October

Nanchi kimye kimo kimukatazha kukookela nyi? Mfumu Davida naye kyamukatazhanga kukookela. Walombele kwi Lesa amba: “Nkwashai ngikale na muchima wa kwimukookela.” (Sala. 51:12) Davida watemenwe Yehoba. Nangwa byonkabyo, kimye kimo kyamukatazhanga bingi kukookela byonkatu ne atweba byo kitukatazha. Mambo ka? Kitanshi, bumbulwa kulumbuluka bo twaswaine bwitulengela kukankalwa kukookela. Kya bubiji, Satana ukeba atweba kusatukila Yehoba byonkatu byo aubile. (2 Ko. 11:3) Kya busatu, twikala mu ntanda muji bantu baji na byubilo bya bunsatuki, ko kuba’mba “mupashi ubena kwingila mu bantu babula kukookela.” (Efi. 2:2) Onkao mambo, twafwainwa kwibikako bingi kuchinuzhuka kulengalenga mambo, kukaana Diabola ne bantu ba mu ino ntanda betukanjikizha kuba’mba tubulenga kukookela. Twafwainwa kwibikangako bingi kukookela Yehoba ne bo atongola kwitutangijila. w23.10 6 ¶1

Twakonsha kufunjilako ka ku kya kukumya kyaubile Yesu kya kwalula mema ke binyu? Tufunjilako kwipelula. Yesu kechi witotele pa kya kukumya kyo aubile ne. Kabiji kechi witotelepo pa bintu byonse byo aubile ne. Pakuba, wipelwile ne kupana lukumo lonse ne munema kwi Shanji. (Yoa. 5:19, 30; 8:28) Umvwe twatwajijila kwipelula byonka byajinga Yesu, kechi tuketotanga pa bintu byonse byo tuba ne. Twafwainwa kupananga lukumo kwi Lesa wetu ye twingijila. (Yele. 9:23, 24) Twafwainwa kumupa munema, mambo kafwako kintu kyawama kyo twakonsha kuba kwa kubula bukwasho bwa Yehoba ne. (1 Ko. 1:26-31) Inge twipelula, kechi tuketotanga pa bintu byawama byo tubila bakwetu ne. Tukatondwa mambo twayuka kuba’mba Yehoba umona byo tuba kabiji wibinemeka. (Esakanyaiko Mateo 6:2-4; Hebe. 13:16) Kwambatu kine, tusangajika Yehoba umvwe ketulondele Yesu ne kumwesha kwipelula.​—1 Pe. 5:6. w23.04 4 ¶9; 5 ¶11-12

Mutumwa Paulo bamutangijile ku mupashi wazhila kutundaika bena Kilishitu kuta muchima ku bintu bya bakwabo. Twakonsha kwingijisha byepi luno lutundaiko mu kimye kya kupwila? Twakonsha kuvulukanga’mba bakwetu nabo bakeba kukumbulapo byonkatu ne atweba byo tukeba. Akilangulukai pa kino. Umvwe mubena kwisamba na bakwenu, nanchi yenu mukeba kwambangatu bakwenu kwakubula kwambapo nyi? Ine. Mukeba bakwenu nabo saka bambapo pa kuba’mba balanguluke’mba mwibata muchima. Kyo kimotu ne pa kupwila, tukeba kupako bakwetu kimye kya kukumbulapo. Kwambatu kine, jishinda jawama kutundaikilamo balongo ne banyenga ke kwibapako kimye kya kukumbulapo pa kuba’mba balumbulule lwitabilo lwabo patoka. (1 Ko. 10:24) Twafwainwa kukumbulapo mu byambo bicheche pa kuba’mba bavula bakumbulepo. Nangwatu mu mukumbu wenu mwipi kechi mwafwainwa kwamba pa bishinka byavula ne. Umvwe mwaamba byonse biji mu jifuka mwakonsha kulengela bakwenu kubula bya kwambapo. w23.04 22-23 ¶11-13

Twafwainwa kuvulukanga’mba kyanema bingi kukwasha bakwetu kikatakata mu mwingilo wa kusapwila. Kechi twafwainwa kuminangatu pa kintu kimo mu mwingilo wa kusapwila ne. Bantu bo tusapwilako baji na milanguluko yapusana pe Lesa kabiji bafuma ku mapunzha apusana pusana ne bisho byapusana pusana. Mutumwa Paulo kechi waumijiletu pa kintu kimo ne, kabiji twafwainwa kufunjilako ku byo aubile. Yesu watongwele Paulo kwikala “mutumwa wa ku bisaka bya bantu.” (Loma 11:13) Onkao mambo, Paulo wasapwijilenga ku Bayudea, Bangiliki, bantu bafunjile, bamingilo ba mukafulumende ne ku bamfumu. Pa kuba’mba Paulo asapwile bantu bapusana pusana waalukile “bintu byonse ku bantu bonse.” (1 Ko. 9:19-22) Walangulukilenga pa kwafumine bantu bo aambanga nabo ne bintu byo baitabijilemo. Kino kyamulengejile kubula kuminatu pa kintu kimo ne kumulengela kwambanga bintu byafikilenga bantu pa muchima. Ne atweba twakonsha kuwamishako busapwishi bwetu inge kechi tubena kuminatu pa kintu kimo ne kabiji inge tubena kulanguluka pa jishinda jawama jo twafwainwa kukwashishamo bantu bo tubena kusapwilako pa muntu pa muntu. w23.07 23 ¶11-12

