June

Bafunjishi bafwainwa kuta muchima bantu bo bafunjisha. Monainga bantu bo mufunjisha amba bakekala balongo ne banyenga yetu mu kipwilo. Kechi kibapelela kusha balunda nabo ba ku ntanda ne kupimpula bwikalo bwabo pa kuba’mba bengijilenga Yehoba ne. O ene mambo bafunjishi ba Mambo a Lesa o bakwashisha bo bafunjisha kuyuka balongo ne banyenga mu kipwilo. Bano balongo ne banyenga bakonsha kukwasha bafunda Baibolo kufwenya kwipi ne Yehoba ne kwibatundaika inge kebapite mu makatazho. Tukeba bonse bafunda Baibolo kuyuka’mba nabo ke lubaji lwa kipwilo kabiji baikala ke kisemi kyetu kya ku mupashi. Tukeba bafunda Baibolo kukasuluka kupwanañana na kisemi kyetu kya balongo ne banyenga. Kino kikebakwasha kuleka kupwanañana na bantu babula kwibakwasha kutemwa Yehoba. (Maana 13:20) Inge baleka kupwanañana na bantu bo bapwanañananga nabo kala, bafunda Baibolo bakayuka’mba bakonsha kutaana balunda ba kine mu jibumba ja Yehoba.—Mako 10:29, 30; 1 Pe. 4:4. w20.10 17 ¶10-11

Twafwainwa kwikala balunda ne Yesu pa kuba’mba twikale na bulunda bwawama ne Yehoba. Mambo ka? Langulukai pa bino bishinka bibiji. Kitanshi, Yesu wafunjishe baana banji ba bwanga amba: “Batata abo bene bemutemwa, mambo anweba mwantemwa.” (Yoa. 16:27) Kabiji waambile’mba: “Kafwako wiya kwi Batata ne, poso wapichila mwi amiwa.” (Yoa. 14:6) Kukeba kwikala balunda ne Yehoba saka mwabula kwikala balunda ne Yesu kijitu nobe kutwela mu kishimikwa kwa kubula kupichila pa kibelo. Yesu waingijishe ino ñambilo byo elumbulwile aye mwine amba ye ‘kibelo kya mikooko.’ (Yoa. 10:7) Kishinka kya bubiji ke kya kuba’mba Yesu wamwesheshetu suka byubilo bya Shanji. Waambijile baana banji ba bwanga amba: “Awa wammona, wamona ne Batata.” (Yoa. 14:9) Onkao mambo, jishinda jawama kuyukilamo Yehoba ke kufunda bwikalo bwa kwa Yesu. Inge twafunda byavula pe Yesu, butemwe bo twamutemwa bukabaya. Kabiji inge bulunda bwetu ne Yesu bwakosa, butemwe bo twatemwa Shanji bukabayilako. w20.04 21-22 ¶5-6

Nanchi mulaalatu pa mwanya nangwa mwendela pa kakinga kabilema nyi? Nanchi manungo enu akooka nangwa meso enu kechi amona bulongo nenyi? Inge byo byo kiji, nanchi mwakonsha kunyemena pamo na banyike nangwa boba baji na butuntulu bwa mubiji bwawama nyi? Ee, mwakonsha. Bavula bakoma ne bakolwakolwa babena kunyemena mu jishinda jaya ku bumi. Kechi bakonsha kuba bino na bulume bwabo ne. Pakuba batambula bulume kwi Yehoba kupichila mu kuteleka ku kupwila kwa bwina Kilishitu pa foni nangwa kutamba pa kiñambañamba. Kabiji bengila mwingilo wa kufunjisha bantu kwikala baana ba bwanga kupichila mu kusapwila ku badokotala, bamanase, ne balongo babo. Inge kya kuba mukankalwa kuba byonse byo mukeba kuba mu mwingilo wa Yehoba, kange mulefulwe ne kulanguluka’mba kechi mwakonsha kuchinchika kufika ku mpelo ya buno bwikalo ne. Yehoba wimutemwa na mambo a lwitabilo lwenu ne na mambo a byonse byo mwaingijile pa myaka yavula mu mwingilo wanji. Mwafwainwa kuketekela mu bukwasho bwanji luno kukila kala, kabiji kechi ukemusha ne. (Sala. 9:10) Pakuba ukafwenya kwipi ne anweba. w20.04 29 ¶16-17

Ñanyi mutwe ye mwakonsha kwisambapo na muntu uji na bupopweshi? Esekai kuyuka bintu byo mwataibilamo bonse. Kampe naye upopwelatu Lesa umo, wayuka’mba Yesu ye Mupulushi wa bantu, nangwa waitabila’mba katatakatu bubi bukapwe. Ingijishai bintu byo mwaitabilamo bonse kusapwila byambo bya mu Baibolo ku uno muntu pa kuba aswe kuteleka. Yukai kuba’mba bantu kechi bakonsha kwitabila byonse bifunjisha bantangi babo ba bupopweshi ne. Onkao mambo, nangwa kya kuba mwayuka bupopweshi buyamo muntu, esekai kuyuka bintu byo aitabila aye bunke bwanji. Mulongo umo mishonale wa ku Argentina waambile’mba bantu bamo bamba’mba baitabila Balesa basatu, bino kechi baitabila’mba Tata, Mwana, mupashi wazhila ke Lesa umo ne. Wanembele’mba: “Inge nayuka’mba muntu ye mbena kwisamba nanji kechi waitabila byonse bifunjisha bantangi banji ba bupopweshi ne, kimpelela kumusapwila.” Onkao mambo, mwafwainwa kwesekesha kuyuka bintu byaitabimo bantu. Byonka byo kyajinga kwi mutumwa Paulo, ne anweba ‘mukaluka bintu byonse ku bantu bonse.’—1 Ko. 9:19-22. w20.04 10 ¶9-10

