Kubijika Kwiikajila

KU MPELO ya kupwila kubiwa pa mwaka pa mwaka kwa ba mu kije kya Watch Tower Bible and Tract Society of Pennsylvania kwajingako pa October 7, 2000, kwajinga kubijika kwiikajila kwabijikiwe na cheyamani John E. Barr wa mu Jibumba Jitangijila. Kuno kubijika kwaubiwe pa nyuma ya majashi aambiwe na Theodore Jaraz ne Daniel Sydlik pa jonka jino juba.—Monai mapeja 16-17 ne 29-32 a uno magazini.

Mulongo Barr waambile kishinka kya kuba’mba: “Kalume wa kishinka ne wa maana ne Jibumba janji Jitangijila wapewa kulama bintu bya buneme byavula kukila byapanyiwa ku bije byaswishiwa na muzhilo. Byalumbululwa mu mizhilo ya bino bije ke bichechetu. Bino Nkambo yetu Yesu Kilishitu wapa jibumba ja kalume wa maana ‘bintu,’ nangwa’mba byonse bya Bufumu pano pa ntanda.”—Mateo 24:45-47.

Pa mambo a kije kya Pennsylvania, mulongo Barr wanungilepo’mba: “Kutendekatu mu 1884 kimye kyalengelwe kino kije kya Watch Tower Bible and Tract Society of Pennsylvania, kyaingila mwingilo mukatampe bingi mu ano moba etu. Bino nangwa kiji byonkabyo, ke kijetu kibena kwingijishiwa na ‘kalume wa kishinka ne wa maana’ pa kimye kyafwainwa.”

Mu majashi abo, Mulongo Sydlic ne Jaracz balumbulwile’mba, nangwa kyakuba ‘kalume wa kishinka ne wa maana’ wapewa bintu byonse bya Nkambo pano pa ntanda, kino kechi kimukanya kuswisha banabalume bafikapo ba mu ‘mikooko ikwabo’ kuba’mba bapewepo mingilo imo ya bukulumpe ne. (Yoano 10:16) Kabiji kafwako kishinka kya mu Binembelo kya kukoselapotu amba kanatu bena Kilishitu bashingwa bo bafwainwa kwikala bantangi ba bije byonse byaswishiwa na muzhilo bingijisha Bakamonyi ba kwa Yehoba ne.

Mulongo Barr wabujile luonde amba ku nyuma kwe, bamo ba mu Jibumba Jitangijila ja Bakamonyi ba kwa Yehoba befuukwijile bene kuleka kwikala bantangi ne babilolo ba mu mabumba a bantangi onse a bije byaswishiwa na muzhilo bingijisha ‘kalume wa kishinka ne wa maana’ mu United States. Balongo bamo bafikapo ba mu mikooko ikwabo batongwelwe ne kupingakena pa bino bifulo.

Uno mulanguluko wawama bingi. Ulengela ba mu Jibumba Jitangijila kwikala na kimye kyawana kya kukokozha kajo ka ku mupashi ne kumona pa kukajilwa kwa ku mupashi kwa balongo mwaya ntanda yonse.

Pa kupezhako cheyamani wabujile luonde amba: “Nangwa kyakuba mingilo yapusana-pusana ya mizhilo yapanyiwa ku bakulumpe bafikapo, . . . bonse batangijilwa na buntangi bwa ku mupashi mu kwingijila pamo na Jibumba Jitangijila. . . . Atweba bonse na lulombelo tutala kwi Yehoba kupesha ngovu yetu mu kuba kyaswa muchima wanji pa kuba’mba jizhina janji jikatampe jishingikwe ne kutumbijikwa.”