September

Lesa wapa Yesu bulume bwa kufumyapo makatazho onse apitamo bantu. Bya kukumya byaubile Yesu, byamwesheshenga’mba uji na bulume bwa kupwisha makatazho onse o twakonsha kukankalwa kupwisha na bulume bwetu. Uji na bulume bwa kufumyapo bintu byonse bilengela bantu kumanama nabiji, bundengamambo bo twaswana bulengela kukolwa ne kufwa. (Mat. 9:1-6; Loma 5:12, 18, 19) Bya kukumya byo aubile bimwesha’mba uji na bulume bwa “kubuka misango yonse” ya bikola ne kusangula bafwa. (Mat. 4:23; Yoa. 11:43, 44) Kabiji, uji na bulume bwa kukanya luvula ne kushinda bandemona. (Mako 4:37-39; Luka 8:2) Kyawama bingi kuyuka’mba, Yehoba wapana buno bulume ku Mwananji. Twafwainwa kushiinwa kuba’mba Bufumu bwa Lesa bukafikizha milaye yonse yawama. Bya kukumya byaubile Yesu byo ajinga pano pa ntanda bitufunjisha’mba ukebyuba ntanda yonse mambo ye Mfumu wa Bufumu bwa Lesa. w23.04 3 ¶5-7

Umvwe muji mu kipwilo muji basapwishi bavula kabiji anweba kechi bemutongolapo ne, kampe mwakonsha kutatula kulanguluka’mba kyawama kwikilekatu kusuntula kuboko. Pano bino, kechi mwafwainwa kuleka kukumbulapo ne. Nengezhainga mikumbu yavula pa kupwila konse. Inge kechi mwakumbulapo ku ntatwilo ya lufunjisho ne, mwakonsha kukumbulapo mu mafuka alondelapo. Umvwe mubena kunengezha Lufunjisho lwa Kyamba kya Usopa langulukai pa mafuka byo akwatankana na kishina kya mutwe ye mubena kufunda. Inge mwauba bino, mukayuka mikumbu yavula yo mwakonsha kukumbulapo mu lufunjisho lonse. Kabiji mwakonsha kunengezha kukumbulapo mu mafuka aamba pa bukine bwazhika bwakonsha kukatazha kulumbulula. Mambo ka? Mambo kampe bantu bakonsha kusuntula maboko kuba’mba bakumbulepo bakonsha kwikalatu bacheche. Mwakonsha kuba byepi inge kya kuba kechi bemupapo kimye kya kukumbulapo ne? Kupwila saka kukyangye kutendeka, buulai utangijila lufunjisho bwipuzho bo mukeba kukumbulapo. w23.04 21-22 ¶9-10

Yosefwa wakookejile byamubuujile Yehoba, kabiji kino kyamulengejile kwikala mwanamulume wawama ku mukazhanji. Kabiji pa bimye bisatu, wakookejile byamukambizhe Lesa pa bya kuba na kisemi kyanji. Pa bino bimye byonse bisatu, waubile byo bamubuujile nangwa kya kuba kechi kyapeelele ne. (Mat. 1:20; 2:13-15, 19-21) Na mambo a kuba walondejile byamubuujile Lesa, Yosefwa wazhikijile Maliya, kumukwasha ne kumukebela bya mu bwikalo. Bintu byaubilenga Yosefwa byafwainwa byalengejile Maliya kumutemwa bingi ne kumunemeka. Anweba banabalume basongola, londelainga byaamba Baibolo pa bya kulama bisemi byenu byonka byaubile Yosefwa. Inge mwalondela luno lujimuno, nangwatu inge kuba bino kubena kulumbulula kupimpulako bintu bimo mu bwikalo bwenu, mukamwesha’mba mwatemwa bakazhi benu kabiji mukakosesha masongola enu. Nyenga wa ku Vanuatu waikala mu masongola myaka kukila 20, waambile’mba: “Inge bamwatawami ke balombe ne kulondela lutangijilo lwa Yehoba, nebanemeka bingi. Kindengela kuyuka’mba nazhikijilwa kabiji nketekela byo bafuukulapo.” w23.05 21 ¶5

Bayudea bonse babwelelenga kufuma ku Babilona bafwainwe kwikala “bantu bazhila” kwi Lesa wabo. (Mpitu. 7:6) Kino kibena kulumbulula’mba, bonse bafwainwe kupimpula byubilo byabo pa kuba’mba batokeshenga Yehoba ku muchima. Bayudea bavula basemekejilwe mu Babilona, kabiji kyamweka batendekele kwikala na ndangulukilo ne byubilo byajinga na bena Babilona. Byo papichile myaka yavula kufuma kimye Bayudea batanshi kyo babwelele ku Isalela, Kinemanga aye Nehemiya wakuminye bingi byo ayukile’mba baana bamo basemekejilwe mu Isalela kechi bayukile mulaka wa Bayudea ne. (Mpitu. 6:6, 7; Ne. 13:23, 24) Bano baana bakonsheshe byepi kutemwa Yehoba ne kumupopwela byo babujilenga kumvwa Kihebelu, mulaka mwanembejilwe Mambo a Lesa? (Eze. 10:3, 44) Onkao mambo, bano Bayudea bafwainwe kupimpula byubilo byabo. Kabiji kyafwainwe kwibapelela mambo pa kikye kimye mu Isalela bupopweshi bwa kine bwayilenga na kubwela pachepache.​—Ne. 8:8, 9. w23.05 15 ¶6-7

