August

Kyamweka Yesu waambilenga pa bashilikale bena Loma bamupopelenga misumali mu maboko ne maulu anji. Yesu kechi waswishishe nshiji yo bamubile kumulengela kuzhingila ne kukana kulekelako mambo bano bantu bamumanyikilenga ne. (1 Pe. 2:23) Byonka byaubile Yesu, ne atweba twafwainwa kulekelangako bakwetu mambo. (Kolo. 3:13) Bantu bamo, kubikapotu ne balongo betu bakonsha kwitwimena kuntundwa na mambo a kuba’mba kechi bayuka bintu byo twaitabilamo ne byo twikala ne. Bakonsha kwitubepela, kwitambila byambo byatama pa meso a bantu, konauna mabuku etu, nangwatu kukeba kwitupuma ne kwitukozha. Kechi twafwainwa kuzhingila ne, bino twafwainwa kulomba Yehoba kuba’mba akwashe boba betukanya kwingijila Lesa kuswa bukine. (Mat. 5:44, 45) Bimye bimo, kyakonsha kwitukatazha kulekelako bantu mambo, kikatakata inge betuba nshiji. Bino umvwe twatwajijila kuzhingila ne kubula kwibalekelako mambo, twakonsha kwiletelatu makatazho atweba bene. (Sala. 37:8) Umvwe twafuukulapo kulekelako bantu mambo, ko kuba’mba twasalapo kubula kuswisha bintu byatama byo betubile kwitulengela kutwajijila kuzhingila.—Efi. 4:31, 32. w21.04 8-9 ¶3-4

Nanchi muji na mulongo wenu ye bapanga mu kipwilo nyi? Kino kintu kileta bingi bulanda. Yehoba kyamukolele bingi ku muchima kimye ba mu kisemi kyanji, ko kuba’mba bamalaika bamo kyo bamusatukijile. (Yuda 6) Kabiji Yehoba wajinga bingi na bulanda kumona bena Isalela, bantu bo atemenwe bingi byo bamusatukijilenga pa bimye byavula. (Sala. 78:41) Yukai kuba’mba Shetu wa mwiulu wa butemwe kimukola bingi ku muchima umvwe mulongo wetu waleka kumwingijila. Yehoba wayuka bulongo bulanda bo muji nabo na mambo a mulongo wenu ya bapanga mu kipwilo. Ukemutekenesha ne kwimutundaika na kifyele pa kuba’mba mutwajijile kukosa. Umvwe mwana wa mulume nangwa wa mukazhi bamupanga mu kipwilo, javula bansemi batemwa kwipamo mambo amba kechi baingijile na ngovu kukwasha mwanabo kwikala na bulunda bwakosa na Yehoba ne. Mulongo umo waambile’mba: “Nepelengamo mambo. Aja juba nalotele ne biloto byatama.” Nyenga naye wajinga na mwana wa mulume ye bapangile mu kipwilo walangulukilenga’mba: “Kampe paji bintu bimo byo nalubankenye. Ne kuba’mba nakankelwe kufunjisha mwanami kutemwa Yehoba.” w21.09 26 ¶1-2, 4

Bantu bamo balanguluka’mba bantu ba Lesa kechi bakonsha kufunjisha bya mu Baibolo ne, mambo kechi bafunda masukulu a bya bupopweshi ne. Pano bino, bafwainwa kuyuka bishinka. Byo byaubile ne nnembi wa Mambo Awama aye Luka. Waingijile na ngovu kukebakeba “bulongo bino bintu byonse kufuma ku ntendekelo yabyo.” Wakebelenga kuba’mba bantu bakatanganga bakakonshe “kuyuka bulongo” bintu byo baumvwine pe Yesu. (Luka 1:1-4) Bayudea bajinga mu muzhi wa Beliya nabo baubile byonka byaubile Luka. Byo baumvwine mambo awama pe Yesu kimye kitanshi, baesakenye byambo byo baumvwine ku Binembelo bya Kihebelu pa kuba’mba bayuke’mba bebabuujilenga bya kine. (Byu. 17:11) Ne bantu lelo jino bafwainwa kukebakeba bishinka. Bafwainwa kwesakanyanga byo bebafunjisha ku bantu ba Lesa ku byaamba Binembelo. Kabiji bafwainwa kufundanga bintu byauba bantu ba Yehoba mu ano moba. Umvwe bayuka bulongo bantu ba Yehoba byo baji, kechi bakaswisha bintu byatama byamba bantu kwibalengela kukana bukine ne. w21.05 3 ¶7-8

Nanchi mu kipwilo kyenu mujipo muntu umo ye mwakonsha kwitako ku nzubo kwenu nyi? Bakwetu bena Kilishitu basangalala bingi inge saka tumonapo kimye kya kupwanañana nabo. Bamo kyakonsha kwibakatazha kwikala pamo na ba mu kisemi kyabo kimye kyo basekelela moba a kukookoloka. Bakwabo bekala bingi na bulanda pa moba amo a mu mwaka, nabiji juba jafwijilepo benakwabo. Umvwe twamonapo kimye kya kwikala pamo na balongo ne banyenga babena kupita mu makatazho a uno mutundu, tumwesha’mba ‘twateshako muchima ku bijikila byabo.’ (Fili. 2:20) Kuji bintu byavula bingi byakonsha kulengela mwina Kilishitu bimye bimo kumona nobe ujitu bunke. Bino kechi twafwainwa kulubako kuba’mba Yehoba wayuka byonse byo tupitamo ne. Javula wingijisha balongo ne banyenga yetu kwitupa byo tukeba. (Mat. 12:48-50) Kabiji tumwesha’mba tubena kusanchila Yehoba pa kwitupa kipwilo inge ke twibikeko kukwasha balongo ne banyenga. Nangwa kya kuba bimye bimo twakonsha kumona nobe tujitu bunke, bino kishinka ke kya kuba’mba kechi tuji bunke ne, Yehoba ukatwajijila kwikala ne atweba. w21.06 13 ¶18-20

