Yesu, Bankasanji Ne Bansemi Banji Baya Ku Yelusalema

Kyajinga kimye kya mwela wa mebele. Onkao mambo, kimye kyafikile kya kuba’mba Yosefwa ne kisemi kyanji pamo na balongo ne balunda nanji, baye ku Yelusalema. Bayanga ku Yelusalema pa mwaka pa mwaka na kutanwa ku Kijiilo kya Lupitailo, byonka byakambizhe Mizhilo ya Lesa. (Mpitulukilo ya mu Mizhilo 16:16) Kufuma ku Nazala kufika ku Yelusalema palepele makilomita 120. Bantu bonse basangalele bingi. Pa kikye kimye, Yesu wajinga na myaka 12, kabiji wakebeshe bingi kutanwa ku kino kijiilo ne kufika kwipi na nzubo ya Lesa jikwabo.

Yesu ne bansemi banji ne bankasanji kechi batanwangatu ku Kijiilo kya Lupitailo kyonka ne. Panyuma ya Kijiilo kya Lupitailo, juba jalondelangapo jajinga “juba jitanshi ja Kijiilo kya Bashinkwa Babula Mbizho,” kyo baubanga pa moba atanu na abiji. (Mako 14:12) Baikalanga na kino kijiilo mu kimye kyo baikelangamo na Kijiilo kya Lupitailo. Onkao mambo, lwendo lonse kufuma ku nzubo yabo mu Nazala, moba o baikalanga mu Yelusalema, ne lwendo lwabo lwa kubwela ku nzubo, lwaikalanga nobe milungu ibiji. Bino, na mambo a kintu kyaubile Yesu, moba abo a lwendo avujijileko. Kino kyamwekele kimye kyo babwelelenga ku nzubo kufuma ku Yelusalema.

Byo babwelelenga ku nzubo, ba Yosefwa ne Maliya balangulukile’mba Yesu uji pamo na balongo ne balunda mo bayijilenga. Bino, byo balaajile bufuku pakachi ka lwendo lwabo, kechi bamumwene ne. Kabiji bayile na kumukeba mu balongo babo ne bayukane, bino kechi bamutaine ne. Onkao mambo, ba Yosefwa ne Maliya babwelele ku Yelusalema na kumukeba.

Bamukebele juba jonse, bino kechi bamutaine ne. Kabiji juba jalondejilepo najo kechi bamutaine ne. Bino pa juba ja busatu, bamutaine mu nzubo ya Lesa. Mu kibamba kimo kya mu nzubo ya Lesa bamwene Yesu saka aikala mukachi ka bafunjishi Bayudea. Watelekelenga kwi abo ne kwibashikisha mepuzho, kabiji nabo bakuminyenga bingi maana anji.

Maliya wamushikishe’mba: “Mwanami, mambo ka o witubila bibye? Bashobe ne amiwa twakooka na kukukeba.”—Luka 2:48.

Yesu wakuminye bingi pa kumvwa’mba kechi bayukile kwa kumutana ne. Wibashikishe’mba: “Mambo ka o mubankebelenga? Nanchi kechi mwayuka’mba nafwainwa kwikala mu nzubo ya Batata nenyi?”—Luka 2:49.

Byo bamutaine, Yesu wabwelele kwabo ku Nazala ne ba Yosefwa ne Maliya kabiji watwajijile kwibanekenena. Kabiji wakomenenga mu maana ne mu kimino, saka bamutemwa kwi Lesa ne ku bantu. Kufumatu ku bwanyike, byubilo bya kwa Yesu byamwesheshe kuba’mba watele muchima pa kwingila mwingilo wa Lesa ne kunemeka bansemi banji.