo yamukosejile bingi Saulo, ne bataya miketo bamutaaine, kabiji bataya miketo bamukozhezhe bingi.+ 4 Kepo Saulo aambijile wamusendelanga bilwilo amba: “Somona mpoko yobe ungase, kuchina’mba bano bantu babula kuya ku mukanda+ bakeya nakungasa ne kunguba kintu kyatama* bingi.” Bino awa wamusendelanga bilwilo kechi wakebele kuba kino ne, mambo waumvwine bingi moyo. Onkao mambo, Saulo washikwile mpoko ne kuponenako.+ 5 Awa wamusendelanga bilwilo byo amwene’mba Saulo wafwa,+ naye waponejile ku mpoko yanji ne kufwila pamo nanji. 6 Byonkabyo, Saulo, baana banji ba balume basatu, awa wamusendelanga bilwilo, ne bantu banji bonse bafwijile pamo jonkaja juba.+ 7 Bena Isalela baikalanga mu kimpachiko* ne mu kibunji kya Yodano, byo baumvwine’mba bashilikale ba bena Isalela banyema ne kuba’mba Saulo ne baana banji bafwa, batendekele kufumamo mu mizhi ne kunyema;+ kepo bena Filishitiya baishile ne kwikalamo.

8 Juba jalondejilepo, bena Filishitiya byo baishile na kuvuula bo baipayile, bataaine Saulo ne baana banji basatu saka balaala pa Mutumba wa Giliboa.+ 9 Onkao mambo, bamuchibileko mutwe ne kumuvuula bya kuvwala byanji bya nkondo ne kutuma jiwi mu kyalo kyonse kya bena Filishitiya ne kutaya mbila+ mu mazubo onse a bankishi babo+ ne mu bantu babo. 10 Kepo babikile bya kuvwala byanji bya nkondo mu nzubo ya bipashañano bya Ashatoleta, ne kupopela mubiji wanji ku nsakwa ya Bete-shana.+ 11 Bena Yabeshi-gileada+ byo baumvwine kintu kyaubile bena Filishitiya kwi Saulo, 12 bashilikale bonse baimene ne kwenda bufuku bonse ne kufumyako mubiji wa kwa Saulo ne mibiji ya baana banji ku nsakwa ya Bete-shana. Babwelele ku Yabeshi ne kwiisookela konkakwa. 13 Kabiji basendele bikupa byabo+ ne kwibizhiika munshi ya kichi kya tamaleshika mu Yabeshi,+ kabiji bazhikilwe na nzala moba atanu na abiji.