Yesu watwajijile kwikala na ndangulukilo yawama ne kutwajijila kusapwila nangwa kya kuba bamo kechi bakebelenga kuteleka ku byambo byanji ne. Mambo ka? Mambo wayukile kuba’mba kyanema bingi bantu kufunda bukine, kabiji wakebelenga kukwasha bantu bavula kuswa byambo bya Bufumu. Kabiji wayukile’mba bantu bamo bakonsha kukana kumvwa mambo awama kimye kitanshi, bino mu kuya kwa kimye bakonsha kuswa. Langulukai pa kyamwekele mu kisemi kyanji. Kimye Yesu kyo aingijilenga mwingilo wa kusapwila pa myaka isatu ne kichika, kafwako nangwa umo pa bankasanji waikele mwananji wa bwanga ne. (Yoa. 7:5) Bino kimye kyo bamusangwile, bano bankasanji baikele ke bena Kilishitu. (Byu. 1:14) Kechi twayuka bantu bakaswa bukine bwa mu Baibolo bo tufunjisha ne. Bantu bamo papita myaka yavula pa kubatu’mba baswe kufunda bukine. Nangwatu boba babula kukeba kuteleka kwi atweba bamona byubilo byetu byawama kabiji bakonsha kutendeka “kutumbijika Lesa.” w21.05 18 ¶17-18

Yesu byo ajinga pano pa ntanda, wakambizhe baana banji ba bwanga kwingila mwingilo uji na mbaji ibiji. Wibakambizhe kusapwila mambo awama a Bufumu, kabiji wibabuujile ne bya kwingila uno mwingilo. (Luka 8:1) Kabiji Yesu wabuujile baana banji ba bwanga bya kuba inge bantu baswa byambo bya Bufumu, ne bya kuba inge bakana. (Luka 9:2-5) Walumbulwile ne kuba’mba baana banji ba bwanga bakasapwila ku bantu bavula bingi mu mapunzha avula byo aambile’mba bakashimuna “bukamonyi ku bisaka byonse bya bantu.” (Mat. 24:14; Byu. 1:8) Kabiji wakambizhe baana banji ba bwanga kufunjisha bantu kwikala ke baana ba bwanga ne kwibakwasha kulama byonse byo akambizhe. Yesu wamwesheshe kuba’mba uno mwingilo wanema ukatwajijila “kukafikatu ne ku mpelo ya buno bwikalo.” (Mat. 28:18-20) Kabiji mu Lumwekesho lo amwesheshe Yoano, Yesu wamwesheshe patoka kuba’mba baana banji ba bwanga bonse bafwainwa kukwasha bantu kuyuka Yehoba.—Lum. 22:17. w21.07 2-3 ¶3-4

Mu ntanda lelo jino, bantu bavula bakeba kwimwesha’mba banema kukila bakwabo. Muntu uba busulu wakonsha kukeba kulenganga mali avula kukila basulu bakwabo, ne kuba bintu byakonsha kubika bumi bwa bakwabo mu kizumba. Muntu unyema kapela wakonsha kuba kintu kyakonsha kulengela bakwabo kwikozha pa kuba’mba aye ashinde ne kutambula kilambu. Mwana wa sukulu wakonsha kwingijisha mashinda a bujimbijimbi pa kunemba mpeso pa kuba’mba bakamusale kuya ku sukulu mukatampe. Atweba bena Kilishitu twayuka’mba abino byubilo byatama, mambo ke “mingilo ya mubiji.” (Nga. 5:19-21) Nangwa byonkabyo, abya kyakonsheka bakalume ba Yehoba bamo kuleta mupashi wa kwikyombesha mu kipwilo kwa kubula ne abo bene kuyuka nyi? Buno bwipuzho bwanema bingi, mambo muchima wa kwikyombesha wakonsha kuleta mabano mu kipwilo. Twafwainwa kulangulukanga pa banabalume ne banabakazhi ba kishinka banembwa mu Baibolo bakaine muchima wa kwikyombesha. w21.07 14 ¶1-2

Butemwe bubula kwaluka bwitulengela kukwasha boba baji na bulanda. Balongo ne banyenga bavula baji na lusa batwajijila kukwasha ba mu kipwilo bapopomenwa nangwa baji na bulanda. Batemwa bingi balongo ne banyenga yabo, kabiji bebikako kwibakwasha. (Maana 12:25, tubyambo twa munshi; 24:10) Mutumwa Paulo witutundaikile kuba bino byo aambile’mba: “Tekeneshai bantu bapopomenwa, koseshai babula kukosa ne kwikala batekanya ku bantu bonse.” (1 Tesa. 5:14) Jishinda jawama kukwashishamo mulongo nangwa nyenga wapopomenwa ke kutelekesha inge ubena kwamba ne kumukwasha kuyuka’mba mwamutemwa. Yehoba wimusanchila bingi pa bintu byo muba pa kukwasha bakalume banji. Byambo bya Maana 19:17 byaamba’mba: “Awa ubila byawama mulanda ukongwesha Yehoba, ne aye ukamufweta pa bintu byo oba.” w21.11 10 ¶11-12