Kechi twafwainwa kwakamwa byo tubena kutengela bintu biji kulutwe ne. Mambo Danyela ne Yoano baambile’mba Yehoba ne Yesu bakapulusha bakalume babo mu kimye kya malwa akatampe. Danyela waambile’mba bantu bakapuluka mazhina abo ‘bakeanemba mu buku.’ Pano twakonsha kuba byepi pa kuba’mba mazhina etu anembwe mu buku? Twafwainwa kumwesha’mba twaitabila mwi Yesu, Mwana Mukooko wa Lesa. (Yoa. 1:29) Twafwainwa kumwesha patoka kwipana kwetu kwi Lesa kupichila mu kubatizhiwa. (1 Pe. 3:21) Kabiji twafwainwa kutundaikanga Bufumu bwa Lesa kupichila mu kwibikako kukwasha bantu kuyuka Yehoba. Kino kyo kimye kya kukosesha luketekelo lwetu mwi Yehoba ne mu jibumba ja bakalume banji bakishinka. Kabiji kino kyo kimye kya kutundaika Bufumu bwa Lesa. Inge twauba bino, baketupulusha kimye Bufumu bwa Lesa kyo bukonauna mfumu wa ku kabeta ka ku buyeke ne mfumu wa ku kabeta ka ku bulenge. w20.05 16 ¶18-19

Adama ne Evwa bayukile jizhina ja Yehoba, kabiji bayukile ne bukine bwavula pa Mwine mwina jino jizhina. Bayukile’mba ye Mulenga wabo, ye wibapele bumi, muzhi wawama wa kwikalamo, ko kuba’mba Paladisa, ne masongola alumbuluka. (Nte. 1:26-28; 2:18) Bino nanchi batwajijile kulanguluka pa byonse bibobijile Yehoba nyi? Nanchi batwajijile kusanchila mwina jino jizhina nyi? Mikumbu yayukanyikilwe kimye mulwanyi wa Lesa kyo ebesekele. Kupichila mu muloolo, Satana washikishe Evwa bwipuzho bwa kuba’mba: “Nanchi Lesa kine wimwambijile’mba kechi mwafwainwa kuja ku bichi byonse bya mu bujimi nenyi?” (Nte. 2:16, 17; 3:1) Mu buno bwipuzho mwajinga bubela buji nobe bulembe bo bafya. Lesa waambile’mba bafwainwe kuja bipangwa ku bichi byonse, kufumyakotu kimo. (Nte. 2:9) Satana walengejile Adama ne Evwa kulanguluka’mba Lesa ntanyi. Kyamweka Evwa walangulukilenga’mba, ‘Nanchi Lesa witufya bintu byawama nyi?’ w20.06 3-4 ¶8-9

Bakalume ba Yehoba bamo bazhingila na mambo a kibobile mulongo nangwa nyenga mu kipwilo. Mutumwa Paulo wayukile kuba’mba bimye bimo umo wakonsha kwikala “na mambo na mukwabo” mulongo nangwa nyenga. Kabiji kampe bakonsha kwituba nshiji. Inge twabula kujimuka, twakonsha kwikala na kizhingijisha. Bukaji bwakonsha kulengela muntu kuleka kupwanañana na bantu ba Yehoba. Mulongo wa ku South America wa jizhina ja Pablo bamubepejile’mba walengele mambo, kabiji kyafuminemo, bamwangachile mingilo yo aingilanga mu kipwilo. Waubile byepi? Waambile’mba: “Nazhingijile, kabiji natendekele kuleka kupwila pachepache.” Inge muntu walengelepo mambo kala, wakonsha kutwajijila kwizhachisha ne kulanguluka’mba Lesa waleka kumutemwa. Nangwa kya kuba walapijile kabiji bamubijile lusa, wakonsha kulanguluka’mba kechi wafwainwa kutwajijila kwikala pa bantu ba Lesa ne. Mumona byepi balongo ne banyenga bapita mu makatazho a uno mutundu? w20.06 19 ¶6-7

Atweba twafwainwa kuyuka bintu byakonsha kubika bumi bwetu mu kizumba ne kumona byo twakonsha kwibichinuzhuka. (Hebe. 5:14) Twafwainwa kusalanga bulongo bya kisangajimbwe. Mitanchi ya pa TV ne mafilimu javula bitundaika byubilo bincha. Bino bintu bifichisha Lesa ku muchima kabiji byakonsha kwituletela bya malwa. Onkao mambo, twafwainwa kuchinuzhuka bino bya kisangajimbwe mambo byakonsha kwitulengela kuleka kutemwa Lesa. (Efi. 5:5, 6) Twafwainwa kwikala na milangwe ya kuyuka bizumba biji mu bubela busampanya bansatuki pa kuba’mba bakonshe kusampanya bya bubela pa balongo nangwa kwitulengela kutendeka kuzhinauka jibumba ja Yehoba. (1 Timo. 4:1, 7; 2 Timo. 2:16) Buno bubela bwakonsha kukokesha lwitabilo lwetu. Mambo ka? Mambo “bantu baji na michima yatama ne kukankalwa kumvwisha mwayila bukine” bo basampanya bino byambo. Kine kintu kyo bobila bino ke kukeba kuleta “mapata.” (1 Timo. 6:4, 5) Bekeba’mba twitabile byambo byabo byatama ne kuleka kuketekela balongo betu. w20.09 29 ¶13, 15