Nangwa kya kuba tuji na kizaku nangwa twibikako byepi, kwakonsha kumweka kintu kyakonsha kwitubwezha panyuma. Nabiji “bintu bya kubula kuketekela” byakonsha kwitujiila kimye kyo tukeba kwingijisha pa kuba’mba tufikizhe kikonkwanyi kyetu. (Sapwi. 9:11) Kampe twakonsha kupita mu lukatazho lwakonsha kwitulengela kulefulwa ne kwitupwishisha bulume. (Maana 24:10) Bumbulwa kulumbuluka bwakonsha kwitulengela kuba bintu byakonsha kulengela kyakatazha kufikizha kikonkwanyi kyetu. (Loma 7:23) Nangwa kampe twakonsha kukooka. (Mat. 26:43) Ñanyi kintu kyakonsha kwitukwasha kubula kubwela panyuma? Vulukainga kuba’mba inge kwamweka kintu kyakonsha kwimulengela kubwela panyuma, kechi kilumbulula’mba mwakankalwa ne. Baibolo waamba’mba twakonsha kupita mu makatazho bimye byavula. Nangwa byonkabyo, waamba ne kuba’mba twakonsha kufikizha kikonkwanyi kyetu. Inge mwatwajijila kwibikako kufikizha bikonkwanyi byenu, nangwa kya kuba mubena kupita mu makatazho, mumwesha’mba mukeba kutokesha Yehoba ku muchima. Yehoba usangalala bingi inge wamona byo mwibikako kufikizha bikonkwanyi byenu. w23.05 30 ¶14-15

Mwingilo wa kimye kyonse ukwasha banyike kuyuka bya kwingila bulongo na bantu bapusana pusana. Kabiji wibakwasha kuyuka bya kwingijisha bulongo mali kwakubula kisuse. (Fili. 4:11-13) Kwingilako bupainiya bwa kukwasha kwibatundaika kutendeka ne bupainiya bwa kimye kyonse. Bavula bengilako bupainiya bwa kukwasha pa kimye kyabaya. Kino kibalengela kutendeka bupainiya bwa kimye kyonse. Mwingilo wa bupainiya bwa kimye kyonse ulengela bamo kwingilako mingilo ikwabo ya kimye kyonse nabiji kwingilako mwingilo wa buntungi nangwa kwingijila pa Betele. Balongo bonse bafwainwa kufikilamo kwikala bakulumpe mu kipwilo pa kuba’mba bakwashenga balongo ne banyenga mu kipwilo. Baibolo waamba’mba banabalume bakanamina uno mwingilo bakeba “mwingilo wawama.” (1 Timo. 3:1) Mwanamulume patanshi wafwainwa kwikala nkwasho. Bankwasho bakwasha bakulumpe mu kipwilo mu mingilo yavula. Bakulumpe mu kipwilo ne bankwasho bonse bakwasha balongo ne banyenga mu kipwilo kabiji bengila na mukoyo mwingilo wa kusapwila. w23.12 28 ¶14-16

Mfumu Yosiya wajingatu na myaka 16 byo atendekele kukeba Yehoba. Wakebeshe bingi kufunda pe Yehoba ne kuba kyaswa muchima wanji. Nangwa kyajinga bino, bintu kechi byamupeelejile ne. Mambo pa kyokya kimye, bantu bavula bapopwelanga balesa ba bubela. Onkao mambo, Yosiya wafwainwe kukosa pa kuba’mba ebakanye kuba bino. Kabiji kechi wajinga na moyo ne. Yosiya saka akyangye kufikizha myaka 20, watendekejilepo kufumya bupopweshi bwa bubela mu bisaka bya bantu.(2 Moba 34:1, 2) Nangwatu inge mukiji banyike, mwafwainwa kuba byaubile Yosiya kukeba Yehoba ne kufunda byavula pe Yehoba ne byubilo byanji byawama. Inge mwauba bino, kikemutundaika kwipana kwi aye. Nanchi kwipana kwenu kukalengela bwikalo bwenu bwa pa juba pa juba kwikala byepi? Luka wabatizhiwe saka aji na myaka 14 waambile’mba: “Kyapwa kufumatu luno nsakutwajijila kutangizhako kwingijila Yehoba mu bwikalo bwami ne kwibikako kubanga bintu bimutookesha ku muchima.” (Mako 12:30) Kashika mukekala bingi bulongo inge mwafuukulapo kwingijila Yehoba byonkatu byaubile Luka. w23.09 11 ¶12-13