Twakonsha kuba byepi luno pa kuba’mba twinengezhe ku bintu bikamweka kulutwe? Twafwainwa kutondwa na bintu byonka byo tuji nabyo ne kumwena lusekelo mu bulunda bwetu ne Yehoba. Inge twamuyuka Lesa wetu bulongo, tukashiinwa kuba’mba uketupokolola kimye kiketulukuka Gogi wa Magogi. Byambo biji mu kinembelo kya lelo byalumbulula ene mambo Davida o aketekejile mwi Yehoba. Davida bimye byavula wamwesheshe kuba’mba waketekejile mwi Yehoba, kabiji Lesa wanji wamukwashanga kimye kyonse. Davida byo ajinga mwanyike, wayile na kulwa na kiyangala mwina Filishitiya aye Goliata kabiji wamubuujile’mba: “Lelo jonka Yehoba usakukupana mu maboko ami.” (1 Sam. 17:46) Mu kuya kwa kimye, Davida waingijilenga mfumu Saulo, kabiji Saulo wakebelenga kumwipaya pa bimye byavula bingi. Bino “Yehoba wajinga” ne Davida. (1 Sam. 18:12) Na mambo a kuba’mba Davida wimwenejile Yehoba byo amukwashishe kala, wayukile kuba’mba ukamukwasha mu makatazho o apichilengamo. w22.01 6 ¶14-15

Mu bintu byonse byo oba, Yehoba utekanya ne kwingijisha kimye kyafwainwa pa kuba’mba apwishe mwingilo wanji. Uba bino pa kuba’mba alete lukumo pa jizhina janji ne kukwasha bilengwa byanji. Kimye kyo alengelenga ntanda kuba’mba pakekalenga bantu, Yehoba waubilenga bintu mu ndonda kimo kimo. Pa kulumbulula byo alengelenga ntanda, Baibolo waingijisha byambo bya kuba’mba “wiipimine,” waajile ‘bitendekesho byayo,’ ne kubika “jibwe jayo ja pa jikonka.” (Yoba 38:5, 6) Kabiji waikele ne na kimye kya kulanguluka pa mingilo yanji. (Nte. 1:10, 12) Langulukai pa bamalaika byo baumvwinenga kimye kyo bamwenenga bintu bipya byalengelenga Yehoba. Bafwainwa basangalele bingi. Na mambo a kino, “babijikilenga saka batakaika.” Tufunjilako ka? Papichile myaka yavula bingi pa kuba’mba Yehoba apwishishe kulenga ntanda, tubangabanga, ne bilengwa byumi byonse. Bino kimye Yehoba kyo atajile pa bintu byonse byo alengele, waambile’mba “byawamishatu.”—Nte. 1:31. w21.08 9 ¶6-7

Mu kishimpi kya kwa Yesu, mwanamulume winengezhezhenga kuya ku mpunzha kwalepa. Saka akyangye kuya, waichile bakalume banji ne kwibapa matalenta kuba’mba bakobenga busulu. Uno muntu wayukile bulongo byajinga bakalume banji, onkao mambo, kalume umo wamupele matalenta atanu, mukwabo abiji, kabiji wa busatu wamupele talenta umo. Bakalume batanshi babiji baingijile na ngovu kuba busulu ne kumwenamo nsubu. Bino kalume wa busatu aye kafwako kyo aubilepo na mali o bamupele ne, kabiji bamupangile nkito ku mwine mwina mali. Kalume mutanshi ne kalume wa bubiji naye wayukile’mba mwingilo ye bamupele wanemene bingi, kabiji waingijile na ngovu mwingilo wa nkambo yanji. Kyafuminemo, wamwenejilemo matalenta akwabo abiji. Uno kalume bamufwetele na mambo a kwingila na ngovu. Nkambo yanji wasangalele bingi kabiji wamupele mingilo yavula. w21.08 21 ¶7; 22 ¶9-10

Yehoba watekenya bingi bantu mu ano moba a kupelako. Kechi usaka muntu nangwa umo akafwe ne. (2 Pe. 3:9) Wapana kimye ku bonse kuba’mba balapile. Pano bino, butekanye bwanji kechi bukatwajijila ne. Aba bakana kutundaika Bufumu bwa Lesa bakamona bintu byamwene Felo mu moba a kwa Mosesa. Yehoba waambijile Felo amba: “Mambo amiwa umvwe natanyikile kuboko kwami pe obewa ne pa bantu bobe ne kukukambula na kinkunka kikatampe, kino kimye inge wazhiya pano pa ntanda. Na mambo a kino, nakikuleka: namba nkumweshe bulume bwami ne kulengela jizhina jami kuyukanyikwa pano pa ntanda ponse.” (Lupu. 9:15, 16) Bisaka byonse bya bantu bikayuka’mba Yehoba ye yenkatu Lesa wa kine. (Ezi. 38:23) Kusunkenya ko baambapo mu kinembelo kya juba kya lelo kubena kulumbulula lonaiko lwa myaka ne myaka lwa bantu baji nobe Felo bakana kuswa kuba’mba Yehoba ye uji na luusa lwa kulama bilengwa. w21.09 18-19 ¶17-18