Bantu bakooka muchima batwajijila kuchinchika. Twafwainwa kutekanya inge tubena kupita mu makatazho. Kukooka muchima ke kyubilo kimo kiji pa “bipangwa bya mupashi.” (Nga. 5:22, 23) Kyambo kya Kingiliki kyatuntululwa’mba “kukooka muchima” kimye kimo kilumbulula mbili ye bafunjisha bulongo kukookela. Akilangulukai pa mbili wa mungye ye bafunjisha kukookela. Uno mbili utwajijila kwikala na bulume, bino na mambo a kumufunjisha ukookela. Bantu bakonsha kwikala byepi na bulume aku saka bakooka muchima? Kechi twakonsha kuba bino mu bulume bwetu ne. Twafwainwa kulomba kwi Lesa kuba’mba mupashi wanji etukwashenga kwikala na kino kyubilo kyawama bingi. Bantu bavula bafunda kukooka muchima. Balongo ne banyenga bavula bamwesha kino kyubilo inge bantu bebambila byatama nangwa kwibazhingijisha. Kino kilengela bantu kwamba byawama pa Bakamonyi ba kwa Yehoba.​—2 Timo. 2:24, 25. w23.09 15 ¶3

Mu kimwesho, mutumwa Yoano wamwene bakulumpe 24 mwiulu saka bapopwela Yehoba. Batotelenga Yehoba kabiji baambilenga’mba aye ye wafwainwa kutambula “lukumo ne buneme ne bulume.” (Lum. 4:10, 11) Bamalaika ba kishinka nabo baji na bishinka byavula bingi bibalengela kutota Yehoba. Bamuyuka bingi bulongo mambo bekala nanji mwiulu. Kabiji bayuka byubilo byanji mambo bebimona mu bintu byo oba. Kumona Yehoba byo oba kwibalengela kumutota. (Yoba 38:4-7) Ne atweba twafwainwa kutotanga Yehoba mu milombelo yetu. Twakonsha kuba bino inge ketumubuule byo twamutemwa ne ene mambo o tumunemekela. Umvwe mubena kutanga ne kufunda Baibolo, monai byubilo bya Yehoba byo mukeba kwikala nabyo. (Yoba 37:23; Loma 11:33) Kepo mwakonsha kubuula Yehoba byo mumona bino byubilo. Kabiji twakonsha kumutota mambo witukwasha kabiji ukwasha ne balongo ne banyenga yetu ntanda yonse.​—1 Sam. 2:1, 2. w23.05 3-4 ¶6-7

Mu 1919, bantu ba Lesa bafumine mu Babilona Mukatampe, ko kuba’mba bupopweshi bwa bubela bwa ntanda yonse. Mu yenkawa mwaka, “kalume wa kishinka kabiji wa maana” watendekele kukwasha bantu bajinga na michima ya bukishinka kutendeka kwenda mu “Mukwakwa Wazhila.” (Mat. 24:45-47; Isa. 35:8) Mwingilo waingijile banabalume ba kishinka ba kala, wakwashishe bantu kutendeka kwenda mu Mukwakwa wazhila kabiji bafunjile byavula pe Yehoba ne byo akeba kwitubila. (Maana 4:18) Bafwainwe kupimpula byubilo byabo ne kutendeka kuba kyaswa muchima wa Yehoba. Yehoba wayukile kuba’mba, pafwainwe kupita kimye pa kuba’mba bantu banji bapimpule byubilo byabo. Onkao mambo, wibatokeshenga pachepache. Atweba bonse tukekala bingi na lusekelo inge twatwajijila kutokesha Yehoba ku muchima mu bintu byonse byo tuba. Mukwakwa yense ukebewa kumuwamisha kimye kyonse pa kuba’mba bantu bendengamo bulongo. Kutendeka mu 1919, Mwingilo wa kuwamisha “Mukwakwa Wazhila” watwajijila, pa kuba’mba bantu bavula bafume mu Babilona Mukatampe. w23.05 17 ¶15; 19 ¶16

Jibumba Jitangijila jatwajijila kufunjisha bankwasho babo ba mu tuvoto twapusana pusana twa Jibumba Jitangijila. Bano bankwasho babena kwingila mu bukishinka mingilo yavula bingi mu jibumba ja Lesa. Bebafunjisha kutwajijila kwingila bulongo ino mingilo ya kukwasha mikooko ya kwa Kilishitu. Kimye bashingwa bashalapo kyo bakebasenda kuya mwiulu kwipi na mpelo ya malwa akatampe, bupopweshi bwa kine bukatwajijila pano pa ntanda. Bapopweshi ba Yehoba bakatwajijila kumwingijila mu bukishinka mambo Yesu Kilishitu ukatwajijila kwibatangijila. Twayuka kuba’mba pa kyokya kimye, baketulukuka ku Gogi wa Magogi, ko kuba’mba bisaka bya bantu bikakwatankana. (Ezi. 38:18-20) Nangwa byonkabyo, kuno kwitulukuka kechi kukengila ne, mambo kechi kukalengela bantu ba Lesa kuleka kupopwela Yehoba ne. Aye ukebapokolola! Mu kimwesho, mutumwa Yoano wamwene “jibumba jikatampe” ja mikooko ikwabo ya kwa Kilishitu. Yoano bamubuujile’mba jino “jibumba jikatampe” jo ‘jafuma mu malwa akatampe.’ (Lum. 7:9, 14) Twashiinwa kuba’mba kine Yehoba ukebapulusha. w24.02 5-6 ¶13-14