Mutumwa Paulo wanembejile nkalata kipwilo kya mu Tesalonika saka kikyangyetu ne kupwisha mwaka kufuma po kyalengejilwe. Kyamweka banabalume batangijilenga po po batongwelwetu kabiji kampe balubankenyengapo mumo mumo. Nangwa byonkabyo, bonse mu kipwilo bafwainwe kwibanemeka. Malwa akatampe byo abena kufwenya pepi tukakebanga bingi lutangijilo lwa bakulumpe mu kipwilo kukila byo kiji ano moba. Kampe kechi tukatambwilanga mikambizho kufuma ku ofweshi mukatampe wa ntanda yonse ne ku ofweshi wa musampi ne. Onkao mambo, twafwainwa kufunda kutemwa ne kunemeka bakulumpe mu kipwilo lonka luno. Nangwatu kwamweka bintu bya mutundu ka, twayai tutwajijile kwikala balaba, kechi kuta muchima pa bumbulwa kulumbuluka bwabo ne, bino twafwainwa kuvulukanga kishinka kya kuba’mba Yehoba ye ubena kutangijila bano banabalume kupichila mwi Kilishitu. Byonkatu kampompo byo kazhikijila mutwe wa mushilikale, luketekelo lwetu lwa lupulukilo luzhikijila milanguluko yetu. Twayuka kuba’mba bintu bya mu ino ntanda byatutu. (Fili. 3:8) Luketekelo lwetu lwitukwasha kubula kubambisha muchima ne kulanguluka bulongo. w23.06 11-12 ¶11-12

Bantu bomvwa ku “mwanamukazhi wakosama” bafwainwa kufuukulapo kuswa lwito nangwa ne. Kuji bishinka byavula bingi byafwainwa kwitulengela kuchinuzhuka kuba bulalelale. “Mwanamukazhi wakosama” bamulumbulula’mba wamba’mba: “Mema a kwiba atobala.” (Maana 9:17) “Mema a kwiba” o a ka? Baibolo waesakanya kusambakana kwa baji mu masongola ku mema ekizha muchima. (Maana 5:15-18) Mwanamulume ne mwanamukazhi baji mu masongola bebaswisha kusambakana. Bino “mema a kwiba” apusanako. Ano mema ke bulalelale bo bakanya. Bantu boba bulalelale bafya ku bakwabo byonkatu ngivi byo eba bintu mu bufyamfya. “Mema a kwiba” amweka nobe atola inge babena kuba bino kebalanguluke’mba kafwako nangwa umo ukayuka ne. Buno bujimbijimbi bwatama bingi. Kuba bino ke kwibepatu mambo Yehoba umona byonse. Inge Yehoba waleka kwitutala bulongo, kiji nobe ano mema alula kechi “atobala” ne. Kabiji kino kintu kyatama bingi.​—1 Ko. 6:9, 10. w23.06 22 ¶7-9

Mwakonsha kuba byepi inge mwamona’mba kechi mubena kulomba kufuma panshi ya muchima nangwa inge kechi mubena kwingila mwingilo wa kusapwila na kizaku byonka byo mwaingilanga kala ne? Kange mulangulukenga’mba mupashi wa Yehoba wafuma pe anweba ne. Na mambo a kuba’mba twi bambulwakulumbuluka, milanguluko yetu yakonsha kupimpulwa. Umvwe kizaku kyenu kibena kuya na kupwa, langulukai pa bintu byawama byaubanga mutumwa Paulo. Nangwa kya kuba wibikangako kulondela byaubanga Yesu, wayukile’mba pa bimye bimo kechi wakonsheshe kuba byo akebanga kuba ne. Paulo wakebeshenga kupwisha mwingilo wanji nangwa kya kuba pa bimye bimo waumvwanga nobe kechi wakonsha kwingila ne. Po pamotu, kange mufuukulenga bintu kwesakana na byo mubena kumvwa ku muchima ne. Ibikaingako kuba byawama nangwa kya kuba mubena kumvwa kuba’mba kechi mwakonsha kwibyuba ne. Inge mwatwajijila kuba byawama, pa kupitapo kimye milanguluko yenu ikapimpulwa.​—1 Ko. 9:16. w24.03 11-12 ¶12-13

Tumwesha’mba twatemwa balongo ne banyenga inge twaikala balunda nabo. (2 Ko. 6:11-13) Atweba bonse tuji mu bipwilo muji balongo ne banyenga baji na byubilo byapusanako na byetu. Twafwainwa kutwajijila kwibatemwa inge twata muchima pa byubilo byabo byawama. Umvwe twafunda kumona bakwetu byonkatu Yehoba byo ebamona tukatwajijila kwibatemwa. Kutemwa balongo ne banyenga kuketukwasha bingi mu kimye kya malwa akatampe. Yehoba uketuzhikijila byepi inge malwa atendeka? Akilangulukai pe Yehoba byo abuujile bantu banji kuba kimye Babilona kyo bamulukukile. Waambile’mba: “Anweba bantu bami, twelai mu mazubo enu a mukachi, ne kushinka binzhilo byenu. Mukafyamemo pa kakimye kacheche posotu ne bukaji byo bukapita.” (Isa. 26:20) Kyamweka ne atweba tukalondela yenka uno mukambizho mu kimye kya malwa akatampe. w23.07 6-7 ¶14-16