Kange kimukole bingi ku muchima mambo mulongo wenu bamupanga mu kipwilo ne. Pano mwakonsha kuba byepi inge bamo mu kipwilo bamba byambo bilengela lukatazho kubayilako? Kechi bonse bakonsha kwambanga byambo byawama ne. (Yako. 3:2) Atweba bonse twibambulwa kulumbuluka. Onkao mambo, kechi mwafwainwa kukumya umvwe bamo ke bambe byambo byatama byakonsha kwimufichisha ku muchima ne. Vulukainga lujimuno lwa mutumwa Paulo lwa kuba’mba: “Itekenyainga anwe bene na bene ne kwilekelako mambo umvwe umo uji na mambo na mukwabo.” (Kolo. 3:13) Twajijilai kutundaika ba mu kisemi ba kishinka. Kino kyo kimye kikebewa bingi kwibamwesha butemwe ne kwibatundaika. (Hebe. 10:24, 25) Bimye bimo, ba mu kisemi baji na mulongo wabo ye bapanga mu kipwilo bamona’mba bamo mu kipwilo baleka kupwanañana nabo, nobe nabo bebapanga mu kipwilo. Kechi twafwainwa kubanga bino ne. Baana baji na bansemi babo baleka kwingijila Yehoba bakebewa bingi kwibatakaika ne kwibatundaika. w21.09 29 ¶13-14; 30 ¶16

Aba bakoma inge ke besambe na banyike, bonse bamwenamo. (Loma 1:12) Kabiji anweba banyike kikemulengela kushiinwa kuba’mba Yehoba ulama bakalume banji ba kishinka, kabiji aba bakoma nabo bakamona’mba bebatemwa. Mulongo nangwa nyenga wakoma ukemushimikizha Yehoba byo amupesha. Muntu inge ubena kuya na kukoma ne buuya nabo buya na kupwa, bino aba ba kishinka kwi Yehoba bakilamo ne kumweka bulongo kwi aye. (1 Tesa. 1:2, 3) Mambo ka o kyaikela bino? Mambo pa myaka yavula, baswisha mupashi wa Lesa kwibafunjisha ne kwibakwasha kwikala na byubilo byawama. Umvwe twibayuka bulongo balongo ne banyenga yetu bakoma, kwibanemeka, ne kufunda byavula kwi abo, tukebamonanga’mba bya buneme. Kipwilo kitwajijila kukosa inge banyike ke banemeke balongo ne banyenga bakoma, ne boba bakoma nabo inge ke banemeke banyike. w21.09 7 ¶15-18

Twayai tutwajijile kuchinuzhuka kwikala na muchima washinta ne kwibikako kwikala na “lusa lwavula” byonka biji Lesa wetu. (Efi. 2:4) Inge tuji na lusa, kechi tupelelatu pa kumvwina bakwetu lusa ne. Lusa belulumbulula’mba “kifyele kimwekela mu byubilo.” Onkao mambo, atweba bonse twafwainwa kulanguluka pa bantu babena kukebewa bukwasho mu kisemi kyetu, mu kipwilo, ne mu nyaunda. Umvwe ke tube bino, tukamonangapo mashinda avula a kumwesheshamo lusa. Abya kujipo muntu ubena kukebewa lutekenesho nyi? Nanchi twakonsha kumukwashako mu bintu bimo, nabiji kumupapo kajo nangwa bukwashotu bukwabo nyi? Nanchi muntu ye babwezha mu kipwilo kya bwina Kilishitu ubena kukebewa mulunda wawama wa kumutekenesha ne kumutundaika nyi? Abya twakonsha kubuulako bakwetu byambo bya lutekenesho biji mu mambo awama nyi? (Yoba 29:12, 13; Loma 10:14, 15; Yako. 1:27) Inge twayuka kuba’mba bamo babena kukebewa bukwasho, tukamona kuba’mba kuji mashinda avula o twakonsha kwibamwesheshamo lusa. Umvwe ke tumweshe lusa, tusangajika bingi muchima wa Shetu wa mwiulu, Lesa uji na “lusa lwavula.” w21.10 13 ¶20-22

Mu Salamo 23, Davida watongwele bintu byanema bingi, nabiji bintu byawama byamupele Yehoba na mambo a kuba’mba waswile kuba’mba Yehoba ye Kafunga wanji. Yehoba wamutangijilenga “mu mashinda a bololoke,” kabiji watwajijile kukwasha Davida mu bimye byawama ne bimye byatama. Davida wayukile kuba’mba bwikalo mu “munyemvu wavula” wa Yehoba kechi bwikalo bwabula makatazho ne. Bimye bimo, walefulwanga, kabiji kyaikalangatu nobe ubena kwenda “mu kimpachiko mwafiitatu bwii,” kabiji wajinga ne na balwanyi. Bino na mambo a kuba’mba Yehoba wajinga Kafunga wanji, Davida kechi ‘wachinanga kumukozha ne.’ Mu ñanyi jishinda Davida mo abujijile ‘kukajilwa kintu nangwa kimo’? Wajinga na byonse byakebewenga pa kuba’mba atwajijile kufwenya kwipi ne Yehoba. Lusekelo lwanji kechi lwaimenejile pa kwikala na bintu byavula mu bwikalo ne. Davida watondelwe na bintu byonka byamupele Yehoba. Bintu byanemene bingi kwi aye ke bintu byamupele Lesa ne byo amuzhikijilanga. Byambo byaambile Davida bitukwasha kuyuka kuba’mba kechi twafwainwa kunemekesha bintu bya mu bwikalo ne. w22.01 3-4 ¶5-7