Ñanyi kintu kyo twafwainwa kuba pa kuba’mba twikale na mupashi wazhila? Twafwainwa kulomba pa kuba’mba twikale na uno mupashi wazhila, kufunda Mambo a Lesa ne kwikala mu jibumba ja Lesa. Kuba bino kuketulengela kwikala na “bipangwa bya mupashi.” (Nga. 5:22, 23) Lesa upanatu mupashi wanji ku bantu baji na milanguluko yawama ne byubilo byawama. Kechi ukatwajijila kwitupa mupashi wanji inge twaikala na milanguluko yatama ne byubilo byatama ne. (1 Tesa. 4:7, 8) Pa kuba’mba Lesa atwajijile kwitupa mupashi wazhila kechi twafwainwa “kulengululanga bungauzhi ne.” (1 Tesa. 5:20) Pa kino kyepelo “bungauzhi” bubena kulumbulula byambo Yehoba byo etupa kwingijisha mupashi wanji wazhila, kubikapo ne byambo byaamba pa juba ja Yehoba ne kimye kyo tubena kwikalamo. Kechi tulanguluka’mba juba ja Yehoba, ko kuba’mba Amagedonyi kechi ikeya mu moba etu ne. Pakuba tutengela kwiya kwa juba ja Yehoba inge twatwajijila kwikala na byubilo byawama ne kwingila “mingilo ya kunemeka Lesa.”​—2 Pe. 3:11, 12. w23.06 12 ¶13-14

Atweba bena Kilishitu twafwainwa kuba byepi inge pa kiñambañamba kyetu paiya kipikichala kya mulekese? Ponkapotu twafwainwa kufumyako meso. Kyakonsha kwitupeelela kuba bino inge ke tuvuluke’mba bulunda bwetu ne Yehoba kyo kintu kyanemesha mu bwikalo bwetu. Nangwatu bipikichala bimo byabula bya mulekese byakonsha kwitulengela kutatula kwikala na milanguluko ya kukeba kuba bulalelale. Mambo ka o twafwainwa kuchinuzhukila kutamba bipikichala bya uno mutundu? Mambo kechi tukeba kuba bulalelale nangwatu mu muchima wetu ne. (Mat. 5:28, 29) Mukulumpe mu kipwilo aye David wa ku Thailand waambile’mba: “Neipuzha amiwa mwine’mba: ‘Nanchi mbena kutookesha Yehoba ku muchima inge ntwajijile kutala pa bino bipikichala nangwa kya kuba kechi paji bya mulekese nenyi?’ Ndangulukilo ya uno mutundu inkwasha kufuukula bulongo.” Kuchiina kufichisha Yehoba ku muchima kwakonsha kwitulengela kufuukula bulongo. Kwakamwa Lesa “yo ntendekelo ya maana.” w23.06 23 ¶12-13

‘Mazubo a mukachi’ kyamweka abena kwimenako bipwilo byetu. Yehoba witulaya’mba uketuzhikijila mu kimye kya malwa akatampe inge twatwajijila kukwatankana na balongo ne banyenga yetu. Onkao mambo, twafwainwa kwingila na ngovu kutemwa balongo ne banyenga luno mambo kupuluka kwetu po po kukemena. “Juba jikatampe ja Yehoba” jikaleta malwa pa bantu bonse. (Zefwa. 1:14, 15) Bantu ba Yehoba nabo bakamanama. Bino umvwe twinengezhezha jimo lonka luno kechi tukalukusha muchima ne, pakuba tukatekanya ne kukwasha bakwetu. Tukachinchika makatazho onse o tukapitamo. Umvwe bakwetu ba mu lwitabilo bamanama tukepaana kwibakwasha, kwibamwesha kifyele ne kwibapa byonse byo bakakajilwa. Kabiji inge twafunda kutemwa balongo ne banyenga luno, kiketupeelela bingi kwibatemwa mu kimye kya kulutwe. Kepo Yehoba aketupa bumi bwa myaka ne myaka mu ntanda mo tukabula kuvuluka bya malwa ne lumanamo lonse.—Isa. 65:17. w23.07 7 ¶16-17