Byo tuba byafwainwa kumweshanga’mba twakooka muchima. Ishikishai anweba bene amba: ‘Nanchi bantu bammona’mba nakooka muchima, natekanya kabiji’mba kechi nji na kizhingijisha nenyi? Nangwa bammona’mba nguminatu pa kintu kimo, nashinta kabiji nji na kizhingijisha nyi? Nanchi ñumvwa byamba bakwetu ne kwibilondela inge kyakonsheka nyi?’ Tumwesha’mba tulondela Yehoba ne Yesu umvwe twatwajijila kwikala bakooka muchima. Twafwainwa kupimpula mwakubila bintu umvwe bwikalo bwetu bwapimpulwa. Lupimpu lwa uno mutundu lwakonsha kuleta makatazho o twabujilenga ne kulangulukapo. Kampe twakonsha kukolwa kikola kikatampe. Nangwa kampe mitengo yakonsha kuyilako peulu nangwa kafulumende wakonsha kupimpulwa. Bino byonse byakonsha kulengela bwikalo kukatazha. (Sapwi. 9:11) Bintu byakonsha kukatazha nangwatu inge jibumba ja Lesa jitupa mwingilo mukwabo nangwa kwitubuula kuya na kwingijila Yehoba ku mpunzha ingi. Pa kuba’mba tutwajijile kwingila bulongo umvwe bintu byapimpulwa mu bwikalo bwetu, twafwainwa kuba bino bintu bina: (1) Shiinwai kuba’mba bintu byapimpulwa, (2) langulukainga pa bintu byo mwakonsha kuba luno kechi pa byo mwaubanga kala ne, (3) tai muchima pa bintu byawama mu bwikalo bwenu, ne (4) kwashainga bakwenu. w23.07 21-22 ¶7-8

Ngauzhi Danyela wajinga mwanyike kimye bena Babilona kyo bamusendele mu buzha ku Babilona kwalepele bingi na kwabo ku Yelusalema. Babilolo ba mu Babilona bamutemenwe bingi na mambo a ‘byo amwekanga.’ Wamwekanga bulongo kabiji wafumine ku kisemi kyo banemekele bingi. (1 Sam. 16:7) Onkao mambo, bamufunjishe mingilo ya ku jilapa ja bamfumu. (Da. 1:3, 4, 6) Yehoba watemenwe Danyela na mambo a byubilo byo ajinga nabyo. Kyamweka Danyela wajinga na myaka 20 kimye Yehoba kyo aambile’mba wajinga wa kishinka byonka byajinga Nowa ne Yoba. Onkao mambo, Yehoba wamwene’mba Danyela wajinga waoloka byonkatu byajinga Nowa ne Yoba baingijile Yehoba myaka yavula ne kutwajijila kwikala ba kishinka kwi Aye. (Nte. 5:32; 6:9, 10; Yoba 42:16, 17; Ezi. 14:14) Kabiji Yehoba watwajijile kutemwa Danyela myaka yanji yonse ya bumi bwanji.—Da. 10:11, 19. w23.08 2 ¶1-2

Inge mubena kukeba kupota nzubo, mukatwela mukachi pa kuba’mba muyuke biji ino nzubo yonse. Abino byo byo twafwainwa kubanga pa kutanga ne kufunda Baibolo. Inge ke mupitemotu kapambala mukayukakotu “mafunjisho atanshi a Mambo a Lesa.” (Hebe. 5:12) Byonkatu byo tutwela mu nzubo pa kuba’mba tuyuke bintu byonse bijimo, byo byo twafwainwa ne kuba inge tubena kutanga Mambo a Lesa pa kuba’mba tukwatakanye bijimo. Jishinda jawama kufunjilamo Baibolo, ke kumona bishinka byo mubena kutanga mu Baibolo byo byakwatankana na bikwabo. Kechi mwafwainwa kukwatakanyatu bintu byo mwaketekela mu Baibolo ne, bino mwafwainwa ne kuyuka ene mambo o mwibiketekela. Kuji bintu bimo byo twafwainwa kuba pa kuba’mba tumvwishenga biji mu Mambo a Lesa. Mutumwa Paulo watundaikile balongo ne banyenga kufunda Mambo a Lesa na mukoyo pa kuba’mba ‘bakwatakanye bulongo mwayila bwipi, ne bula ne kimino ne kuzhika’ kwa bukine, pa kuba’mba ‘bakose byonka byajimba mizhazhi ya kichi’ ne kushimikwa bulongo mu lwitabilo lwabo. (Efi. 3:14-19) Ne atweba byo byo twafwainwa kuba. w23.10 18 ¶1-3