Kufumatu ne kala, bakamonyi ba Yehoba bavula basapwila ku bantu babula kukeba kuteleka. Nowa wajinga “musapwishi wasapwilanga bololoke” pa myaka yavula. (2 Pe. 2:5) Kwa kubula nangwa kuzhinaukatu ne, waketekejile kuba’mba bantu bamo bakatambwila byambo byo asapwijilenga, bino Yehoba kechi waambilepo’mba kino kikamweka ne. Nowa byo bamukambizhe kufiika bwato, Lesa wamubuujile’mba: “Wafwainwa kutwela mu bwato, obewa, baana bobe, mukazhobe ne bakazhi ba baana bobe.” (Nte. 6:18) Kabiji Nowa byo alangulukilenga pa kubaya kwa bwato bo bamukambizhe kufiika, wafwainwa wayukile’mba bantu bavula kechi bakateleka ku byambo byo akasapwilanga ne, mambo bwato kechi bwabayile kya kuba’mba mwatwela bantu bavula ne. (Nte. 6:15) Byonkatu byo twayuka, kafwako nangwatu muntu umo pa bantu baikalanga mu yoya ntanda mwayujile bukapondo batambwijile byambo byasapwijilenga Nowa ne. (Nte. 7:7) Nanchi Yehoba walangulukilenga’mba Nowa wakankelwe kwingila mwingilo nyi? Ine. Lesa waumvwine bingi bulongo pa mwingilo waingijile Nowa, mambo waubiletu byonse byo bamukambizhe kwi Yehoba.—Nte. 6:22. w21.10 26 ¶10-11

Fwanyikizhai Luta byo aumvwine ku muchima pa kumvwa bino byambo byaambile Naomi. Luta waingijile papelejile bulume bwanji kukwasha Naomi. Luta wamujijishengapo, kumutekenesha kabiji wayilenga nanji konse ko ayilenga pa moba avula. Pano bino, Naomi waambile’mba: “Yehoba wandengela kubwela mabokotu.” Bino byambo byaambile Naomi byamwesheshenga nobe kechi wanemekele bukwasho bwamukwashishe Luta ne. Kino kyafwainwa kyamukozhezhe bingi ku muchima Luta. Nangwa byonkabyo, Luta watwajijile kwikala ne Naomi. (Luta 1:3-18) Ano moba, twakonsha kwingila papelela bulume bwetu kukwasha nyenga ubena kupita mu lukatazho lukatampe. Bino wakonsha kwitwambila byambo bya kupulumuka byakonsha kwitukozha ku muchima. Nangwa byonkabyo, twibikako kubula kuzhingila. Tutwajijila kwikala nanji, kabiji tulomba Yehoba kwitukwasha kutaanapo jishinda jo twakonsha kumutekenesheshamo. (Maana 17:17) Nyenga ubena kukebewa bukwasho kimye kitanshi wakonsha kukana bukwasho. Pano bino, butemwe bubula kwaluka bwitulengela kutwajijila kumonapo mashinda a kumukwashishamo.—Nga. 6:2. w21.11 11 ¶17-19

Mu Baibolo, byambo bya kuba’mba “kuzhila” ne “buzhile” bilumbulula kwikala batoka mu byubilo ne mu bupopweshi nangwa kubula kukowela. Abino byambo bilumbulula ne kwipaatula kwingila mwingilo wa Lesa. Onkao mambo, twikala bazhila inge twaikala na byubilo byawama, kupopwela Yehoba mu jishinda jaitabilwa kwi aye, ne kwikala na bulunda bwakosa ne aye. Ke kya kukumya bingi pa kuyuka kuba’mba nangwa kya kuba twi bambulwa kulumbuluka kabiji Yehoba wazhila, bino ukeba kuba’mba twikale balunda nanji. Yehoba wazhila. Tufunda kino kishinka ku byo bamulumbulula ku bamalaika baji kwipi na jitanda janji batelwa’mba baselafi. Baselafi bamo babijikilenga’mba: “Wazhila, wazhila, wazhila Yehoba wa mabumba.” (Isa. 6:3) Bano bamalaika baji na bulunda bwawama ne Lesa mambo nabo bazhila. O ene mambo mapunzha onse bamalaika po baambijile byambo pano pa ntanda atelwa’mba azhila. w21.12 3 ¶4-5

Banyike javula batemwa kwakamwa pa byo bakobanga mu bwikalo bwabo. Bafunjishi ku sukulu ne balongo babula kwitabila bakonsha kwibatundaika kuya ku sukulu mukatampe pa kuba’mba bakatwele nkito ya kufola muzema wa mali. Kufuukulapo kuba bino kukebewa kimye kikatampe. Pakuba bansemi ne balongo ne banyenga mu kipwilo bakonsha kutundaika banyike kwingijisha bumi bwabo mu mwingilo wa Yehoba. Ñanyi kintu kyakonsha kukwasha ukitwala watemwa Yehoba kufuukula bulongo bintu? Kutanga kinembelo kya Efisesa 5:15-17 ne kulanguluka-langulukapo kwakonsha kumukwasha. Inge ukitwala wapwisha kutanga bino byepelo, wakonsha kwishikisha’mba: Nga “kyaswa muchima wa Yehoba” kyo ki ka? Ñanyi bintu byo nafwainwa kufuukula pa kuba’mba ntokeshe Lesa ku muchima? Kabiji ñanyi bintu byo nakonsha kufuukula bikankwasha kwingijisha bulongo kimye kyami? Vulukai kuba’mba tubena kwikala mu “moba atama,” kabiji katataka mpelo ya ino ntanda ilamwa ne Satana ifike. w22.01 27 ¶5