Mambo a Lesa javula amba pa banabalume bajinga na lwitabilo lwakosa. Nangwa kya kuba bano banabalume bamo bajinga na lwitabilo lwakosa, pa bimye bimo balangulukanga’mba lwitabilo lwabo kechi lwakosa ne. Pa bimye bimo Davida walangulukanga’mba lwitabilo lwanji ‘lwakoseletu nobe mutumba,’ pano bino pa bimye bikwabo ‘waubile moyo.’ (Sala. 30:7) Nangwa kya kuba mupashi wa Lesa walengejile Samisonyi kwikala bingi na bulume, bino wayukile’mba kwa kubula bulume bufuma kwi Lesa, wakonsha “kukooka ne kwikalatu byonka biji bantu bonse.” (Mito. 14:5, 6; 16:17) Yehoba ye wapanga bulume bano banabalume ba kishinka. Mutumwa Paulo naye wayukile’mba wakebelenga bulume kufuma kwi Yehoba. (2 Ko. 12:9, 10.) Wakolwa kolwanga. (Nga. 4:13, 14) Kabiji pa bimye bimo kyamukatazhanga bingi kuba bintu byaoloka. (Loma 7:18, 19) Waikalanga ne na bijikila pa bintu byakonsha kumumwekela. (2 Ko. 1:8, 9) Pano bino, Paulo byo aumvwanga kukooka, waikalanga na bulume. Mu ñanyi jishinda? Yehoba wapanga Paulo bulume inge wakooka. Buno bulume bwamukwashanga kuchinchika makatazho. w23.10 12 ¶1-2

Inge kya kuba pa bimye bimo ketulanguluke’mba kechi twanema ne, twafwainwa kuvulukanga’mba Yehoba ye witukookejile kwi aye. (Yoa. 6:44) Yehoba umona byawama mwi atweba byo twakonsha kubula kumona ne atweba bene. Kabiji wayuka biji mu muchima wetu. (2 Moba 6:30) Onkao mambo, inge twayuka’mba Yehoba witunemeka, tukamuketekela bingi. (1 Yoa. 3:19, 20) Saka tukyangye kufunda bukine, atweba bamo twaubilepo bintu byatama byakonsha kwitulengela kwizhachisha. (1 Pe. 4:3) Nangwatu bena Kilishitu baingijila Yehoba pa myaka yavula mu bukishinka, nabo balubankanya. Nanchi ne anweba mwizhachisha nyi? Inge ibyo, yukai’mba bantu ba Yehoba ba kishinka nabo byo byo bomvwa. Bino byo byo kyajinga ne kwi mutumwa Paulo. Waumvwanga kutama ku muchima byo alangulukanga pa bintu byo alubankanyanga. (Loma 7:24) Nangwa byonkabyo, Paulo walapijile ne kubatizhiwa. Pano bino waambile pe aye mwine amba ne “mucheche pa batumwa” bonse kabiji ndengamambo “wakilamo.”​—1 Ko. 15:9; 1 Timo. 1:15. w24.03 27 ¶5-6

Kintu kimo kyo tubena kufunjilako ku kufuukulapo kutama kwa Mfumu Yehoashi ke kya kuba’mba twafwainwa kusala balunda batemwa Yehoba kabiji bakebesha kuba bintu bimutookesha ku muchima. Kwikala na balunda baji bino, kuketukwasha kubanga bintu byawama. Balunda netu bafwainwa kwikala bakulumpe nangwa banyike pe atweba. Vulukai kuba’mba Yehoashi wajinga mwanyike, bino wajinga mulunda ne Yehoyada wamukijileko myaka. Pa balunda bo musala, iipuzhainga’mba: ‘Nanchi balunda nami bankwasha kukosesha lwitabilo lwami mwi Yehoba nyi? Abya bakookela Lesa ne kuntundaika kumukookela nyi? Nanchi bamba pe Yehoba ne bintu byo bafunda mu Baibolo nyi? Abya bakookela mizhilo ya Lesa nyi? Nanchi banjimunako inge natamisha nyi?’ (Maana 27:5, 6, 17) Onkao mambo, kechi mwafwainwa kwikala na balunda babula kutemwa Yehoba ne. Inge balunda nenu batemwa Yehoba, bakemutundaikanga kuba bintu byawama kimye kyonse.​—Maana 13:20. w23.09 9-10 ¶6-7

Alefwa kyo kisopelo kitanshi mu bisopelo byonse bya Kingiliki ne omeka kyo kisopelo kyapelako. Yehoba byo elumbulwile mwine amba “yami Alefwa ne Omeka,” walumbulwilenga’mba inge watendeka kuba kintu kanatu wikipwisha. Yehoba byo alengele Adama ne Evwa wibambijile’mba: “Semainga ne kusemununa, muyuzhe ntanda ne kwiijima.” (Nte. 1:28) Byo aambile bino byambo byaamba pa kyaswa muchima wanji, kyajingatu nobe Yehoba waambilenga’mba yami “Alefwa.” Bino byambo bikafika kimye baana balumbuluka ba kwa Adama ne Evwa kyo bakayuzha ntanda ne kwiyalula ke paladisa. Pa kyokya kimye Yehoba po po akamba’mba yami “Omeka.” Yehoba byo apwishishe kulenga “jiulu ne ntanda ne byonse bijimo,” byo aambile byamwesheshe’mba ukafikizha kyaswa muchima wanji. Yehoba ukoba byo akebelenga kuba ku bantu ne ntanda ku mpelo ya juba ja butanu na bubiji.​—Nte. 2:1-3. w23.11 5 ¶13-14