Mu Baibolo muji mashimikila aamba pa bantu bavula bamwesheshe butekanye. Kyakonsha kuwama bingi kutendeka kufunda pa bano bantu. Nangwa kya kuba Davida bamutongwele kwikala mfumu wa bena Isalela saka akiji mwanyike, wapembelejile myaka yavula pa kuba’mba atendeke kulama. Shimeona ne Ana bapopwelanga Yehoba bapembelejile kufika kwa kwa Mesiasa. (Luka 2:25, 36-38) Inge mubena kutanga pa ano mashimikila, kumbulai ano mepuzho: Ñanyi kintu kyakwashishe uno muntu kutekanya? Ñanyi bintu byo amwenejilemo mu butekanye? Twafwainwa kwikala byepi batekanya byonka byo ajinga? Kabiji mwakonsha kufunjilako ne ku bantu babujile kumwesha butekanye. (1 Sam. 13:8-14) Ishikishai’mba: ‘Ñanyi kintu kyalengejile uno muntu kubula kutekanya? Ñanyi kintu kyafuminemo?’ w23.08 25 ¶15

Mutumwa Petelo wajinga wa kishinka kabiji kechi waswishishepo kintu nangwatu kimo kumukanya kwikala mwana wa bwanga wa kwa Yesu ne. Petelo wamwesheshe bukishinka bwanji kimye Yesu kyo aambile kintu kimo kyabujile baana banji ba bwanga kuyuka mo kyatajile. (Yoa. 6:68) Kwa kubula kupembelela mukumbu mo atazhizhe, bavula balekele kulondela Yesu. Pakuba Petelo aye wakaine kuya mambo wayukile’mba Yesu ye yenkatu uji na “byambo bipana bumi bwa myaka ne myaka.” Yesu wayukile’mba Petelo ne bakwabo batumwa basakumusha. Nangwa byonkabyo, Yesu wabuujile Petelo amba nangwa kya kuba Petelo ukamukana, ukabwela ne kutwajijila kwikala wa kishinka kwi aye. (Luka 22:31, 32) Yesu wayukile’mba “kine muchima [wa kwa Petelo] wakebesha, pakuba mubiji wakooka.” (Mako 14:38) Nangwa kya kuba Petelo wamukaine’mba kechi wamuyuka ne, Yesu kechi wamulubileko uno mutumwa wanji ne. Byo bamusangwile, Yesu wamwekele kwi Petelo, kyamweka pa kikye kimye Petelo saka ajitu bunke. (Mako 16:7; Luka 24:34; 1 Ko. 15:5) Akino kintu kyatundaikile Petelo mambo waakaminwe bingi pa kintu kyo aubile! w23.09 22 ¶9-10

Lesa ulekelako nangwa kuvweta pa mambo a boba baji na lwitabilo mwi aye. Wibalekelako mambo kabiji kechi uvuluka mambo abo o balengele ne. (Sala. 32:1, 2) Wibamona babula kaneneno kabiji baoloka na mambo a lwitabilo lwabo. Nangwa kya kuba ba Abalahama, Davida ne bapopweshi bakwabo ba kishinka ba Lesa bebatelele’mba baoloka, bakijinga bandengamambo. Pano bino na mambo a lwitabilo lwabo, Lesa wibamwene kwikala babula kaneneno kikatakata byo ebesakenye na boba babujile lwitabilo mwi aye. (Efi. 2:12) Byonkatu mutumwa Paulo byo aambile mu nkalata yanji, lwitabilo lo lulengela muntu kwikala mulunda ne Lesa. Lwitabilo lo lwalengejile ba Abalahama ne Davida kwikala balunda ba Lesa. Ne atweba byo byo twafwainwa kuba pa kuba’mba twikale balunda ne Lesa. w23.12 3 ¶6-7

Lelo jino, bena Kilishitu bonse bengijisha kimye, ngovu ne bintu byabo bya ku mubiji kutundaikilamo mwingilo wa Bufumu bwa Lesa. Twakonsha kumwesha’mba twatemwa bingi kwingijila Yehoba inge saka twingila na bulume ne na muchima wetu yense. Mutumwa Paulo waambile pa bintu byo twafwainwa kubanga kimye kyonse pa kwingijila Yehoba. (Hebe. 10:22-25) Twafwainwa kulombanga kwi Yehoba, kusapwila bantu mambo awama, kupwila ne kwitundaika atwe bene na bene “byo [tubena] kumona aja juba saka jifwenya pepi.” Ku mpelo ya jishimikila jiji mu buku wa Lumwekesho, malaika wa Yehoba waambile’mba: “Popwelai Lesa!” (Lum. 19:10; 22:9) Wabwezhezhepo bino byambo bya kuba’mba “popwelai Lesa!” kumwesha’mba kuba bino kwanema bingi. Twayai tulangulukenga kimye kyonse pa bino bintu byonse byo twafunda byaamba pa nzubo ikatampe ya Yehoba ya ku mupashi ne mwingilo ye tuji nanji wa kwingijila Lesa wetu wakila! w23.10 29 ¶17-18

