KUKWASHA BANTU KWIKALA BAANA BA BWANGA
LUFUNJISHO 10
Ibikaiko Kukwasha Bantu
Jifunde: “Onkao mambo, byo twimutemwishe, kechi twakebeshetu kwimubuula mambo awama a Lesa onkatu ne, bino twipaine ne atweba bene, mambo twimutemenwe bingi.”—1 Tesa. 2:8.
Byaubanga Yesu
1. Tambai VIDYO, nangwa tangai Yoano 3:1, 2. Apa bino mwisambe ano mepuzho:
Mambo ka Nikodema o ayijile bufuku kwi Yesu?—Monai Yoano 12:42, 43.
Yesu byo aswile kusambakana ne Nikodema bufuku, wamwesheshe byepi amba wakebeshe kukwasha bantu kwikala baana ba bwanga?
Ñanyi Bintu byo Twafunjilako kwi Yesu?
2. Na mambo a kuba’mba twatemwa bantu kyo kitulengela kukebesha kwibakwasha kwikala baana ba bwanga.
Ubainga Byaubanga Yesu
3. Funjishainga muntu Baibolo pa kimye kyo atemwa ne mpunzha yo akeba. Kampe mwine wafwainwa kusalapo juba nangwa kimye kya kufunjilapo. Nanchi ukakasuluka kufunjilanga Baibolo ku nkito, pa nzubo nangwa ku mpunzha kutaanwa bantu bavula nyi? Inge kyaikala bino, pimpulaiko mutanchi wenu pa kuba’mba mumufunjishenga Baibolo pa kimye ne mpunzha yo asala mwine.
4. Mufunjishainga kimye kyonse. Inge mukafumapo, kwimika mutanchi wa kumufunjisha Baibolo ne. Pakuba ubai bino:
Nanchi kuba mwamufunjisha pa kimye kikwabo mu yenkao mulungu nenyi?
Nanchi kuba mwamufunjisha kwingijisha foni nangwa zoom nenyi?
Nanchi kuba mwashila musapwishi mukwenu kufunda nanji pa kimye kyo mwafumapo nenyi?
5. Lombainga. Lombainga kwi Yehoba kwimukwasha kubula kuleka kufunjisha muntu Baibolo. Inge kechi mufunda nanji kimye kyonse ne, kabiji ubanda kwingijisha bintu byo abena kufunda, kange mumuleke kumufunjisha ne. (Fili. 2:13) Kampe muntu ye mufunjisha Baibolo uji na byubilo byawama byavula. Onkao mambo, lombainga kwi Yehoba kwimukwasha kutatu muchima pa byubilo byanji byawama.