Museke wa kufuma ku Babilona kuya ku Isalela wajinga wa kwendapo bañondo bana. Nangwa kya kuba luno lwendo kechi lwapeelele ne, Yehoba wibalayile kuba’mba ukafumyapo mikiika yonse yafwainwe kwibalengela kubula kubwela kwabo. Bayudea ba kishinka bayukile kuba’mba bafwainwe kumwenamo bintu byavula inge basha mazubo nangwa busulu bwabo ne kubwela ku Isalela. Kintu kyanema kyavwangilemo mpopwelo yabo. Kechi mwajinga nzubo ya Yehoba mu Babilona ne. Kechi mwajinga kya kusokelapo bitapisho bena Isalela kyo bakonsheshe kwingijisha kupainapo bitapisho monka mwayijile Mizhilo ya Mosesa ne. Kabiji kechi kwajinga jibumba ja bañanga jafwainwe kupana ino milambo ne. Kabiji bantu bapopwelanga balesa ba bubela mu uno muzhi bavujile kukila banemekele Yehoba nangwa mizhilo yanji. Onkao mambo, Bayudea bavula batemenwe bingi Yehoba bakebeshe bingi kubwela kwabo na mulanguluko wa kukeba kubwezha mpopwelo ya kine. w23.05 14-15 ¶3-4

Twafwainwa kulomba mupashi wazhila wa Lesa pa kuba’mba etukwashe kutwajijila kuba bintu bimwesha’mba twi “baana ba kyeya.” Mambo ka? Mambo kyakatazha bingi kutwajijila kwikala batooka mu ino ntanda muji byubilo byatama. (1 Tesa. 4:3-5, 7, 8) Mupashi wazhila wakonsha kwitukwasha kukana ndangulukilo ya bantu ba mu ino ntanda babula kumwena bintu monka mwibimwena Yehoba. Kabiji mupashi wa Lesa witukwasha kwikala na “buwame bonse [ne] bololoke.” (Efi. 5:9) Jishinda jimo Lesa jo akonsha kwitupeelamo mupashi wanji wazhila ke kumulomba. Yesu waambile’mba Yehoba ‘upana mupashi wazhila ku boba bamulomba.’ (Luka 11:13) Kabiji Yehoba witupa mupashi wanji wazhila inge twapwila pamo na kumutota. (Efi. 5:19, 20.) Mupashi wazhila uketukwasha kwikalanga bwikalo butookesha Lesa ku muchima. w24.03 23-24 ¶13-15

Nanchi mukeba kwikala batekanya nyi? Inge ibyo, lombainga pa kuba’mba mutwajijile kutekanya. Kutekanya ke kipangwa kya mupashi. (Nga. 5:22, 23) Onkao mambo, lombai kwi Yehoba kuba’mba emupe mupashi wazhila ne kwimukwasha kwikala na kino kipangwa. Umvwe ketupite mu meseko ‘tulombenga’ kwi Lesa kwitupa mupashi wazhila uketulengela kutekanya. (Luka 11:13) Kabiji twafwainwa kulombanga kwi Yehoba kuba’mba etukwashe kumonanga bintu monka mo ebimwena. Umvwe twalomba twafwainwa kwibikako bingi kwikala batekanya pa juba pa juba. Umvwe ke tulombe kwi Yehoba kuba’mba etukwashe kutekanya ne kwitulengela kumweshanga kino kyubilo, uketukwasha kwikala batekanya nangwa kya kuba kala kechi twajinga na kino kyubilo ne. Kwitukwasha ne kulanguluka pa bantu banembwa mu Baibolo bamwesheshe butekanye. Mu Baibolo mwanembwa bantu bavula bingi bamwesheshe butekanye. Umvwe ke tulanguluke languluke pa mashimikila a bantu bamwesheshe butekanye, tukafunda kutekanya. w23.08 22 ¶10-11

Yesu wabuujile mutumwa Petelo amba Yehoba ukamukwasha mu byonse. Yesu byo bamusangwile wakwashishe Petelo ne batumwa bakwabo kukwata masabi jibiji mu jishinda ja kukumya. (Yoa. 21:4-6) Akino kya kukumya kyalengejile Petelo kushiinwa’mba kinetu Yehoba ukamumwena bintu byonse bya ku mubiji byo akakajilwa. Kampe uno mutumwa wavulukile byambo byaambile Yesu amba Yehoba ukwasha bonsetu batwajijila na “kukeba Bufumu patanshi.” (Mat. 6:33) Abino byonse byatundaikile Petelo kutangizhako mwingilo wa kusapwila mu bwikalo bwanji, kechi mwingilo wa kukwata masabi ne. Wasapwijile na kuchinchika pa juba ja Pentekosita 33 C.E., kabiji wakwashishe bantu bavula kuswa mambo awama. (Byu. 2:14, 37-41) Wakwashishe bena Samaliya ne bantu ba mu bisaka bikwabo kwitabila mwi Yesu ne kumulondelanga. (Byu. 8:14-17; 10:44-48) Kine, Yehoba waingijishe Petelo kukwasha bantu bapusana pusana kwiya mu kipwilo. w23.09 20 ¶1; 23 ¶11

