LUFUNJISHO 2
Mwakonsha Kumuyuka Byepi Lesa?
1, 2. Ñanyi kimwesho kibena kulumbulula jishinda jabukine jakuyukilako bupopweshi byobuji?
TWAKONSHA kumuyuka byepi Lesa? Nanchi kyakonsheka kupesa-pesa mafunjisho onse abupopweshi bubavule bibyenyi? Kino kechi kyakonshekane. Pano umvwe kyakuba kyaubiwa, twakonsha kuyuka byepi lufunjisho lwakine?
2 Kashika, namambo akuba mafunjisho pamambo a Lesa aenda kupusana-pusana, twafwainwa kumonapo jishinda jimo jabukine, jaitabilamo bantu. Kyakumwenako: Umvwe kyakuba pakisankane paji babena kwipachika pamambo abula bwakisapi. Mupoteshi waamba kuba’mba akye kisapi kiji namamita asatu mubula, bino ubena kupota aye amba ine kyaipipa. Nanchi ano mapata akonsha kupwa byepi? Akonsha kupwatu umvwe kisapi bekipima natepu.
3. Mamboka Baibolo kyoyanembejilwe?
3 Abya kujipo tepu nangwa’mba bukine bwakuyukilako bupopweshi byobujinyi? Ee, Baibolo. Lesa wanembeshe Baibolo kuba’mba bantu konse konse bamuyuke. Ma Baibolo anembwa avula bingi. Kabiji yatuntululwa yonse, nebibese byayo bimo mumilaka kukila 2,100, pakuba’mba muntu yense akonshe kutanga bukine mumulaka wanji mwine kuba’mba ayuke Lesa.
4. Ñanyi byambo biji mu Baibolo?
4 Baibolo kekyabupe kyanema kyafuma kwi Lesa. Itulumbulwila bintu byotwashi tukabule kuyuka. Itubula bilengwa bya mupashi byamwiulu. Kabiji itulumbulwila milanguluko ya Lesa, bumuntu bwanji, apa bino nebyoakeba. Yamba pabyoalaminenga bantu myaka yakala nepabikamweka kulutwe nalwendo. Itufunjisha nebyotwakonsha kutana jishinda jaya kubumi bwamyaka.
Ene Mambo Omwafwainwa Kuketekela Baibolo
5. Kyakumwenakoka kimwesha’mba Baibolo yamba nebya sayansi?
5 Bishinka byavula bingi byakonsha kwitulengela kuketekela’mba Baibolo kine Byambo bya Lesa. Kishinka kimo kekyakuba’mba Baibolo yamba nebya sayansi. Kala bantu mwaya ntanda yonse baketekejile’mba kuji kintu kiikwata ntanda poyaikala. Kyakumwenako, bantu ba Kumuzhika wa Africa baketekejile’mba ntanda yaikala pamulolo wipombakanya bizhingu 3,500 peulu nepanshi. Monka mwaambila sayansi, nembi wa Baibolo umo wanembele’mba Lesa ‘wakobeka ntanda palwelele.’ Pabapite myaka kukila 3,500 kufuma kimye anembele bino byambo.—Yoba 26:7.
6. Ñanyi kiyukilo kikatampe kiyukisha kuba’mba Baibolo kine yafuma kwi Lesa?
6 Kiyukilo kikatampe kiyukisha kuba’mba Baibolo kine yafuma kwi Lesa ke binembelo bijimo byambila jimo bintu bikobiwa kimye kyakulutwe. Lesa kechi wambatu nobe mañambila abantu ne, aye wayuka byakulutwe kabiji byonse byoamba bikala byakine.
7. Bungauzhika bumo bwamu Baibolo bwafikizhiwe mukimye kyakunyuma?
7 Bungauzhi bwavula bwamu Baibolo bwafikizhiwe mubimye byakala. Kyakumwenako, myaka 700 kulutwe, Baibolo yaambijile jimo kuba’mba Yesu ukasemwa mumuzhi wa Betelema, nekino kyaubiwe byonkabyo. (Mika 5:2; Mateo 2:3-9) Kununga pabungauzhi bwavula bwaambijile jimo pakusemwa kwa Yesu, Baibolo yaambile nekuba’mba ukasemwa mu mwanamukazhi muzhike kabiji kulutwe nalwendo ukasololwa na ndalama ya siliva makumi asatu. Abwa bungauzhi nabo bwafikizhiwe. Ee kine, kafwako muntu nangwa umo wakonsheshe kwamba bintu byamweka kulutwene!—Isaya 7:14; Zekaliya 11:12, 13; Mateo 1:22, 23; 27:3-5.
8. Ñanyi bungauzhi bumo bubena kufikizhiwa muano moba etu alelo, kabiji bulumbululaka?
8 Kabiji bungauzhi bwavula bwamu Baibolo bubena kufikizhiwa muano moba etu alelo. Bumo kebuno:
“Mukoka ukemena mukoka mukwabo [mu nkondo], bufumu nabo bufumu bukwabo; kukekala ne bitentanshi bikatampe, ne kuntu kwavula kukekala bipowe bya nzala ne myalo.”—Luka 21:10, 11.
Kabiji ne “bubi bukavula.”—Mateo 24:12.
“Mu moba akapelako . . . bantu bakekala ba kwitemwa abo bene, ba kutemwa mali, . . . ba kulengulula bebasema, . . . bakubula kwilama, bashinta, ba kubula kutemwa byawama, . . . ba kwilundumika, ba kutemwa bya lusangajiko ne kutemwa Lesa ne.”—2 Timoti 3:1-5.
Nanchi kechi mwaswa kuba’mba bino bintu bibena kumweka kino kimye nenyi? Bungauzhi bwamu Baibolo bulumbulula kuba’mba Baibolo kechi buku uji byonka biji mabuku akwabo akumbanamone. Ke Byambo bya Lesa byanembeshiwa!—2 Timoti 3:16.
Nanchi Baibolo Yapimpulwanyi?
9, 10. Kika kimwesha’mba Lesa kechi waitabizha bantu kupimpula Baibolo ne?
9 Twambe namba yenu bene bena fwakitole kabiji mwanemba nemizhilo yakulondela bantu benu bankito. Umvwe mulwanyi waiya bumbelambela nekunembamo mizhilo ingi muyoya yomwanembele, mwakonsha kubapo byepi? Nanchi kuba mwaolola yoya mizhilo ingi nenyi? Byonkabyo, Lesa kechi wakonsha kuswisha bantu kupimpula bukine bwa Byambo byanji, Baibolo ne.
10 Aba betutujika amba bapimpule mafunjisho a Byambo bya Lesa bakankalwa. Umvwe twaesakanya Baibolo yotuji nayo lelo jino kuma Baibolo anembelwe kala, tutana kuba’mba ajitu pamo. Kino kilumbulula’mba nanchi pamyaka yavula Baibolo kechi yapimpulwane.