Ba mulume ne mukazhi bafwainwa kwitemwa ne kwinemeka. (Efi. 5:33) Baibolo witufunjisha kuta muchima pa kupana kukila pa kutambula. (Byu. 20:35) Ñanyi kyubilo kyakonsha kukwasha ba mulume ne mukazhi kwitemwa ne kwinemeka? Kwipelula kyo kyubilo kyakonsha kwibakwasha. Kwipelula kwakwasha bena Kilishitu bavula kwikala na bingi lusekelo mu masongo abo. Mwanamulume wasongola wa jizhina ja Steven waambile’mba: “Mwanamulume ne mwinakwanji bafwainwa kwingijila pamo, kikatakata inge baji na makatazho. Kechi mwafwainwa kulangulukangatu pa ‘kimuwamina bunke bwenu ne,’ bino mwafwainwa kulanguluka pa ‘bimuwamina bonse babiji.’” Abino byo bilanguluka ne benakwabo abo ba Stephanie. Baambile’mba: “Kafwako muntu utemwa kwikala na muntu umutobosha kimye kyonse ne. Inge twapusenamo mu milanguluko, twesekesha kuyuka kyalengela. Apa bino twalombapo, kukeba-keba bishinka ne kwisambapo. Twibikako kupwisha lukatazho kechi kwiambila byatama ne.” Ba mulume ne mukazhi bakekala na lusekelo inge kebabule kulanguluka kukila po mwafwainwa kwilangulukila. w20.07 3-4 ¶5-6

Kechi mwafwainwa kuketekela mu bulume bwenu nangwa mu maana enu pa kwingijila Yehoba ne. Mutumwa Paulo wafunjile bingi, bamufunjishe ku muntu ye banemekele bingi ku bantangi ba Bayudea pa kyo kya kimye. Uno muntu wajinga Ngamaliela. (Byu. 5:34; 22:3) Kabiji pa kimye kimo, Paulo wajinga muntu ye banemekele bingi ku Bayudea bakwabo. (Byu. 26:4) Bino Paulo kechi wiketekejile mwine ne. Paulo wajinga na lusekelo pa kusha bintu byamulengejile kunemekwa bingi ku bakwabo. (Fili. 3:8; tubyambo twa munshi) Paulo byo aikele mwina Kilishitu, wapichile mu makatazho avula bingi. Bamushikilwe ne ku bantu ba mu kisaka kyanji. (Byu. 23:12-14) Kabiji bamupumine ne kumukasa ku bakwabo bangikazhi ba mu Loma. (Byu. 16:19-24, 37) Paulo wayukile ne kuba’mba wajinga mbulwa kulumbuluka ne kuba’mba kyakatezhe bingi kuba byaoloka. (Loma 7:21-25) Bino kechi walekele kwikala mwana wa bwanga wa Kilishitu na mambo a ano makatazho ne. Pakuba wasekelanga bingi “mu kubula kukosa.” Mambo ka? Mambo kimye kyo akookanga kyo kimye kyo emwenanga bulume bwa Lesa byo bwamukwashanga.—2 Ko. 4:7; 12:10. w20.07 16 ¶7-8

Lelo jino, twafwainwa kuteshako bingi muchima ku mwingilo wa kusapwila pa Bufumu. Yesu waambijile jimo kuba’mba baana banji ba bwanga bakatwajijila kusapwila inge aye wafwa, kabiji bakengila mingilo kukila ne byo aingijile. Byo asangwilwe, Yesu waubile kya kukumya kupichila mu kukwasha baana banji ba bwanga bamo kukwata masabi avula bingi. Byo aubile kino kya kukumya, wakoseshe kishinka kya kuba’mba kusapwila ne kufunjisha bantu kwikala baana ba bwanga ye mwingilo wanemene bingi kukila mingilo ikwabo. (Yoa. 21:15-17) Kabiji byo kwashajiletu pacheche kuba’mba aye mwiulu, Yesu wabuujile baana banji ba bwanga amba bakengila mwingilo wa kusapwila mu byalo bikwabo kechi mu Isalela monkatu ne. (Byu. 1:6-8) Byo papichile myaka, Yesu wamwesheshe mutumwa Yoano kimwesho kya bintu bikamwekanga “mu juba ja Nkambo.” Kintu kimo Yoano kyo amwene ke malaika wajinga na “mambo awama a myaka ne myaka” a kusapwila “ku bisaka bya bantu byonse ne ku mikoka yonse ku ba njimi yonse ne ku mitundu yonse ya bantu.” (Lum. 1:10; 14:6) Kino kimwesha’mba kyaswa muchima wa Yehoba ke kya kuba’mba twingilenga mwingilo mukatampe wa kusapwila kufikatu ne byo akapwa. w20.09 9 ¶5

