BYAMBAPO BAIBOLO

Yesu

Nanchi Yesu Lesa Nyi?

“Kafwako muntu wamonapo kala Lesa ne.”—Yoano. 1:18.

BYAMBA BANTU Bantu bavula baitabila kuba’mba Yesu kechi Lesa ne. Pano bino, bakwabo bamba pa byepelo bya mu Baibolo bimwesha nobe Yesu waesakana pamo ne Lesa.

BYAMBA BAIBOLO Baibolo kechi umweshapo kuba’mba Yesu Lesa wa bulume bonse nangwa amba waesakana ne Lesa ne. Pano bino, Baibolo ufunjisha kuba’mba Yesu kechi waesakana pamo ne Lesa ne. Kyakumwenako, mu Baibolo muji byambo byaambile Yesu bya kuba’mba: ‘Batata bo bankila.’ (Yoano 14:28) Kabiji Baibolo waamba’mba: “Kafwako muntu wamonapo kala Lesa ne.” (Yoano 1:18) Yesu kechi wakonsha kwikala Lesa ne, mambo bantu bavula bamumwene Yesu.

Baana ba bwanga ba kwa Yesu batanshi kechi baambile’mba Yesu wajinga Lesa ne. Kyakumwenako, nembi wa Mambo Awama aye Yoano waambile pa bintu byanembwa amba: “Abino byanembwa kuba amba mwitabile amba Yesu ye Kilishitu Mwana Lesa.”—Yoano 20:31.a

Yesu Wasemenwe Ñanyi Kimye?

“Mwajinga . . . bakafunga bajinga mungye na kusopa matanga abo bufuku bonse.”—Luka 2:8.

BYAMBA BANTU Bantu bamo basekelela kiminshiminshi pa 25 December, mambo balanguluka’mba jo juba jasemenwe Yesu. Bakwabo basekelela juba jasemenwe Yesu ku ntendekelo ya January.

BYAMBA BAIBOLO Baibolo kechi waamba juba jasemenwe Yesu ne. Nangwa byonkabyo, waamba kuba’mba pa kimye kyasemenwe Yesu, “mwajinga . . . bakafunga bajinga mungye na kusopa matanga abo bufuku bonse.” (Luka 2:8) Onkao mambo kechi kyakonshekele bano bakafunga kulama matanga abo pangye bufuku mu ñondo wa December ne January ne. Mambo ka?

Mambo ku mpunzha kwasemekejilwe Yesu kwikala bingi mashika mu December ne January. Pa kwamba pa kikye kimye kya mwaka, Baibolo ushimuna kuba’mba bantu ‘bazakaminenga na mambo a mvula mukatampe.’ (Ezela 10:9, 13; Yelemiya 36:22) Onkao mambo, pa kikye kimye kya mwaka, bakafunga kechi bakonsheshe kwikala “mungye” na matanga abo ne.

Nanchi kya Kine Yesu Wasangwilwe Nyi?

“Lesa wamusangwile [Yesu] ku bafu”—Byubilo 3:15

BYAMBA BANTU Bantu bamo baitabila kuba’mba kechi kyakonsheka muntu yense, kubikapotu ne Yesu kusangulwa ku bafu ne.

BYAMBA BAIBOLO Yesu wafunjishe baana banji ba bwanga amba ‘ukamanyikwa kyabaya bingi ne kumwipaya, apa bino akasangulwe pa juba ja busatu.’ (Mateo 16:21) Baibolo waamba’mba panyuma ya kumwipaya ne kusangulwa, Yesu wamwekele ku bantu kukila pa 500. (1 Kolinda 15:6) Bantu bamumwene Yesu, bashiinwe kuba’mba wasangulwa ku bafu. Bepaine ne kufwilapo pa luno lwitabilo lwabo.—Byubilo 7:51-60; 12:1, 2.

ENE MAMBO O KYANEMENA Baibolo ufunjisha kuba’mba lufu lwa kwa Yesu ne lusanguko lwanji lwashinkwijile bantu bonse jishinda ja kumwenamo mu mulaye wa mu Baibolo wa Paladisa pano pa ntanda. (Salamo 37:11, 29; Lumwekesho 21:3, 4) Tuji na luketekelo lwa kwikala na bumi bwa myaka ne myaka kabiji bwa lusekelo mu Paladisa pano pa ntanda. Tusanta bingi pa butemwe bwitutemwa Yesu ne Shanji, Lesa wa Bulume bonse aye Yehoba.—Yoano 3:16; Loma 6:23.

[Tubyambo twa mushi]