Atweba bonse twafwainwa kutwajijila ‘kwitemwa atwe bene na bene.’ Nangwa byonkabyo, twafwainwa kuvulukanga’mba Yesu witujimwineko’mba “butemwe bwa bavula bukakepa.” (Mat. 24:12) Yesu kechi walumbulwilenga’mba baana banji ba bwanga bavula bakaleka kwitemwa bene na bene ne. Nangwa byonkabyo, twafwainwa kujimuka kuchiina’mba twakekala na byubilo bya bantu ba mu ino ntanda byakonsha kwitulengela kuleka kwitemwa atwe bene na bene. Pano twayai twisambe pa bwipuzho bwanema bingi bwa kuba’mba: Ñanyi kintu kiketukwasha kuyuka inge twatwajijila kutemwa balongo ne banyenga? Jishinda jimo jafwainwa kwitukwasha kuyuka inge twatemwa bakwetu ke byo tuba inge kwamweka bintu bimo mu bwikalo bwetu. (2 Ko. 8:8) Mutumwa Petelo waambapo kintu kimo kya uno mutundu. Waamba’mba: “Kyakila pa byonse, itemwishai anwe bene na bene, mambo butemwe buvweta pa mambo avula.” (1 Pe. 4:8) Onkao mambo, byo tuba inge bakwetu betuzhingijisha nangwa betukozha ku muchima byo bikamwesha inge twibatemwa. w23.11 10-11 ¶12-13

Kechi twakonsha kukookela mukambizho wa kwa Yesu waamba pa butemwe inge twabula kutemwa balongo ne banyenga bonse mu kipwilo ne. Kya kine kuba’mba twakonsha kutemwa bingi bamo mu kipwilo kukila byo twatemwa bakwabo byonka byaubile Yesu. (Yoa. 13:23; 20:2) Bino mutumwa Petelo wituvululamo’mba twafwainwa kwibikako kwikala na butemwe bwa “kutemwa balongo” ko kuba’mba kutemwa balongo ne banyenga bonse mambo twi kisemi kimo. (1 Pe. 2:17) Petelo witutundaika’mba “itemwishai na muchima yense anwe bene na bene.” (1 Pe. 1:22) Kutemwa “na muchima yense” kulumbulula kutemwa muntu nangwa kya kuba kyakatazha kumumwesha butemwe. Twakonsha kuba byepi inge mulongo wituzhingijisha? Twakonsha kufuukulapo kushinkanya nanji ne kuleka kumutemwa. Bino Petelo wafunjile kwi Yesu kuba’mba Lesa washikwa kushinkanya. (Yoa. 18:10, 11) Petelo wanembele’mba: “Kange mushinkanyenga kibi pa kibi kikwabo nangwa matuka pa matuka akwabo ne. Bino bapeshainga.” (1 Pe. 3:9) Inge twatemwa balongo ne banyenga na muchima yense, tukebamweshanga lusa ne kifyele. w23.09 28-29 ¶9-11

Tukumya bingi mwana byo akoma lubilo ne kwikala ke mukulumpe. Baana kechi bayuka ne kuyuka’mba babena kukoma ne. Nangwa byonkabyo, atweba pa kuba’mba twikale bena Kilishitu bakosa, twafwainwa kubapo bimo. (1 Ko. 13:11; Hebe. 6:1) Twafwainwa kukosesha bulunda bwetu ne Yehoba. Kabiji twafwainwa kulomba Yehoba kwitupa mupashi wanji wazhila pa kuba’mba twikale na byubilo byawama bimutookesha ku muchima, kufunda mingilo imo ne kwitukwasha kuyuka byo tukekalanga kulutwe. (Maana 1:5) Yehoba walengele bantu kwikala banabalume nangwa banabakazhi. (Nte. 1:27) Mu kwibamona, banabalume ne banabakazhi bapusana, pano bino bapusana ne mu mashinda akwabo. Yehoba walengele banabalume ne banabakazhi kwingila mingilo yapusana. Onkao mambo, bafwainwa kwikala na byubilo byawama ne kufundapo mingilo imo ya kwibakwasha kwingila bulongo mingilo yabo.​—Nte. 2:18. w23.12 18 ¶1-2

Nanchi Yesu wakebanga bantu kwingijisha jizhina ja Shanji nyi? Ee. Bantangi ba bupopweshi bamo bafunjishanga’mba kutela jizhina ja Lesa kumwesha’mba kechi twijinemeka ne. Bino Yesu kechi waswishishe ano mafunjisho abula a mu Binembelo kumulengela kubula kunemeka jizhina ja Shanji ne. Akilangulukai pa kimye kyo abukile mwanamulume wajinga na bandemona mu kibunji kya Bangalasene. Bantu baumvwine moyo kabiji basashijile Yesu amba afumemo mu mpunzha yabo, onkao mambo wafuminemo. (Mako 5:16, 17) Nangwa byonkabyo, Yesu wakebelenga Yehoba kuyukanyikwa mu ino mpunzha. Yesu wabuujile mwanamulume ye abukile kubuula bantu amba Yehoba ye wamubila bino bintu byawama, kechi Yesu ne. (Mako 5:19) Ne lelo jino, Yesu ukeba’mba ne atweba tuyukanyikishe jizhina ja Shanji mwaya ntanda yonse. (Mat. 24:14; 28:20) Inge twauba bino, tutokesha ku muchima Mfumu wetu aye Yesu. w24.02 10 ¶10