Kisemi kya kwa Abalahama kyapichilenga mu makatazho. Mukazhanji ye atemenwe bingi aye Sala kechi wasemenepo mwana ne. Bajinga bingi na bijikila pa luno lukatazho pa myaka yavula. Mu kuya kwa kimye, Sala wapaine wa mwingilo wanji aye Hegala kwi Abalahama kuba’mba alaale nanji pa kuba’mba asemenemo baana. Bino Hegala byo aimichile jimi ja kwa Ishimela, watendekele kulengulula Sala. Luno lukatazho lwabayile bingi kya kuba Sala wapangile Hegala. (Nte. 16:1-6) Kepo Sala aimichile kabiji wasemene mwana wamulume ye batumbile jizhina ja Izaka. Abalahama watemenwe baana banji babalume bonse babiji, Ishimela ne Izaka. Bino na mambo a bintu byatama Ishimela byo aubilenga Izaka, Yehoba waambijile Abalahama kupanga Ishimela ne Hegala. (Nte. 21:9-14) Byo papichile myaka, Yehoba wabuujile Abalahama kulambula mwananji aye Izaka kwikala mulambo wa kusoka. (Nte. 22:1, 2; Hebe. 11:17-19) Abalahama waketekejile’mba Yehoba ukapesha bano baana banji babalume. w20.08 4 ¶9-10

Fwanyikizhai lusekelo lukekala na boba bakasangulwa byo bakavuula bumuntu bwa kala ne kutendeka kulondela mizhilo ya Lesa yaoloka. Aba bakavuula bumuntu bwa kala bakebaswisha kwikala na bumi bwa myaka ne myaka. Pakuba aba bakasatukila Lesa kechi bakebaswisha kuvulañanya mutende ukekala mu Paladisa ne. (Isa. 65:20; Yoa. 5:28, 29) Mu Bufumu bwa Lesa, bantu ba Lesa bonse bakemwena bukishinka bwa byambo biji pa Byambo bya Maana 10:22 bya kuba’mba: “Mapesho a Yehoba o alengela muntu kunonka, kabiji kechi wiapaina pamo na misongo ne.” Na bukwasho bwa mupashi wa Yehoba, bantu ba Lesa bakanonka ku mupashi, ko kuba’mba bakekalatu byonka biji Kilishitu ne kwikala balumbuluka. (Yoa. 13:15-17; Efi. 4:23) Pa juba pa juba, mibiji yabo ikawamanga ne kwikala na butuntulu bwawama kabiji bakekala bantu bawama. Byo kikawamapo!—Yoba 33:25. w20.08 17 ¶11-12

Twafwainwa kuvulukanga kuba’mba bena Kilishitu bamo bebikila kikonkwanyi kya kubula kutwela mu masongola. Bakwabo bakeba kusongola nangwa kusongolwa, bino bakyangye kutana muntu wibatokela ku muchima. Pakuba bakwabo bafwisha benakwabo. Nanchi kijitu bulongo ba mu kipwilo kwipuzha bena Kilishitu bakatanda ne bazhike ene mambo o babujila kutwela mu masongola, nangwa kwibambila’mba bebakwasheko kutaana muntu wa kutwela nanji mu masongola nyi? Inge kya kuba bene kechi balomba buno bukwasho ne, bakonsha kumvwa byepi inge mwibambila’mba mwibakwasheko? (1 Timo. 5:13) Balongo bakatanda ne banyenga yetu bazhike bakasanta bingi inge twibanemeka na mambo a byubilo byabo byawama, kechi na mambo a kubula kutwela mu masongola ne. Kechi twafwainwa kwibomvwinanga lusa ne, bino twafwainwa kwibanemeka na mambo a bukishinka bwabo. Inge ke tube bino, balongo bakatanda ne banyenga bazhike kechi bakamonanga nobe tubena kwibambila’mba: “Kechi mbena kukukeba ne.” (1 Ko. 12:21) Pakuba bakayuka’mba twibanemeka kabiji twanemeka kifulo kyabo mu kipwilo. w20.08 29 ¶10, 14

Mu kuya kwa kimye, Yesu wamwekele ne kwi aye mwine Paulo. (1 Ko. 15:8) Paulo (Saulo) wajinga mu jishinda kuya ku Damasakasa kimye kyo aumvwine jiwi ja kwa Yesu kabiji wamumwene mu kimwesho mu lukumo lwa mwiulu. (Byu. 9:3-5) Kyamwekejile Paulo ke kishiino kikwabo kyamwesheshe’mba Yesu kine bamusangwile. (Byu. 26:12-15) Bantu bamo bakonsha kutemwa bingi kumvwa byaambile Paulo, mambo Yesu saka akyangye kumweka kwi aye, Paulo wamanyikilenga bena Kilishitu. Bino byo ashiinwe’mba Yesu bamusangwile, Paulo waingijile na ngovu kulumbulwila bakwabo kino kishinka. Wachinchikile bipumo byavula, kumukasa, ne maato o akanjijilemo konaika pa kuya na kushimuna bukine bwa kuba’mba Yesu wafwile kabiji bamusangwile. (1 Ko. 15:9-11; 2 Ko. 11:23-27) Paulo washiinwe kuba’mba Yesu bamusangwile kabiji wipaine kufwa pa mambo a kusapwila pa kino kishinka. Nanchi byashimwine bena Kilishitu batanshi kechi bimulengela kushiinwa kuba’mba Yesu bamusangwile nenyi? Kabiji nanchi kechi bikosesha luketekelo lwenu mu lusanguko nenyi? w20.12 3 ¶8-10