Byo papichile kampe myaka ibiji kufuma kimye bena Babilona kyo baonawine Yelusalema. Mfumu wa Babilona aye Nebukaneza walotele kiloto kya lukipashañano mukatampe kyamulengejile bingi moyo. Wakambizhe bonse babuulañana maana ne Danyela amba bamubuule kiloto kyanji ne kumulumbulwila mo kyatajile ne kwibambila’mba inge bakankalwa usakwibepaya. (Da. 2:3-5) Danyela wafwainwe kubapo kimo bukiji. Inge kechi waubile bino ne, bantu bavula inge bafwile. “Wayile kwi mfumu na kumusashijila kuba’mba amuswishe kumulumbulwila mwatala kiloto kyanji.” (Da. 2:16) Kino kyamwesheshe’mba Danyela wachinchikile bingi kabiji wajinga na lwitabilo lwakosa. Mu ñanyi jishinda? Baibolo kechi waambapo’mba Danyela wakilumbulwilepo biloto kala ne. Waambijile bakwabo “amba balombe kwi Lesa wa mwiulu kuba’mba ebobile bibusa ne kwibasolwela kino kyafyamika.” (Da. 2:18) Yehoba wakumbwile milombelo yabo. Wakwashishe Danyela kulumbulula mwatajile kiloto kyalotele Nebukaneza. Onkao mambo, kino kyalengejile Danyela ne bakwabo kubula kwibepaya. w23.08 3 ¶4

Langulukai pa byo mwafwainwa kumwenamo mu kutekanya. Inge twatekanya, tukasangalala ne kubula bijikila. Onkao mambo, kutekanya kuketulengela kulanguluka bulongo ne kwikala na butuntulu bwa mubiji bwawama. Umvwe twatekenya bakwetu bulunda bwetu ne abo bukakosa. Kabiji kipwilo kyetu kikakwatankana. Inge muntu umo wituzhingijisha tukabandanga kuzhingila kabiji tukalengela lukatazho kubula kubaya. (Sala. 37:8, tubyambo twa munshi; Maana 14:29) Kyakila pa byonse, tukekala biji Shetu wa mwiulu kabiji tukafwenya kwipi ne aye. Kutekanya ke kyubilo kyawama bingi kitusangajika atweba bonse. Kya kine kuba’mba kechi kitupelela kwikala batekanya kimye kyonse ne, bino Yehoba uketukwasha kutwajijila kwikala na kino kyubilo. Byo twatekanya ne kutengela ntanda ipya, twashiinwa kuba’mba “meso a Yehoba atalatala pa boba bamwakamwa, aba batengela butemwe bwanji bubula kwaluka.” (Sala. 33:18) Twayai tutwajijile kwikala batekanya. w23.08 22 ¶7; 25 ¶16-17

Yakoba walumbulwile’mba muntu wa uno mutundu wakonsha kwamba’mba uji na lwitabilo, pano bino byubilo byanji bimwesha’mba kechi uji na lwitabilo ne. (Yako. 2:1-5, 9) Yakoba waambile pa muntu wamwene ‘mulongo nangwa nyenga wabula bivwalo nangwa kajo,’ pano bino kechi wamukwashishe ne. Nangwa kya kuba uno muntu wakonsha kwamba’mba uji na lwitabilo, pano bino byubilo byanji bibena kumwesha’mba lwitabilo lwanji lo lwatutu. (Yako. 2:14-16) Yakoba waambile’mba Lehaba waubile bintu byawama byamwesheshe’mba wajinga na lwitabilo. (Yako. 2:25, 26) Waumvwine nkuwa ya bintu byaubilenga Yehoba kabiji wayukile’mba Yehoba wakwashishenga bena Isalela. (Yosh. 2:9-11) Byo aubile byamwesheshenga’mba uji na lwitabilo mambo wazhikijile bamwendela ntanda babiji bena Isalela kuchiina’mba bakebepaya. Onkao mambo, uno mwanamukazhi mbulwakulumbuluka wabujile mwina Isalela bamutelele’mba waoloka byonkatu byo batelele ne Abalahama. Tubena kufunjilako kwi Lehaba kuba’mba twafwainwa kuba bintu byawama pa kuba’mba tumweshe’mba tuji na lwitabilo. w23.12 5-6 ¶12-13

Atweba bena Kilishitu kechi twafwainwa kuyukatu mafunjisho atanshi a mu Baibolo ne. Twafwainwa kufunda “ne bintu byazhika bya Lesa” kabiji mupashi wazhila wakonsha kwitukwasha. (1 Ko. 2:9, 10) Mwakonsha kukebakeba bishinka pa kufunda Baibolo pa bunke byakonsha kwimukwasha kufwenya kwipi ne Yehoba, nangwa kukebakeba bishinka pa byo atemenwe bapopweshi banji ba kala ne bino byo bimwesha’mba ne anweba wimutemwa. Kabiji mwakonsha kukebakeba bishinka byaamba pe Yehoba byo akebelenga bena Isalela kumupopwelanga ne kwibyesakanya ku byo akeba’mba ne atweba tumupopwelenga mu ano moba. Nangwa kampe mwakonsha kukebakeba bishinka byaamba pa bungauzhi bwafikizhe Yesu mu bwikalo bwanji ne byo aingijilenga mwingilo wa kusapwila pano pa ntanda. Buku wa Kukwasha Bakamonyi ba kwa Yehoba Kukebakeba Bishinka ukemukwasha bingi kukwatakanya bino bintu byo mukafundanga. Kukwatakanya bino bintu bya mu Baibolo kukakosesha bingi lwitabilo lwenu kabiji ‘mukamuyuka Lesa.​—Maana 2:4, 5. w23.10 18-19 ¶3-5