Ñanyi kimye Yakoba kyo aikele mwana wa bwanga wa kwa Yesu wa kishinka? Yesu byo bamusangwile, “wamwekele kwi Yakoba, kepo amwekele ne ku batumwa bonse.” (1 Ko. 15:7) Yakoba byo amonañene ne Yesu, po po apimpwile milanguluko yanji. Watainwepo kimye batumwa kyo bajinga mu kibamba kya peulu mu Yelusalema na kupembelela kutambula mupashi wazhila wibalayile Yesu. (Byu. 1:13, 14) Mu kuya kwa kimye, Yakoba waikele mu jibumba jatangijilenga mwingilo mu kimye kya bena Kilishitu batanshi. (Byu. 15:6, 13-22; Nga. 2:9) Kabiji mwaka wa 62 C.E. saka akyangye kufika, Yakoba watangijilwe na mupashi kunembela bena Kilishitu bashingwa nkalata. Ino nkalata itukwasha atweba bonse lelo jino, baji na luketekelo lwa kuya mwiulu ne baji na luketekelo lwa kwikala pano pa ntanda. (Yako. 1:1) Shayuka wa bintu byamwekele kala Muyudea wa jizhina ja Josephus wanembele’mba, Yakoba bamwipayile kimye Ñanga Mwine Mukatampe wa Bayudea aye Ananyasa wamwanyike kyo akambizhe kuba’mba bamwipaye. Yakoba watwajijile kwikala wa kishinka kwi Yehoba kufikatu ne kimye kyo apwishishe mwingilo wanji pano pa ntanda. w22.01 8 ¶3; 9 ¶5

Kintu kimo kyo twakonsha kufunjilako ku kinembelo kya lelo ke kya kuba’mba kechi twafwainwa kuketekela Yehoba kwituzhikijila ku makatazho eseka lwitabilo lwetu ne. Byonkatu Yesu byo bamwesekele kufika ne ku lufu, ne atweba twafwainwa kwinengezha kutwajijila kwikala ba kishinka kufikatu ne ku lufu. (Mat. 16:24, 25) Nangwa byonkabyo, twashiinwa kuba’mba Lesa kechi uketuleka amba tupite mu lweseko lwakila pa bulume bwetu ne. (1 Ko. 10:13) Kintu kikwabo kyo tufunjilako ke kya kuba’mba, byonkatu byo kyajinga kwi Yesu, bantu bakonsha kwitumanyika kya nshijitu. (1 Pe. 2:19, 20) Aba betumanyika, kechi boba bino na mambo a kuba’mba twauba kintu kyatama ne. Pakuba boba bino na mambo a kuba’mba kechi twivwanga mu bya pano pa ntanda ne, kabiji tushimuna bukine. (Yoa. 17:14; 1 Pe. 4:15, 16) Yesu wayukile ene mambo Yehoba o amuswishishe kumanama. Bino bapopweshi ba kishinka bakwabo bamanama bimye bimo beipwizha ene mambo Yehoba o aswishisha bintu bimo kumweka. (Ha. 1:3) Lesa wetu wa lusa kabiji wa butekanye, uyuka kuba’mba kechi bepuzha bino na mambo a kuba’mba kechi baji na lwitabilo ne. Boba bino mambo bakeba lutekenesho lufuma kwi aye.—2 Ko. 1:3, 4. w21.04 11 ¶9-10

Yehoba ukatambwila mpopwelo yetu umvwe tumupopwela mwayila kyaswa muchima wanji na butemwe ne mushingi. Twayuka kuba’mba Yehoba ye twafwianwa kupopwela, kabiji tukeba kumupopwela mu jishinda jawama. Jishinda jimo jo tupopwelamo Yehoba ke kulomba kwi aye. Binembelo byaesakanya milombelo yetu ku bya kufutumuna byo banengezhanga bulongo byo bapananga pa tente wa lusambakeno kabiji mu kuya kwa kimye batendekele kwibilambula pa Nzubo ya Lesa. Bino bya kufutumuna byafumyanga bwema bwawama bwasangajinga muchima wa Lesa. Ne milombelo yetu ya kufuma panshi ya muchima ‘imusangajika’ Yehoba nangwa kya kuba twalombatu byambo bicheche. (Maana 15:8; Mpitu. 33:10) Yehoba umvwa bulongo byo tumubuula byo twamutemwa ne byo tumusanchila pa byo etubila. Ukeba’mba tumubuulenga makatazho etu, luketekelo lwetu, ne byo tukebesha mu bwikalo. Saka mukyangye kwisamba ne Yehoba mu lulombelo, kyanema kulangulukila jimo byo musa kulomba. Umvwe kemube bino, mukalombanga bulongo kwi Shenu wa mwiulu milombelo iji nobe bya kufutumuna binunka bulongo. w22.03 20 ¶2; 21 ¶7