Twakonsha kwiipuzha’mba, ‘Nanchi ntanwa ku kupwila kimye kyonse nyi?’ Inge twatanwa ku kupwila kunengezha jibumba ja Yehoba, twikosesha kutwajijila kwingijila Yehoba ne kutambula lutundaiko lufuma ku balongo ne banyenga. (Mat. 11:28) Kabiji twakonsha kwiipuzha’mba, ‘Nanchi mfunda Baibolo pa bunke bwami kimye kyonse nyi?’ Inge muji na kisemi, nanchi mwikala na kupopwela kwa kisemi kimye kyonse nyi? Nangwa inge mwikala bunke, nanchi mwikala na kimye kya kupopwela uba nobe muji na kisemi nyi? Kabiji abya mwingilako papelela bulume bwenu mwingilo wa kusapwila ne kufunjisha bantu kwikala baana ba bwanga nyi? Mambo ka o kyanemena kwiipuzha ano mepuzho? Baibolo witubuula’mba Yehoba ukebakeba mu michima yonse ne kumona milanguluko yetu. Ne atweba byo byo twafwainwa kubanga. (1 Moba 28:9) Inge twamona’mba twafwainwa kupimpulako bikonkwanyi byo twibikila mu bwikalo, byubilo, nangwa milanguluko yetu, twafwainwa kulomba Yehoba kuba’mba etukwashe. Kino kyo kimye kya kwinengezhezha jimo ku meseko aji kulutwe. w20.09 19 ¶19-20

Yesu waingijishe kimwesho kyamwesheshenga muntu byo afwainwa kuba pa kuba’mba ekale mwananji wa bwanga. Waambile pa muntu ukeba kushimika nzubo ne pa mfumu ukeba kuya ku nkondo. Yesu waambile’mba muntu ukeba kushimika nzubo ‘ukikala panshi ne kubala mali o akengijisha’ pa kuba’mba amone kana uji na avula a kupwishisha nzubo. Kabiji mfumu naye wafwainwa “kukikala panshi ne kumona kana” bashilikale banji bakonsha kushinda. (Luka 14:27-32) Po pamotu ne muntu ukeba kwikala mwana wa bwanga. Yesu wayukile’mba muntu ukeba kwikala mwananji wa bwanga wafwainwa kulangulukishapo pa byo kilumbulula kumulondela. Onkao mambo, twafwainwa kutundaika bantu bo tufunjisha Baibolo kuba’mba twibafunjishenga pa mulungu pa mulungu. Byo muji bafunjishi, mwafwainwa kunengezha bulongo saka mukyangye kuya na kufunjisha muntu Baibolo. Langulukainga pa biji muntu ye mufunjisha Baibolo ne byo mwakonsha kulumbulula bulongo byambo mu jishinda japeela pa kuba’mba omvwishe ne kwibingijisha.—Ne. 8:8; Maana 15:28a. w20.10 7 ¶5; 8 ¶7

Mikambizho ya kwa Yesu kechi yakobankana ne. Twafwainwa kufunjisha bantu bintu byo akambizhe. Nangwa byonkabyo, kechi twafwainwa kulubako kishinka kyanema ne. Yesu kechi waambile’mba: ‘Bafunjishai bintu byonse byo nemukambizha ne.’ Bino waambile’mba: Bafunjishai “kulama bintu byonse byo nemukambizha.” Kukookela uno mukambizho kulumbulula’mba twafwainwa kufunjisha muntu bya kuba ne kumumwesha bya kuba byo byo bintu. (Byu. 8:31) Mambo ka o kyanemena kuba byobyo? “Kulama” mukambizho kulumbulula kumukookela. Inge tubena kufunjisha bantu Baibolo, twibafunjisha bikeba Lesa. Bino kechi twafwainwa kupelelatu ponkapo ne. Twafwainwa kwibafunjisha kwingijisha byo babena kufunda mu bwikalo bwabo pa juba pa juba. (Yoa. 14:15; 1 Yoa. 2:3) Kupichila mu byo tuba, twakonsha kumwesha bo tufunjisha Baibolo byo bakonsha kwingijisha mafunde a mu Binembelo pa Sukulu, ku nkito nangwa mu bya kisangajimbwe. Inge tuji na bo tufunjisha Baibolo, twakonsha kulomba kwi Yehoba kuba’mba mupashi wazhila ebatangijilenga.—Yoa. 16:13. w20.11 2-3 ¶3-5

Baana ba bwanga ba kwa Yesu bapichile mu makatazho. Kechi bajinga na mivungilo ya binembelo yavula nangwa mabuku alumbulula Baibolo byonka byo kiji lelo jino ne. Kabiji baana ba bwanga basapwijilenga ku bantu baambanga milaka yapusana-pusana. Nangwa kya kuba bapichilenga mu ano makatazho, bano baana ba bwanga baingijile mwingilo wamwekelenga kukatazha. Mu myaka ichechetu, basapwijile mambo awama “ku bilengwa byonse biji pano panshi.” (Kolo. 1:6, 23) Mu ano moba, Yehoba watwajijila kutangijila bantu banji ne kwibapa bulume bwa kwingila. Javula utangijila bantu banji kupichila mu Baibolo wanembelwe na lutangijilo lwa mupashi wanji wazhila. Mu Baibolo tutangamo mashimikila aamba pa mwingilo wa kwa Yesu ne mukambizho ye akambizhe baana banji ba bwanga wa kutwajijila kwingila mwingilo ye atendekele. (Mat. 28:19, 20) Yehoba kechi uji na misalululo ne; waambijile jimo kuba’mba mambo awama akasapwilwa “ku mikoka yonse ku ba njimi yonse ne ku mitundu yonse ya bantu.” (Lum. 14:6, 7) Ukeba kuba’mba bantu bonse bomvwe mambo a Bufumu. w20.10 21 ¶6-8