Kyambo kyaingijisha mutumwa Petelo kilumbulula kutandubula. Byambo byalondelapo mu kino kyepelo byalumbulula byo twakonsha kuba inge twatemwisha bakwetu. Kutemwisha bakwetu kwitulengela kuvweta pa mambo a balongo ne banyenga yetu. Fwanyikizhai kuba’mba pa tebulu wenu paji byasombela. Kyapeela kutola kisapi ne kwikitandubwila pa tebulu pa kuba’mba kivwete ponse pasombela. Po pamotu, inge twatemwisha balongo ne banyenga yetu, twakonsha kuvweta nangwa’mba kwibalekelako mambo onse o betulenga. Kutemwa bakwetu kwafwainwa kwitulengelanga kulekelako mambo bakwetu bena Kilishitu bambulwa kulumbuluka nangwatu inge kyakatazha kuba bino. (Kolo. 3:13) Inge ketulekeleko bakwetu mambo, tumwesha’mba twibatemwa bingi kabiji kino kitookesha bingi Yehoba ku muchima. w23.11 11-12 ¶13-15

Mfumu Yosiya byo afikizhe myaka 26, watendekele kuwamisha nzubo ya Lesa. Byo baingijilenga uno mwingilo, bataaine “buku wa Mizhilo ya Yehoba yo apaine kupichila mwi Mosesa.” Mfumu byo aumvwine byanembelwemo, ponkapotu wakookejile ne kupimpula byubilo byanji. (2 Moba 34:14, 19-21) Nanchi mukeba kutendeka kutanga Baibolo pa juba pa juba nyi? Kampe mwatatulako kala kutanga Baibolo pa juba pa juba. Nanchi mubena kumwenamo bintu byawama nyi? Abya munembapo byepelo bimo byafwainwa kwimukwasha nyi? Yosiya byo afikizhe myaka 39, waubile kintu kyatama kyamwipayishe. Wiketekejile mwine kwa kubula kubuula Yehoba kumukwasha. (2 Moba 35:20-25) Umvwai byo tubena kufunjilako: Nangwa kya kuba twakoma nangwa twafunda Baibolo pa myaka yavula, twafwainwa kutwajijila kukeba Yehoba. Ko kuba’mba twafwainwa kulombanga kimye kyonse kwi Yehoba kwitupa maana, kufunda Mambo Anji ne kukookelanga bitubuula bakwetu bena Kilishitu. Inge twalondela bino byonse, kechi tukalenganga mambo akatampe ne, kabiji tukekala na lusekelo.​—Yako. 1:25. w23.09 12 ¶15-16

Baibolo waamba pa banabakazhi bavula bajinga na byubilo byawama kabiji batemenwe Yehoba ne kumwingijila. Bajinga “belama bulongo” kabiji “ba kishinka mu bintu byonse.” (1 Timo. 3:11) Ne lelo jino, banyenga bakonsha kutaana banabakazhi ba uno mutundu bo bakonsha kulondela mu bipwilo mo baji. Anweba banyenga banyike, nanchi mwayukapo banabakazhi bena Kilishitu baji na bulunda bwakosa ne Yehoba bo mwakonsha kulondela nyi? Yukai byubilo byawama byo baji nabyo. Kabiji langulukai pa byo mwakonsha kwikala na bino byubilo ne anweba. Pa kuba’mba mwina Kilishitu engilenga bulongo wafwainwa kwipelula. Umvwe mwanamukazhi wipelula, ukekala na bulunda bwawama ne Yehoba ne na bakwabo. Nabiji mwanamukazhi watemwa Yehoba wipelula ne kulondela jifunde jaamba pa bumutwe bwabikako Yehoba. (1 Ko. 11:3) Jino jifunde jingila mu kipwilo ne mu kisemi. w23.12 18-19 ¶3-5

Yehoba ukeba mwanamulume kutemwa mukazhanji, kumukebela bintu bikebewa mu bwikalo, kwikala mulunda nanji wawama ne kumukwasha kukosesha bulunda bwanji ne Yehoba. Kwikala na maana a kupima bintu bulongo, kunemeka banabakazhi ne kwikala waketekelwa, kukemukwasha kwikala mwanamulume ulama kisemi kyanji bulongo. Inge mwasongola, mwakonsha kwikala na baana. Ñanyi bintu byo mwafwainwa kufunjilako kwi Yehoba pa kuba’mba mwikale nsemi wawama? (Efi. 6:4) Yehoba wabuujile Mwananji aye Yesu kuba’mba wamutemwa bingi kabiji amba mo amwena lusekelo. (Mat. 3:17) Umvwe mwaikala na baana, mwafwainwa kwibabuulanga kimye kyonse kuba’mba mwibatemwa bingi. Basanchilainga pa bintu byawama byonse byo boba. Bashetu baji na byubilo bijipo ne Yehoba bakwasha baana babo kwikala banabalume ne banabakazhi bena Kilishitu batemwa Yehoba. Mwakonsha kwinengezhezha jimo kukekala nsemi wawama inge ke mumweshe’mba mwata muchima ba mu kisemi kyenu, balongo ne banyenga mu kipwilo ne kwibabuulanga’mba mwibatemwa kabiji mwibata muchima.​—Yoa. 15:9. w23.12 28-29 ¶17-18