Pa Amagedonyi, atweba kechi yetu tukafuukula bantu Yehoba bo akobila lusa ne bo akabula kubila lusa ne. (Mat. 25:34, 41, 46) Abya tukaketekela mu bunchibamambo bwa Yehoba nyi, inyi tukaleka kumwingijila na mambo a kuba’mba kechi tukaswa mo akachibila mambo ne? Kwambatu kine, twafwainwa kuketekela mwi Yehoba luno pa kuba’mba kiketupelele kumuketekela kulutwe. Fwanyikizhai byo tukomvwanga ku muchima mu ntanda ipya ya Lesa. Bupopweshi bwa bubela bakebuzhiya, kubikapotu ne bipamo bya busulu ne bya bumulwila ntanda byamanyika bantu pa kimye kyabaya ne kwibaletela malwa akabotoka. Kechi kukekala kukolwa, kukota, nangwa kufwisha batemwe betu ne. Satana ne bandemona banji bakebakasa pa myaka kiumbi. Bintu byonse byatama byaubiwa na mambo a bunsatuki bwabo kechi bikekalako jibiji ne. (Lum. 20:2, 3) Kiketuletela bingi lusekelo kuyuka kuba’mba twaketekejile jishinda Yehoba jo obilamo bintu. w22.02 6-7 ¶16-17

Yesu watundaikanga mutende ne kukwasha bakwabo kupwana. Wibafunjishe kuba’mba bafwainwe kupwana na bakwabo pa kuba’mba Yehoba atambwile mpopwelo yabo. (Mat. 5:23, 24) Kabiji wakwashishe batumwa banji pa bimye byavula kuba’mba bafwainwe kuleka kwipachika pa wajinga mukulumpe pe abo. (Luka 9:46-48; 22:24-27) Pa kuba’mba twikalenga mu mutende na bakwetu, kechi twafwainwa kupelelatu pa kuchinuzhuka bintu bivulañanya mutende ne. Twafwainwa kwibikako kupwana ne kutundaika balongo ne banyenga kupwisha makatazho inge bapusana. (Fili. 4:2, 3; Yako. 3:17, 18) Twafwainwa kwiipuzha atweba bene amba: ‘Ñanyi bintu bimo byo nafwainwa kubula kuba pa kuba’mba ngikalenga mu mutende na bakwetu? Inge mulongo nangwa nyenga wamfichisha ku muchima, ntwajijila kumuzhingijila nyi? Nanchi mpembelela kuba’mba mukwetu akeye na kulomba lulekelo lwa mambo nyi, inyi ntendekelapo kuya na kupwana na yeo muntu nangwa kya kuba ye waletele lukatazho?’ w22.03 10 ¶10-11

Baibolo waambijile jimo kuba’mba bantu “bakepana na muchima yense” kwingijila Yehoba saka balondela lutangijilo lwa Mwananji. (Sala. 110:3) Buno bungauzhi bubena kufika lelo jino. Pa mwaka pa mwaka, bakalume ba Yehoba bengila maola avula bingi mu mwingilo wa busapwishi. Kechi bebafolesha pa kwingila uno mwingilo ne, bino bengila na mambo a kwipana kukwasha bakwabo. Kabiji bepana kukwasha bakwabo ba mu lwitabilo na bintu bikebewa mu bwikalo, kwibatundaika ne kukosesha lwitabilo lwabo. Bakulumpe mu kipwilo ne bankwasho bengijisha kimye kyabaya kunengezha majashi ne mwingilo wa bukafunga. Ñanyi kine kintu kilengela bantu ba Yehoba kwingila ino mingilo yonse? Mambo batemwa Yehoba ne bantu. (Mat. 22:37-39) Yesu wamwesheshe’mba watele bingi muchima ku bintu bya bakwabo kukila byanji. Ne atweba twibikako kulondela mu ngayo yanji. (Loma 15:1-3) Aba balondela mu ngayo ya kwa Yesu bakamwenamo byawama. w22.02 20 ¶1-2

Mwina Kilishitu utwezha bakwabo nkito wafwainwa kulanguluka pa mbaji ikwabo mukebewa kwikala wa kishinka. Umvwe wa mwingilo babula kumupa mfweto yanji pa kukotoka, kechi wakonsheshe kwikala na mali a kujiishishamo kisemi kyanji pa jojo juba ne. Yehoba walumbulwile’mba: “Aye wakajilwa kabiji bwikalo bwanji bwaimenatu pa mfweto yanji.” (Mpitu. 24:14, 15; Mat. 20:8) Ano moba ba mingilo bavula bebapa mfweto yabo jimo nangwa jibiji pa ñondo, kechi pa juba pa juba ne. Pano bino, jifunde jiji pa Bena Levi 19:13 jingila ne lelo jino. Bantu bamo batwezha bakwabo nkito, bebila ba mingilo kupichila mu kwibapa kajali kacheche kabula kwesakana na mingilo yo bengila. Bayuka kuba’mba bano ba mingilo bakajilwa kabiji bakatwajijila kwibengijila nangwa kya kuba bebafolesha kajali kacheche. Kuba bino kujitu nobe ‘balama mfweto ya bantu bebengijila.’ Mwina Kilishitu utwezha bantu nkito wafwainwa kumona kuba’mba ubena kwibapa mfweto yafwainwa. w21.12 10 ¶9-10