Twatokwa bingi pa kwikala mu jibumba ja Yehoba mu ano moba a kupelako akatazha bingi. Nangwa kya kuba bintu bibena kuya na kutaminakotu mu ino ntanda, Yehoba witunengezhezha kisemi kyakwatankana kya balongo ne banyenga. (Sala. 133:1) Witukwasha kwikala na lusekelo mu bisemi byetu. (Efi. 5:33–6:1) Kabiji witupa milangwe ne maana bitukwasha kuyuka bya kuba na bijikila ne kwikala na lusekelo. Nangwa byonkabyo, twafwainwa kwibikako kutwajijila kwingijila Yehoba mu bukishinka. Mambo ka? Mambo pa bimye bimo bakwetu bakonsha kwituzhingijisha na mambo a bumbulwakulumbuluka bwabo. Kabiji twakonsha kulefulwa na mambo a bintu byo tulubankanya, kikatakata inge twabwezhapo kulubankanya bintutu bimo. Twafwainwa kutwajijila kwingijila Yehoba na mukoyo (1) inge mukwetu mwina Kilishitu wituzhingijisha, (2) inge mwinakwetu witulefula ne (3) inge twalefulwa na mambo a byo tulubankanya. w24.03 14 ¶1-2

Pa kimye pa kimye mukomvwanga masawakya a balongo ne banyenga bafuukulapo kwingilako pakatampe mu mwingilo wa Yehoba. Kampe batainwe ku Sukulu wa Basapwishi ba Bufumu nangwa bayile na kwingijila kwakepa basapwishi. Inge mukeba kuba byaubile bano balongo ne banyenga, ko kuba’mba mwafuukulapo kintu kyawama. Bantu ba Yehoba bakebesha kwingilako pakatampe mu mwingilo wanji. (Byu. 16:9) Pano mwakonsha kuba byepi inge pa kino kimye kechi mwakonsha kwingilako ino mingilo ne? Kange mwiesakanyenga ku bakwenu bakonsha kwingilako ino mingilo ne. Kintu kyanema ke kutwajijila kuchinchika. (Mat. 10:22) Vulukainga kimye kyonse kuba’mba musangajika bingi Yehoba inge kemumwingijile kwesakana na papelela bulume bwenu. Jino ke jishinda janema bingi jo mwakonsha kumwesheshamo amba mwatwajijila kulondela Yesu panyuma ya kubatizhiwa.​—Sala. 26:1. w24.03 10 ¶11

Shetu wa mwiulu witulaya kuba’mba uketulekelako mambo inge twalapila. (Sala. 86:5) Onkao mambo, inge twalapila kya kine pa mambo o twalengele, twafwainwa kuketekela’mba Yehoba uketulekelako mambo. Vulukainga kuba’mba Yehoba kechi witukebela kuba bintu byo twakonsha kukankalwa kuba ne. Yehoba usanta bingi inge ketumwingijile papelela bulume bwetu. Kabiji langulukainga pa bantu bo baambapo mu Baibolo baingijilanga Yehoba na muchima yense. Akilangulukai pe mutumwa Paulo. Waingijile na mukoyo pa myaka yavula, waendelenga miseke ne kulenga bipwilo byavula. Pano bino, bintu byo byapimpwilwe mu bwikalo bwanji, kechi wasapwijilenga byonka byo asapwilanga kala ne. Nanchi kino kibena kulumbulula’mba Yehoba walekele kumubila bibusa nyi? Ine. Paulo watwajijile kwingila papelela bulume bwanji kabiji Yehoba wamupesheshe bingi. (Byu. 28:30, 31) Kyo kimotu, bintu byo twakonsha kuba mu mwingilo wa Yehoba byakonsha kupimpulwa. Pano bino kintu kyanema kwi aye ke kintu kine kitulengela kumwingijila. w24.03 27 ¶7, 9

Baana ba bwanga ba kwa Yesu bafunjile kwi aye bya kulomba kwi Yehoba. Yesu walombanga javula inge ubena kusapwila. Wamonangapo kimye kya kulomba nangwa kya kuba wapayankene bingi kabiji bantu bavula kechi bamushilanga kanya ne. (Mako 6:31, 45, 46) Wabukile ku makya ne kuya kwa bunke na kulomba. Kimye kimo walombele bufuku bonse saka akyangye kufuukulapo kintu kyanema kyo akebelenga kuba. (Luka 6:12, 13) Kabiji Yesu walombele javula bingi bufuku bwapeleleko saka akyangye kufwa ne kuba kintu kyanema pano pa ntanda. (Mat. 26:39, 42, 44) Yesu byo aubanga bitufunjisha kuba’mba nangwa kya kuba tupayankana bingi, twafwainwa kwikalangapo na kimye kya kulomba. Byonkatu byaubanga Yesu ne atweba twafwainwa kwikalangapo na kimye kya kulomba. Kampe twakonsha kubuuka ku makya ne kulomba nangwa bufuku saka tukyangye kulaala. Inge twauba bino tumwesha lusanchilo kwi Yehoba pa buno bupe bwanema bo etupa. w23.05 3 ¶4-5