Mfumu Davida wajinga mwanamulume watemenwe bingi “mizhilo ya Yehoba.” (Sala. 1:1-3) Davida wayukile’mba Yehoba upulusha bantu bepelula kabiji ukana bantu betota. Onkao mambo, Davida waswishishe mizhilo ya Lesa kupimpula milanguluko yanji. Wanembele’mba: “Nkamutotanga Yehoba, yenka wambuula bya kuba. Nangwatu mu kimye kya bufuku, milanguluko yami ya mukachi mwine, imfunjisha.” (Sala. 16:7) Inge twipelula, tukaswisha Mambo a Lesa kolola ndangulukilo yetu yatama saka ikyangye kwitulengela kuba bintu byatama. Mambo a Lesa akekala nobe jiwi jibena kwitubuula’mba: “Jino jo jishinda, jo mwafwainwa kuyamo.” Aketujimunangako inge ke tufume mu jishinda ne kuya ku kipiko nangwa ku kilujo. (Isa. 30:21) Inge ke tumvwine Yehoba, tukamwenamo byawama bingi. (Isa. 48:17) Bimo byo tukamwenamo ke bino: Kechi tukomvwa bumvu bwiya na mambo a kwitololako ku muntu mukwabo ne. Kabiji tukafwenya kwipi ne Yehoba, mambo twayuka’mba ubena kwitulama byonkatu nsemi byo alama baana banji bo atemwa.—Hebe. 12:7. w20.11 20 ¶6-7

Bantu bamo mu Kolinda kyamweka nabo beikele na ino milanguluko. (1 Ko. 15:12) Kabiji kyamweka bakwabo bamonanga mulanguluko wa lusanguko nobe ñambilotu ya kifwanyikizho, kulumbulula’mba muntu “wafwa” ku bundengamambo bino “wasangulwa” kwikala ke mwina Kilishitu. Onkao mambo, kukana’mba kafwako lusanguko kwalumbulwilenga’mba lwitabilo lwabo lwajingatu lwatu. Inge kya kuba’mba Lesa kechi wasangwile Yesu ne, ko kuba’mba bukuzhi kechi bwapainwe ne. Kabiji bonse batwajijile mu bundengamambo bwabo. Onkao mambo, aba bakaine’mba kafwako lusanguko, kechi bajinga na luketekelo ne. (1 Ko. 15:13-19; Hebe. 9:12, 14) Mutumwa Paulo wayukile kuba’mba “Kilishitu wasangwilwe mu bafu.” Luno lusanguko lwanemene kukila lusanguko lonse lwaubiwe, mambo bonse bo basangwile, bafwile jibiji. Paulo waambile’mba Yesu ye wajinga “mutanshi, nangwa’mba wa nsomo kusangulwa pa boba baponena mu tulo twa lufu.” Mambo ye wajinga mutanshi kusangulwa ne kwikala kilengwa kya mupashi, kabiji ye wajinga mutanshi kufuma pano pa ntanda kuya mwiulu.—1 Ko. 15:20, Byu. 26:23; 1 Pe. 3:18, 22. w20.12 5 ¶11-12

Kimye kya bena Kilishitu batanshi, jibumba jatangijilanga jajinga mu Yelusalema jakwatankene kukwasha bantu ba Lesa kwikala mu mutende. (Byu. 2:42) Kimye kyo kwabuukile mambo a mukanda mu mwaka wa 49 C.E., jibumba jatangijilanga jisambilepo pa ano mambo na lutangijilo lwa mupashi wazhila. Inge kya kuba kipwilo kyatwajijile kwabenamo na mambo a luno lukatazho, mwingilo wa kusapwila inge kechi waendele bulongo ne. Nangwa kya kuba batumwa ne bakulumpe mu kipwilo bajinga Bayudea, bino kechi balondelanga kino kisho kya Bayudea nangwa kwikala ku lubaji lwa boba batundaikilenga kino kisho ne. Pakuba bakebele lutangijilo lwa Mambo a Lesa ne mupashi wazhila. (Byu. 15:1, 2, 5-20, 28) Ki ka kyafuminemo? Yehoba wapesheshe byo bafuukwilepo, mambo kipwilo kyatwajijile kwikala mu mutende ne kukwatankana, kabiji mwingilo wa kusapwila watwajijile kuyilako palutwe. (Byu. 15:30, 31; 16:5) Mu ano moba, Jibumba ja Yehoba jibena kukwasha bantu ba Yehoba kutwajijila kukwatankana ne kwikala mu mutende. w20.10 22-23 ¶11-12

Na mambo a kukoma, butuntulu bwa mubiji nangwa bintutu bikwabo, kechi twakonsha kufikilamo kwingila mingilo imo mu kipwilo ne. Inge byo byo kiji kwi atweba, twakonsha kufunjilako byavula kwi Mfumu Davida. Davida wakebeshe kushimika nzubo ya Lesa, bino Yehoba wasajile muntu mukwabo kwingila uno mwingilo. Davida watundaikile uno muntu ye basajile kwingila uno mwingilo ne kumupa ngolode ne siliva yavula bingi ya kwingijisha. Davida wamwesheshe muchima wawama bingi ye twafwainwa kulondela. (2 Sam. 7:12, 13; 1 Moba 29:3-5.) Na mambo a kukolwa, mulongo wa ku France wa jizhina ja Hugues walekele mwingilo wa bukulumpe mu kipwilo, kabiji kechi wakonsheshe nangwa kwingilatu tumingilo twapeela pa nzubo yanji ne. Wanembele’mba: “Patanshinalefwilwe bingi ne kumona nobe kafwako byo nji ne. Bino mu kuya kwa kimye, namwene kuba’mba kyanema kuleka kwikala na bulanda pa bintu byo mbena kukankalwa kuba luno. Kabiji nsekela mu byonka byo mbena kuba mu mwingilo wa Yehoba. Kechi nkabwela panyuma ne. Nkatwajijilatu kwibikako byonka byaubile Gidiona ne banabalume 300 bo ajinga nabo, bakookele bino kechi bekilekele kulwa ne.”—Mito. 8:4. w20.12 25 ¶14-15