Na mambo a bintu byonse Yesu byo apichilemo, wafwainwa wafwile bingi kilaka. Wakebelenga kumukwasha kupwisha kino kilaka. Yesu kechi walangulukile’mba kyatama kwamba byo aumvwinenga ne. Ne atweba kechi twafwainwa kumvwa bumvu kwamba byo tubena kumvwa ne. Kampe mu bwikalo bwetu kechi tukeba kubuulako bakwetu bintu byo tukeba ne. Bino umvwe tubena kukeba bukwasho, kechi twafwainwa kukankazhama kulomba bukwasho ku bakwetu ne. Umvwe twakoma nangwa kechi tuji na butuntulu bwa mubiji bwawama ne, twafwainwa kulomba mukwetu kwitutwalako ku shitolo na kupota bintu nangwa kwitutwalako ku kipatela. Inge tuji na bulanda nangwa twalefulwa, twakonsha kubuulako mukulumpe mu kipwilo nangwa mwina Kilishitu wakoma mu maana wakonsha kuteleka ne kwitutundaika na “byambo byawama.” (Maana 12:25) Tuvulukenga kuba’mba balongo ne banyenga yetu betutemwa bingi, kabiji bakeba kwitukwasha mu “kimye kya bya malwa.” (Maana 17:17) Bino kechi bakonsha kuyuka byo tubena kulanguluka nangwa byo tubena kumvwa ne. Kechi bakonsha kuyuka’mba tubena kukeba bukwasho ne, kanatu twibabuula. w21.04 11-12 ¶11-12

Atweba bavula kitukatazha bingi inge bintu byapimpulwa mu bwikalo bwetu. Bamo bajinga mu mwingilo wa kimye kyonse wiikajila pa myaka yavula bebalekeshe kwingila uno mwingilo na mambo a lupimpu. Bakwabo baleka kwingila mwingilo ye batemwa na mambo a kukoma. Kijitu bulongo kumvwa bulanda inge bintu bya uno mutundu bitumwekela. Kitupeelela kupijilwa bwikalo bwa katataka inge ke tumwene bintu monka mwibimwena Yehoba. Lesa ubena kuba bintu bikatampe lelo jino, kabiji tuji na munema wa kwikala ba mwingilo umo ne aye. (1 Ko. 3:9) Butemwe bwitutemwa Yehoba kechi bukapimpulwa ne. Onkao mambo, inge lupimpu lwaubiwa mu jibumba ja Lesa lwimukwata, kange mutayenga kimye kyabaya na kulanguluka pa ene mambo luno lupimpu o lwaishila ne. Kechi mwafwainwa kutonganga “moba a kala” ne, bino mwafwainwa kulomba kwi Yehoba pa kuba’mba emukwashe kuta muchima pa byawama byafuma mu lolo lupimpu. (Sapwi. 7:10) Twajijilai kwikala na muchima wa lusekelo. Onkao mambo, tukatwajijila kwikala na lusekelo ne bukishinka inge bintu byapimpulwa mu bwikalo bwetu. w22.03 17 ¶11-12

Bañanyi Yehoba bo amwesha butemwe bubula kwaluka? Baibolo waamba’mba twakonsha kutemwa bintu nabiji, “bunjimi,” “binyu ne manyi,” “mafunde,” “maana a kuyuka bintu,” “maana,” ne bintutu bikwabo. (2 Moba 26:10; Maana 12:1; 21:17; 29:3) Pano bino, butemwe bubula kwaluka kechi bebumwesha ku bintu nangwa ku milanguluko ne; bebumweshatu ku bantu. Bino Yehoba kechi umwesha butemwe bubula kwaluka ku muntu yensetu ne. Wibumweshatu ku boba baji na bulunda bwakosa ne aye. Lesa wetu wa kishinka ku balunda nanji. Ukebobila bintu byawama, kabiji kechi ukaleka kwibatemwa ne. Yehoba umwesha butemwe ku bantu bonse. Yesu wabuujile mwanamulume wa jizhina ja Nikodema amba: “Mambo Lesa watemenwe bingi ba pano pa ntanda kya kuba wapaine Mwananji yenkawa umotu, kuba’mba bonse bamwitabila kechi bakonaike ne, poso bakekale na bumi bwa myaka ne myaka.”—Yoa. 3:1, 16; Mat. 5:44, 45. w21.11 2 ¶3; 3 ¶6-7

Bwikalo mu ino ntanda bwakatazha bingi, kabiji tukapitanga ne mu makatazho akatampe kulutwe. (Mat. 24:21) Byo tubena kutongapo juba bino bintu byonse po bikapwa ne kwibilubako! (Isa. 65:16, 17) Onkao mambo, twafwainwa kufunda kuchinchika. Mambo ka? Mambo Yesu waambile’mba: “Umvwe mwachinchika, mukapulusha bumi bwenu.” (Luka 21:19) Kulanguluka pa bakwetu byo babena kuchinchika makatazho epasha na o tubena kupitamo kwitulengela ne atweba kutwajijila kuchinchika. Ñanyi mwine ye twafwainwa kufunjilako kuchinchika? Mukumbu ke wa kuba’mba, Yehoba Lesa. Nanchi uno mukumbu wimulengela kukumya nyi? Kampe mwakonsha kukumya. Bino inge mwalangulukapo, kechi mwakonsha kukumya ne. Ino ntanda iji mu bulume bwa kwa Diabola, kabiji mwayulatu makatazho. Yehoba uji na bulume bwa kupwisha ano makatazho mu kimye kichechetu, bino ubena kupembelela juba jo asala jiji kulutwe. (Loma 9:22) Pa kino kimye, Lesa wetu watwajijila kuchinchika kufika ne kimye kyo atongola byo kikafika. w21.07 8 ¶2-4