Akimonai kyambo kya kuba’mba “bebuyuzha” mu kinembelo kiji peulu po. Buku umo waamba pa bya mu Baibolo walumbulula’mba “buno butemwe buji nobe mema abena kukonkolokela pe atweba kufuma mu kakola.” Ino ndumbulwilo ya byambo yamwesha patoka kuba’mba Yehoba watemwa bingi bashingwa. Bashingwa nabo bayuka kuba’mba ‘Lesa wibatemwa.’ (Yuda 1) Mutumwa Yoano waambile pa bashingwa byo bomvwa ku muchima byo anembele amba: “Monai butemwe Tata bo etutemwa, pa kwitutela’mba baana ba Lesa!” (1 Yoa. 3:1) Pano nanchi Yehoba watemwatu bashingwa kwapwa nyi? Ine. Yehoba witutemwa atweba bonse. Ñanyi kintu kikatampe kimwesha’mba Yehoba witutemwa? Ke bukuzhi. Kabiji buno bukuzhi bumwesha butemwe bukatampe bo etumwesha kukila butemwe bwakonsha kwitumwesha muntu yense.​—Yoa. 3:16; Loma 5:8. w24.01 28 ¶9-10

Kyepelo kiji peulu po kyaamba pa jishinda jakwashishe Davida kuleka kumvwa moyo. Nangwa kya kuba bumi bwa kwa Davida bwajinga mu kizumba, walangulukile pa bintu Yehoba byo akonsheshe kumubila kulutwe. Davida wayukile’mba Yehoba ukamupulusha pa kimye kyafwainwa. Mambo Yehoba waambijile jimo kuba’mba Davida ye ukaswana pa bufumu mu Isalela. (1 Sam. 16:1, 13) Davida wamwenenga bintu byonse byamulayile Yehoba nobe byaubiwa ne kala. Ñanyi bintu Yehoba byo alaya’mba ukemubila? Yehoba kechi witulaya’mba uketuzhikijila ku makatazho onse ne. Nangwa byonkabyo, twafwainwa kuvulukanga’mba makatazho onse o twakonsha kupitamo mu ino ntanda ukeafumyapo mu ntanda ipya. (Isa. 25:7-9) Mulenga wetu uji na bulume bwa kusangula bafwa, kubuka bikola byetu ne kuzhiisha balwanyi betu bonse.​—1 Yoa. 4:4. w24.01 6 ¶12-13

Langulukainga pa ene mambo o mwipaine kwi Yehoba ne kubatizhiwa. Mwaubile bino, mambo mwakebelenga kwikala ku lubaji lwa Yehoba. Vulukai kimukwashishe kushiinwa’mba mwataana bukine. Mwamuyukile Yehoba ne kutendeka kumunemeka kabiji mwamutemenwe kuba’mba ye Shenu wa mwiulu. Kino kimulengejile kwitabila ne kulapila. Mwalekele kuba bintu byashikwa Yehoba ne kutendeka kuba bintu bimutokesha ku muchima. Mwaumvwine bingi bulongo pa kuyuka’mba Lesa wimulekelako mambo. (Sala. 32:2) Mwatendekele kupwila ne kwisamba na bakwenu bintu byawama byo mwafunjilenga. Byo mwipana ne kubatizhiwa kwikala mwina Kilishitu, mwatwajijila kwenda mu jishinda jiya ku bumi, kabiji muba bintu bimulengela kutwajijila kwenda monka. (Mat. 7:13, 14) Ikalai bashikimana, twajijilai kutemwa Yehoba ne kukookela mikambizho yanji. w23.07 17 ¶14; 19 ¶19

Kulanguluka pa lulombelo lwenu lwa kwipana kwi Yehoba, kukemulengela kushinda meseko onse. Nanchi mwakonsha kutendeka kusengula na muntu wabula mwina kwenu nyi? Ine, mambo mwamulayile kala Yehoba kuba’mba kechi mukoba kintu kya uno mutundu ne. Inge mwabula kuswisha ino milanguluko yatama mu muchima wenu, kechi kikemukatazha kwiisankilapo ne. Kabiji kechi mukaya mu jishinda “ja babi” ne. (Maana 4:14, 15) Yesu watookeshanga Shanji ku muchima. Onkao mambo, kulanguluka languluka pa byo aubile kukemulengela kukana bintu bifichisha Lesa ku muchima ye mwalayile kwingijila. (Mat. 4:10; Yoa. 8:29) Kishinka ke kya kuba’mba byo muba umvwe mwaesekwa, byo bikamwesha inge mukatwajijila ‘kulondela’ Yesu. Kabiji mwafwainwa kushiinwa’mba Yehoba ukemukwasha. w24.03 9-10 ¶8-10