Mu jishimikila ja bwikalo bwa kwa Yesu jo anembele, mutumwa Yoano waingijishe kyambo kya “butemwe” bimye byavula kukila byanembele bannembi bakwabo ba Mambo Awama basatu inge twibivwanga pamo. Byambo byo anembele bimwesha’mba byonse byuba mwina Kilishitu byafwainwa kwimena pa butemwe. (1 Yoa. 4:10, 11) Pano bino, papichile kimye pa kuba’mba Yoano afunde kino kishinka kyanema. Yoano byo ajinga mwanyike kechi wamweshanga butemwe kimye kyonse ne. Pa kimye kimo, Yesu ne baana banji ba bwanga baendejile pamo kuya ku Yelusalema kukafika ne ku Samaliya. Bantu mu muzhi umo wa mu Samaliya bakaine kwibatambwila. Yoano walombele Yesu kuba’mba aye ne mulongo wanji Yakoba bete mujilo kufuma mwiulu ne kusoka bangikazhi bonse ba mu uno muzhi. (Luka 9:52-56) Kabiji pa kimye kikwabo, Yoano ne mulongo wanji Yakoba kyamweka bakanjikizhe inabo kuba’mba epuzhe Yesu kuba’mba akebape bifulo bikatampe mu Bufumu. Batumwa bakwabo byo baumvwine kyaubile Yakoba ne Yoano, bazhingijile bingi. (Mat. 20:20, 21, 24) Bino nangwa kya kuba Yoano walubankenye mu ano mashinda, Yesu watwajijile kumutemwa.—Yoa. 21:7. w21.01 8-9 ¶3-4

Yehoba ufuukula bintu bilengela bilengwa byanji kumwenamo. Byo etulengele, kechi witulengela’mba aye mwine amwenengamo ne, bino waubile kino kuba’mba ne atweba twiyowenga bumi. Kafwako wakonsheshe kumukanjikizha kupana Mwananji kuba’mba etufwile na mambo a bundengamambo bwetu ne. Waubile kino mambo wakebelenga kuba’mba tumwenemo. Yesu naye wafuukulanga bintu byakwashanga bakwabo. Pa kimye kimo, wakookele bingi kabiji wakebelenga kukookoloka, bino kechi waubile bino ne, wafuukwilepo kufunjisha jibumba ja bantu jaishile ko ajinga. (Mako 6:31-34) Mutwe wa kisemi wawama wayuka kuba’mba kintu kimo kyakatazha bingi kyo afwainwa kuba ke kufuukwila kisemi bintu. Kabiji utako bingi muchima ku uno mwingilo. Kechi ufuukula bintu kwa kubula kulangulukapo bulongo nangwa kufuukula saka azhingila ne. Bino uswisha Yehoba kumufunjisha bya kufuukula bulongo bintu. (Maana 2:6, 7) Kuba bino kukamukwasha kulanguluka pa bintu byakonsha kumwenamo bakwabo, kechi byamuwaminatu aye mwine ne. (Fili. 2:4) Umvwe mwanamulume wibikako kulondela Yehoba ne Yesu, ukekala mutwe wa kisemi wawama. w21.02 7 ¶19-21

Byo akijingatu nsongwalume, Mfumu Asa wipelwile kabiji kechi wajinga na moyo ne. Kimye kyo aswaine shanji aye Abiya pa bufumu, Asa watendekele mukwekele wa kufumyamo bankishi mu kyalo. Kabiji “waambijile bena Yuda kukeba Yehoba Lesa wa bashakulu babo ne kulondela Mizhilo ne mikambizho yanji.” (2 Moba 14:1-7) Kabiji kimye Zela mwina Etiopya kyo aishile na kulukuka Yuda na nzhita ya bashilikale 1,000,000, Asa walombele bukwasho bwa Yehoba ne kwamba’mba: “Anweba Yehoba, kechi kyakatazha kwi anweba kukwasha bantu bavula nangwa boba babula ngovu ne. Anweba Yehoba Lesa wetu, tukwashai, mambo twakinka manungo mwi anweba.” Abino byambo byawama bimwesha kuba’mba Asa waketekejile mwi Yehoba amba ukamupulusha ne kupulusha bantu banji. Asa waketekejile mwi Shanji wa mwiulu, kabiji “Yehoba wakwashishe Asa ne bena Yuda kushinda bena Etiopya. (2 Moba 14:8-12) Kwa kubula nangwa kuzhinaukatu ne, Asa waumvwine bingi moyo kimye kyo bamulukukile ku nzhita ya bashilikale 1,000,000. Bino na mambo a kuba’mba waketekejile mwi Yehoba, Asa washinjile. w21.03 5 ¶12-13