Ne atweba nangwa kya kuba twi bantu ba Yehoba ba kishinka, tupita mu makatazho ne kukolwa byonkatu byo kikala ku bantu bonse. Kabiji twafwainwa kuchinchika inge kebetukanye nangwa kwitumanyika ku bantu bashikwa bantu ba Lesa. Nangwa kya kuba Yehoba kechi wituzhikijila ku bino byatama byo tupitamo ne, bino witulaya’mba uketukwashanga. (Isa. 41:10) Na mambo a kuba’mba witukwasha, twafwainwa kwikala na lusekelo, kufuukula bintu bulongo ne kutwajijila kwikala ba kishinka kwi aye nangwa kya kuba makatazho abayepotu byepi. Kwesakana na byaamba Baibolo, Yehoba witulaya kwitupa “mutende [wanji].” (Fili. 4:6, 7) Uno mutende ulumbulula byo tumvwa inge milanguluko ne muchima wetu bya kasuluka na mambo a kwikala na bulunda bwakosa ne aye. Uno mutende “wakila milanguluko ya bantu,” ko kuba’mba ke mutende wawama witukwasha bingi. Bavula bakilombapo kwi Yehoba kufuma panshi ya muchima kabiji byo bapwishishe kulomba bakasulukile bingi ku muchima ne mu milanguluko. Abya ne anweba mwakyumvwapo kala bino nyi? Inge ibyo, ko kuba’mba “mutende wa Lesa” ye wimulengejile kumvwa bino. w24.01 20 ¶2; 21 ¶4

Kutemwa Lesa kulengela bantu ba kishinka kutota jizhina janji na muchima yense. Mfumu Davida wayukile’mba kutota jizhina ja Yehoba kulumbulula kutota Yehoba aye mwine. Jizhina ja Yehoba javwangamo kumuyuka byo aji, byubilo byanji byawama ne byo oba na bantu. Davida wazhijikanga jizhina ja Shanji aye Yehoba ne kwijitota. Wakebanga kwijizhijika na “bintu byonse bya mukachi” kanji, ko kuba’mba na muchima wanji yense. Bena Levi nabo batotanga jizhina ja Yehoba. Bayukishetu bulongo kuba’mba jizhina ja Yehoba jazhila ne kutumbalala bingi kukila byambo byabo byonse bya lutotelo. (Ne. 9:5.) Kwipelula ne kutota Lesa mu jino jishinda kwatokeshanga bingi Yehoba ku muchima. w24.02 9 ¶6

Yehoba kechi ukamona’mba mwakankalwa inge mwabula kufikizha kikonkwanyi kyakila pa bulume bwenu ne. (2 Ko. 8:12) Funjilaiko ku bintu bimulengejile kubula kufikizha bikonkwanyi byenu. Vulukainga mingilo yo mwaingila. Baibolo waamba’mba “Lesa waoloka kabiji kechi wakonsha kuvulama mingilo yenu ne.” (Hebe. 6:10) Onkao mambo, ne anweba kechi mwafwainwa kulubamo mingilo yo mwaingila ne. Langulukainga pa bintu byo mwauba, nabiji kwikala balunda ne Yehoba, kubuulako bantu pe aye, nangwa kubatizhiwa. Byonkatu byo mwibikileko kufikizha bikonkwanyi bya mu mwingilo wa Lesa kunyuma, twajijilai kwingila na ngovu pa kuba’mba mufikizhe ne kikonkwanyi kyo mwibikila luno. Na bukwasho bwa Yehoba, mwakonsha kufikizha kikonkwanyi kyenu. Byo mubena kwibikako kwingila mingilo yakonsha kwimulengela kufikizha kikonkwanyi kyenu, langulukainga pe Yehoba byo abena kwimukwasha, ne kuba’mba ukemukwasha kwikala na lusekelo byo mubena kwibikako kufikizha bikonkwanyi byenu. (2 Ko. 4:7) Inge mwabula kubwela panyuma, mukatambula mapesho avula kulutwe.​—Nga. 6:9. w23.05 31 ¶16-18

Yehoba umonapo mashinda a kumwesheshamo’mba watemwa bantu banji kabiji usekela mwi abo. Binembelo byaamba pa bimye bibiji Yehoba po aambijile Yesu kuba’mba wamutemwa kabiji amba usekela mwi aye. (Mat. 3:17; 17:5) Nanchi ne anweba mukeba Yehoba kwimwambila’mba usekela mwi anweba nyi? Yehoba kechi wamba ne atweba kufuma mwiulu ne, pakuba wamba ne atweba kwingijisha Baibolo. Twakonsha “kumvwa” jiwi ja Yehoba ja kuba’mba usekela mwi atweba inge ke tutange byambo bya kwa Yesu byanembwa mu mabuku ana a Mambo Awama. Yesu wamwesheshetu suka suka byubilo bya Shanji. Onkao mambo, inge ke tutange kuba’mba Yesu wasekejile mu baana banji ba bwanga nangwa kya kuba bajinga bambulwakulumbuluka, twakonsha kufwanyikizha Yehoba saka abena kwamba bino byambo bya kwa Yesu kwi atweba. (Yoa. 15:9, 15) Inge tubena kupita mu bya malwa, kino kechi kilumbulula’mba twaleka kwitabilwa kwi Lesa ne. Pakuba bitulengela kumwesha byo twatemwa Yehoba ne byo twamuketekela.​—Yako. 1:12. w24.03 28 ¶10-11