Mu Baibolo mwanembwa mashimikila a bantu bambulwa kulumbuluka bemweshanga butemwe bene na bena. Akilangulukai pe Yonafwanyi ne Davida byo betemenwe. Baibolo waamba’mba: “Yonafwanyi ne Davida baikele ke balunda ba pa muchima, kabiji Yonafwanyi wamutemenwe byonkatu byo etemenwe aye mwine.” (1 Sam. 18:1) Davida bamushingile manyi kuba’mba akaswane mfumu Saulo. Saulo byo ayukile kino, washikilwe bingi Davida kabiji wakebelenga kumwipaya. Pano bino, Yonafwanyi mwana wa kwa Saulo kechi wakwatankene na shanji mu kukeba kwipaya Davida ne. Yonafwanyi ne Davida balayañene kutwajijila kwikala balunda ne kwikwashanga abo bene na bene. (1 Sam. 20:42) Bulunda bwajinga pakachi ka kwa Yonafwanyi ne Davida bukumisha bingi umvwe twalanguluka pa bintu byakonsheshe kwibalengela kubula kwikala balunda. Yonafwanyi wakijileko Davida na myaka ya kusemwa 30. Kino kyakonsheshe kulengela Yonafwanyi kulanguluka kuba’mba Davida mwanyike kabiji kechi wayuka bintu byavula ne. Pano bino, Yonafwanyi kechi byo byo alangulukilenga ne, wanemekele bingi Davida. w21.01 21-22 ¶6-7

Yesu walayile baana banji ba bwanga amba bakekala na lusekelo lwa kine. Kabiji wibajimwineko’mba aba bonse bamutemwa bakapitanga mu meseko. (Mat. 10:22, 23; Luka 6:20-23) Kituletela bingi lusekelo pa kwikala baana ba bwanga ba kwa Kilishitu. Pano twakonsha kumvwa byepi inge balongo betu kebetukanye kwingijila Lesa, kafulumende ke etumanyike, nangwa bakwetu mo twingijila nkito nangwa bo tufunda nabo ke betukanjikizhe kuba byatama? Kwambatu kine, ano meseko akonsha kwitulengela kwikala na bijikila. Bantu bavula bakana’mba kechi kyakonsheka kwikala na lusekelo inge babena kukumanyika ne. Pano bino, Mambo a Lesa etubuula’mba kyakonsheka. Mwana wa bwanga aye Yakoba wanembele’mba kechi twafwainwa kukakilwa inge tubena kupita mu meseko ne, bino amba twafwainwa kusekela. (Yako. 1:2, 12) Kabiji Yesu waambile’mba twafwainwa kusekela inge babena kwitumanyika. (Mat. 5:11) Yehoba watangijile Yakoba kunembela bano bena Kilishitu pa kuba’mba ebakwashe kutwajijila kwikala na lusekelo nangwa kya kuba bapichilenga mu meseko. w21.02 26 ¶1-2; 27 ¶5

Mu kimye kya kwa Timoti, bena Kilishitu bamo kechi banemekele kintu kyo bajinga nakyo kya kwikala ba mwingilo umo ne Lesa ne. Pa bano pajinga Demasa, Figelusa, Helemojene, Haiminusa, Alekasanda ne Filitusa. (1 Timo. 1:19, 20; 2 Timo. 1:15; 2:16-18; 4:10) Abano bonse patanshi bakosele mu lwitabilo, bino balekele kulanguluka’mba bintu bibapele Yehoba byanemene bingi. Satana ukeba kwitulengela kuleka kukwachisha ku bya buneme bitupa Yehoba. Uba byepi bino? Monai tukose tumo Satana to engijisha. Wingijisha bya kisangajimbwe ne byambo bya pa mwela, pa TV, mafilimu, Intaneti, mapepala a byambo, mabuku ne magazini kuba’mba etulengele kukankalwa kukwachisha bukine. Weseka kwitumvwisha moyo na mambo a bintu byamba bantu pe atweba nangwa kwitumanyika pa kuba’mba tuleke kusapwila. Kabiji witujimbaika’mba tutelekenga “ku bintu bya bubela byo . . . batela’mba o ‘maana’” byamba bansatuki pa kuba’mba tusankilepo bukine. Inge twabula kujimuka, twakonsha kutendeka kufuma mu bukine.—1 Timo. 6:21. w20.09 27 ¶6-8

Nanchi kujipo mulunda nenu nangwa mulongo wenu wimufutukamo nyi? Umvwe ko aji, mwakonsha kumwenamo bingi mu kufunda kyamwekejile Mfumu Davida na mwananji aye Abisalomo. (2 Sam. 15:5-14, 31; 18:6-14) Byo mubena kulanguluka pa jino jishimikila, buulai Yehoba byo mubena kumvwa ku muchima pa kintu kyatama kyo bemuba. (Sala. 6:6-8) Kabiji fwanyikizhai Davida byo aumvwinenga ku muchima kimye kyamumwekejilenga bino bintu byonse. Watemenwe bingi Abisalomo kabiji waketekejile Ahitofela. Bino bano bonse babiji bamufutukilemo. Bamukozhezhe bingi ku muchima kabiji bakebelenga ne kumwipaya. Davida wakonsheshe kuleka kuketekela mu balunda nanji bakwabo ne kwibalangulukila kuba’mba kampe nabo bakwatankana ne Abisalomo. Kampe inge walangulukilengatu bya kwipulusha aye mwine ne kunyemamo mu kyalo bunke bwanji. Nangwa inge wakankelwe bya kuba na mambo a kupelelwa. Pakuba walombele kwi Yehoba kuba’mba amukwashe. Kabiji waingijilepo bukiji pa bintu byo afuukwilepo kuba. Watwajijile kuketekela mwi Yehoba ne mu balunda nanji. w21.03 15 ¶7-8; 17 ¶10-11